புதுக்கோட்டை

புதுக்கோட்டை:

புதுக்கோட்டை மாவட்டத்தில், ஊரக வளர்ச்சி மற்றும் ஊராட்சித் துறையின் கீழ்  சுகாதாரம் மற்றும் துப்புரவு தொடர்பான பணிகள் மத்திய மற்றும் மாநில அரசு திட்டங்களின் கீழ் சிறப்பாக மேற் கொள்ளப்பட்டு வருகின்றது.
 
சுகாதாரத்தில் சிறப்பாக செயல்படும் கிராம ஊராட்சிகளை ஊக்குவிக்கும் வகையில் மாநில அரசால், முன் மாதிரி கிராம விருது உருவாக்கப்பட்டு,  அதன் அடிப்படையில் மாநில அளவில் தேர்வு செய்யப்படும் மூன்று ஊராட்சிகளுக்கு தலா ரூ.15 லட்சம் பரிசுத் தொகையும் கேடயமும்,  மாவட்ட அளவில் ஒரு கிராம ஊராட்சி தேர்வு செய்யப்பட்டு ரூ.7.50 லட்சம் பரிசுத் தொகையும் கேடயமும், வழங்கப்படவுள்ளது.
 
இதற்காக, புதுக்கோட்டை மாவட்டத் திலுள்ள  497 ஊராட்சி களிலும் சுகாதார திட்டங்களை சிறப்பாக செயல்படுத்திட வேண்டி விழிப் புணர்வு ஏற்படுத்த வட்டாரத்திற்கு 2 ஊராட்சிகள் வீதம் மொத்தம் 26 முன்மாதிரி நிறை செறிவு ஊராட்சிகள் தேர்வு செய்யப்பட்டு இவ்வூராட்சிகளில் சமூக வரைபடம், மூன்று கட்ட கழிவு தணிக்கை, திடக்கழிவு மேலாண்மை கூடங்கள் மறுசீரமைப்பு, சாம்பல் நீர் மேலாண்மை, பிளாஸ்டிக் கழிவுகள் மேலாண்மை,  தூய தெருக்கள் பராமரிப்பு ஆகிய பல்வேறுகட்ட பணிகள் திட்டமிடப் பட்டு நடைபெற்று வருகின்றன. 


எனவே, இந்த பணிகளில் உள்ளாட்சி பிரதிநிதிகள், அரசு அலுவலர்கள், தன்னார் வலர்கள், மகளிர் சுய உதவிக்குழுகள், தூய்மை பணியாளர்கள் மற்றும் பொது மக்கள் சிறப்பாக செயல்பட்டு மாநிலத்தில் முதற்பரிசினை பெறத்தக்க வகையில் மாவட்ட நிர்வாகத்தின் நடவடிக் கைகளுக்கு ஒத்துழைப்பு நல்குவதுடன் பொதுமக்கள் தங்களின் வீட்டையும், சுற்றுப் புறத்தையும் குப்பைகள் சேரா வண்ணம் பராமரிக்கவும், சுகாதார பழக்க வழக்கங்களை மேற் கொள்ளவும், அன்புடன் கேட்டுக் கொள்கிறேன் என மாவட்ட கலெக்டர் கவிதா ராமு தெரிவித்துள்ளார்.




 

விராலிமலை:

புதுக்கோட்டை மாவட்டம், இலுப்பூர் அருகே உள்ள திருநல்லூரில் முத்து மாரியம்மன் கோவில் திருவிழாவையொட்டி நேற்று ஜல்லிக்கட்டு போட்டி நடைபெற்றது.

இதில் புதுக்கோட்டை, திருச்சி, திண்டுக்கல், மதுரை, சிவகங்கை, கரூர் உள்பட பல்வேறு மாவட்டங்களில் இருந்து 800-க்கும் மேற்பட்ட காளைகள் அழைத்து வரப்பட்டிருந்தன. காளைகளை அடக்க 250-க்கும் மேற்பட்ட மாடுபிடி வீரர்களும் பங்கேற்றனர்.

இதில் ஜல்லிக்கட்டை வேடிக்கை பார்த்துக்கொண்டிருந்த திருச்சி மாவட்டம் இனாம்குளத்தூர் அருகே உள்ள கீழப்பட்டியை சேர்ந்த கபடி வீரரும், விராலிமலையில் உள்ள தனியார் நிறுவனம் ஒன்றில் கூலி தொழிலாளியாக வேலை பார்த்து வந்த பாண்டி முருகன் (வயது 19) என்பவர் ஒரு காளை முட்டியதில் உயிரிழந்தார்.

மேலும், இந்த ஜல்லிக்கட்டில் மாடுபிடி வீரர்கள் 60-க்கும் மேற்பட்டோர் காயமடைந்தனர். அவர்களுக்கு ஜல்லிக்கட்டு நடைபெற்ற இடத்தில் தயார் நிலையில் இருந்த மருத்துவக்குழுவினர் சிகிச்சை அளித்தனர். அவர்களில் படுகாயமடைந்த 20-க்கும் மேற்பட்டோர் மேல் சிகிச்சைக்காக இலுப்பூர், விராலிமலை, திருச்சி, புதுக்கோட்டையில் உள்ள அரசு மற்றும் தனியார் மருத்துவமனைகளில் அனுமதிக்கப்பட்டனர்.

