கடலூர்

பண்ருட்டி:

பண்ருட்டியை அடுத்த சாத்திப்பட்டு கிராமத்தை சேர்ந்தவர் சண்முகம் (வயது 45). அண்ணாகிராமம் வட்டார த.மா.கா. துணைத்தலைவர். சட்டசபை தேர்தலில் அந்த கட்சி சார்பில் போட்டியிட விருப்ப மனு செய்துள்ளார்.

நேற்று முன்தினம் இரவு சண்முகம் பண்ருட்டியில் இருந்து மோட்டார் சைக்கிளில் சென்ற போது, காரில் முகமூடி அணிந்து வந்த மர்ம கும்பல் சண்முகத்தை கடத்தி சென்றது. மேலும் அவரை மிரட்டி ரூ.1 லட்சத்தை பறித்து கொண்டு சண்முகத்தை விடுவித்து விட்டு தப்பி சென்றனர்.

இதுபற்றி பண்ருட்டி போலீசில் சண்முகம் புகார் செய்தார். அதன்பேரில் போலீசார் வழக்குபதிவு செய்தனர். இந்த சம்பவம் தொடர்பாக பண்ருட்டி பகுதியை சேர்ந்த ராஜசேகர், மோகன், கனகசபை ஆகியோரை பிடித்து விசாரணை நடத்தி வருகின்றனர்.

பெண்ணாடம்:

கடந்த சட்டசபை தேர்தலில் திட்டக்குடி தனித் தொகுதியில் தே.மு.தி.க. சார்பில் போட்டியிட்டு வெற்றி பெற்றவர் தமிழழகன். இவர் தே.மு.தி.க. அதிருப்தி எம்.எல்.ஏ.வாக இருந்தார்.

இவர் கடந்த மாதம் பெண்ணாடத்தில் உள்ள தனது வீட்டில் இருந்த போது அவருக்கு செல்போன் மூலம் கொலை மிரட்டல் வந்தது. இது குறித்து அவர் பெண்ணாடம் போலீசில் புகார் செய்தார். போலீசார் விசாரணை நடத்தியதில் தமிழழகன் எம்.எல்.ஏ.வுக்கு கொலை மிரட்டல் விடுத்து பேசியது சென்னை விருகம்பாக்கம் தே.மு.தி.க. எம்.எல்.ஏ. பார்த்தசாரதி என்பவரது செல்போனில் இருந்து பேசியது தெரியவந்தது.

இதையடுத்து பார்த்தசாரதி எம்.எல்.ஏ. மீது பெண்ணாடம் போலீசார் வழக்கு பதிவு செய்து அவரை கைது செய்ய நடவடிக்கை மேற்கொண்டனர்.

இதைத் தொடர்ந்து பார்த்தசாரதி எம்.எல்.ஏ. முன்ஜாமீன் கேட்டு சென்னை ஐகோர்ட்டில் மனு தாக்கல் செய்தார். மனு மீது விசாரணை நடத்திய சென்னை ஐகோர்ட்டு பெண்ணாடம் போலீசில் தினமும் ஆஜராகி கையெழுத்து விட வேண்டும் என்று நிபந்தனை ஜாமீன் வழங்கியது, அதன்படி பார்த்தசாரதி எம்.எல்.ஏ. பெண்ணாடம் போலீஸ் நிலையத்தில் ஆஜராகி தினமும் கையெழுத்திட்டு வந்தார். இதற்கிடையே நிபந்தனை ஜாமீனை தளர்த்த வேண்டும் என்று பார்த்தசாரதி எம்.எல்.ஏ. மீண்டும் சென்னை ஐகோர்ட்டில் மனு தாக்கல் செய்தார்.

மனு மீது விசாரணை நடத்திய சென்னை ஐகோர்ட்டு எந்த போலீஸ் நிலையத்தில் புகார் அளிக்கப்பட்டதோ அந்த போலீஸ் நிலையத்திற்கு உட்பட்ட கோர்ட்டில் ஆஜராகி நிபந்தனை ஜாமீனை தளர்த்துமாறு மனு தாக்கல் செய்ய வேண்டும் என்று சென்னை ஐகோர்ட்டு உத்தரவிட்டது.

