அரியலூர்

செந்துறை:

பள்ளி விடுதியில் தற்கொலை செய்த அரியலூர் மாணவி லாவண்யா சொந்த ஊரான அரியலூர் மாவட்டம் திருமானூர் அருகே உள்ள வடுகபாளையம் கிராமத்தில் பாரதிய ஜனதா கட்சியின் மாநில தலைவர் அண்ணாமலை, பா.ஜ.க. தேசிய மாநில மகளிரணி தலைவர் வானதி சீனிவாசன், பா.ஜ.க. தேசிய செயற்குழு உறுப்பினர் சி.பி.ராதாகிருஷ்ணன் ஆகியோர் மாணவி லாவண்யாவின் படத்திற்கு மலர் தூவி அஞ்சலி செலுத்தினர்.

பின்னர் மாணவியின் பெற்றோரை சந்தித்து ஆறுதல் தெரிவித்தனர். மேலும் மாணவியின் பெற்றோருக்கு ரூ.10 லட்சம் நிதி உதவி வழங்கினர்.

பின்னர் அண்ணாமலை நிருபர்களிடம் கூறியதாவது:-

அனிதாவிற்கு ஒரு நியாயம், லாவண்யாவிற்கு ஒரு நியாயமா? மாணவியின் தற்கொலைக்கு நீதி கிடைக்கும் வரை பா.ஜ.க போராடும். பா.ஜ.க குழு நாளை மறுநாள் அரியலூர் வர உள்ளது. மாணவியின் குடும்பத்திற்கு உண்மையான நீதி கிடைக்க வேண்டும். இந்த போராட்டம் எந்த மதத்திற்கும் எதிரான போராட்டம் இல்லை. சகோதரி லாவண்யாவிற்கு நீதி கேட்டு போராட்டம். இதில் மனிதர்கள் தவறு செய்துள்ளனர். சி.பி.ஐ. விசாரணை நடத்த வேண்டும் என தொடர்ந்து வலியுறுத்தி வருகிறோம்.

மாணவி வீடியோவை அடிப்படையாக வைத்து பாரதிய ஜனதா கட்சி தன்னுடைய குரலை கொடுத்து வருகிறது. வாக்குமூலத்தை அடிப்படையாக வைத்து பா.ஜ.க. போராடுகிறது.

ஆட்சியாளர்கள், பொறுப்பில் இருப்பவர்கள் பொறுப்பில்லாமல் பேசுவதால் நீதி கிடைக்குமா? என்ற சந்தேகம் வந்துள்ளது. இறக்கும் தருவாயில் எந்த ஒரு குழந்தையும் பொய் சொல்ல வாய்ப்பில்லை. ஒரு மதத்தை சேர்ந்த 2 மனிதர்கள் செய்த தவறு தான் இது. இதில் புலனாய்வு துறை தவறான அறிக்கையை முதல்வருக்கு தெரிவித்துள்ளது.

தமிழக அரசு மோசமாக கையாண்டுள்ளது, அற்புதமான காவல்துறைக்கு களங்கம் ஏற்படுத்தியுள்ளது. காவல் துறையை சுதந்திரமாக செயல்பட விடுங்கள்.

ஆதாரம் இல்லாமல் அனிதாவின் உடலை வைத்து அரசியல் செய்தது தி.மு.க.தான். நாங்கள் அப்படி செய்யவில்லை ஆதாரத்துடன் லாவண்யாவிற்கு நீதி கேட்கிறோம். அனிதாவிற்கு ஒரு நியாயம், லாவண்யாவிற்கு ஒரு நியாயமா?

இவ்வாறு அவர் கூறினார்.

அரியலூர்:

அரியலூர் மாவட்டம் வடுகபாளையம் கிராமத்தை சேர்ந்தவர் முருகானந்தம். இவரது மகள் லாவண்யா(வயது 16). தஞ்சையை அடுத்துள்ள மைக்கேல்பட்டி தனியார் கிறிஸ்தவ பள்ளிக்கூட விடுதியில் தங்கி படித்து வந்த இவர் பூச்சி மருந்தை குடித்து தற்கொலை செய்து கொண்டார்.

இதைத்தொடர்ந்து மாணவி லாவண்யாவின் பெற்றோரை பா.ஜ.க. மாநில தலைவர் அண்ணாமலை நேற்று நேரில் சந்தித்து ஆறுதல் கூறினார். மேலும் அவர்களிடம் பா.ஜ.க. சார்பில் ரூ.10 லட்சத்திற்கான காசோலையையும் வழங்கினர்.

