ஈரோடு

தாளவாடி:

ஈரோடு மாவட்டம் சத்தியமங்கலம் புலிகள் காப்பகத்துக்குட்பட்ட தாளவாடி மற்றும் ஆசனூர் வனப்பகுதியில் சிறுத்தைகள் அதிகளவில் உள்ளன.

அடர்ந்த காட்டுப்பகுதியில் வாழும் சிறுத்தைகள் அடிக்கடி கிராம பகுதிக்குள் புகுந்து கால்நடைகளை வேட்டையாடி வருகிறது.

இந்நிலையில் ஆசனூர் அடுத்த பங்களா தொட்டி என்ற பகுதியை சேர்ந்த தொழிலாளி ஒருவர் ஆடு, மாடுகள் வளர்த்து வருகிறார். இன்று காலை அவர் வழக்கம்போல மாடுகளை பராமரிக்க மாட்டு கொட்டகைக்கு சென்றார்.

அப்போது மாட்டுக்கொட்டயின் ஒரு பகுதியில் ஒரு சிறுத்தை குட்டி சோர்வுடன் படுத்து கிடப்பதை கண்டு அதிர்ச்சி அடைந்தனர்.

பின்னர் இது குறித்து அவர் வனத்துறையினருக்கு தகவல் தெரிவித்தார். அங்கு வந்த வனத்துறையினர் சிறுத்தை குட்டியை மீட்டு பரிசோதனை செய்தனர். அப்போது அது 3 மாதமே ஆன பெண் சிறுத்தை குட்டி என்பது தெரியவந்தது.

இதனையடுத்து வனத்துறையினர் அந்த சிறுத்தை குட்டியை மீட்டு ஆசனூர் வனஅலுவலகத்துக்கு கொண்டு சென்றனர். அங்கு வனத்துறை டாக்டர். அசோகன் சிறுத்தை குட்டியை பரிசோதனை செய்தார். பரிசோதனையில் சிறுத்தை குட்டி சோர்வுடன் இருப்பது தெரியவந்தது.

இதனையடுத்து மருத்துக் குழுவினர் சிறுத்தை குட்டிக்கு சிகிச்சை அளித்து வருகின்றனர். சிறுத்தை குட்டியின் உடல்நிலையில் முன்னேற்றம் ஏற்பட்டவுடன் அதனை மீண்டும் தாயிடம் சேர்க்க முயற்சி எடுக்கப்படும் என வனத்துறையினர் தெரிவித்தனர். மேலும் இந்த சிறுத்தை குட்டி வனப்பகுதியில் இருந்து மாட்டு கொட்டகைக்கு எப்படி வந்தது என்பது குறித்தும் வனத்துறையினர் விசாரணை நடத்தி வருகின்றனர்.

ஈரோடு:

பொங்கல் பண்டிகை நாளை மறுநாள் (வெள்ளிக்கிழமை) கொண்டாடப்பட உள்ளது. மேலும் வருகிற 17-ந் தேதி திங்கட்கிழமையும் அரசு விடுமுறையாக அறிவிக்கப்பட்டுள்ளது.

பொங்கல் பண்டிகையை கொண்டாடுவதற்காக பொதுமக்கள் தங்கள் சொந்த ஊர்களுக்கு சென்ற வண்ணம் உள்ளனர். ஏற்கனவே கொரோனா பரவல் காரணமாக பள்ளிகள், கல்லூரிகள் விடுமுறை அளிக்கப்பட்டுள்ளதால் பலர் முன் கூட்டியே சொந்த ஊருக்கு புறப்பட்டு சென்று விட்டனர்.

ஏற்கனவே சொந்த ஊருக்கு செல்வதற்காக திட்டமிட்டு ரெயிலில் முன்பதிவு செய்த பயணிகளும் தற்போது செல்கின்றனர். இதனால் ரெயில் நிலையம், பஸ் நிலையங்களில் கூட்டம் அலைமோதி வருகிறது.

ஈரோடு மாவட்டத்தில் உள்ள பல்வேறு நிறுவனங்களில் வெளி மாவட்டங்களை சேர்ந்த ஏராளமானோர் தொழிலாளர்களாக வேலை பார்த்து வருகின்றனர். இதேப்போல் ஆயிரக்கணக்கான வட மாநிலத்தவர்களும் பல்வேறு நிறுவனங்களில் வேலைபார்த்து வருகின்றனர்.

