உக்ரைன் மீதான ரஷிய படையெடுப்பு கடந்த 35 நாட்களுக்கும் மேலாக நடைபெற்று வருகிறது. ரஷியா உக்ரைன் மீது பல்வேறு தாக்குதல்களை நடத்தி வருகிறது. இரு நாடுகளுக்கும் இடையேயான போரை நிறுத்த நடத்தப்பட்ட அனைத்து பேச்சுவார்த்தைகளும் தோல்வியில் முடிந்துள்ளன.
ரஷிய படைகளை பின் வாங்க வலியுறுத்தியும், உலக நாடுகளை உதவக்கூறியும் வேண்டி உக்ரைன் அதிபர் ஜெலன்ஸ்கி காணொளியில் பேசி வருகிரார்.
இந்நிலையில் உக்ரைன் அதிபர் ஜெலன்ஸ்கி நகைச்சுவை நடிகராக இருந்தபோது நடைபெற்ற ஒரு நிகழ்ச்சியில் ரஷிய அதிபர் புதின் கலந்துகொண்டு மகிழ்ந்ததாக வீடியோ ஒன்று இணையத்தில் வைரலாகி வருகிறது. 16 நொடிகள் உள்ள அந்த வீடியோவில் ஜெலன்ஸ்கி மேடையில் நகைச்சுவையாக பேசுகிறார். புதின் பார்வையாளர்களுடன் அமர்ந்து சிரித்து மகிழ்கிறார்.
இதை பதிவிட்ட ஃபேஸ்புக் கணக்கு ஒன்று விதி அனைத்தையும் மாற்றி விட்டது என பதிவிட்டுள்ளது.
இந்நிலையில் இந்த வீடியோவில் காட்டப்படும் காட்சி உண்மையில்லை என தற்போது தெரியவந்துள்ளது. இரண்டு வெவ்வேறு காட்சிகளை எடிட் செய்து ஒன்றாக இணைத்து இந்த வீடியோ உருவாக்கப்பட்டுள்ளதாக தெரிவிக்கப்பட்டுள்ளது.
ஜெலன்ஸ்கியின் வீடியோ 2012-ம் ஆண்டு எடுக்கப்பட்டது என்றும், அந்த வீடியோ ஒரு மணி நேரத்திற்கும் மேல் உள்ளது. ஆனால் அந்த வீடியோவில் ஒரு இடத்தில் கூட புதின் இடம்பெறவில்லை என கூறப்பட்டுள்ளது. அதேபோன்று புதின் அமர்ந்திருக்கும் வீடியோ 2006-ம் நடைபெற்ற நிகழ்ச்சி ஒன்றில் எடுக்கப்பட்டது என்பதும் உறுதியாகியுள்ளது.
இதனால் இணையத்தில் பரவி வரும் வீடியோ உண்மை இல்லை என தெரிவிக்கப்பட்டுள்ளது.