பின்னர் அண்ணாமலை நிருபர்களிடம் கூறியதாவது;-

மாணவியின் தற்கொலைக்கு நீதி கிடைக்கும் வரை பா.ஜ.க. போராடும். மேலும் பா.ஜ.க. குழு நாளை(செவ்வாய்க்கிழமை) அரியலூர் வர உள்ளது. அவர்களும் இந்த குடும்பத்தை வந்து சந்திப்பார்கள். மாணவியின் மரணத்தைவிட போலீசாரின் விசாரணையே மாணவியின் பெற்றோருக்கு மனக்கஷ்டத்தை அளித்து வருகிறது. ஆளும் கட்சியினர் மற்றும் போலீசார், இவர்களைத்தான் குற்றவாளிகள் என முடிவு செய்து அவ்வாறு நடத்துகின்றனர்.

எனவே மாணவியின் மரணத்தில் எந்தவித பாரபட்சமும் இல்லாமல் நடுநிலையான விசாரணை நடைபெற, இந்த வழக்கை சி.பி.ஐ.க்கு மாற்றி உத்தரவிட வேண்டும் என்று பா.ஜ.க. சார்பில் வலியுறுத்துகிறோம்.

அனிதாவிற்கு ஒரு நியாயம்? லாவண்யாவிற்கு ஒரு நியாயமா?. எந்த ஒரு அடிப்படை ஆதாரமும் இல்லாமல் நீட் தேர்வில் அனிதாவின் உடலை வைத்து தி.மு.க. அரசியல் செய்தது. ஆனால் அது போன்று பா.ஜ.க. செய்யாது. அதற்கான அவசியம் இல்லை.

இவ்வாறு அவர் கூறினார்.

அரியலூர்:

அரியலூர் மாவட்டம் செந்துறையில் இருந்து உடையார்பாளையம் செல்லும் சாலையில்  உள்ள இரும்புலிக்குறிச்சி, பரணம் உள்ளிட்ட கிராமங்களில் கடந்த ஒரு வார காலமாக நில அளவையர், மருத்துவர், செவிலியர்  உள்ளிட்ட பலரிடம் ரசாயன பொடியை தூவி மர்ம நபர்கள் கொள்ளை முயற்சியில் ஈடுபட்டனர்.

பெண்களிடம் தங்களது துப்பட்டா வண்டியில் சிக்கியுள்ளது, சேலை வண்டியில் மாட்டி உள்ளது என்று கூறி 2 இளைஞர்கள் நூதன முறையில் ரசாயன பொடி தூவி கொள்ளையடிக்க முயற்சித்தனர்.    

ஆனால் அவர்கள் அதிர்ஷ்டவசமாக தப்பினர். இந்தநிலையில் நேற்று முன்தினம் இரவு செந்துறையில் ஜவுளிக்கடை நடத்தி வரும் பழனியம்மாள் (வயது 50) என்பவர் செந்துறையில் இருந்து தனது ஸ்கூட்டரில் சொந்த ஊரான நல்லாம்பாளையம் கிராமத்தை நோக்கி சென்று கொண்டு இருந்தார்.

சமத்துவபுரம் அருகே சென்று கொண்டிருந்த அவரை பின்தொடர்ந்து வந்த அதே  இளைஞர்கள் 2 பேர் பழனியம்மாளிடம் தங்களது சேலை வண்டியில் மாட்டி உள்ளது என்று கூறியுள்ளனர்.

இதனை நம்பிய அவர்  வண்டியை  நிறுத்த முயற்சித்தபோது அந்த கொள்ளையர்கள் ரசாயன பொடி தூவி அவர் அணிந்திருந்த 6 பவுன் தாலிச் சங்கிலியை பறித்துக்கொண்டு கொண்டு தப்பி விட்டனர்.

இதுகுறித்து அவர் செந்துறை போலீசில் கொடுத்த புகாரின் பேரில் போலீசார் சம்பவ இடத்திற்கு விரைந்து வந்து விசாரணை நடத்தினர். அப்போது அவர்கள் சம்பவம் நடந்த இடம் இரும்புலிக்குறிச்சி போலீஸ் நிலைய எல்லைக்கு உட்பட்டது என்று கூறினர்.

அதனைத்தொடர்ந்து அரியலூர் போலீஸ் துணை சூப்பிரண்டு மதன், குவாகம் போலீஸ் இன்ஸ்பெக்டர் கதிரவன், உடையார்பாளையம் போலீஸ் இன்ஸ்பெக்டர் ரவி சக்கரவர்த்தி உள்ளிட்டோர் சம்பவ இடத்திற்கு வந்து விசாரணை மேற்கொண்டனர்.

