சிவகங்கை

சிவகங்கை:

சிவகங்கை மாவட்ட கலெக்டர் மதுசூதன் ரெட்டி வெளியிட்டுள்ள செய்திக்குறிப்பில் கூறியுள்ளதாவது:-

கொரோனா நோய் பரவலை தடுப்பதற்காக மாவட்ட நிர்வாகம் பல்வேறு தடுப்பு நடவடிக்கைகளை எடுத்து வருகிறது. இதில் ஒரு பகுதியாக மாவட்டத்தில் அனைத்து இடங்களிலும் தடுப்பூசி போடும் பணி நடைபெற்று வருகிறது. இதுவரை இந்த மாவட்டத்தில் 2 லட்சத்து 15 ஆயிரத்து 806 பேருக்கு கொரோனா தடுப்பூசி போடப்பட்டு உள்ளது. இதில் ஒரு லட்சத்து 87 ஆயிரத்து 435 பேர் முதல் தவணையாக தடுப்பூசி போட்டுள்ளனர். மேலும் 28 ஆயிரத்து 371 பேர் இரண்டு தவணையும் தடுப்பூசி போட்டு உள்ளனர். இதேபோல 18 வயதுக்கு மேற்பட்டவர்களுக்கு தடுப்பூசி போட அரசு அனுமதி அளித்துள்ளதன் பேரில் இதுவரை 74 ஆயிரத்து 730 பேருக்கு தடுப்பூசி போடப்பட்டுள்ளது.

தற்போது அரசின் அறிவுறுத்தலின் பேரில் பிரசவித்த பாலூட்டும் தாய்மார்களுக்கும் தடுப்பூசி போடும் பணி தொடங்கியுள்ளது. கொரோனா தடுப்பூசி கையிருப்பை பொருத்து வரவர தடுப்பூசி போடப்பட்டு வருகிறது. மேலும் தொழிற்சாலைகள் மற்றும் கிராமங்கள் போன்ற இடங்களில் முகாம்கள் நடத்தி தடுப்பூசி போடப்பட்டுள்ளது.

காரைக்குடி:

கொரோனா தொற்றில் இருந்து பாதுகாக்கும் வகையில் தடுப்பூசி போட்டுக்கொள்ளும்படி மக்களிடம் அரசு அறிவுறுத்தி வருகிறது. ஆரம்ப கட்டத்தில் பொதுமக்களிடையே ஒருவித அச்ச உணர்வு ஏற்பட்ட காரணத்தினால் இதில் அவர்கள் போதிய அக்கறை செலுத்தாமல் இருந்தனர். இந்தநிலையில் கொரோனாவின் 2-வது அலையில் ஏராளமானோர் பாதிக்கப்பட்டு உயிரிழந்தும் வந்தனர்.

இதையடுத்து பொதுமக்களிடையே தற்போது கொரோனா தடுப்பூசி செலுத்துவதில் அதிகளவு ஆர்வம் ஏற்பட்டுள்ளது. தினந்தோறும் மாவட்டத்தில் தடுப்பூசி செலுத்தும் இடம் குறித்து தகவல் கேட்டு தற்போது ஏராளமானோர் தடுப்பூசி செலுத்தி வருகின்றனர். சிவகங்கை மாவட்டத்தில் சிவகங்கை, காரைக்குடி, திருப்பத்தூர், தேவகோட்டை, சிங்கம்புணரி உள்ளிட்ட பல்வேறு இடங்களில் தடுப்பூசி போடப்பட்டு வருகிறது. பெரும்பாலான அரசு மருத்துவமனைகள் மற்றும் ஆரம்ப சுகாதார நிலையங்களிலும் தடுப்பூசி போடப்பட்டு வருகிறது.

இதுதவிர தடுப்பூசி முகாம்கள் நடத்தப்பட்டு அங்கு வரும் பொதுமக்களுக்கும் தடுப்பூசி போடப்படுகிறது. காரைக்குடி மற்றும் அதன் சுற்று வட்டார பகுதியில் நடைபெற்று வரும் தடுப்பூசி முகாம்களில் நாள்தோறும் ஆயிரக்கணக்கான மக்கள் திரண்டு வந்து போதிய சமூக இடைவெளியில்லாமல் தடுப்பூசி போட வரிசையில் நிற்கின்றனர். இதனால் கொரோனா பரவும் அபாயம் உள்ளது. காரைக்குடி செஞ்சை பகுதியில் நேற்று நடைபெற்ற முகாமில் தடுப்பூசி போடுவதற்காக மக்கள் நீண்ட வரிசையில் போதிய சமூக இடைவெளியில்லாமல் காத்திருந்தனர். இதேபோல் காரைக்குடி ராமநாதன் செட்டியார் அரசு பள்ளியில் நடந்த முகாமிலும் நீண்ட வரிசையில் ஆண்களும், பெண்களும் வரிசையில் நின்றனர்.

இதில் பெண்கள் நின்ற வரிசையானது போதிய சமூக இடைவெளியில்லாமல் இருந்தது. பெரும்பாலான பெண்கள் தங்களது குழந்தைகளையும் அழைத்து வந்து கூட்ட நெரிசலில் காத்திருப்பதை காண முடிந்தது. எனவே வருங்காலங்களில் இவ்வாறான தடுப்பூசி முகாம்கள் நடத்துபவர்கள் ஒரு மணி நேரத்திற்கு 200 பேர் என்ற விகிதத்தில் டோக்கன் முறை வழங்கி நாள் முழுவதும் தடுப்பூசி செலுத்த நடவடிக்கை எடுக்க வேண்டும். இல்லையெனில் தொடர்ந்து அந்த பகுதியில் 2 அல்லது 3 நாட்கள் வரை இந்த தடுப்பூசி முகாம்கள் நடத்தினால் மட்டுமே மக்கள் ஒன்று கூடுவதை தடுக்க முடியும் என்று சமூக ஆர்வலர்கள் தரப்பில் கோரிக்கை விடுக்கப்பட்டுள்ளது.

திருப்புவனம்:

திருப்புவனம் அரசு மருத்துவமனை சித்தா பிரிவும், தமிழ்நாடு தவ்ஹீத் ஜமாஅத் திருப்புவனம் கிளையும் இணைந்து கொரோனா விழிப்புணர்வு பிரசாரம் மற்றும் இலவசமாக கபசுர குடிநீர் வழங்கும் முகாமை கழுகேர்கடை கிராமத்தில் நடத்தியது.

திருப்புவனம் கிளைத் தலைவர் தீன்முகம்மது தலைமை தாங்கினார். அரசு மருத்துவமனை சித்தா பிரிவு மருந்தாளுனர் ராஜ்குமார் முன்னிலை வகித்தார். பேச்சாளர் முஸ்ரப் கொரோனா குறித்து விழிப்புணர்வு பிரசாரம் செய்தார். முகாமில் 600 நபர்களுக்கு இலவசமாக கபசுர குடிநீர் வழங்கப்பட்டது. இதற்கான ஏற்பாடுகளை கிளை நிர்வாகிகள் செய்திருந்தனர்.