பொங்கல் பண்டிகை மற்றும் தைப்பூசத்தை யொட்டி அரசு அலுவலர்களுக்கு தொடர்ச்சியாக 5 நாட்கள் விடுமுறையும், தொழிலாளர்களுக்கு ஒரு வாரமும் விடுமுறை அளிக்கப்பட்டுள்ளது.

இதனால் பொங்கல் பண்டிகை கொண்டாட தங்களது குடும்பத்தினருடன் நேற்று முதல் பஸ் நிலையம், ரெயில் நிலையங்களில் குவிந்து வருகின்றனர். வெளி மாவட்ட மக்களுக்காக சிறப்பு பஸ்களும் நேற்று இரவு முதல் இயக்கப்பட்டு வருகின்றன.

கொரோனா பரவல் காரணமாக வெளி மாவட்டங்களுக்கு இயக்கப்படும் பஸ்களில் 75 சதவீத பயணிகளுடன் மட்டுமே பஸ்கள் இயக்கப்பட்டு வருகின்றன. மேலும் இன்று ஈரோடு பஸ் நிலையத்தில் பஸ்களில் கிருமி நாசினி தெளிக்கப்பட்டன.

ஈரோடு:

ஈரோடு மாவட்டம் சத்தியமங்கலம் பஞ்சாயத்து யூனியனை சேர்ந்தது குன்றி மலை கிராமம். வனப்பகுதிகள் நிறைந்த இங்கு 15 குக்கிராமங்கள் உள்ளன. கடம்பூர் மலைப்பகுதியில் இருந்து 15 கிலோமீட்டர் தொலைவில் இந்த குக்கிராமங்கள் அமைந்துள்ளன.

இங்கு எந்த ஒரு தொலைத்தொடர்பு வசதிகளும் இல்லை. இந்த 15 குக்கிராமங்களில் 7 ஆயிரத்துக்கும் மேற்பட்ட மக்கள் வசித்து வருகின்றனர். இக்கிராம மக்கள் பெரும்பாலும் விவசாயம், கூலித் தொழிலாளர்களாக உள்ளனர்.

இங்கு 600-க்கும் மேற்பட்ட பள்ளி மாணவர்களும், 120-க்கும் மேற்பட்ட கல்லூரி மாணவர்களும் படித்து வருகின்றனர். இந்த மாணவர்கள் அனைவரும் அடர்ந்த வனப்பகுதியை கடந்தே பள்ளிகளுக்கு சென்று வருகின்றனர்.

கொரோனா தாக்கம் காரணமாக பள்ளிகள், கல்லூரிகள் மூடப்பட்டு ஆன்லைன் வகுப்புகள் நடந்தது. இங்குள்ள மாணவர்களுக்கு செல்போன் டவர் இல்லாததால் சிக்னல் கிடைக்கவில்லை. இதனால் ஆன்லைன் வகுப்புகளில் பங்கேற்க 2 கிலோமீட்டர் தொலைவில் உள்ள குதியாளதூர் என்ற அடர்ந்த வனப்பகுதிக்கு செல்ல வேண்டும். அங்குள்ள ஒரு இடத்தில்தான் சிக்னல் கிடைக்கும்.

ஆனால் இந்த வனப்பகுதியில் யானைகள் நடமாட்டம் அதிகளவில் உள்ளது. இதைத்தாண்டி தான் மாணவர்கள் ஆன்லைன் வகுப்புகளில் பங்கேற்று வருகின்றனர். ஒரு சில மாணவர்கள் படிப்பதை நிறுத்தி விட்டனர். இதனால் இந்த பகுதியில் செல்போன் டவர் அமைக்க வேண்டும் என நீண்ட வருடமாக மலை கிராம மக்கள் கோரிக்கை விடுத்து வந்தனர். இதுகுறித்து கலெக்டரிடம் அவர்கள் கோரிக்கை விடுத்தனர்.