கிராம நிர்வாக அதிகாரி களிடம் எல்லைப் பிரச்சினை குறித்து கேட்டபோது, சம்பவம்  நடந்த இடம் உஞ்சினி வருவாய் எல்லைக்கு உட்பட்டது என்று கூறினர். இதையடுத்து இரும்புலிக்குறிச்சி போலீசார் விசாரணை நடத்தினர்.  

இந்த நிலையில் கடந்த ஒரு வார காலமாக இந்த தொடர் கொள்ளை தொடர்பாக அரியலூர் மாவட்ட போலீஸ் சூப்பிரண்டு பெரோஸ்கான் மற்றும் ஜெயங்கொண்டம் துணை போலீஸ் சூப்பிரண்டு கலைகதிரவன் உத்தரவின் பேரில் அமைக்கப்பட்ட தனிப்படை போலீசார் தொடர்ந்து இந்த பகுதியில் கண்காணித்து வந்தனர்.

ஆங்காங்கே உள்ள சி.சி.டி.வி. கேமரா பதிவின் மூலம் தேடி வந்த நிலையில் தொடர் கொள்ளை சம்பவத்தில் ஈடுபட்ட கொள்ளையர்கள் 2 பேரை அடையாளம் கண்டு தேடிவந்தனர். இந்தநிலையில் அவர்களை போலீசார் கைது செய்யப்பட்டு உள்ளனர்.

இருவரையும் ரகசிய இடத்தில் வைத்து போலீசார் தீவிர விசாரணை நடத்தி வருகிறார்கள். மேலும் அவர்களிடம் இருந்து பல்வேறு இடங்களில் நடத்திய கொள்ளைய சம்பவங்களில் தொடர்புடைய நகைகள் மற்றும் பொருட்களை போலீசார் பறிமுதல்  செய்துள்ளனர்.

அரியலூர்:

தமிழகத்தில் வருகிற 19-ந் தேதி நடைபெறவுள்ள நகர்ப்புற உள்ளாட்சி தேர்தலுக்கான வேட்பு மனு தாக்கல் நேற்று தொடங்கியது. பெரம்பலூர் மாவட்டத்தில் பெரம்பலூர் நகராட்சி மற்றும் குரும்பலூர், அரும்பாவூர், பூலாம்பாடி, லெப்பைக்குடிகாடு ஆகிய 4 பேரூராட்சிகள் உள்ளன. இதில் பெரம்பலூர் நகராட்சியில் 21 வார்டுகளும், 4 பேரூராட்சிகளில் தலா 15 வார்டுகளும் என மொத்தம் 81 வார்டுகள் உள்ளன.

இதேபோல் அரியலூர் மாவட்டத்தில் அரியலூர், ஜெயங்கொண்டம் ஆகிய 2 நகராட்சிகளும், உடையார்பாளையம், வரதராஜன்பேட்டை ஆகிய 2 பேரூராட்சிகளும் உள்ளன. இதில் அரியலூர் நகராட்சியில் 18 வார்டுகளும், ஜெயங்கொண்டம் நகராட்சியில் 21 வார்டுகளும், உடையார்பாளையம், வரதராஜன்பேட்டை ஆகிய 2 பேரூராட்சிகளிலும் தலா 15 வார்டுகளும் என மொத்தம் 69 வார்டுகள் உள்ளன.

இந்த வார்டுகளில் போட்டியிட விரும்புபவர்களிடம் இருந்து வேட்பு மனுவை பெறுவதற்காக மாவட்டங்களில் அந்தந்த நகராட்சி, பேரூராட்சி அலுவலகங்களில் தேர்தல் நடத்தும் அலுவலர்களும், உதவி தேர்தல் நடத்தும் அலுவலர்களும் தயார் நிலையில் இருந்தனர். மேலும் வேட்பு மனு தாக்கல் நடைபெறுவதை முன்னிட்டு மேற்கண்ட நகராட்சி, பேரூராட்சி அலுவலகங்களின் முன்பு போலீசார் பாதுகாப்பு பணியிலும் ஈடுபட்டனர்.

