கடலூர்

கடலூர் :

வடலூரில் தைப்பூச திருவிழா கொடியேற்றத்துடன் தொடங்கியது. சத்தியஞான சபையில் இன்று(வியாழக்கிழமை) ஜோதி தரிசனம் நடக்கிறது. இதற்காக அங்கு பக்தர்கள் குவிந்துள்ளனர்.

விழாவின் சிகர நிகழ்ச்சியான தைப்பூச ஜோதி தரிசனம் சத்திய ஞானசபையில் இன்று காலை 6 மணிக்கு ஜோதி தரிசனம் நடைபெற்றது. இதில் ஞானசபையில் நிலை கண்ணாடிக்கு முன்பு கருப்பு, நீலம், பச்சை, சிவப்பு, பொன் நிறம், வெள்ளை, கலப்பு வண்ண திரை என்று 7 வண்ண திரைகள் உள்ளன. அந்த திரைகள் ஒவ்வொன்றாக விலக்கி நிலை கண்ணாடிக்குள் இருக்கும் ஜோதியை காண்பதே ஜோதி தரிசனமாகும்.


தொடர்ந்து காலை 10 மணி, மதியம் 1 மணி, இரவு 7 மணி, இரவு 10 மணி மற்றும் நாளை காலை 5.30 மணிக்கு ஜோதி தரிசனம் நடைபெற உள்ளது.

வடலூர் :

கடலூர் மாவட்டம் வடலூரில் அருட்பிரகாச வள்ளலார் நிறுவிய சத்திய ஞானசபையில் ஆண்டுதோறும் தைப்பூச விழா நடைபெறுவது வழக்கம்.

இந்த ஆண்டு தைபூச திருவிழாவையொட்டி வடலூர் வள்ளலார் ஞானசபையில் இன்று காலை 10 மணிக்கு கொடியேற்றம் நிகழ்ச்சி நடைபெற்றது. இதில் ஏராளமான பக்தர்கள் கலந்து கொண்டனர். இன்று இரவு தருமச்சாலை மேடையில் சன்மார்க்க சொற்பொழிவு நடைபெறுகிறது.

நாளை (28-ந்தேதி) தைப்பூச திருவிழாவையொட்டி காலை 6 மணி 10 மணி, பகல் 1 மணி, இரவு 7 , மணி 10 மணி, மறுநாள் காலை 5.30 ஆகிய 6 காலங்களில் 7 திரைநீக்கி ஜோதி தரிசனம் நடைபெறுகிறது.

இதனை காண தமிழகம் மற்றும் உலகெங்கும் வாழும் தமிழர்கள், லட்சக்கணக்கான சன்மார்க்க அன்பர்கள் திரளுவது வழக்கம். இதற்காக தமிழகத்தின் பல பகுதியில் இருந்தும் வடலூ ருக்கு சிறப்பு பஸ் மற்றும் ரெயில்கள் இயக்க ஏற்பாடு செய்யப்பட்டுள்ளது.

தைப்பூசத்தன்றுகாலை 10 மணிக்கு தருமச்சாலை மேடையில் சிறப்பு நிகழ்ச்சிகள் மாவட்ட கலெக்டர் சந்திர சேகர் சாகமூரி முன்னிலையிலும், தமிழக தொழில் துறை அமைச்சர் எம்.சி.சம்பத்தலைமையிலும் நடைபெறுகிறது.

இதில் அறநிலையத்துறை அமைச்சர் சேவூர் ராமச்சந்திரன் மற்றும் எம்.பி., எம்.எல்.ஏ. க்கள், மாவட்ட அரசு அதிகாரிகள் உட்பட பலர் கலந்து கொள்கின்றனர். தைப்பூச விழாவிற்கு பின்னர் ஒருநாள் இடைவெளி விட்டு (30-ந் தேதி) பகல் 12 மணி முதல் மாலை 6 மணிவரை மேட்டுக்குப்பத்தில் வள்ளலார் சித்திப்பெற்ற திருஅறைதரிசனம் நடைபெறுகிறது.

