தி.மு.க.வுடன் உறவு வைத்து அ.தி.மு.க.வை அழிக்கப் பார்க்கிறார் தினகரன்- அமைச்சர் திண்டுக்கல் சீனிவாசன்

மதுரை:

திருப்பரங்குன்றம் இடைத்தேர்தலையொட்டி தமிழக அரசின் சாதனைகளை வாக்காளர்களுக்கு எடுத்துக் கூற பெண்கள் பங்கேற்கும் சைக்கிள் பேரணி ஜெயலலிதா பேரவை சார்பில் வருகிற 24-ந்தேதி நடைபெற உள்ளது. இதற்கான பயிற்சி முகாம், மதுரை ரிங்ரோட்டில் உள்ள திருமண மண்டபத்தில் நடந்தது.

முகாமில் அமைச்சர் திண்டுக்கல் சீனிவாசன் பேசியதாவது:-

திருப்பரங்குன்றம் இடைத்தேர்தலில் பிரசாரம் செய்வதற்காக இங்கே திரண்டுள்ள பெண்களை பார்க்கும்போது மகளிர் மாநாடு போல இருக்கிறது. தமிழகம் தற்போது 19 அரசு துறைகளில் தலைசிறந்து விளங்கி வருகிறது.

1972-ல் எம்.ஜி.ஆர். அ.தி.மு.க.வை தொடங்கிய போது முதல் வெற்றியை தந்தது ஒருங்கிணைந்த மதுரை மாவட்டம். இது போன்ற ஒரு வெற்றியை திருப்பரங்குன்றம் இடைத்தேர்தலில் நாம் பெற வேண்டும். பெண்கள் நினைத்தால் எதையும் சாதிக்கலாம்.

டி.டி.வி. தினகரன் அ.தி.மு.க.வை அழிக்கப்பார்க்கிறார். தி.மு.க.வோடு உறவு வைத்துக்கொண்டு அ.தி.மு.க.வை வீழ்த்திவிடலாம் என கனவு காண்கிறார். அவரது எண்ணம் பலிக்காது. அவர் நமக்கு எதிரி அல்ல. தி.மு.க.தான் முக்கிய எதிரி. எனவே அ.தி.மு.க. வெற்றிக்கு அனைவரும் துணை நிற்க வேண்டும்.

இவ்வாறு அவர் பேசினார். #ADMK #TNMinister #DindigulSrinivasan #TTVDhinakaran #DMK