நீலகிரி

ஊட்டி:

நீலகிரி மாவட்டத்தில் நிலவும் இதமான காலநிலை மற்றும் இயற்கை வளம் மிகுந்த வனப்பகுதிகள் மற்றும் சுற்றுலா தலங்களை கண்டு ரசிக்க தமிழகத்தின் பிற மாவட்டங்கள், வெளி மாநிலங்கள் மட்டுமின்றி வெளிநாடுகளில் இருந்தும் சுற்றுலா பயணிகள் வருவார்கள்.

சுற்றுலா பயணிகளை கவரும் விதமாக ஆண்டு தோறும் மே மாதத்தில் ஊட்டி தாவரவியல் பூங்காவில் மலர் கண்காட்சி நடத்தப்பட்டு வருகிறது.

கடந்த 2 ஆண்டுகளாக கொரோனா காரணமாக ஆன்லைன் வாயிலாக கண்காட்சி நடந்தது. மக்கள் வீட்டில் இருந்தபடி தாவரவியல் பூங்காவில் வைக்கப்பட்டிருந்த பல்வேறு வண்ண செடிகளை கண்டு ரசித்தனர்.

தற்போது தொற்று முழுவதும் குறைந்து சுற்றுலா யணிகள் வருகையும் கடந்த சில மாதங்களாக அதிகரித்த வண்ணம் உள்ளது.

இதையடுத்து 2 ஆண்டுகளுக்கு பிறகு ஊட்டி தாவரவியல் பூங்காவில் 124-வது மலர் கண்காட்சி அடுத்த மாதம் 20-ந் தேதி முதல் 24-ந் தேதி வரை 5 நாட்கள் நடக்கிறது.

மலர் கண்காட்சி தேதி அறிவிக்கப்பட்டதை அடுத்து தாவரவியல் பூங்காவில் முன்னேற்பாடு பணிகள் தீவிரமாக நடைபெற்று வருகிறது. தாவரவியல் பூங்காவில் இந்த ஆண்டு விழாவின் சிறப்பு அம்சமாக 35 ஆயிரம் மலர் தொட்டிகளில் ஓரியண்டல் லில்லி, ஏசியாடிக் லில்லி, கேலஞ்சியோடு, இன்கா மேரிகோல்டு, பிரெஞ்சு மேரிகோல்டு, பிளாக்ஸ், பெட்டுனியா, சால்வியா, பெகோனியா, செம்பா, புளோரன்ஸ், ஆஸ்டர், பால்சம், க்ரைசாந்திமம் போன்ற மலர்கள் பொதுமக்களின் பார்வைக்கு வைக்கப்பட உள்ளது. இதற்கான ஏற்பாடுகள் முழு வீச்சில் நடந்து வருகிறது.

இதுதவிர சுற்றுலா பயணிகளை மகிழ்விக்க பூங்காவில் வண்ண மலர்த் தொட்டிகள் பல வடிவங்களில் காட்சிப்படுத்தும் பணி நடந்து வருகிறது.

கண்காட்சியில் பல வண்ண மலர்களை கொண்டு சுற்றுலா பயணிகளை கவரும் வகையில் விலங்குகள், பல்வேறு வடிவிலான பொருட்கள் வடிவமைக்கும் பணியும் நடக்கிறது. பூங்காவில் உள்ள கண்ணாடி மாளிகையிலும் மலர் செடிகள், அரிய வகை தாவரங்களும் வைக்கப்பட்டு வருகிறது.

2 ஆண்டுகளுக்கு பிறகு நடப்பதால் சுற்றுலா பயணிகள், குழந்தைகளை கவரும் வகையில் தாவரவியல் பூங்கா முழுவதும் அழகுபடுத்தும் பணியும் நடக்கிறது. இந்த பணிகளில் தோட்டக்கலை அதிகாரிகள், பணியாளர்கள் ஈடுபட்டு வருகின்றனர்.

இந்த நிலையில் விடுமுறை தினமான நேற்று முன்தினம் மற்றும் நேற்று ஆகிய 2 நாட்களில் ஊட்டியில் உள்ள சுற்றுலா தலங்களில் சுற்றுலா பயணிகள் கூட்டம் அலைமோதியது. தாவரவியல் பூங்கா, ரோஜா பூங்கா, பைக்காரா படகு இல்லம், ஊட்டி படகு இல்லம், தொட்டபெட்டா உள்ளிட்ட அனைத்து சுற்றுலா தலங்களிலும் எங்கு பார்த்தாலும் சுற்றுலா பயணிகளாகவே காணப்பட்டனர்.

குதிரைபந்தயம், மலர் கண்காட்சி, ரோஜா, காய்கறிகள் கண்காட்சி, பழ கண்காட்சி வருகிற நாட்களில் நடைபெற உள்ளதால் நீலகிரிக்கு வரும் சுற்றுலா பயணிகள் எண்ணிக்கை அதிகரிக்கும் என எதிர்பார்க்கப்படுகிறது.

