நீங்கள் தேடியது "Regional Meteorological Centre"

சென்னை :

மத்திய கிழக்கு அரபிக்கடல் பகுதியில் மிக தீவிர புயலாக நிலவிய 'பிப்பர்ஜாய்' வடக்கு திசையில் நகர்ந்து நேற்று கோவாவில் இருந்து மேற்கு, வடமேற்கு திசையில் 700 கி.மீ. தொலைவிலும், மும்பையில் இருந்து மேற்கு, தென்மேற்கு திசையில் சுமார் 620 கி.மீ. தொலைவிலும், குஜராத் போர்பந்தரில் இருந்து தென், தென்மேற்கு திசையில் சுமார் 600 கி.மீ. தொலைவிலும் நிலை கொண்டது.

இந்த புயல் மேலும் வலுப்பெற்று அடுத்த 24 மணி நேரத்தில் (இன்று) வடக்கு, வடகிழக்கு திசையை நோக்கியும், அடுத்த 3 தினங்களில் வடக்கு, வடமேற்கு திசையை நோக்கியும் நகரக் கூடும் என்று வானிலை ஆய்வு மையம் கணித்துள்ளது. இந்த நிலையில் மேற்கு திசையின் காற்று, வெப்ப சலனம் ஆகிய காரணங்களால் தமிழ்நாட்டில் மழை பெய்யக்கூடும் என்று சென்னை வானிலை ஆய்வு மையம் தெரிவித்துள்ளது.

இதுதொடர்பாக வானிலை ஆய்வு மையத்தின் இயக்குனர் பா.செந்தாமரை கண்ணன் வெளியிட்ட செய்திக்குறிப்பில் கூறியிருப்பதாவது:-

11-ந் தேதி (இன்று) தமிழ்நாடு, புதுச்சேரி மற்றும் காரைக்கால் பகுதிகளில் ஓரிரு இடங்களில் இடி, மின்னலுடன் கூடிய லேசானது முதல் மிதமான மழை பெய்யக்கூடும். 12-ந் தேதி (நாளை) முதல் 14-ந் தேதி (புதன்கிழமை) வரையில் தமிழ்நாடு, புதுச்சேரி மற்றும் காரைக்கால் பகுதிகளில் ஒரு சில இடங்களில் இடி-மின்னலுடன் கூடிய லேசானது முதல் மிதமான மழை பெய்யக்கூடும்.

சென்னை மற்றும் புறநகர் பகுதிகளை பொறுத்தவரையில் அடுத்த 24 மணி நேரத்துக்கு (இன்று) வானம் ஓரளவு மேகமூட்டத்துடன் காணப்படும். நகரின் ஒரிரு இடங்களில் இடி, மின்னலுடன் கூடிய லேசானது முதல் மிதமான மழை பெய்யக்கூடும்.

இவ்வாறு அவர் கூறியுள்ளார்.

தமிழ்நாட்டில் வெப்ப சலனம் காரணமாக ஒரு சில இடங்களில் மழை பெய்துள்ளது. அதிகபட்சமாக திருவள்ளூர் மாவட்டம் ஊத்துக்கோட்டையில் 6 செ.மீ. மழையும், வேலூரில் 5 செ.மீ. மழையும் பதிவாகி உள்ளது. வேலூர் மாவட்டம் விரிஞ்சிபுரம், காட்பாடி, குடியாத்தம், மேலாளத்தூர், திருவண்ணாமலை மாவட்டம் ஆரணி, வெம்பாக்கம், சேத்துப்பட்டு, கோவை மாவட்டம் சின்னக்கல்லார், சின்கோனா, சோலையார், ஈரோடு மாவட்டம் அம்மாபேட்டை, திருவள்ளூர் மாவட்டம் திருவாலங்காடு, ஆர்.கே.பேட்டை, பூண்டி, செங்கல்பட்டு மாவட்டம் திருக்கழுகுன்றம், நீலகிரி மாவட்டம் பில்லிமலை எஸ்டேட், காஞ்சீபுரம் மாவட்டம் காட்டுக்குப்பம் ஆகிய இடங்களிலும் மிதமான மழை பெய்துள்ளது.