அதன்படி பார்த்தசாரதி எம்.எல்.ஏ. இன்று திட்டக்குடி ஒருங்கிணைந்த கோர்ட்டில் ஆஜர் ஆனார்.

புதுச்சேரி:

புதுவை உருளையன்பேட்டை போலீஸ் நிலையத்தில் சப்–இன்ஸ்பெக்டராக பணியாற்றி வந்தவர் ஆறுமுகம். இவர் புதுவை நெல்லிதோப்பு அருள்படையாட்சி வீதியை சேர்ந்த என்ஜினீயர் செந்தில் என்பவரிடம் பேரம்பேசி ரூ.10 ஆயிரம் லஞ்சம் வாங்கும் வீடியோ காட்சி சமூக வலைதளங்களில் பரவியது.

என்ஜினீயர் செந்திலுக்கும் அவரிடம் வேலை பார்த்த குமார் என்பவருக்கும் இடையே சம்பள பண பிரச்சினை இருந்தது. இதுதொடர்பாக செந்தில் மீது குமார் வன்கொடுமை தடுப்பு சட்டத்தில் புகார் செய்துள்ளார்.

இந்த புகார் தொடர்பாக சமாதானம் பேச சப்–இன்ஸ்பெக்டர்ஆறுமுகம் என்ஜினீயர் செந்திலை அழைத்துள்ளார். அப்போது என்ஜினீயர் செந்திலிடம் சப்–இன்ஸ்பெக்டர் ஆறுமுகம் வழக்கில் இருந்து தப்பிக்க ரூ.10 ஆயிரம் லஞ்சம் கேட்டு பெற்றார்.

இந்த லஞ்ச பணத்தை கொடுக்கும் காட்சியே வீடியோவாக சமூக வலைதளங்களில் வெளியானது. லஞ்ச பணத்தை கொடுப்பவர் யார்? என்று தெரியவில்லை. ஆனால், சாதாரண உடையில் உள்ள சப்–இன்ஸ்பெக்டர் ஆறுமுகம் அதனை பெறுவது தெளிவாக தெரிகிறது.

லஞ்ச பணத்தை பெறும் சப்–இன்ஸ்பெக்டர் அதனை மேஜை டிராயரில் வைக்கிறார். இந்த வீடியோ காட்சியே பேஸ்புக் மற்றும் வாட்ஸ் அப்பில் பரவியது. அதோடு இது புதுவை காவல்துறையிலும் பெரும் அதிர்ச்சியை உருவாக்கியது.

இது தொடர்பாக சீனியர் போலீஸ் சூப்பிரண்டு சந்திரன், போலீஸ் சூப்பிரண்டு தெய்வசிகாமணி ஆகியோர் விசாரணை நடத்தினர். விசாரணையில் சப்–இன்ஸ்பெக்டர் ஆறுமுகம் லஞ்சம் வாங்கியது உறுதி செய்யப்பட்டது.

இதுகுறித்து போலீஸ் ஐ.ஜி.க்கு விளக்க அறிக்கை அனுப்பப்பட்டது. இதன் மீது ஐ.ஜி. பிரவீன்ரன்ஜன் நடவடிக்கை எடுத்து சப்–இன்ஸ்பெக்டர் ஆறுமுகத்தை சஸ்பெண்டு செய்து உத்தரவிட்டார்.

புதுச்சேரி:

புதுவை உருளையன்பேட்டை சப்–இன்ஸ்பெக்டராக இருப்பவர் ஆறுமுகம். இவர் போலீஸ் நிலையத்தில் தனது இருக்கையில் இருந்தபடியே பேரம் பேசி லஞ்சம் வாங்கும் வீடியோ பதிவு நேற்று மாலை முதல் சமூக வலைதளங்களான பேஸ்புக், வாட்ஸ்–அப் ஆகியவற்றில் பரவியது.