நீலகிரி:

தமிழகத்தில் கோடைக்காலம் துவங்கியுள்ளதால், பெரும்பாலான மாவட்டங்களில் வறண்ட வானிலை நிலவி வருகிறது. தென் மாவட்டங்களில் கடந்த ஓரிரு தினங்களாக பரவலாக மழை பெய்து வருகிறது. இந்த நிலையில் ஊட்டி உள்ளிட்ட சுற்றுலா தளங்களில் சுற்றுலா பயணிகளின் வருகை அதிகரித்துள்ளது.

அதிலும் குறிப்பாக வார இறுதி நாட்களான சனி, ஞாயிறு ஆகிய 2 தினங்களில், நீலகிரி மாவட்டத்தில் உள்ள சுற்றுலா தளங்களை 60 ஆயிரத்துக்கும் மேற்பட்ட சுற்றுலா பயணிகள் கண்டு ரசித்துள்ளனர். தோட்டக்கலைத்துறைக்கு சொந்தமான தாவிரவியல் பூங்கா, ரோஜா பூங்கா உள்ளிட்ட 7 சுற்றுலா தளங்களை 36 ஆயிரம் பேர் பார்வையிட்டுள்ளனர். அதே போல் சுற்றுலாத்துறை சொந்தமான சுற்றுலா தளங்களை சுமார் 25 ஆயிரம் பேர் கண்டு ரசித்துள்ளனர்.

குன்னூர்:

நீலகிரி மாவட்டத்தில் கடந்த சில தினங்களாக பகல் நேரங்களில் கடும் வெயிலும், மாலை நேரங்களில் இதமான காலநிலையும் நிலவி வருகிறது.

குன்னூர் மற்றும் அதனை சுற்றியுள்ள பகுதிகளில் நேற்று காலை கடுமையான வெயில் நிலவியது. மதியத்திற்கு பிறகு வானத்தில் மேகமூட்டங்கள் திரண்டு, மழை பெய்வது போல் இருந்தது. இரவில் திடீரென மழை பெய்ய தொடங்கியது. சாரல் மழையாக தொடங்கி பலத்த மழையாக கொட்டி தீர்த்தது.

சுமார் 1 மணி நேரத்திற்கும் மேலாக மழை பெய்தது. இந்த மழை குன்னூர் பஸ் நிலைய சாலை உள்ளிட்ட முக்கிய சாலைகள், தெருக்களில் தண்ணீர் பெருக்கெடுத்து ஓடியது. இதனால் வாகன ஓட்டிகள் மிகவும் சிரமம் அடைந்தனர்.

இதேபோல் குன்னூரை சுற்றியுள்ள கிராம பகுதிகளிலும் மிதமான மழை பெய்தது.

கோத்தகிரி, கட்டபெட்டு, கொடநாடு, கீழ்தட்டபள்ளம், சோலூர் மட்டம் பகுதிகளில் இரவு 10 மணியளவில் இடி மின்னலுடன் கனமழை பெய்தது. சுமார் 3 மணி நேரத்திற்கும் மேலாக நீடித்த இந்த மழை காரணமாக தாழ்வான பகுதிகளில் தண்ணீர் தேங்கி நின்றது. சாலைகளில் தண்ணீர் ஆறாக பெருக்கெடுத்து ஓடியது.

இன்று காலையும் தொடர்ந்து மழை பெய்து வருகிறது. இந்த திடீர் மழையால் மாவட்டத்தில் நிலவி வந்த வெப்பம் தணிந்து குளிர்ச்சியான காலநிலை நிலவுகிறது. மேலும் தேயிலை செடிகளில் ஏற்பட்ட கொப்பள நோய்களும் சரியாகி வருவதால் விவசாயிகள் மகிழ்ச்சி அடைந்துள்ளனர்.

கூடலூர் அடுத்த எருமாடு பகுதியிலும் மழை பெய்தது. சாரல் மழை பெய்ய தொடங்கி, சிறிது நேரத்தில் ஆலங்கட்டி மழையும் பெய்தது. மாவட்டத்தின் பிற பகுதிகளான மஞ்சூர், கூடலூர் உள்ளிட்ட பகுதிகளில் கனமழை கொட்டி தீர்த்தது.

வால்பாறை பகுதியில் நேற்று லேசான மழை பெய்யும், சுற்றுவட்டார பகுதிகளில் பலத்த காற்று மற்றும் இடி, மின்னலுடன் கனமழை பெய்தது. இந்த மழையால் மார்க்கெட்டிற்கு வந்தவர்கள், பள்ளி சென்று வீடு திரும்பிய மாணவர்கள் அனைவரும் மழையில் நனைந்தனர். சாலைகளிலும் வெள்ளம் கரைபுரண்டு ஓடியது.

இதேபோல் பொள்ளாச்சி பகுதியிலும் மழை பெய்தது. அரை மணி நேரத்திற்கும் மேலாக நீடித்த மழையால் வெப்பம் தணிந்து குளிர்ந்த காற்று வீசியது. இதனால் பொதுமக்கள் மிகவும் மகிழ்ச்சி அடைந்தனர்.