ஆனால் நகராட்சி, பேரூராட்சி அலுவலகங்களில் முதல் நாளில் யாரேனும் வேட்பு மனு தாக்கல் செய்ய வருவார்களா? என்று தேர்தல் நடத்தும் அலுவலர்களும், உதவி தேர்தல் நடத்தும் அலுவலர்களும் காலை 10 மணி முதல் மாலை 5 மணி வரை வழிமேல் விழி வைத்து காத்திருந்து ஏமாற்றம் அடைந்தனர். நேற்று வேட்பு மனு தாக்கல் செய்ய அரசியல் கட்சியை சேர்ந்தவர்களும், சுயேச்சையாக போட்டியிட விரும்புபவர்களும் வரவில்லை.

அரியலூர் :

அரியலூர் மாவட்டம் தா.பழூர் கிராம நிர்வாக அலுவலர் அய்யப்பன் தனது உதவியாளருடன் பாலசுந்தரபுரம் கிராமத்தில் ரோந்து பணியில் ஈடுபட்டார். அப்போது 5 மொபட்டுகளில் தலா 3 மூட்டைகளில் மணல் அள்ளி வந்தவர்கள், கிராம நிர்வாக அலுவலரை பார்த்தவுடன் மொபட்டுகளை விட்டுவிட்டு தப்பி ஓடிவிட்டனர்.

இது குறித்து தா.பழூர் போலீசில் கிராம நிர்வாக அலுவலர் கொடுத்த புகாரின் பேரில் சப்-இன்ஸ்பெக்டர் வேல்முருகன் விசாரணை நடத்தினார். இதில் தாதம்பேட்டை காலனி தெருவை சேர்ந்த சசிகுமார்(வயது 30), பிரேம்குமார்(27), விக்னேஷ்(25), காமராஜ்(60), முனியப்பன்(45) ஆகியோர் மணல் திருட்டில் ஈடுபட்டது தெரியவந்தது.

அவர்கள் மீது வழக்குப்பதிவு செய்து மணல் திருட்டுக்கு பயன்படுத்திய 5 மொபட்டுகளும் போலீசாரால் பறிமுதல் செய்யப்பட்டன. இதேபோல் வாழைக்குறிச்சி கிராம நிர்வாக அலுவலர் பரணிகுமார் தனது உதவியாளருடன் ரோந்து பணியில் ஈடுபட்டபோது அடிக்காமலை கொள்ளிடக்கரை அருகில் 3 மொபட்டுகளில் மணல் திருடி வந்த நபர்களை தடுத்து நிறுத்தியுள்ளார்.

இதையடுத்து அவர்கள் அங்கிருந்து தப்பி ஓடிவிட்டனர். இது குறித்து தா.பழூர் போலீசில் கிராம நிர்வாக அலுவலர் கொடுத்த புகாரின்பேரில் போலீசார் மொபட்டுகளை பறிமுதல் செய்து, தப்பி ஓடியவர்கள் குறித்து விசாரித்து வருகின்றனர்.

அரியலூர் :

அரியலூர் மாவட்டம், ஜெயங்கொண்டத்தில் அனல்மின் திட்டம் செயல்படுத்துவதற்காக விவசாயிகளிடமிருந்து தமிழ்நாடு முதலீட்டு நிறுவனம் (டிட்கோ) மூலம் 1996-ம் ஆண்டு நிலங்கள் கையகப்படுத்தப்பட்டது. இதில் ஜெயங்கொண்டம் மற்றும் ஆண்டிமடம் ஊராட்சி ஒன்றியத்திற்கு உட்பட்ட புதுக்குடி, மேலூர், தேவனூர், கொளத்தூர் உள்ளிட்ட 13 கிராமங்களில் இருந்து சுமார் 10 ஆயிரத்திற்கும் மேற்பட்ட ஏக்கர் விவசாய நிலங்கள் கையகப்படுத்தப்பட்டது. ஆனால்  23 ஆண்டுகளாகியும் இது வரை இழப்பீடு தொகையும்  வழங்கவில்லை, திட்டமும் செயல்படுத்தப்படவில்லை.

நிலங்களின் பட்டாக்களை தமிழ்நாடு தொழில் முதலீட்டு நிறுவனத்திடம் கொடுத்து விட்டதால், அரசு வழங்கக்கூடிய மானியத் திட்டங்கள் மற்றும் இலவசங்களை கூடி பெற முடியாத நிலையில் விவசாயிகள் உள்ளனர். மேலும் கடந்த ஆண்டு பிப்ரவரி மாதம் 25-ந் தேதி காட்டாத்தூர் தெற்கு, கூவத்தூர் தெற்கு ஆகிய 2 கிராமங்களுக்கு 23 மடங்கு தொகையை கொடுப்பது என்று அர சாணை வெளியிட்டும், இதுவரை விவசாயிகளுக்கு இழப்பீட்டுத் தொகை வழங்கப்படவில்லை.

