விருதுநகர்

விருதுநகர்:

விருதுநகர் மாவட்டம் சாத்தூர் அருகே உள்ள அச்சங்குளம் கிராமத்தில் கடந்த 12-ந்தேதி பட்டாசு ஆலையில் பயங்கர வெடி விபத்து ஏற்பட்டது. இதில் அங்குள்ள அறைகள் இடிந்து தரைமட்டமானது.

இந்த வெடிவிபத்தில் கணவன்-மனைவி, கர்ப்பிணி பெண், கல்லூரி மாணவி உள்பட 20 பேர் பலியானார்கள். மேலும் படுகாயம் அடைந்த சிலர் ஆஸ்பத்திரிகளில் தொடர்ந்து சிகிச்சை பெற்று வருகிறார்கள்.

இந்த வெடிவிபத்து தொடர்பாக பட்டாசு ஆலை உரிமையாளர் சந்தனமாரி, குத்தகைதாரர்கள் சக்திவேல், பொன்னுபாண்டி, சிவக்குமார், ராஜா, வேல்ராஜ் ஆகிய 6 பேர் மீது ஏழாயிரம்பண்ணை போலீசார் வழக்குப்பதிவு செய்து விசாரணை நடத்தி வந்தனர்.

இவர்களில் பொன்னுபாண்டி, சக்திவேல் ஆகியோர் கைது செய்யப்பட்டனர். இந்த நிலையில் சக்திவேல் மனைவி ஜெயராமு (வயது39) மீது போலீசார் வழக்குப்பதிவு செய்து அவரையும் கைது செய்தனர்.

இதன் தொடர்ச்சியாக இன்று காலை பட்டாசு ஆலை உரிமையாளர் சந்தனமாரியை போலீசார் கைது செய்தனர்.

இதுவரை இந்த வழக்கில் 4 பேர் கைது செய்யப்பட்டுள்ளனர் என்பது குறிப்பிடத்தக்கது. மற்ற 3 பேரை போலீசார் தேடி வருகிறார்கள்.

சாத்தூர்:

சாத்தூர் அருகே அச்சங்குளத்தில் உள்ள பட்டாசு ஆலையில் கடந்த 12-ந் தேதி ஏற்பட்ட வெடி விபத்தில் தொழிலாளா்கள் 20 போ் உயிரிழந்தனர். 20-க்கும் மேற்பட்டவர்கள் தனியார் மற்றும் அரசு மருத்துவமனைகளில் சிகிச்சை பெற்று வருகின்றனர்.

இந்த நிலையில் பட்டாசு வெடி விபத்தில் பலியானவர்களுக்கு அரசு சார்பில் ரூ.3 லட்சமும், காயமடைந்தவர்களுக்கு ரூ.1 லட்சமும் நிவாரண தொகை வழங்கப்படும் என முதல்-அமைச்சர் எடப்பாடி பழனிசாமி அறிவித்தார்.

இந்தநிலையில் சாத்தூரில் உள்ள வட்டாட்சியர் அலுவலகத்தில் நடைபெற்ற நிகழ்ச்சியில் அமைச்சர் கே.டி. ராஜேந்திரபாலாஜி கலந்து கொண்டு பட்டாசு வெடி விபத்தில் உயிரிழந்த 17 பேரின் குடும்பங்களுக்கு தமிழக அரசு அறிவித்த ரூ.3 லட்சத்திற்கான நிவாரண தொகைக்கான காசோலையை வழங்கினார்.

மேலும் காயமடைந்தவர்களை நேரில் சந்தித்து ஆறுதல் கூறியதுடன் காயம் அடைந்த 19 பேருக்கு ரூ.1 லட்சத்திற்கான காசோலையையும் வழங்கினார்.

அப்போது ராஜவர்மன் எம்.எல்.ஏ., கிழக்கு மாவட்ட செயலாளர் ரவிச்சந்திரன், கலெக்டர் கண்ணன், மாவட்ட வருவாய் அலுவலர் மங்கல ராமசுப்பிரமணியன், கோட்டாட்சியர் காசி செல்வி, தாசில்தார் வெங்கடேஷ், சாத்தூர் துணை போலீஸ் சூப்பிரண்டு ராமகிருஷ்ணன் மற்றும் அரசு அலுவலர்கள் உடனிருந்தனர்.

பின்னர் அமைச்சர் கே.டி.ராேஜந்திரபாலாஜி நிருபர்களுக்கு அளித்த பேட்டியில் கூறியிருப்பதாவது:-

சாத்தூர், வெம்பக்கோட்டை, சிவகாசி உள்ளிட்ட பகுதிகளில் அடிக்கடி உயிரிழப்பு ஏற்படுவதால் தி.மு.க உள்ளிட்ட சில இயக்கங்கள் பட்டாசு தொழிலை நிறுத்த வேண்டும் என்று கூறுகின்றனர்.

