ஈரோடு

கொடுமுடி:

ஈரோடு மாவட்டம் கொடுமுடி மன்னதம்பாளையம் காவிரி ஆற்றில் மத்திய அரசின் ஜல்ஜீவன் திட்டத்தின் கீழ் கூட்டு குடிநீர் திட்ட பணிகள் தனியார் நிறுவனத்தால் ஒப்பந்த அடிப்படையில் நடைபெற்று வருகிறது.

இங்கு சேலம் மாவட்டம் மேட்டூர் குஞ்சாண்டியூரை சேர்ந்த வெங்கடேஷ் என்பவர் ஒப்பந்த அடிப்படையில் பாறைகளை வெடி வைத்து தகர்த்து குழி தோண்டும் பணி மேற்கொண்டு வருகிறார். அவரிடம் மேட்டூர் பெரியசோரகையை சேர்ந்த அருள் என்பவரது மகன் குமார் (35), மாதையன் என்பவரது மகன் ரவி (26) ஆகியோர் தொழிலாளர்களாக வேலை பார்த்து வருகிறார்கள்.

இன்று காலை 8.30 மணி அளவில் குமார், ரவி ஆகியோர் வழக்கம்போல் காவிரி ஆற்றில் கம்ப்ர‌ஷர் வாகனங்கள் மூலம் பாறைகளில் குழி தோண்டும் பணியில் ஈடுபட்டனர்.

அப்போது ஏற்கனவே பாறையில் பழைய குழியில் வைக்கப்பட்டிருந்த வெடிக்காத வெடி ஒன்று திடீரென்று வெடித்து விபத்தானது. இதில் அங்கு வேலை பார்த்து கொண்டிருந்த குமார் முகம் மற்றும் தலையில் பலத்த காயம் அடைந்து சம்பவ இடத்திலேயே பலியானார். இந்த விபத்தில் ரவி பலத்த காயம் அடைந்தார்.

இதுபற்றி தெரிய வந்ததும் சம்பவ இடத்துக்கு மலையம்பாளையம் இன்ஸ்பெக்டர் ஜீவானந்தம் மற்றும் போலீசார் விரைந்து சென்று காயம் அடைந்த ரவியை மீட்டு சிகிச்சைக்காக ஈரோடு அரசு ஆஸ்பத்திரிக்கு அனுப்பி வைத்தனர். மேலும் வெடி விபத்தில் பலியான குமாரின் உடலை மீட்டு பிரேத பரிசோதனைக்காக பெருந்துறை மருத்துவக்கல்லூரி மருத்துவமனைக்கு அனுப்பி வைத்தனர். இந்த சம்பவத்தால் அந்த பகுதியில் பரபரப்பான சூழ்நிலை நிலவியது.

ஈரோடு:

ஈரோடு அனைத்து மகளிர் போலீஸ் நிலையத்தில் இன்ஸ்பெக்டராக பணியாற்றி வருபவர் நீலாவதி (44). இவருக்கு ஒரு மகன், ஒரு மகள் உள்ளனர். இவர் தனது குடும்பத்தினருடன் சூரம்பட்டி வலசு, காந்திஜி வீதியில் வசித்து வருகிறார்.

இந்நிலையில் கடந்த 13-ந் தேதி அனைத்து மகளிர் போலீஸ் நிலையத்தில் நீலாவதி பணியில் இருந்தார். அப்போது காதல் கலப்பு திருமணம் செய்துகொண்ட புதுமணத் தம்பதிகள் பாதுகாப்பு கேட்டு தஞ்சம் அடைந்தனர்.

இன்ஸ்பெக்டர் நீலாவதி இருவீட்டு பெற்றோர்களையும் வரவழைத்து பேச்சுவார்த்தை நடத்தினார். அப்போது அந்த பெண் தனது காதல் கணவருடன் செல்வதாக கூறியதால் அந்த பெண்ணை காதல் கணவருடன் அனுப்பி வைத்தார்.

புதுமண தம்பதிகள் ஈரோடு கள்ளுக்கடை மேடு பகுதியில் டீ குடித்துக்கொண்டிருந்தபோது பெண்ணின் உறவினர்கள் அவரைக் காரில் கடத்திச் சென்றனர்.