பார்வையாளராக சென்று ஜல்லிக்கட்டு போட்டியை திம்மயம்பட்டியை சேர்ந்த மணி (45) என்பவர் ரசித்து பார்த்துக்கொண்டிருந்தார். அப்போது பாய்ந்து வந்த மாடு முட்டியதில் அவரது வயிற்று பகுதியில் பலத்த காயம் ஏற்பட்டது. திருச்சி அரசு மருத்துவமனைவில் அனுமதிக்கப்பட்ட அவர் இன்று அதிகாலை சிகிச்சை பலனின்றி பரிதாபமாக உயிரிழந்தார். இதனால் திருநல்லுர் ஜல்லிக்கட்டில் உயிரிழப்பு இரண்டாக உயர்ந்துள்ளது.

ஆலங்குடி:

புதுக்கோட்டை மாவட்டம் கறம்பக்குடி அருகே உள்ள கோட்டைக்காடு பகுதியை சேர்ந்தவர் செல்வம். இவர் மதுரை உயர்நீதிமன்ற கிளையில் தாக்கல் செய்த மனுவில் கூறியிருந்ததாவது:-

கறம்பக்குடி தாலுகா மாங்கோட்டை ஊராட்சிக்குட்பட்ட புதுப்பட்டி கிராமத்தில் 600 குடும்பங்கள் வசிக்கின்றன. இதில் 150 குடும்பங்கள் பட்டியல் இனத்தை சேர்ந்தவர்கள் ஆவர்.

கறம்பக்குடி அருகே உள்ள புதுப்பட்டியில் பட்டியல் இனத்தை சேர்ந்தவர்களுக்கு முடி திருத்தம் செய்ய மறுக்கப்படுவதாகவும், மேலும் மிரட்டப்படுவதாகவும் அவர்கள் மீது நடவடிக்கை எடுக்க வேண்டும் என்றும் கூறியிருந்தார்.

இதனால் முடி வெட்டுவதற்காக கறம்பகுடி நகருக்குச்செல்ல வேண்டியுள்ளது. இது தொடர்பாக அதிகாரிகளுக்கு புகார் அளித்தும் நடவடிக்கை எடுக்கவில்லை. எனவே புதுப்பட்டிக்கு அதிகாரிகள் குழுவை அனுப்பி பட்டியல் இனத்தை சேர்ந்தவர்களுக்கு எதிராக தீண்டாமையை பின்பற்றுபவர்கள் மீது நட வடிக்கை எடுக்க உத்தரவிட வேண்டும் என்றும் குறிப்பிட்டு இருந்தார்.

கடந்த 9-ந்தேதி தாக்கல் செய்த இந்த மனு நீதிபதி பரேஷ் உபாத்யா கிருஷ்ணன் ராமசாமி முன்பு விசாரணைக்கு வந்தது. இந்த மனுவில் உள்ள வி‌ஷயம் உண்மையாக இருந்தால் பெரும் அதிர்ச்சி தரும் வி‌ஷயமாகும். எனவே இது தொடர்பாக விசாரணை நடத்தி 4 வாரங்களுக்குள் அறிக்கை சமர்ப்பிக்க நீதிபதிகள் மாவட்ட கலெக்டருக்கு உத்தரவிட்டனர்.

இந்த நிலையில் இன்று புதுக்கோட்டை கோட்டாட்சியர் அபிநயா தனது அலுவலகத்தில் வைத்து விசாரணையை தொடங்கினார். இதில் புதுப்பட்டி கிராமத்தை சேர்ந்த பட்டியல் இனத்தை சேர்ந்தவர்கள், கோர்ட்டில் மனு தாக்கல் செய்த செல்வம் மற்றும் முடிதிருத்தும் சலூன் கடை வைத்திருப்பவர்கள் நேரில் ஆஜராக உத்தரவிடப்பட்டு இருந்தது.

அதன்படி இன்று காலை புதுக்கோட்டையில் உள்ள வருவாய் கோட்டாட்சியர் அலுவலகத்தில் அவர்கள் நேரில் ஆஜரானார்கள். தற்போதைய சூழ்நிலையில் புதுப்பட்டி பகுதி பட்டியலின் மக்களின் பாதுகாப்பு அடிப்படையாக கொண்டு நேரில் அந்த கிராமத்திற்கு சென்று விசாரணை நடத்தப்படவில்லை.

பட்டியலின் மக்களின் எண்ண கருத்தின் அடிப்படையில் வருகிற திங்கட்கிழமை நேரில் புதுப்பட்டி கிராமத்திற்கு சென்று கள ஆய்வு நடத்தி, கோட்டாட்சியர் அபிநயா விசாரணை நடத்த இருக்கிறார். தொடர்ந்து அங்கு வசிக்கும் அனைத்து தரப்பு மக்களிடமும் கருத்து கேட்டு அடுத்த கட்ட நடவடிக்கை எடுக்கப்படும் என்று தெரிவிக்கப்பட்டுள்ளது.

பட்டியலினத்தை சேர்ந்தவர்களுக்கு முடி திருத்தம் செய்வதில் சாதிய பாகுபாடு காட்டப்படுவதாக எழுந்துள்ள இந்த புகார் புதுக்கோட்டை மாவட்டத்தில் பெரும் பரபரப்பை ஏற்படுத்தி உள்ளது.