புதுச்சேரி

புதுச்சேரி:

மூலக்குளம் ஆசிரியர் காலனியை சேர்ந்தவர் ரமணி. கல்வித்துறை அதிகாரி. இவரது மனைவி சித்ரா. இவர் குருமாம்பேட்டில் உள்ள காமராஜர் வேளாண் அறிவியல் நிலையத்தில் பேராசிரியராக பணிபுரிந்து வருகிறார். இவர்களுக்கு 2 மகன்கள் உள்ளனர்.

இவர்களது வீட்டில் ராட் வீலர் வகையை சேர்ந்த 2 வெளிநாட்டு நாய்களை வளர்த்து வந்தனர். அவற்றுக்கு லெனி, மிஸ்ட்டி என பெயரிட்டு அழைத்தனர்.

வீட்டை சுற்றி மதில்சுவர் கட்டப்பட்டுள்ள நிலையில் இரவு வேளையில் பாதுகாப்புக்காக நாய்களை கட்டிப்போடாமல் அவிழ்த்து விட்டு விடுவது வழக்கம். இதனால் அவை காம்பவுண்டு சுவருக்குள் சுற்றி வரும்.

இந்தநிலையில் மிஸ்ட்டி என்ற நாய்க்கு திடீரென உடல் நலக்குறைவு ஏற்பட்டது. முகம் வீங்கியும் மிகவும் சோர்வுடனும் காணப்பட்டது. இதனால் ரமணி குடும்பத்தினர் அதிர்ச்சி அடைந்தனர்.

இதையடுத்து அந்த நாய்க்கு அங்குள்ள ஆஸ்பத்திரியில் சிகிச்சை அளித்தனர். அதன்பிறகும் நாய் சோர்வுடனே இருந்து வந்தது.

இந்தநிலையில் நேற்று வீட்டின் மொட்டை மாடிக்குச் சென்று ரமணி பார்வையிட்டார். அங்கு பயன்படுத்தாமல் கிடந்த தேங்காய் நார் மெத்தையில் சுமார் 3 அடி நீளமுள்ள கண்ணாடி விரியன் பாம்பு செத்து கிடந்தது. இதைப்பார்த்ததும் அவர் அதிர்ச்சி அடைந்தார்.

வீட்டுக்குள் செல்ல வந்த அந்த பாம்புடன் மிஸ்ட்டி போராடி கொன்று இருப்பதும் பாம்பு கடித்து விஷம் ஏறியதால் நாய்க்கு உடல்நலம் பாதிக்கப்பட்ட காரணமும் அப்போது தான் அவருக்கு தெரியவந்தது.

உடனே அந்த நாயை புதுவை மறைமலையடிகள் சாலையில் உள்ள கால்நடை ஆஸ்பத்திரிக்கு கொண்டு சென்று சிகிச்சை அளித்தனர். தற்போது நாய் உடல்நிலையில் முன்னேற்றம் ஏற்பட்டுள்ளது.

இதுகுறித்து டாக்டர்கள் கூறுகையில், ‘பொதுவாக கண்ணாடி விரியன் பாம்பு கடித்தால் விஷம் ரத்தத்தில் கலந்து ஒரு சில மணி நேரங்களில் கடிபட்டவர்கள் உயிரிழந்து விடுவார்கள். நாயின் மூக்கு பகுதியில் பாம்பு கடித்ததால் விஷம் ரத்தத்தில் கலக்கவில்லை. அதனால் நாய் உயிர் பிழைத்தது’ என தெரிவித்தனர்.
நாயை வளர்த்த ரமணி கூறுகையில், ‘நாங்கள் வளர்க்கும் நாய்கள் வேட்டையாடும் வகையை சேர்ந்தது. வீட்டில் புகுந்த பாம்பை, நாய் கடித்து கொன்று விட்டது. நாங்கள் குடும்பத்துடன் தூங்கிக் கொண்டிருந்தபோது இரவு நேரத்தில் இந்த சம்பவம் நடந்து இருக்க வேண்டும். அந்த பாம்பு வீட்டுக்குள் நுழைந்து இருந்தால் விபரீதம் ஏற்பட்டு இருக்கும். அது நாயால் தவிர்க்கப்பட்டிருக்கிறது. அந்த நாய்கள் வீட்டிற்குள் ஒரு தவளை, பூரானை கூட நுழைய விடாது. நாய்க்கு அளித்த சிகிச்சையில் நல்ல முன்னேற்றம் ஏற்பட்டுள்ளது . இருப்பினும் அது முழுமையாக குணமடைந்தால் தான் எங்களுக்கு நிம்மதி’ என்றார்.