2 நிமிடம் 50 நொடிகள் இந்த காட்சி ஓடுகிறது. உருளையன் பேட்டை போலீஸ் நிலையத்தில் தனது இருக்கையில் சப்–இன்ஸ்பெக்டர் ஆறுமுகம் அமர்ந்துள்ளார். அவரது எதிரே ஒரு நபர் அமர்ந்து பேசுகிறார். அவரது முகம் வீடியோவில் பதிவாகவில்லை. அப்போது ஒருவர் வந்து சப்–இன்ஸ்பெக்டரிடம் கையெழுத்து பெறுகிறார். இதைத் தொடர்ந்து சப்–இன்ஸ்பெக்டர் ஆறுமுகம் எதிரில் உள்ள நபரிடம் கொடுங்கள் என கை நீட்டுகிறார்.

எதிரே இருக்கும் நபர் எவ்வளவு? என கேட்கிறார். சப்–இன்ஸ்பெக்டர் மெல்லிய குரலில், ரூ.30 ஆயிரம் தரும் படி கூறுகிறார். எதிரே உள்ள நபர் ஆயிரம் ரூபாய் தாளை ஒன்று, இரண்டு என 30 தாள்களை எண்ணி ஆறுமுகத்திடம் கொடுத்தார்.

இதை குமாரிடம் கொடுத்து விடுவீர்களா? என கேள்வி கேட்கிறார். தொடர்ந்து மீண்டும் எவ்வளவு? என கேட்கிறார். அதற்கு ஆறுமுகம் சைகையில் 10 விரலை காட்டுகிறார். யார், யாருக்கு? என கேட்கிறார். அதற்கு ஆறுமுகம், மொத்தமாகத்தான் என கூறுகிறார்.

வேறு யாராவது வந்து என்னிடம் கேட்டால் நான் என்ன சொல்வது? இது உங்களுக்கு மட்டும்தானா? என அந்த நபர் கேட்கிறார். அதற்கு ஆறுமுகம், உங்கள் வேலையை பாருங்க, நாங்க பார்த்துக்கொள்கிறோம் என்கிறார்.

இதையடுத்து எதிரே இருந்த நபர் இன்ஸ்பெக்டர், எஸ்ஐ, ஏட்டு, ரைட்டர் எல்லாருக்கும் கொடுத்துவிடுவீர்களா? என கேட்கிறார். அதற்கு ஆறுமுகம், சைகையாலேயே கொடுங்கள் என கூறுகிறார். இதையடுத்து அந்த நபர் மீண்டும் ஆயிரம் தாள்களை ஒன்று, இரண்டு என எண்ணி 10 தாள்களை கொடுக்கிறார். அப்போது குமாரிடம் ஸ்டேட்மெண்ட் வாங்கிவிட்டீர்களா? என அந்த நபர் கேட்கிறார்.

இதைத்தொடர்ந்து ஆறுமுகம் குமாரை கூப் பிடுகிறார்? அவர் வந்தவுடன் ஒரு கோப்பில் கையெழுத்து வாங்கிவிட்டு, பணம் கொடுத்த நபரிடமும் ஆறுமுகம் கையெழுத்து வாங்குகிறார். வாங்கிய பணத்தை ஆறுமுகம் தனது டிராயரில் வைத்துக் கொள்கிறார். இவ்வாறு அந்த வீடி யோவில் காட்சிகள் ஓடுகிறது.

நெல்லித்தோப்பு அருள் படையாட்சி வீதியை சேர்ந்தவர் செந்தில். என்ஜினீயரான இவரிடம் குமார் என்பவர் வேலை பார்த்து வந்தார். அவருக்கும், என்ஜினீயருக்கும் ஆட்களுக்கு சம்பளம் வழங்கியதில் தகராறு ஏற்பட்டுள்ளது. இதையடுத்து தாழ்த்தப்பட்ட வகுப்பைச் சேர்ந்த குமார், வன்கொடுமை தடுப்பு பிரிவின் கீழ் வழக்குப் பதிவு செய்யும்படி புகார் கொடுத்தார். இந்த புகாரின் மீது விசாரணை நடந்து வந்தது.