முன்னதாக வடலூர் ஞானசபையில் இருந்து வள்ளலார் பயன்படுத்திய பொருட்கள் அடங்கிய பெட்டியை பூக்களால் அலங்கரித்து மேளதாளம் முழங்க வள்ளலார் சித்திபெற்ற திரு அறையில் உள்ள மேட்டுக்குப்பம் கொண்டு செல்லப்படும்.

அங்கு பக்தர்கள் வழிபாட்டுக்கு பின்னர் மீண்டும் வடலூர் கொண்டு வரப்படும் தைப்பூச திருவிழா வையொட்டி பல்வேறு சன்மார்க்க சங்கத்தினர்களும், சொற்பொழிவுகள், இசை நிகழ்ச்சி, நாடகம் உள்ளிட்ட பல கலைநிகழ்ச்சிகள் நடைபெறுவது வழக்கம்.

ஆனால் இந்த ஆண்டு கொரோனா தொற்று காரணமாக பல்வேறு தளர்வுகளுடன் ஊரடங்கு உத்தரவு நடைமுறையில் இருப்பதால் இந்த ஆண்டு அந்த கலை நிகழ்ச்சிகள் தடைசெய்யப்பட்டுள்ளது. தைப்பூச விழாவை யொட்டி வடலூர் பகுதிகளில் ஏராளமான கடைகள் அமைக்கப்படும். இந்த ஆண்டு கொரோனா ஊரடங்கு காரணமாக கடைகள் அமைக்கப்படவில்லை.

கடலூர்:

கடலூர் மாவட்டம் இலங்கியனூர் கிராமத்தை சேர்ந்தவர் ராம்குமார். இவரது மனைவி மணிமேகலை. இவர்களுக்கு 4 வயதில் விக்னேஸ்வரன், சர்வேஸ்வரன் என இரட்டை குழந்தைகள் இருந்தனர்.

இந்த நிலையில் மணிமேகலை தனது குழந்தைகளுடன் திருப்பெயர் கிராமத்தில் உள்ள தனது பாட்டி வீட்டுக்கு வந்திருந்தார். மணிமேகலையை பார்ப்பதற்காக அந்த கிராமத்தில் வசித்து வரும் அவரது சகோதரி மல்லிகா தனது 4 வயது மகன் விவேகனுடன் பாட்டி வீட்டு வந்திருந்தார்.

நேற்று முன்தினம் மாலை விவேகன், விக்னேஸ்வரன், சர்வேஸ்வரன் ஆகிய 3 சிறுவர்களும் அங்குள்ள குளத்திற்கு அருகே விளையாடிய போது துரதிருஷ்டவசமாக குளத்தில் தவறி விழுந்து உயிரிழந்துள்ளனர். நேற்று குளத்திற்குள் இருந்து தீயணைப்பு வீரர்கள் சிறுவர்கள் 3 பேரின் உடல்களையும் மீட்டு வெளியே கொண்டுவந்தனர். இதை பார்த்து அவர்களது பெற்றோர் மற்றும் குடும்பத்தினர் கதறி அழுதனர்.

இதேபோல் பண்ருட்டி அருகே மற்றொரு துயரசம்பவம் நடந்துள்ளது.

பண்ருட்டி அருகே உள்ள ஏ.புதூர் கிராமம் வடக்கு தெருவை சேர்ந்தவர் லட்சபூபதி. காய்கறி வியாபாரி. இவரது மகள்கள் நந்தினி(18), வினோதினி(17). அதே பகுதியை சேர்ந்தவர் பாலமுருகன் மகள் புவனேஸ்வரி (20).

இதில் வடலூரில் உள்ள பெண்கள் மேல்நிலைப்பள்ளியில் வினோதினி பிளஸ்-2-வும், நந்தினி வடலூரில் உள்ள தனியார் கல்லூரியில் பி.எஸ்சி. முதலாமாண்டும் படித்து வந்தனர். புவனேஸ்வரி குறிஞ்சிப்பாடியில் உள்ள ஒரு கல்லூரியில் பி.எஸ்சி. இறுதியாண்டு படித்து வந்தார்.