இதையடுத்து கலெக்டர் கிருஷ்ணனுண்ணி மலைப்பகுதியில் செல்போன் டவர் அமைக்க தனியார் தொலைத் தொடர்பு நிறுவனத்திடம் பேச்சுவார்த்தை நடத்தி வந்தார். இதன் பயனாக தனியார் தொலைத்தொடர்பு நிறுவனம் சார்பாக மலை கிராமப்பகுதியில் செல்போன் டவர் அமைக்க முடிவு செய்யப்பட்டது.

இதற்காக அங்குள்ள மலை உச்சியில் உள்ள பட்டா நிலத்தில் செல்போன் டவர் அமைக்க இடம் தேர்வு செய்யப்பட்டது. இதையடுத்து அந்தப் பகுதியை தூய்மைப்படுத்தும் பணி தீவிரமாக நடைபெற்று வருகிறது. இந்த பணிகள் முடிவடைந்ததும் கான்கிரீட் கட்டும் பணி தொடங்குகிறது.

அதைத் தொடர்ந்து இன்னும் ஒரு மாதத்துக்குள் செல்போன் டவர் கோபுரம் அமைக்கும் பணி முழுமையாக முடிவடையும் என அதிகாரிகள் தெரிவித்தனர். நீண்டநாள் கோரிக்கைகள் நிறைவேற உள்ளதால் மலைகிராம மக்கள், மாணவர்கள் மகிழ்ச்சி அடைந்துள்ளனர்.

சத்தியமங்கலம்:

பவானிசாகர் அணை மூலம் ஈரோடு, திருப்பூர், கரூர் மாவட்டங்களில் சுமார் 2 லட்சத்து 47 ஆயிரம் ஏக்கர் விவசாய நிலங்கள் பாசன வசதி பெற்று வருகிறது. மேலும் பல்வேறு கூட்டு குடிநீர் திட்ட பணிகளும் பவானிசாகர் அணை மூலம் செயல்படுத்தப்பட்டு வருகிறது.

கடந்த ஆண்டு நீர்பிடிப்பு பகுதிகளில் பெய்த மழை காரணமாக பவானிசாகர் அணை நீர்மட்டம் 2 முறை 100 அடியை தொட்டது. அரக்கன்கோட்டை- தடப்பள்ளி பாசனம், கீழ்பவானி வாய்க்கால் பாசனம் மற்றும் குடிநீர் தேவைக்காக ஆற்றில் தொடர்ந்து தண்ணீர் திறக்கப்பட்டு வந்தாலும் அணையின் நீர்மட்டம் 100 அடிக்கு குறையாமல் இருந்தது.

இந்நிலையில் கடந்த நவம்பர் மற்றும் டிசம்பர் மாதங்களில் பெய்த மழை காரணமாக நீர்வரத்து அதிகரித்து அணையின் நீர்மட்டம் 105 அடியை நெருங்கியது. பின்னர் அணையின் பாதுகாப்பு கருதி அணைக்கு வரும் தண்ணீர் அப்படியே ஆற்றில் திறந்து விடப்பட்டது.

இதற்கிடையே நீர்பிடிப்பு பகுதிகளில் மழை குறைந்து விட்டதால் அணைக்கு நீர்வரத்து குறைந்துள்ளது. அதே நேரம் அதிகளவில் தண்ணீர் வெளியேற்றப்பட்டு வருகிறது. இதனால் பவானிசாகர் அணை நீர்மட்டம் குறைய தொடங்கி உள்ளது. இன்று காலை 8 மணி நிலவரப்படி அணையின் நீர்மட்டம் 101.14 அடியாக இருந்தது. அணைக்கு 892 கனஅடி தண்ணீர் வந்து கொண்டிருந்தது. அணையில் இருந்து அரக்கன்கோட்டை- தடப்பள்ளி கால்வாயில் 200 கனஅடியும், குடிநீர் தேவைக்காக பவானி ஆற்றில் 100 கனஅடியும், கீழ்பவானி வாய்க்காலில் வினாடிக்கு 2300 கனஅடியும் என மொத்தம் 3 ஆயிரத்து 100 கனஅடி தண்ணீர் திறந்து விடப்பட்டுள்ளது. தொடர்ந்து இதேஅளவில் இருந்தால் அணையின் நீர்மட்டம் இன்னும் 2 நாட்களில் 100 அடிக்கு கீழே சென்று விடும்.