சென்னையில் நேற்று பகல் வேளையில் வெயில் கொளுத்தினாலும், மாலை வேளையில் இதமான வானிலை நிலவியது. கருமேகங்கள் தென்பட்டது. எனவே மிதமான மழை வரும் என்ற எதிர்பார்ப்பு ஏற்பட்டது. ஆனால் லேசான துளிகள் மட்டும் விழுந்தது. பெரிய மழை பெய்யவில்லை.

தற்போது 'பிப்பர்ஜாய்' புயல் மையம் கொண்டுள்ள கடல் பகுதிகளில் சூறாவளி காற்று பலமாக வீசக்கூடும் என்பதால் இந்த கடற்கரை பகுதிகளுக்கு மீனவர்கள் மீன்பிடிக்க செல்ல வேண்டாம் என்றும், அரபிக்கடலின் ஆழ்கடலில் உள்ள மீனவர்கள் உடனடியாக கரைக்கு திரும்ப வேண்டும் என்றும் வானிலை ஆய்வு மையம் அறிவுறுத்தி உள்ளது.

சென்னை :

தமிழ்நாட்டில் கோடை வெயிலின் கொடுமை நாளுக்கு நாள் அதிகரித்து வருகிறது. தொடர்ந்து சுட்டெரிக்கும் வெயிலின் தாக்கத்தாலும், அனல் காற்றினாலும் மக்கள் வாடி வதங்கி போய் இருக்கின்றனர். அந்தவகையில் நேற்று தமிழ்நாட்டில் 16 இடங்களில் வெயில் 100 டிகிரியை தாண்டி பதிவாகி இருந்தது. இதில் வேலூரில் அதிகபட்சமாக 107.24 டிகிரி பதிவானது. இதுதவிர நேற்று ஒரே நாளில் கரூரில் இயல்பைவிட 5 டிகிரியும், மதுரை, வேலூர், தூத்துக்குடியில் 4 டிகிரியும் அதிகரித்து வெப்பம் உக்கிரமாக இருந்தது. தமிழ்நாட்டில் 100 டிகிரிக்கு மேல் நேற்று வெயில் பதிவான இடங்கள் வருமாறு:-

சென்னை நுங்கம்பாக்கம் -104.18 டிகிரி

சென்னை மீனம்பாக்கம் -105.26 டிகிரி

ஈரோடு - 102.56 டிகிரி

கரூர் - 103.1 டிகிரி

மதுரை நகரம் - 103.28 டிகிரி

மதுரை விமான நிலையம் - 103.28 டிகிரி

நாகப்பட்டினம் - 101.3 டிகிரி

நாமக்கல் - 101.3 டிகிரி

பாளையங்கோட்டை - 101.12 டிகிரி

பரங்கிப்பேட்டை - 102.2 டிகிரி

தஞ்சாவூர் - 100.4 டிகிரி

திருப்பத்தூர் - 101.48 டிகிரி

திருச்சி - 102.38 டிகிரி

திருத்தணி - 105.98 டிகிரி

தூத்துக்குடி - 103.1 டிகிரி

வேலூர் - 107.24 டிகிரி

சென்னை :

சென்னையில் நேற்றும் வெயில் வறுத்தெடுத்தது. பிற்பகல் முதல் மாலை வேளை வரை நகரின் ஒரு சில இடங்களில் ஆங்காங்கே லேசான மழை பெய்தது. புறநகர் பகுதிகளிலும் லேசான மழை பெய்தது. அதனால் எந்த பலனும் இல்லை. சில நிமிடங்கள் பெய்த லேசான மழையும் சூட்டை கிளப்பி, மக்களின் வேதனையைத்தான் வாங்கியது.

இதற்கிடையில் தமிழகத்தில் வெயிலின் தாக்கம் இன்னும் அதிகரிக்கக்கூடும் என்று வானிலை ஆய்வு மையம் தெரிவித்துள்ளது. இந்த பகீர் தகவலால் மக்கள் பீதி அடைந்திருக்கிறார்கள்.