இந்த நிலையில் அந்த கிராமத்தில் உள்ள கன்னியம்மன் கோவிலில் கன்னிவிடு திருவிழாவையொட்டி நேற்று சாமிக்கு அங்குள்ள குளத்தில் தீர்த்தவாரி நடைபெற்றது. திருவிழாவில் ஏராளமானவர்கள் கலந்து கொண்டு குளத்தில் நீராடினர். மாணவிகள் நந்தினி, வினோதினி, புவனேஸ்வரி ஆகியோரும் குளத்தில் இறங்கி நீராடினர்.

அப்போது, எதிர்பாராதவிதமாக மாணவிகள் 3 பேரும் அடுத்தடுத்து தண்ணீரில் மூழ்கி பரிதாபமாக உயிரிழந்தனர்.

குளத்தில் மூழ்கி இரட்டை குழந்தைகள் உள்பட 6 பேர் பலியான சம்பவங்களால் மேற்படி இரு கிராமங்களும் சோகத்தில் மூழ்கின.

கடலூர் மாவட்டம் வடலூரில் அருட்பிரகாச வள்ளலார் நிறுவிய சத்திய ஞான சபை உள்ளது. இங்கு ஆண்டுதோறும் தைப்பூச ஜோதி தரிசன விழா வெகுவிமரிசையாக நடைபெறும். அதன்படி இந்த ஆண்டுக்கான தைப்பூச ஜோதி தரிசன விழா நாளை மறுநாள்(புதன்கிழமை) காலை கொடியேற்றத்துடன் தொடங்குகிறது. இதையொட்டி அன்றைய தினம் காலை 5 மணிக்கு அருட்பெருஞ்ஜோதி அகவல் பாராயணமும், காலை 7.30 மணிக்கு தருமசாலையில் சன்மார்க்க கொடியேற்றுதல் நிகழ்ச்சி நடைபெற உள்ளது. அதேசமயத்தில் மருதூர், நற்கருங்குழி, மேட்டுக்குப்பம் வள்ளலார் சன்னதிகளிலும் கொடியேற்றப்படுகிறது. அதன்பிறகு காலை 10 மணியளவில் ஞானசபையில் கொடியேற்றம் நடக்கிறது. இரவு 7 மணியளவில் தருமச்சாலை மேடையில் சன்மார்க்க சொற்பொழிநடைபெறும்.

சிகர விழாவாக 28-ந்தேதி(வியாழக்கிழமை) தைப்பூச விழாவையொட்டி காலை 6 மணி, 10 மணி, மதியம் 1 மணி, இரவு 7 மணி, இரவு 10 மணி மற்றும் மறுநாள் 29-ந்தேதி காலை 5.30 மணி ஆக 6 காலம், 7 திரைகளை நீக்கி ஜோதி தரிசனம் நடைபெறுகிறது.

இந்த விழாவில் தமிழகத்தில் இருந்து லட்சக்கணக்கான பக்தர்கள் கலந்து கொண்டு சாமி தரிசனம் செய்ய உள்ளனர்.

இதையடுத்து வருகிற 30-ந்தேதி மதியம் 12 மணி முதல் மாலை 6 மணி வரை மேட்டுக்குப்பம் வள்ளலார் சித்திப்பெற்ற திருஅறைதரிசனம் நடைபெறுகிறது.

முன்னதாக வடலூர் ஞானசபையில் இருந்து வள்ளலார் பயன்படுத்திய பொருட்கள் அடங்கிய பெட்டியை பூக்களால் அலங்கரித்து மேளதாளம் முழங்க வள்ளலார் சித்திபெற்ற திருஅறை உள்ள மேட்டுக்குப்பம் கொண்டு செல்லப்படும். அங்கு பக்தர்கள் வழிபாட்டுக்கு பின்னர் மீண்டும் வடலூர் கொண்டு வரப்படும்.

கொரோனா வழிகாட்டுதலின்பேரில் தைப்பூச திருவிழாவையொட்டி சன்மார்க்க சங்கங்கள் சார்பில் நடைபெறும் சொற்பொழிவு, இசைநிகழ்ச்சி, நாடகம் உள்ளிட்ட பல்வேறு கலைநிகழ்ச்சிகளுக்கு மாவட்ட நிர்வாகம் தடை விதித்துள்ளது. மேலும் கொரோனா பரவலை தடுக்க ஏதுவாக இந்தாண்டு கடைகள், நடன நாட்டிய அரங்குகள், ராட்டினம் உள்ளிட்டவைகள் வைக்க தடைசெய்யப்பட்டுள்ளது. விழாவை முன்னிட்டு ஞானசபை வளாகத்தில் பிரமாண்ட பந்தல் அமைக்கும் பணிகள் தீவிரமாக நடைபெற்று வருகிறது.