இதுகுறித்த புகாரின்பேரில் சூரம்பட்டி போலீசார் பெண்ணின் பெற்றோர், உறவினர்கள் உள்பட 30 பேர் மீது வழக்கு பதிவு செய்தனர். பின்னர் புதுப்பெண் மீட்கப்பட்டு கோர்ட்டில் ஆஜர்படுத்தினர். அப்போது அந்தப் பெண் தன்னை பெற்றோர் கடத்தவில்லை என்றும் தனது விருப்பத்தின் பேரில்தான் அவர்களுடன் சென்றேன் எனவும், பெற்றோருடன் செல்ல விரும்புவதாகவும் கூறினார். இதனைத் தொடர்ந்து கோர்ட்டு உத்தரவுப்படி அவர் பெற்றோருடன் அனுப்பி வைக்கப்பட்டார்.

இதற்கிடையே காதல் திருமணம் பெண் கடத்தப்பட்டது சம்பந்தமாக சரியான நடவடிக்கை எடுக்கவில்லை எனக் கூறியும், இதுகுறித்து உயர் அதிகாரிகளுக்கு முறையாக தகவல் தெரிவிக்கவில்லை என கூறியும் உயர் அதிகாரி ஒருவர் வாக்கி டாக்கியில் இன்ஸ்பெக்டர் நீலாவதியை கடுமையாக எச்சரித்ததாக கூறப்படுகிறது.

இதில் மனவேதனை அடைந்த நீலாவதி நேற்று முன்தினம் பணியில் இருந்தபோது திடீரென உயர்அதிகாரியை செல்போனில் தொடர்பு கொண்டு தான் தற்கொலை செய்து கொள்ளப் போவதாக தெரிவித்து உயர் அதிகாரிகளுக்கு குறுஞ்செய்தியும் அனுப்பினார்.

பின்னர் சோலார் பகுதியில் உள்ள தனது தோழி வீட்டுக்கு சென்ற இன்ஸ்பெக்டர் நீலாவதி திடீரென கீழே மயங்கி விழுந்தார். பின்னர் அவர் சிகிச்சைக்காக ஈரோட்டில் உள்ள தனியார் மருத்துவமனையில் அனுமதிக்கப்பட்டார். தொடர் சிகிச்சையில் இருந்த நீலாவதி நேற்று குணமடைந்து வீடு திரும்பினார். ஆனால் பணிக்கு திரும்பாமல் வீட்டில் இருந்து வருகிறார்.

இந்நிலையில் நீலாவதி பேசிய ஆடியோ ஒன்று சமூக வலைதளங்களில் வைரலாக பரவி வருகிறது. அந்த ஆடியோவில் அவர் உயர் போலீஸ் அதிகாரி, தனிப்பிரிவு ஏட்டு ஆகியோரால் நான் மனஉளைச்சலில் உள்ளேன். என்னை பற்றி உயர் அதிகாரிகளுக்கு தவறான தகவல்களை தெரிவித்துள்ளனர். இதனால் என்னை ஆயுதப்படைக்கு போக சொல்லிவிட்டு ஜீப்பை பறித்து கொண்டனர். இதனால் மனஅழுத்தம் காரணமாக நான் தற்கொலை செய்வதாக கூறி விட்டு சென்றேன். மேலும் இதுதொடர்பாக தமிழக முதல்-அமைச்சர், டி.ஜி.பி.யை சந்தித்து புகார் தெரிவிப்பேன் என்றும் அதில் கூறி இருந்தார். இந்த சம்பவம் போலீசார் மத்தியில் பெரும் பரபரப்பை ஏற்படுத்தியது.

இதுகுறித்து ஈரோடு மாவட்ட போலீஸ் சூப்பிரண்டு சசிமோகன் கூறியதாவது:-

இன்ஸ்பெக்டர் நீலாவதி ஒரு உயர் அதிகாரி மீதும், தனிப்பிரிவு ஏட்டு மீதும் புகார் தெரிவித்துள்ளார். இந்த விவகாரத்தில் உண்மை நிலையை தெரிந்து கொள்ளும் வகையில் டவுன் டி.எஸ்.பி. ஆனந்தகுமார் தலைமையில் விசாரணை குழு அமைக்கப்பட்டுள்ளது.

