சினிமா செய்திகள்

தமிழ் சினிமாவில் இளம் கதாநாயகனாக வலம் வருபவர் கதிர். இவர் நடித்த கிருமி, விக்ரம் வேதா, பரியேறும் பெருமாள் உள்ளிட்ட படங்கள் ரசிகர்களை வெகுவாக கவர்ந்தது. குறிப்பாக பரியேறும் பெருமாள் படத்தில் இவரது நடிப்புக்காக விருதுகளும் கிடைத்தது.

இந்நிலையில் நடிகர் கதிர் தனது ட்விட்டர் பக்கத்தில் மண்வெட்டியை வைத்து மண் அள்ளிப்போடும் போட்டோவை பகிர்ந்துள்ள அவர், விவசாயிகளின் அன்றாட வேலைதான், சிட்டி வாழ்க்கையில் ஒர்க் அவுட்டாம். என்ன சொல்றது போங்க...' எனவும் அவர் பதிவிட்டுள்ளார். கதிரின் இந்த பதிவு ரசிகர்களை கவர்ந்துள்ளது. 

நடிகை சமந்தா சமீபத்தில் அளித்த பேட்டியில் கூறியதாவது, ’எனது சினிமா பயணத்தில் எந்த நேரத்தில் எது நடக்க வேண்டுமோ அதுதான் நடந்தது என்று சொல்லலாம். நாம் நினைத்தது எல்லாம் உடனே நடந்து விடாது.

எதற்கும் ஒரு நேரம் வர வேண்டும். சினிமாவுக்கு வந்த புதிதில் இன்னும் அதிக வாய்ப்புகள் வரவில்லையே என்ற நிராசை இருந்தது. ஆனால் இப்போது திரும்பி பார்த்தால் எனது வயதுக்கு ஏற்ற படங்களைத்தான் அப்போது செய்து இருக்கிறேன் என்பது புரிகிறது.

கதாநாயகர்களுக்கு ஜோடியாக நடித்துக்கொண்டே எனது முத்திரையை பதிக்க முயற்சி செய்தேன். அதனால்தான் தனி அடையாளத்தை பெற முடிந்தது. எதற்கும் பொறுமை வேண்டும். அப்போது ஆவேசப்பட்டாலும் இப்போது சினிமாவில் எனக்கு முதிர்ச்சி வந்து இருக்கிறது”.

லோகேஷ் கனகராஜ் இயக்கத்தில் விஜய் - விஜய் சேதுபதி இணைந்து நடித்திருக்கும் படம் மாஸ்டர். இப்படத்தை இணையதளத்தில் வெளியிட பிரபல ஓடிடி நிறுவனம் பேச்சுவார்த்தை நடத்திய நிலையில், நடிகர் விஜய் கேட்டுக் கொண்டதால் படத்தை திரையரங்கில் வெளியிட படக்குழு முடிவு செய்துள்ளதாக தகவல் வெளியாகி இருக்கிறது.

மாஸ்டர் படத்திற்கான திரையரங்கு உரிமையை 7 ஸ்கிரீன் ஸ்டூடியோ நிறுவனம் சார்பாக லலித் கைப்பற்றியிருக்கிறார். கொரோனா ஊரடங்கால் படத்தின் ரிலீஸ் தள்ளிப்போனதால் வாங்கிய கடனுக்கு வட்டி கட்ட வேண்டிய சூழலுக்கு தள்ளப்பட்டிருக்கிறார். இதனை கருத்தில் கொண்டு நடிகர் விஜய், அவரது தயாரிப்பில் ஒரு படம் நடிக்க ஒப்பந்தம் செய்திருப்பதாக தகவல் வெளியாகி உள்ளது.

விஜய்யின் இந்த முடிவுக்கு பலரும் பாராட்டு தெரிவித்து வருகிறார்கள். படம் 2020 தீபாவளிக்கு பிரம்மாண்டமாக வெளியாகும் என்று எதிர்பார்க்கப்படுகிறது.

பாலிவுட்டில் முன்னணி ஹீரோயினாக வலம் வருபவர் ஹூமா குரேஷி. இவர் தமிழில் ரஜினி நடித்த காலா திரைப்படத்தில் ஹீரோயினாக நடித்து அசத்தினார்.
இந்நிலையில் ஹூமா குரேஷி தனது இன்ஸ்டாகிராம் பக்கத்தில் ஒரு வீடியோவை வெளியிட்டுள்ளார். ''இந்த ஊரடங்கு முடிந்துவிட்டது என்று சொன்னால், நான் இப்படிதான் ஆடுவேன். எப்போது அந்த காலம் வருமோ..?!" என பதிவிட்டுள்ள அவர், அதற்கு ரொம்பவே ஜாலியாக ஆடும் வீடியோவையும் வெளியிட்டுள்ளார். ஹூமா குரேஷியின் இந்த வீடியோ ரசிகர்களை கவர்ந்து வைரல் ஆகி வருகிறது.

கொரோனா ஊரடங்கால் கமல்ஹாசன் நடிக்கும் இந்தியன் 2 படத்தின் படப்பிடிப்பு பாதிக்கப்பட்டுள்ளது. இந்நிலையில் சில வாரங்களுக்கு முன்பு, ‘இந்தியன் 2’ படத்தை கைவிட்டு விட்டார்கள் என்று தகவல் பரவியது. கொரோனா நெருக்கடியால் லைகா நிறுவனத்தின் வியாபாரங்களில் கடும் பொருளாதார இழப்பு ஏற்பட்டுள்ளதாகவும், எனவே அவர்களால் மீண்டும் சினிமாவில் முதலீடு செய்ய முடியாது எனவும் குறிப்பிட்டு இருந்தார்கள்.

ஆனால் இறுதி கட்ட பணிகள் தொடங்கலாம் என்று தமிழக அரசு அறிவித்தவுடனே, ‘இந்தியன் 2’ படத்தின் எடிட்டிங் பணிகளை படக்குழு தொடங்கிவிட்டது. இரண்டு இடங்களில் இதன் பணிகள் நடைபெற்று வருகின்றன. தற்போது இதுவரை படமாக்கப்பட்ட காட்சிகளே அதிக அளவில் இருப்பதால் அவற்றைச் சுருக்கி வருகிறது படக்குழு. கொரோனா ஊரடங்கு முடிவதற்குள் அந்தப் பணிகளை முழுமையாக முடிக்கத் திட்டமிடப்பட்டுள்ளது.

படப்பிடிப்புக்கும் தமிழக அரசு அனுமதி கிடைத்தவுடன் தொடங்கப்படும் என்கிறார்கள் படக்குழுவினருக்கு நெருக்கமானவர்கள். ஈவிபி அரங்கில்தான் ‘இந்தியன் 2’ படப்பிடிப்பில் விபத்து ஏற்பட்டது. எனவே அங்கிருந்து அரங்குகள் அனைத்தையும் பல்லாவரம் அருகில் உள்ள பின்னி மில்லுக்கு மாற்றிவிட்டது படக்குழு. அடுத்தகட்டப் படப்பிடிப்பு அங்குதான் தொடங்கவுள்ளது.