இதுகுறித்து சென்னை வானிலை ஆய்வு மையம் வெளியிட்டுள்ள செய்திக்குறிப்பில் கூறியிருப்பதாவது:-

மேற்கு திசை காற்று மற்றும் வெப்ப சலனம் காரணமாக 6-ந்தேதி (இன்று) தமிழகம் மற்றும் புதுச்சேரியில் ஒரு சில இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும். 7-ந்தேதி முதல் 9-ந்தேதி வரையில் ஓரிரு இடங்களில் லேசானது முதல் மிதமான மழை பெய்யக்கூடும். தமிழகத்தின் இன்றைய (செவ்வாய்க்கிழமை) அதிகபட்ச வெப்பநிலை 40 முதல் 42 டிகிரி செல்சியஸ் வரையிலும், ஓரிரு இடங்களில் இயல்பை விட 2 முதல் 4 டிகிரி செல்சியஸ் அதிகமாகவும் இருக்கும். அதிக வெப்பநிலை மற்றும் அதிக ஈரப்பதம் இருக்கும்போது வெப்ப அழுத்தம் காரணமாக அசவுகரியம் ஏற்படலாம்.

சென்னை மற்றும் புறநகர் பகுதிகளை பொறுத்தவரை அடுத்த 48 மணி நேரத்துக்கு (இன்றும், நாளையும்) வானம் மேகமூட்டத்துடன் காணப்படும். ஓரிரு இடங்களில் லேசான மழை பெய்யக்கூடும். அதிகபட்ச வெப்பநிலை 41 டிகிரி செல்சியஸ் ஆகவும், குறைந்தபட்ச வெப்பநிலை 30 டிகிரி செல்சியஸ் ஆகவும் இருக்கும்.

வங்கக்கடல் மற்றும் அரபிக் கடல் பகுதிகளில் 6-ந்தேதி முதல் 9-ந்தேதி வரை சூறாவளிக்காற்று வீசக்கூடும் என்பதால் அந்த பகுதிகளுக்கு மேற்கண்ட நாட்களில் மீனவர்கள் செல்லவேண்டாம் என்று எச்சரிக்கப்பட்டுள்ளது.

இவ்வாறு அதில் கூறப்பட்டுள்ளது.

தமிழகத்தில் 13 நகரங்களில் வெயில் 100 டிகிரியை தாண்டி சதம் அடித்தது. அதிகபட்சமாக சென்னையில் 105.44 டிகிரி வெயில் கொளுத்தியது.

தமிழகத்தின் முக்கிய நகரங்களில் பதிவான வெயில் நிலவரம் வருமாறு:-

சென்னை நுங்கம்பாக்கம் - 104.18 டிகிரி - (40.1 செல்சியஸ்)

சென்னை மீனம்பாக்கம் - 105.44 டிகிரி - (40.8 செல்சியஸ்)

கடலூர் - 103.64 டிகிரி - (39.8 செல்சியஸ்)

ஈரோடு - 101.12 டிகிரி - (38.4 செல்சியஸ்)

கரூர் - 103.1 டிகிரி - (39.5 செல்சியஸ்)

மதுரை - 104.36 டிகிரி - (40.2 செல்சியஸ்)

நாகை - 102.38 டிகிரி - (39.1 செல்சியஸ்)

பாளையங்கோட்டை - 104 டிகிரி - (40 செல்சியஸ்)

தஞ்சை - 102.2 டிகிரி - (39 செல்சியஸ்)

திருப்பத்தூர் - 101.84 டிகிரி - (38.8 செல்சியஸ்)

திருச்சி - 103.28 டிகிரி - (39.6 செல்சியஸ்)

திருத்தணி - 105.08 டிகிரி - (40.6 செல்சியஸ்)

தூத்துக்குடி - 101.3 டிகிரி - (38.5 செல்சியஸ்)

வேலூர் - 102.2 டிகிரி - (39 செல்சியஸ்)

சென்னை :

கோடை வெயில் ஒரு பக்கம் வாட்டி வதைத்தாலும், வெப்பச்சலனம் மற்றும் வளிமண்டல கீழடுக்கு மற்றும் மேலடுக்கு சுழற்சியால் தமிழ்நாட்டில் அவ்வப்போது கோடை மழையும் தன் பங்குக்கு பெய்து வருகிறது. இதன் காரணமாக கோடைகாலத்தில் பெய்யவேண்டிய இயல்பான மழை அளவைவிட 65 சதவீதம் அதிகமாக மழை பதிவாகியிருக்கிறது.