வீட்டுக்குள் புகுந்த கொடிய விஷமுள்ள கண்ணாடி விரியன் பாம்பை தடுத்து போராடி கொன்று தன்னை வளர்த்த எஜமானரின் குடும்பத்தையே நாய் காப்பாற்றிய சம்பவம் நெகிழ்ச்சியை ஏற்படுத்தியது.

புதுச்சேரி:

புதுச்சேரிக்கு வார இறுதி நாட்களில் வெளிநாடுகள், வெளிமாநிலங்களில் இருந்து ஏராளமான சுற்றுலா பயணிகள் வருவது வழக்கம். அதன்படி நேற்று விடுமுறை தினம் என்பதால் ஏராளமான சுற்றுலா பயணிகள் குவிந்தனர். இதனால் ஓட்டல்கள், தங்கும் விடுதிகள் நிரம்பி வழிந்தன.

சுற்றுலா பயணிகள் வருகை எதிரொலியாக சுற்றுலா தலங்கள் களை கட்டியது. கடற்கரை, பாரதி பூங்கா, நோணாங்குப்பம் படகு குழாம், மணக்குள விநாயகர் கோவில், அரவிந்தர் ஆசிரமம், பாண்டி மெரினா பீச் உள்ளிட்ட சுற்றுலா தலங்களில் மக்கள் கூட்டம் அலைமோதியது.

குறிப்பாக கடற்கரை சாலையில் தலைமை செயலகம் எதிரே உள்ள செயற்கை மணல் பரப்பு, பழைய துறைமுக பாலம் உள்ளிட்ட பகுதிகளில் சுற்றுலா பயணிகளும், உள்ளூர் மக்களும் உற்சாகமாக குளித்து மகிழ்ந்தனர்.

புதுச்சேரி நகர பகுதியில் நேற்று ஏராளமான வெளி மாநில பதிவெண் கொண்ட கார்கள் உலா வந்தன. நேற்று முகூர்த்தநாள் என்பதாலும், சுற்றுலா பயணிகள் வருகையாலும் நகரின் முக்கிய வீதிகளான அண்ணாசாலை, நேருவீதி, புஸ்சி வீதி, கடலூர் சாலை, மரப்பாலம் சந்திப்பு உள்ளிட்ட பகுதிகளில் கடும் போக்குவரத்து நெரிசல் ஏற்பட்டது.

புதுச்சேரி தாவரவியல் பூங்காவில் பராமரிப்பு பணி காரணமாக நேற்று குழந்தைகள் ரெயில் இயக்கப்படவில்லை. இதனால் அங்கு வந்த சுற்றுலா பயணிகள் பலர் ஏமாற்றத்துடன் திரும்பி சென்றனர். ஒயிட் டவுன் பகுதியில் உள்ள கட்டிடங்களில் வரைந்துள்ள ஓவியங்களின் முன்பு நின்று சுற்றுலா பயணிகள் செல்பி எடுத்து மகிழ்ந்தனர்.

சண்டே மார்க்கெட் செயல்படும் காந்திவீதியில் பொதுமக்கள், சுற்றுலா பயணிகள் கூட்டம் அதிகமாக காணப்பட்டது. அவர்கள் தங்களுக்கு தேவையான பொருட்களை பேரம் பேசி வாங்கி சென்றனர்.