இதேபோல் இன்ஸ்பெக்டர் நீலாவதி மீதும் பல்வேறு புகார்கள் எழுந்துள்ளது. விசாரணைக் குழுவினர் உயர் அதிகாரி, தனிப்பிரிவு ஏட்டு, இன்ஸ்பெக்டர் நீலாவதி ஆகியோரிடம் தனித்தனியாக விசாரணை நடத்துவார்கள். விசாரணை முடிவில் அடுத்தகட்ட நடவடிக்கை எடுக்கப்படும்.

இவ்வாறு அவர் கூறினார்.

தற்கொலை செய்வதாக கூறி சென்ற இன்ஸ்பெக்டர் நீலாவதி விடுமுறை குறித்து இதுவரை முறையான எந்த தகவலும் தெரிவிக்கவில்லை என்பது குறிப்பிடத்தக்கது.

அந்தியூர்:

ஈரோடு மாவட்டம் வெள்ளிதிருப்பூர் அருகே உள்ள பூசாரியூர் வள்ளுவர் தோட்டத்தை சேர்ந்தவர் ஜெயபிரகாஷ். இவரது மனைவி கிருஷ்ணவேணி. இவர்களுக்கு கீதா (17) என்ற மகளும், விஷ்வா (14) என்ற மகனும் உள்ளனர்.

கீதா வெள்ளிதிருப்பூரில் உள்ள அரசு மேல்நிலைப்பள்ளியில் பிளஸ்-2 படித்து வந்தார். விஷ்வா 9-ம் வகுப்பு படித்து வருகிறார். கடந்த சில நாட்களாக மாணவி கீதா பள்ளிக்கு செல்லாமல் வீட்டிலேயே இருந்து வந்தார். பெற்றோர் பள்ளிக்கு செல்ல கூறியதற்கு செல்போன் வாங்கி தந்தால்தான் பள்ளிக்கு செல்வேன் என்று மாணவி கீதா கூறினார்.

இதையடுத்து ஜெயபிரகாஷ் தனது மகளுக்கு செல்போன் வாங்கி கொடுத்தார். இதையடுத்து கீதா 2 நாட்கள் மட்டும் பள்ளிக்கு சென்று விட்டு மீண்டும் வீட்டிலேயே இருந்து வந்தார்.

இதையடுத்து பெற்றோர் பள்ளிக்கு செல்லுமாறு பல முறை கீதாவை கண்டித்தனர். ஆனால் அவர் பள்ளிக்கு செல்லாமல் வீட்டிலேயே இருந்து வந்தார்.

சம்பவத்தன்று ஜெயபிரகாஷ் தனது மனைவியுடன் தோட்டத்துக்கு புறப்பட்டார். அப்போது தனது மகளை இன்று பள்ளிக்கு செல்ல வேண்டும் என்று கூறி விட்டு சென்றார். மீண்டும் அவர் தனது மனைவியுடன் இரவு 7 மணி அளவில் தனது வீட்டிற்கு திரும்பினார்.

அப்போது வீட்டில் இருந்த கட்டிலில் மாணவி கீதா மயக்க நிலையில் படுத்து கிடந்தார். இதுகுறித்து அவரிடம் விசாரித்தபோது தான் வீட்டில் இருந்த களை கொல்லி (வி‌ஷம்) மருந்தை குடித்து விட்டதாக கூறினார்.

இதைக்கேட்டு அதிர்ச்சி அடைந்த பெற்றோர் கீதாவை மீட்டு அந்தியூரில் உள்ள ஒரு தனியார் ஆஸ்பத்திரிக்கு கொண்டு வந்து சேர்த்தனர். அங்கு சிகிச்சை பெற்று வந்த கீதா சிகிச்சை முடிந்து வீடு திரும்பினார்.

இந்நிலையில் தொடர்ந்து கீதாவுக்கு இருமல் வந்து கொண்டே இருந்தது. இதையடுத்து அவரை ஈரோட்டில் உள்ள ஒரு தனியார் ஆஸ்பத்திரியில் சேர்த்தனர். பின்னர் மேல்சிகிச்சைக்காக சென்னை ராஜூவ்காந்தி அரசு மருத்துவமனைக்கு கொண்டு சென்றனர். அங்கு சிகிச்சை பெற்று வந்த மாணவி திடீரென இறந்து விட்டார்.

இதுகுறித்து வெள்ளிதிருப்பூர் போலீசார் வழக்குப்பதிவு செய்து விசாரணை நடத்தி வருகின்றனர்.