விழாவுக்கான ஏற்பாடுகளை வள்ளலார் தெய்வ நிலையத்தின் செயல் அலுவலர் சரவணன் மற்றும் பார்வதிபுரம் கிராம மக்கள் செய்து வருகிறார்கள்.

நெய்வேலி:

கடலூர் மாவட்டம் நெய்வேலி 5-வது வட்டம் என்.எல்.சி. குடியிருப்பில் வசித்து வருபவர் பாலமுருகன். இவரது மனைவி சுந்தரி. இவர் விருத்தாசலம் அடுத்த பரவளூரில் கிராம நிர்வாக அலுவலராக பணிபுரிந்து வருகிறார். இவர்களது மகள் ரம்யாகவுரி(வயது 19) ரஷ்யா நாட்டில் உள்ள ஒரு மருத்துவ கல்லூரியில் எம்.பி.பி.எஸ். 2-ம் ஆண்டு படித்து வந்தார். கொரோனா பரவல் காரணமாக மருத்துவக்கல்லூரி மூடப்பட்டதால் ரம்யாகவுரி கடந்த சில மாதங்களுக்கு முன்பு சொந்த ஊருக்கு வந்துவிட்டார்.

நேற்று காலை வீட்டில் இருந்த ரம்யாகவுரியின் செல்போன் எண்ணுக்கு அழைப்பு வந்தது. இதைகேட்ட அவரது தாயார் சுந்தரி, மகளிடம் உன்னிடம் செல்போனில் பேசியது யார்? என கேட்டுள்ளார். அதற்கு ரம்யாகவுரி பதில் ஏதும் கூறாமல் அறைக்குள் சென்று கதவை உள்பக்கமாக தாழிட்டு கொண்டார்.

இதனால் பதறிய சுந்தரி அக்கம் பக்கத்தினர் உதவியுடன் அறையின் கதவை உடைத்து உள்ளே புகுந்து பார்த்தபோது, ரம்யா கவுரி துப்பட்டாவால் தூக்குப்போட்டபடி மயங்கிய நிலையில் தொங்கினார். இதைபார்த்து அதிர்ச்சியடைந்த சுந்தரி அவரை மீட்டு நெய்வேலியில் உள்ள ஒரு மருத்துவமனைக்கு கொண்டு சென்றார். அங்கு அவரை பரிசோதித்த டாக்டர்கள், ரம்யா கவுரி ஏற்கனவே இறந்து விட்டதாக கூறினர். இதுகுறித்த புகாரின்பேரில் நெய்வேலி டவுன்ஷிப் போலீசார் வழக்குப்பதிவு செய்து ரம்யாகவுரி தற்கொலை செய்து கொண்டதற்கான காரணம் குறித்து விசாரணை நடத்தி வருகிறார்கள்.

கடலூர்:

போலியோ நோயை தடுப்பதற்காக தீவிர போலியோ சொட்டு மருந்து முகாம் 1995-ம் ஆண்டு தொடங்கப்பட்டு, நடைபெற்று வருகிறது. அந்த வகையில் இந்த ஆண்டு 5 வயதுக்குட்பட்ட அனைத்து குழந்தைகளுக்கும் போலியோ சொட்டு மருந்து வழங்கும் வகையில் கடலூர் மாவட்டத்தில் இம்முகாம் வருகிற 31-ந் தேதி நடைபெற உள்ளது.

இந்த போலியோ சொட்டு மருந்து முகாம் அரசு மருத்துவமனைகள், ஆரம்ப சுகாதார நிலையங்கள், துணை சுகாதார மையங்கள், தனியார் மருத்துவமனைகள், பள்ளிக்கூடங்கள், சத்துணவு மையங்கள், அங்கன்வாடி மையங்கள், சத்திரங்கள் மற்றும் தேசிய நெடுஞ்சாலைகளில் உள்ள சுங்கச்சாவடிகள் ஆகிய இடங்களில் நடைபெற உள்ளது.