இதன் தொடர்ச்சியாக தென்னிந்திய பகுதிகளின் மேல் நிலவும் வளிமண்டல கீழடுக்கு சுழற்சி மற்றும் வெப்பச்சலனம் காரணமாக, தமிழ்நாட்டில் சில இடங்களில் லேசானது முதல் மிதமான மழையும், ஓரிரு இடங்களில் கனமழைக்கும் வாய்ப்பு இருப்பதாக வானிலை ஆய்வு மையம் அறிவித்துள்ளது.

அதன்படி, இன்று தமிழ்நாடு, புதுச்சேரி மற்றும் காரைக்கால் பகுதிகளில் சில இடங்களில் இடி, மின்னலுடன் கூடிய லேசானது முதல் மிதமான மழையும், நீலகிரி, கோவை, திருப்பூர், தேனி, திண்டுக்கல், ஈரோடு, கிருஷ்ணகிரி, தர்மபுரி, திருப்பத்தூர், சேலம், கள்ளக்குறிச்சி மற்றும் திருவண்ணாமலை மாவட்டங்களில் ஓரிரு இடங்களில் கனமழையும் பெய்யக்கூடும்.

தமிழ்நாடு, புதுச்சேரி மற்றும் காரைக்கால் பகுதிகளில் நாளை (ஞாயிற்றுக்கிழமை), நாளை மறுதினம் (திங்கட்கிழமை) ஓரிரு இடங்களில் இடி, மின்னலுடன் கூடிய லேசானது முதல் மிதமான மழை பெய்ய வாய்ப்பு இருக்கிறது.

நேற்று காலை 8.30 மணியுடன் முடிவடைந்த 24 மணி நேரத்தில் தமிழ்நாட்டில் சூளகிரி 7 செ.மீ., சின்னார் அணை 6 செ.மீ., வறட்டுப்பள்ளம் 4 செ.மீ., தேன்கனிக்கோட்டை, வி.களத்தூர், குன்றத்தூர் தலா 3 செ.மீ., செம்பரம்பாக்கம், குமாரபாளையம், அம்மாபேட்டை, துவாக்குடி, கோத்தகிரி, விரகனூர், கவுந்தம்பாடி, திருவாலங்காடு, தாமரைப்பாக்கம், ஆவடி, கெட்டி, திருவள்ளூர், ஏற்காடு, மேற்கு தாம்பரம் தலா 2 செ.மீ. உள்பட சில இடங்களில் மழை பெய்துள்ளது.

நாளையுடன் விடைபெறும் அக்னி நட்சத்திரம்

தமிழ்நாட்டில் ஒவ்வொரு ஆண்டு மே மாதம் 4-ந் தேதி முதல் 28-ந் தேதி வரை அக்னி நட்சத்திரம் என்று அழைக்கப்படும் கத்தரி வெயிலின் தாக்கம் இருக்கும். அந்த வகையில் நடப்பாண்டில் கத்தரி வெயில் கடந்த 4-ந் தேதி தொடங்கினாலும், கோடை மழை இருந்ததால் வெப்பத்தின் தாக்கம் சற்று குறைந்து காணப்பட்டது. தமிழ்நாட்டில் பெரும்பாலான இடங்களில் வெயிலின் தாக்கம் குறைவாகவே இருந்தது.