உயிரிழப்பு என்பது எல்லா தொழிலும் இருக்கின்றது. ஆனால் பட்டாசு தொழிலில் மட்டும் உயிரிழப்பு வெளியில் தெரிகிறது. எனவே தமிழக முதல்-அமைச்சர் உயிரிழப்பை தடுக்க விரைவான நடவடிக்கை எடுத்துள்ளார். நிவாரணமும் அறிவித்துள்ளார்.

பட்டாசு தொழிலாளர்கள் வாழ்வாதாரத்தை கெடுக்க வேண்டும் என்ற எண்ணத்தில் தி.மு.க.வின் பொதுச்செயலாளர் அறிக்கை விடுத்துள்ளார்.

தி.மு.க.வினர் வெந்த புண்ணில் வேலைப்பாய்ச்சுவது போல் இந்த தொழிலை நிறுத்த வேண்டும் என்று கூறுகின்றனர். பட்டாசு மற்றும் தீப்பெட்டி தொழிலாளர்களின் வாழ்க்கை தரம் உயர எண்ணற்ற நடவடிக்கையை எடப்பாடி பழனிசாமி எடுத்துள்ளார்.

பட்டாசு தொழிலாளர் நலச்சங்கத்தினரிடம் பேச்சுவார்த்தை நடத்தி விபத்துகள் ஏற்படாத வண்ணம் பாதுகாப்பாக தொழிலை நடத்த முயற்சி மேற்கொள்ளப்படும்.

தாய் தந்தையை இழந்த நடுசூரங்குடி நந்தினிக்கு தேவையான படிப்பு செலவினை நாங்கள் ஏற்றுக்கொள்வோம். அந்தக் குழந்தைக்கென தனி கவனம் செலுத்தி எங்கள் வீட்டுப் பிள்ளையாக நாங்கள் கவனித்துக் கொள்வோம்.

இவ்வாறு அவர் கூறினார்.

ராஜபாளையம்:

ராஜபாளையத்தில ஆதார் அட்டையில் தொலைபேசி எண் சேர்க்க முடியாமல் பொதுமக்கள் தவித்து வருகின்றனர். இதுகுறித்து அதிகாரிகள் நடவடிக்கை எடுக்க வேண்டும் என கோரிக்கை விடுக்கப்பட்டுள்ளது.

அரசின் நலத்திட்ட உதவிகளை பெற ஆதார் அட்டை அவசியம் ஆகும்.

பெரும்பாலான ஆதார் அட்டையில் தெரு பெயர், தொலைபேசி எண் உள்ளிட்ட பல தகவல்கள் பிழையாக இருப்பதாக புகார் எழுந்துள்ளது. பிழைத்திருத்தம் மற்றும் புதிதாக தொலைபேசி எண் பதிவு செய்வதற்கு கிராமப்பகுதியிலிருந்து எண்ணற்ற பொதுமக்கள் அன்றாடம் ராஜபாளையம் நகருக்கு வருகின்றனர்.

ராஜபாளையம் தாலுகா அலுவலகம், தபால் அலுவலகம், ஒரு தனியார் வங்கி என சில இடங்களில் மட்டுேம ஆதார் அட்டை பிழை திருத்தும் பணி, செல்போன் எண் மாற்றுதல் உள்ளிட்டவை செய்யப்படுகிறது.

வட்டாட்சியர் அலுவலகத்தில் ஒருவர் மட்டுமே இப்பணியை மேற்கொண்டு வருகிறார். தினமும் எண்ணற்ற பேர் பிழைத்திருத்தம், தொலைபேசி எண் பதிவு செய்ய வருவதாக கூறப்படுகிறது.

எனவே கூட்டத்தை தவிர்க்க டோக்கன் வழங்கப்படுகிறது. டோக்கன் வாங்குவதற்கு வரிசையில் பல மணிநேரம் காத்து கிடந்து அவதிக்குள்ளாகின்றனர்.

அவ்வாறு டோக்கன் பெற்றாலும் மேற்கண்ட மையங்களில் தினமும் 20 பேருக்கு மட்டுமே ஆதாரில் திருத்தம் செய்து தரப்படுகிறது.

தினமும் குறைவான எண்ணிக்கையில் பிழைத்திருத்தம் மேற்கொள்வதால் பலர் பல மாதங்களுக்கு காத்துக்கிடக்கவேண்டிய அவலம் ஏற்பட்டுள்ளது. இதனால் பள்ளி குழந்தைகள் மற்றும் போட்டி தேர்விற்கு விண்ணப்பிப்பவர், பத்திரப்பதிவு செய்பவர்களும் பாதிக்கப்படுகின்றனர்.

எனவே பொதுநலன் கருதி தாலுகா அலுவலகத்தில் இயங்கிவரும் இ-சேவை மையத்தில் கூடுதல் பணியாளர்கள் நியமித்து பணிகளை துரிதப்படுத்த வேண்டும்.

அத்துடன் ஆதாரில் திருத்தம் மேற்கொள்ளும் வகையில் கூடுதல் மையங்களை ஏற்படுத்த வேண்டும் என பொதுமக்கள் கோரிக்கை விடுத்துள்ளனர்.