இந்நிலையில் என்ஜினீயர் செந்திலை சப்–இன்ஸ்பெக்டர் ஆறுமுகம் போனில் அழைத்து, இந்த புகாரை பதிவு செய்யாமல் குமாருடன் சமாதான பேச்சுவார்த்தை நடத்த அழைத்ததாக கூறப்படுகிறது. அதன்பின் நடந்த சம்பவங்களையே செந்தில் தனது செல்போன் படம்பிடித்துள்ளார்.

இந்த வீடியோ சமூக வலைதளங்களில் பெரும் சர்ச்சையை ஏற்படுத்தியுள்ளது. இதுதொடர்பாக காவல்துறை உயர் அதிகாரிகள் விசாரணையை தொடங்கியுள்ளனர்.

விருத்தாசலம்:

விருத்தாசலம் அருகே உள்ள தொரவலூர் கிராமத்தை சேர்ந்தவர் வேலாயுதம், தச்சு தொழிலாளி. இவரது மகள் அனிதா (வயது 16). அதே பகுதியில் உள்ள அரசு மேல்நிலை பள்ளியிள் 10–ம் வகுப்பு மாணவி.

அனிதா, எஸ்.எஸ்.எல்.சி. பொது தேர்வு எழுதிவந்தார். ஆங்கிலம் தேர்வை அவர் சரியாக எழுதவில்லை. இதனால் விரக்தியடைந்த அனிதா வீட்டில் யாரும் இல்லாத நேரத்தில் தனது உடலில் மண்எண்ணை ஊற்றி தீக்குளித்தார்.

இதில் உடல் கருகியதால் வேதனை பொறுக்கமுடியாமல் அலறினார். அந்த சத்தம் கேட்டு திடுக்கிட்ட அக்கம் பக்கத்தினர் ஓடி வந்தனர். தீயை அணைத்து உயிருக்கு போராடிய அனிதாவை மீட்டு விருத்தாசலம் அரசு ஆஸ்பத்திரியில் சேர்த்தனர்.

பின்னர் மேல் சிகிச்சைக்காக கடலூர் அரசு ஆஸ்பத்திரியில் சேர்க்கப்பட்டார். டாக்டர்கள் தீவிர சிகிச்சையளித்தும் பலனின்றி நேற்று இரவு பரிதாபமாக இறந்தார்.

விருத்தாசலம் போலீசார் வழக்குபதிவு செய்து விசாரணை நடத்தி வருகின்றனர்.

கடலூர்:

முற்போக்கு சிந்தனையாளர் இயக்கம் மற்றும் மக்கள் அதிகாரம் சார்பில் கடலூர் புதிய பஸ் நிலையத்தை புதிய கலெக்டர் அலுவலகம் அருகில் அமைக்கக்கோரி கடலூர் தலைமை தபால் நிலையம் அருகே ஆர்ப்பாட்டம் நடைபெற்றது. இதற்கு மாநில தலைவர் சரவணன் தலைமை தாங்கினார்.

தலைவர் சுந்தரமூர்த்தி, செயலாளர் அல்லிமுத்து, முத்துக்குமரன், மக்கள் அதிகாரம் நகர செயலாளர் நந்தா, பொருளாளர் ஆனந்தி ஆகியோர் முன்னிலை வகித்தனர்.

ஆர்ப்பாட்டத்தில் முற்போக்கு சிந்தனையாளர் இயக்கம் மாநில தலைவர் கு. பாலசுப்பிரமணியன், மக்கள் அதிகாரம் மாநில தலைமை நிர்வாகிகள் பாலு, மாவட்ட செயலாளர் ராசாமணி, துணை செயலாளர் ரவிச்சந்திரன், மாவட்ட செயலாளர் வெங்கடேசன் ஆகியோர் கலந்து கொண்டு கண்டன உரையாற்றினார்கள். இதில் நிர்வாகிகள் விவேகானந்தன், பலராமன், ராஜேஷ் குமார், பாண்டியன், நடராஜன் உள்பட பலர் கலந்து கொண்டனர். முன்னதாக தங்கள் கோரிக்கைகளை வலியுறுத்தி கண்டன கோஷம் எழுப்பினார்கள். முடிவில் இணை செயலாளர் ராஜேஷ் குமார் நன்றி கூறினார்.