கோடை மழை சற்று குறைந்ததும் அக்னி நட்சத்திர வெயில் தன்னுடைய உக்கிரத்தை வெளிகாட்டியது. கடந்த வாரத்தில் அதிகபட்சமாக சென்னையில் 109 டிகிரி வெயில் பதிவானது. இதுதான் இந்த கத்தரி வெயில் காலத்தில் உச்சபட்ச வெயில் பதிவாக இருந்து வருகிறது. அதன் பின்னர் ஒவ்வொரு நாளும் குறைந்தது 10 இடங்களுக்கு மிகாமல் வெயில் 100 டிகிரியை கடந்து சுட்டெரிக்கிறது.

இந்த நிலையில் அக்னி நட்சத்திர வெயில் நாளையுடன் (ஞாயிற்றுக்கிழமை) விடைபெற இருக்கிறது. இதனால் இன்றும் (சனிக்கிழமை), நாளையும் தமிழ்நாட்டில் சில இடங்களில் வெயில் உக்கிரத்துடன் இருக்கும் என்றே தெரிவிக்கப்பட்டுள்ளது.

சென்னை :

தமிழகத்தில் சென்னை, மதுரை, கடலூர், ஈரோடு, கரூர், பாளையங்கோட்டை, தஞ்சை, திருப்பத்தூர், திருச்சி, திருத்தணி, வேலூர் ஆகிய 12 நகரங்களில் வெயில் 100 டிகிரியை தாண்டி சதம் அடித்தது. அதிகபட்சமாக சென்னையில் 105.08 டிகிரி வெயில் பதிவானது.

தமிழகத்தின் முக்கிய நகரங்களில் பதிவான வெயில் நிலவரம் வருமாறு:-

சென்னை நுங்கம்பாக்கம் - 101.3 டிகிரி - (38.5 செல்சியஸ்)

மீனம்பாக்கம் - 105.08 டிகிரி - (40.6 செல்சியஸ்)

கோவை - 97.88 டிகிரி - (36.6 செல்சியஸ்)

குன்னூர் - 76.28 டிகிரி - (24.6 செல்சியஸ்)

கடலூர் - 100.4 டிகிரி - (38 செல்சியஸ்)

தர்மபுரி - 97.16 டிகிரி - (36.2 செல்சியஸ்)

ஈரோடு - 100.4 டிகிரி - (38 செல்சியஸ்)

கன்னியாகுமரி - 92.84 டிகிரி - (33.8 செல்சியஸ்)

கரூர் - 101.3 டிகிரி - (38.5 செல்சியஸ்)

கொடைக்கானல் - 70.7 டிகிரி - (21.5 செல்சியஸ்)

மதுரை - 102.2 டிகிரி - (39 செல்சியஸ்)

நாகை - 99.86 டிகிரி - (37.7 செல்சியஸ்)

நாமக்கல் - 98.6 டிகிரி - (37 செல்சியஸ்)

பாளையங்கோட்டை - 100.76 டிகிரி - (38.2 செல்சியஸ்)

சேலம் - 98.6 டிகிரி - (37 செல்சியஸ்)

தஞ்சை - 100.4 டிகிரி - (38 செல்சியஸ்)

திருப்பத்தூர் - 100.4 டிகிரி - (38 செல்சியஸ்)

திருச்சி - 102.38 டிகிரி - (39.1 செல்சியஸ்)

திருத்தணி - 104.36 டிகிரி - (40.2 செல்சியஸ்)

தூத்துக்குடி - 91.76 டிகிரி - (33.2 செல்சியஸ்)

ஊட்டி - 68.36 டிகிரி - (20.2 செல்சியஸ்)

வால்பாறை - 82.4 டிகிரி - (28 செல்சியஸ்)

வேலூர் - 104 டிகிரி - (40 செல்சியஸ்)

இதற்கிடையே வெப்பச்சலனம் காரணமாக 4 நாட்கள் மழை பெய்ய வாய்ப்பு இருப்பதாக வானிலை ஆய்வு மையம் தெரிவித்து உள்ளது.

புதுடெல்லி :

கடந்த 2 மாதங்களாக கோடை வெயில் வாட்டி வதைத்தது. வீசிய காற்று அனலாக தெறித்தது. மக்கள் கடுமையான துயரங்களை அனுபவித்தனர்.