இதனால் ஆத்திரமடைந்த காட்டாத்தூர் தெற்கு, கூவத்தூர் தெற்கு ஆகிய இரண்டு கிராம மக்கள் ஜெயங்கொண்டம் தனி வட்டாட்சியர் நிலம் எடுப்பு அலுவலகம் முன்பாக முற்றுகையிட்டு கண்டன கோஷங்கள் எழுப்பியவாறு ஆர்ப்பாட்டத்தில் ஈடுபட்ட னர். அப்போது அவர்கள், தமிழ் நாடு தொழில் முதலீ ட்டு நிறுவனத்திடம் இருந்து தகுந்த பதில் வந்தால் மட்டுமே நாங்கள் கலைந்து செல்வோம், இல்லையேல் தொடர் உண்ணாவிரத போராட்டத்தில் ஈடுபடுவோம் என தெரிவித்து போராட்டத்தில் ஈடுபட்டனர்.

தொடர்ந்து அவர்கள் திடீரென வட்டாட்சியர் அலுவலக கட்டிடத்தில் மேல் (3-வது மொட்டை மாடியில்) மாடிக்கு சென்று கோஷங்கள் எழுப்பியவாறு ஆர்ப்பாட்டத்தில் ஈடுபட்டனர். இதில் ஒரு விவசாயி கட்டிடத்தில் இருந்து குதிக்க முயற்சித்த போது போலீசார் தடுத்து நிறுத்தி அனைவரையும் கீழே இறங்க செய்தனர்.

இதையடுத்து நிலம் எடுப்பு தாசில்தார் அலுவ லகம் முன்பு விவசாயிகள் அமர்ந்து தொடர் காத்திருப்பு போராட்டத்தில் ஈடுபட்டனர்.அவர்களிடம் போலீஸ் இன்ஸ்பெக்டர் சண்முகசுந்தரம் தலைமையிலான போலீஸ் சப்-இன்ஸ்பெக்டர் பாலகிருஷ்ணன் உள்ளிட்ட போலீசார் அவர்களிடம் பேச்சு வார்த்தையில் ஈடுபட்டனர். மேலும் அதிகாரிகளிடம் தங்கள் குறைகளை கூறுமாறு தெரிவித்து, அமைதி பேச்சுவார்த்தை நடத்துவதற்கு அலுவலகத்திற்கு உள்ளே அழைத்து சென்றனர்.

இதையடுத்து நிலம் எடுப்பு தாசில்தார் தலைமையில் விவசாயிகளிடம் அமைதி பேச்சுவார்த்தை நடத்தப்பட்டது. இரண்டு மாத காலம் அவகாசம் அளிக்குமாறு விவசாயிகளிடம் தாசில்தார் கேட்டுக்கொண்டார். இது குறித்து சம்பந்தப்பட்ட அதிகாரிகளிடம் தகவல் தெரிவித்து 2 அல்லது 3 மாதங்களுக்குள் தகவல் தெரிவிப்பதாக தெரிவித்தார். இதையடுத்து விவசாயிகள் போராட்டத்தை கைவிட்டு கலைந்து சென்றனர். விவசாயிகள் போராட்டத்தால் ஜெயங்கொண்டம் தாலுகா அலுவலகதத்தில் பெரும்பரபரப்பு ஏற்பட்டது.

இது குறித்து விவசாயிகள் கூறுகையில், சொந்த நிலம், இடங்கள் இருந்தும் சொந்த ஊரில் அகதிகள் போல் வாழ்ந்து வருகிறோம். எங்கள் வீட்டு பெண்களுக்கு திருமணம் செய்வதற்கு கூட  வசதி இல்லாத சூழல் ஏற்பட்டுள்ளது. 3-வது தலைமுறை ஆன நிலையிலும், பல்வேறு போராட்டங்கள் நடத்தப்பட்டும் இதுவரை இதற்கு தீர்வு காணப்படவில்லை. எனவே தற்போதாவது இந்த திட்டத்தை செயல்படுத்த வேண்டும்.

அவ்வாறு செயல்படுத்தப்படும் பட்சத்தில் உரிய இழப்பீட்டுத் தொகையை விவசாயிகளுக்கு வழங்கவேண்டும். இல்லையென்றால் மீண்டும் விவசாயிகளிடமே இழப்பீட்டுத் தொகையுடன் சேர்த்து நிலத்தையும், பட்டாவையும் ஒப்படைக்க வேண்டும் என்று, தமிழக அரசுக்கு கோரிக்கை விடுத்தனர்.