கடலூர்:

கடலூர் அருகே நடுவீரப்பட்டு போலீஸ் சரகம் பத்திரக்கோட்டையை சேர்ந்தவர் நாகமுத்து. அவரது மகள் சரண்யா (வயது 27). இவர் அரியலூர் மாவட்டத்தில் ஆயுதப்படை போலீசாக இருந்து வந்தார். சரண்யாவுக்கு முடக்குவாதம் நோய் இருந்து வந்ததால் கடந்த 2 மாதமாக விடுமுறை எடுத்து சிகிச்சை பெற்று வந்தார்.

மீண்டும் பணிக்கு திரும்பியவர் உடல்நிலை சரியில்லாத காரணத்தினால் 3 நாட்கள் விடுமுறையில் வீட்டிற்கு வந்தார். நேற்று வெளியில் சென்று வந்த அவரது தாயார், வீட்டு கதவு நீண்ட நேரம் திறக்காத நிலையில் இருந்ததால் சந்தேகமடைந்து கதவைத் திறந்து பார்த்தார். அப்போது சரண்யா தூக்கு மாட்டி இறந்த நிலையில் இருந்ததை பார்த்து அவரது தாய் மற்றும் உறவினர்கள் கதறி அழுதனர்.

தகவல் அறிந்த நடுவீரப்பட்டு சப்-இன்ஸ்பெக்டர் விஜயபாஸ்கர் சம்பவ இடத்திற்கு சென்று இறந்த பெண் போலீஸ் சரண்யா உடலை மீட்டு பிரேத பரிசோதனைக்காக கடலூர் அரசு மருத்துவமனைக்கு அனுப்பி வைத்தனர்.

இதுகுறித்து நடுவீரப்பட்டு போலீசார் வழக்குப்பதிவு செய்து விசாரணை நடத்தி வருகின்றனர். இந்த சம்பவத்தால் அந்த பகுதியில் பரபரப்பாக காணப்பட்டது.

புவனகிரி:

புவனகிரி அருகே உள்ள தம்பிக்கு நல்லான்பட்டினம் கிராமத்தை சேர்ந்தவர் கலைமணி. இவருடைய மனைவி ராஜேஸ்வரி (வயது 36). ஆசிரியையான இவர், புவனகிரியில் உள்ள ஒரு தனியார் பள்ளிக்கூடத்தில் பணிபுரிந்து வந்தார். இந்த தம்பதிக்கு வர்ஷினி (8) என்ற மகளும், விஷ்ணுவர்தன் (6) என்ற மகனும் உள்ளனர்.

இந்த நிலையில் ராஜேஸ்வரி, தனது மகள் வர்ஷினியுடன் ஸ்கூட்டரில் புவனகிரியில் உள்ள பள்ளிக்கூடத்திற்கு புறப்பட்டார். பள்ளிக்கூடம் அருகே சென்றபோது, எதிரே வந்த டிராக்டர் எதிர்பாராதவிதமாக ராஜேஸ்வரி ஓட்டி வந்த ஸ்கூட்டர் மீது மோதியது. இதில் படுகாயமடைந்த ராஜேஸ்வரி சம்பவ இடத்திலேயே துடிதுடித்து பலியானார். மேலும் வர்ஷினி காயமடைந்தார்.

இது பற்றி தகவல் அறிந்ததும் புவனகிரி போலீஸ் இன்ஸ்பெக்டர் ராபின்சன் தலைமையிலான போலீசார் விரைந்து சென்று ராஜேஸ்வரியின் உடலை கைப்பற்றி பிரேத பரிசோதனைக்காக சிதம்பரம் அரசு மருத்துவமனைக்கு அனுப்பி வைத்தனர்.

மேலும் காயமடைந்த வர்ஷினி சிகிச்சைக்காக புவனகிரியில் உள்ள தனியார் மருத்துவமனையில் அனுமதிக்கப்பட்டார். அங்கு அவருக்கு தீவிர சிகிச்சை அளிக்கப்பட்டது. இது குறித்து புவனகிரி போலீசார் வழக்குப்பதிவு செய்து விசாரணை நடத்தி வருகின்றனர்.