இந்த நிலையில் டெல்லி உள்ளிட்ட பல மாநிலங்களில் நேற்று வானிலையில் மாற்றம் ஏற்பட்டது. வானம் மப்பும், மந்தாரமுமாக இருக்க, சில இடங்களில் மழைத்துளியும் விழுந்தது.

இதற்கிடையே, இந்தியாவில் வெயிலின் தாக்கம் மற்றும் வெப்ப அலைகள் நேற்றுடன் முடிவுக்கு வந்ததாக வானிலை ஆய்வு மையம் தெரிவித்து உள்ளது. இனி வானில் அவ்வப்போது மேகமூட்டம் ஏற்படும் எனவும், கோடைகாலத்துக்கு முந்தைய மழை பெய்யும் எனவும் கணிக்கப்பட்டு இருக்கிறது.

மலைப்பாங்கான இடங்களில் கனமழை பெய்யும் என்றும், டெல்லி, ராஜஸ்தான், பஞ்சாப், உத்தரபிரதேசம், அரியானா போன்ற மாநிலங்களில் ஆலங்கட்டி மழை பெய்யும் எனவும் தெரிவித்துள்ள வானிலை ஆய்வு மையம், மேற்கண்ட மாநிலங்களில் ஆரஞ்சு நிற எச்சரிக்கையும் விடுத்துள்ளது.

மேலும், இந்த ஆண்டு தென்மேற்கு பருவமழை முன்கூட்டியே தொடங்குவதாக வானிலை ஆய்வு மையம் தெரிவித்துள்ளது.

அதற்கான சூழல் நிலவுவதாகவும், தெற்கு வங்கக்கடலின் பகுதிகள், அந்தமான் கடல், அந்தமான் நிகோபார் தீவுகள் ஆகிய பகுதிகளில் அடுத்த 2 நாட்களில் தென்மேற்கு பருவமழை தொடங்கும் என்று கூறியுள்ளது.

சென்னை :

தமிழ்நாட்டில் கத்தரி வெயில் காரணமாக வெயிலின் தாக்கம் மிகவும் அதிகரித்து காணப்படுகிறது. அந்த வகையில் தமிழ்நாட்டில் சென்னை மீனம்பாக்கம் உள்பட 12 இடங்களில் வெயில் 100 டிகிரியை தாண்டியது. அதிகபட்சமாக வேலூரில் 104 டிகிரி வெயில் பதிவானது. கரூரை பொருத்தவரையில் இயல்பான வெயில் அளவை விட நேற்று 3.7 செல்சியஸ் வரை அதிகமாக பதிவானதாக ஆய்வு மையத்தின் புள்ளி விவரங்கள் தெரிவிக்கின்றன.

தமிழ்நாடு, புதுச்சேரி மற்றும் காரைக்காலில் இன்றும் ஓரிரு இடங்களில் இயல்பைவிட 2 முதல் 3 டிகிரி வரை வெயில் அதிகரிக்கக்கூடும் என்றும் சென்னை வானிலை ஆய்வு மையம் அறிவித்துள்ளது.

தமிழ்நாட்டில் நேற்று மாலை 5.30 மணி வரையிலான நிலவரப்படி பதிவான வெயில் அளவு வருமாறு:-

சென்னை நுங்கம்பாக்கம் - 98.78 டிகிரி (37.1 செல்சியஸ்)

சென்னை மீனம்பாக்கம் - 103.1 டிகிரி (39.5 செல்சியஸ்)

கோவை - 96.08டிகிரி (35.6 செல்சியஸ்)

கடலூர் - 100.4 டிகிரி (38 செல்சியஸ்)

தர்மபுரி - 98.6 டிகிரி (37 செல்சியஸ்)

ஈரோடு -102.56டிகிரி (39.2 செல்சியஸ்)

கன்னியாகுமரி - 91.4 டிகிரி (33 செல்சியஸ்)

கரூர் - 103.1 டிகிரி (39.5 செல்சியஸ்)

கொடைக்கானல் - 70.88 டிகிரி (21.6 செல்சியஸ்)

மதுரை நகரம் -101.48 டிகிரி (38.6 செல்சியஸ்)