அரியலூர்

அரியலூர் மாவட்டம் உடையார்பாளையம் கார்குடி கிராமத்தில் உள்ள சித்தமல்லி நீர்த்தேக்கத்திலிருந்து பாசனத்திற்கு தண்ணீரினை மாவட்ட கலெக்டர் ரமண சரஸ்வதி, இன்று (28.01.2022) திறந்து வைத்தார்.

பின்னர் அவர் தெரிவித்ததாவது :-
தமிழ்நாடு முதல்வரின் ஆணையின்படி சித்தமல்லி நீர்த்தேக்கத்திலிருந்து நன்செய் மற்றும் புன்செய் ஆயக்கட்டு நிலங்களுக்கு இன்று (28.1.22) தண்ணீர் திறந்துவிடப்பட்டுள்ளது.

சித்தமல்லி நீர்த்தேக்கமானது அரியலூர் மாவட்டம், உடையார்பாளையம் , கார்குடி கிராமத்தில் அமைந்துள்ளது. இது  1981-ல் ஆரம்பிக்கப்பட்டு, 1988ம் ஆண்டு கட்டி முடிக்கப்பட்டது. இந்த நீர்த்தேக்கத்தின் கரையின் மொத்த நீளம் 5050 மீட்டர். இந்த அணையின் முழு கொள்ளளவு உயரம் 4.75 மீட்டர். மொத்தக் கொள்ளவு 226.80 மில்லியன் கனஅடி ஆகும்.

இதில் 3 தலைமதகுகள் உள்ளன. தலைமதகு எண்.1 மூலம் கார்குடி தெற்க்கேரிக்கும், தலைமதகு எண்.2 மூலம் கோவத்தடை ஏரிக்கும் மற்றும் மெயின் வாய்க்காலுக்கும், தலைமதகு எண்.3 மூலம் திருப்புரந்தான் பெரிய ஏரிக்கும் மற்றும் திருப்புந்தான் வாய்க்காலுக்கும் தண்ணீர் திறக்கப்பட்டு பாசன வசதி பெறுகிறது.

சித்தமல்லி நீர்த்தேக்கத்தின் மூலம் நன்செய் நிலம் 1179.02 ஏக்கரும், புன்செய் நிலம் 3901.60 ஏக்கர் நிலமும் மொத்தம் 5080.62 ஏக்கர் நிலங்கள் பாசன வசதி பெறுகிறது. இந்த அணையின் மூலம் நடுவலூர் (கிழக்கு), இருகையூர், காரைக்குறிச்சி, தா.பழூர், கோடங்குடி, திருபுரந்தான், இடங்கண்ணி, சோழமாதேவி ஆகிய கிராமங்கள் பயன் பெறுகின்றன.

நீர்தேக்கத்திலிருந்து உபரிநீரை வெளியேற்ற ஒரு உபரிநீர்ப்போக்கியும் மற்றும் ஒரு உபரிநீர் வழிந்தோடியும் உள்ளது. இந்த உபரிநீரானது சித்தமல்லி ஓடை வழியாக சென்று கொள்ளிடத்தில் கலக்கிறது. 2017, 2019ம் ஆண்டு அரசாணை பெறப்பட்டு, தண்ணீர் பாசனத்திற்கு திறந்து விடப்பட்டது.

கடந்த 04.01.2022 அன்று அணையின் கொள்ளளவு இருப்பான 207.911 மில்லியன் கனஅடியை கணக்கில் கொண்டு கருத்துரு அரசுக்கு அனுப்பப்பட்டு அதற்கான அரசாணை பெறப்பட்டு முதல்வரின் ஆணையின்படி சித்தமல்லி நீர்த்தேக்கத்திலிருந்து நன்செய் மற்றும் புன்செய் ஆயக்கட்டு நிலங்களுக்கு 28.01.2022 முதல் 21.03.2022 வரை முறை வைத்து 52 தினங்களுக்கு தண்ணீர் திறந்துவிடப்பட்டுள்ளது.

இவ்வாறு அவர் கூறினார்.

நிகழ்ச்சியில், செயற்பொறியாளர் கீதா, உதவி செயற்பொறியாளர்சாந்தி, உதவிப்பொறியாளர் ராஜாசிதம்பரம் மற்றும் அரசு அலுவலர்கள் பலர் கலந்து கொண்டனர்.