மதுரை விமான நிலையம் - 102.2 டிகிரி (39 செல்சியஸ்)

நாகப்பட்டினம் - 97.7 டிகிரி (36.5 செல்சியஸ்)

பாளையங்கோட்டை - 99.14 டிகிரி (37.3 செல்சியஸ்)

சேலம் -100.58டிகிரி (38.1 செல்சியஸ்)

தஞ்சாவூர் -100.58 டிகிரி (38 செல்சியஸ்)

திருப்பத்தூர் -102.2 டிகிரி (39 செல்சியஸ்)

திருச்சி -101.66 டிகிரி (38.7 செல்சியஸ்)

திருத்தணி -101.12 டிகிரி (38.4 செல்சியஸ்)

தூத்துக்குடி -92.48 டிகிரி (33.6 செல்சியஸ்)

ஊட்டி -72.86 டிகிரி (22.7 செல்சியஸ்)

வால்பாறை - 82.4 டிகிரி (28 செல்சியஸ்)

வேலூர் - 104 டிகிரி (40 செல்சியஸ்)

சென்னை :

வடகிழக்கு பருவமழை தமிழகம், புதுச்சேரியில் ஒவ்வொரு ஆண்டும் அக்டோபர் மாதம் 2-வது வாரத்துக்கு பிறகு தொடங்கி, டிசம்பர் மாதம் இறுதி வரை நீடிக்கும். சில நேரங்களில் ஜனவரி முதல் வாரம் வரை கூட இருக்கும்.

அதன்படி, இந்த ஆண்டு வடகிழக்கு பருவமழை அக்டோபர் மாதம் 3-வது வார இறுதியில் தொடங்கியது. முதல் 2 மழைப் பொழிவில் எதிர்பார்த்த மழை பதிவானது. அதனைத்தொடர்ந்து இடைவெளி ஏற்பட்ட நிலையில், தமிழகத்தின் வடமாவட்டங்களில் கடந்த மாண்டஸ் புயல் காரணமாக, வட மற்றும் உள் மாவட்டங்களில் மழை பெய்தது.

அதன்பின்னர், பெரிய அளவில் மழை பதிவாகவில்லை. ஆங்காங்கே மழை பெய்து வரும் நிலையில், தமிழகம் மற்றும் புதுச்சேரியில் தற்போது வரை இயல்பையொட்டி மழை பதிவாகியுள்ளது.

தமிழகம் மற்றும் புதுச்சேரியில் பருவமழை தொடங்கியதில் இருந்து நேற்று காலை 8.30 மணி வரையிலான நிலவரப்படி, 44.1 செ.மீ. மழை பெய்து இருக்க வேண்டும். ஆனால் சற்று அதிகமாக 44.5 செ.மீ. மழை பெய்திருப்பதாக சென்னை வானிலை ஆய்வு மையம் தெரிவித்துள்ளது.

மேலும், புள்ளி விவரத்தின் படி அரியலூர், கடலூர், கள்ளக்குறிச்சி, நாகப்பட்டினம், நீலகிரி, பெரம்பலூர், புதுக்கோட்டை, ராமநாதபுரம், சிவகங்கை, தென்காசி, தஞ்சாவூர், திருநெல்வேலி, திருவாரூர், தூத்துக்குடி, திருச்சி, வேலூர், விழுப்புரம் ஆகிய 17 மாவட்டங்களில் இயல்பைவிட குறைவாகவே மழை பொழிந்திருக்கிறது. இதில் அதிகபட்சமாக திருவாரூரில் 33 சதவீதமும், அதற்கடுத்தபடியாக நாகப்பட்டினம் 31 சதவீதம், தூத்துக்குடி 30 சதவீதம் இயல்பைவிட குறைவாக மழை பதிவாகியிருக்கிறது.

இதேபோல், புதுச்சேரியில் இயல்பைவிட 20 சதவீதமும், காரைக்காலில் 30 சதவீதமும் மழைப்பொழிவு குறைந்திருக்கிறது.

அதேநேரத்தில் இயல்பைவிட அதிகமாக மழை பதிவான மாவட்டங்களில், அதிகபட்சமாக ஈரோட்டில் 58 சதவீதமும், அதற்கடுத்தபடியாக திருப்பத்தூரில் 55 சதவீதமும், நாமக்கலில் 40 சதவீதமும், கோவையில் 38 சதவீதமும், கிருஷ்ணகிரியில் 37 சதவீதமும், காஞ்சீபுரத்தில் 36 சதவீதமும் அதிகமாக மழை பெய்துள்ளது.

இதுதவிர, சென்னை, செங்கல்பட்டு, தர்மபுரி, திண்டுக்கல், கன்னியாகுமரி, கரூர், மதுரை, மயிலாடுதுறை, ராணிப்பேட்டை, சேலம், தேனி, திருப்பூர், திருவள்ளூர், திருவண்ணாமலை, விருதுநகர் மாவட்டங்களிலும் இயல்பைவிட மழை அதிகமாக பதிவாகியிருக்கிறது.

வழக்கமாக டிசம்பர் 31-ந்தேதியுடன் பருவமழை நிறைவு பெறும். அந்தவகையில் இந்த ஆண்டு வடகிழக்கு பருவமழை நிறைவு பெறும் சூழலுக்கு வந்திருக்கிறது. அதற்கேற்றாற்போல், கடந்த 2 தினங்களாக தமிழகத்தில் மழையும் பதிவாகவில்லை. ஆனால் வானிலை ஆய்வு மையம் பருவமழை நிறைவு பெறுவது தொடர்பான அதிகாரபூர்வ அறிவிப்பு இதுவரை வெளியாகவில்லை.

பருவமழை தொடங்குவதற்கு முன்பு, இந்திய வானிலை ஆய்வு மையத்தின் முந்தைய கணிப்பின்படி, இயல்பையொட்டி மழை பதிவாகும் என்று தெரிவிக்கப்பட்டிருந்தது. அதையொட்டியே இந்த ஆண்டு மழை பதிவானபடி வடகிழக்கு பருவமழை விடைபெறும் என்று ஆய்வு மைய அதிகாரிகள் எதிர்பார்க்கின்றனர்.

சென்னை :

ஜூன் மாதம் முதல் செப்டம்பர் மாதம் வரையிலான தென் மேற்கு பருவமழை காலம் விலகுவதற்கான சூழல் தற்போது நிலவி வருவதாக கூறப்படுகிறது. தென் மேற்கு பருவமழை காலம் நிறைவு பெற்ற பிறகு, அடுத்ததாக வடகிழக்கு பருவமழை தொடங்கும்.

அக்டோபர் மாதம் தொடங்கி டிசம்பர் மாதம் வரை நீடிக்கும் இந்த பருவமழை காலத்தில்தான் தமிழகம் உள்பட தென் இந்திய பகுதிகளில் சில இடங்களுக்கு அதிகளவு மழை கிடைக்கும். அந்த வகையில் வடகிழக்கு பருவமழை அனைத்து தரப்பினராலும் பெரிதும் எதிர்பார்க்கப்படுகிறது.

ஏற்கனவே தென் மேற்கு பருவமழை காலத்தில் தமிழ்நாடு மற்றும் புதுச்சேரியில் இயல்பான அளவை விட 45 சதவீதம் அதிகமாக மழை பதிவாகி இருந்தது. இந்த நிலையில் வடகிழக்கு பருவமழை எப்போது தொடங்கும்? இந்த ஆண்டு எந்த அளவு மழை இருக்கும்? என்பது பற்றி வானிலை ஆய்வு மையம் நேற்று தகவலாக தெரிவித்துள்ளது.

அதன்படி, ''இந்த ஆண்டு வடகிழக்கு பருவமழை தற்போதைய கணினி மாதிரியின் அடிப்படையில் இம்மாதம் 4-வது வாரத்தில் தொடங்க வாய்ப்பு இருப்பதாகவும், இயல்பை ஒட்டியே மழை பெய்வதற்கான சூழல் உள்ளதாகவும்'' தெரிவிக்கப்பட்டுள்ளது.