நீங்கள் தேடியது "tag 128475"

சரஸ்வதி நமஸ்துப்யம் வரதே காம ரூபிணி
வித்யாரம்பம் கரிஷ்யாமி ஸித்திர் பவது மே ஸதா...
ஆய கலைகள் அறுபத்து நான்கினையும்
ஏய உணர்விக்கும் என் அம்மை -தூய
உருப்பளிங்கு போல்வாள் என் உள்ளத்தினுள்ளே
இருப்பளிங்கு வாராது இடர்.

ஓம் கலைவாணியே போற்றி
ஓம் கல்வியறிவு தருபவளே போற்றி
ஓம் நான்முகனின் நாயகியே போற்றி
ஓம் நான்முகனின் நாநுனியில் வசிப்பவளே போற்றி
ஓம் சகல கலா வல்லித்தாயே போற்றி
ஓம் ஏகவல்லி நாயகியே போற்றி
ஓம் பிரம்மதேவரின் பத்தினியே போற்றி
ஓம் பரசுராமரைப் பெற்றவளே போற்றி
ஓம் கல்வியறிவிற்கு அதிபதியே போற்றி
ஓம் மஹா மாயா சக்தியும் நீயே போற்றி
ஓம் தாமரை மலரில் வாசம் செய்பவளே போற்றி
ஓம் கேட்கும் வரமனைத்தும் தருபவளே போற்றி
ஓம் ஞானமுத்திரை தருபவளே போற்றி
ஓம் புத்தகம் கரத்தில் கொண்டவளே போற்றி
ஓம் மஹா வித்தை நீயே தாயே போற்றி
ஓம் மஹா பாதகங்களை துவம்சம் செய்பவளே போற்றி
ஓம் அனைத்து யோகங்களையும் தருபவளே போற்றி
ஓம் மஹாகாளி மஹாதுர்கா மஹாலஷ்மி நீயே போற்றி
ஓம் உயரிய கல்வியை கேட்டபடி தருபவளே போற்றி
ஓம் கற்றதற்கு ஏற்ற உயர்வாழ்வை வரமாய்த் தருபவளே போற்றி
ஓம் சர்வ மந்த்ரங்களின் மூலாதாரப் பொருள் நீயே போற்றி
ஓம் சர்வ மங்கள மந்திரங்கள் சித்தி யளிப்பவளே போற்றி
ஓம் சர்வ மங்கள மாங்கல்ய பலம் தருபவளே போற்றி
ஓம் சர்வ சாஸ்த்திரங்களின் உற்பத்தி ஸ்தலம் நீயே போற்றி
ஓம் கற்றோரை சென்ற இடமெல்லாம் சிறப்பிக்கும் தாயே போற்றி
ஓம் நல்லவர் நாவில் இருந்து நல்வாக்கு சொல்பவளே போற்றி
ஓம் அற்புத மந்திரம் எழுதும் வாணியே போற்றி
ஓம் அழகுவீணை இசைப்பவளே போற்றி
ஓம் கலைகள் மூன்றிற்கும் மூலாதாரச் சுடரே போற்றி
ஓம் கல்வியை உனது ரூபமாகக் கொண்டவளே போற்றி
ஓம் யந்திர தந்திர மந்த்ரம் கற்றுத் தருபவளே போற்றி
ஓம் தொழிற் கல்வி அனைத்தும் தருபவளே போற்றி
ஓம் அனைத்து வாகனங்களின் சூட்சுமம் நீயே போற்றி
ஓம் கணிதம் தந்த கலைவாணித் தாயே போற்றி
ஓம் கணிப்பொறி யியலின் காரணி போற்றி
ஓம் காலம் நேரம் வகுத்தவளே போற்றி
ஓம் விஞ்ஞானத்தின் மூலாதாரமே போற்றி
ஓம் அண்ட சராசரங்களின் இருப்பிடம் கணித்த தாயே போற்றி
ஓம் வான சாஸ்திர அறிவின் பிறப்பிடம் நீயே போற்றி
ஓம் வறுமையை போக்கும் கல்வித் தாயே போற்றி
ஓம் இயல் இசை நாடகம் போதித்த கலைமகளே போற்றி
ஓம் வீணை யொலியில் மந்த்ரம் மீட்டும் தாயே போற்றி
ஓம் மூவுலகும் மயங்கும் வீணை மீட்டும் வீணா கான வாணி போற்றி
ஓம் முத்தமிழும் தழைக்கச் செய்த அன்னையே போற்றி
ஓம் வாக்கிற்கு அதிதேவதை நீயே தாயே போற்றி
ஓம் சௌபாக்ய செல்வம் தரும் மந்த்ரம் நீயே போற்றி
ஓம் வாழ்வைப் புனிதமாக்கும் மந்திரமே போற்றி
ஓம் கலைவாணித் தாயே சரஸ்வதியே போற்றி
ஓம் ரக்தபீஜ சம்ஹார மந்த்ரம் தந்த வாணீ போற்றி
ஓம் அம்பிகை சாமுண்டி வராஹி யாவரும் நீயே போற்றி
ஓம் முக்காலங்களிலும் முகிழ்ந்து உறைந்தவளே போற்றி
ஓம் சுபாஷிணி சுபத்ரை விஷாலாட்சி மூவரும் நீயே போற்றி
ஓம் பிரஹ்மி வைஷ்ணவி சண்டி சாமுண்டி நீயே போற்றி
ஓம் பாரதி கோமதி நாயகி நாண்முகி தாயே போற்றி
ஓம் மகாலஷ்மி மஹாசரஸ்வதி மகாதுர்கா நீயே போற்றி
ஓம் விமலா மாகாளி மாலினி யாவரும் நீயே போற்றி
ஓம் விந்திய விலாசினி வித்யா ரூபினி போற்றி
ஓம் மஹா சக்தியினுள்ளே உறைபவள் போற்றி
ஓம் சர்வ தேவியருள்ளும் உறைபவள் நீயே போற்றி
ஓம் பொன்னும் மெய்ப்பொருளும் கல்வியினால் அருள்பவளே போற்றி
ஓம் திருமால் உந்தியில் உதித்தவனின் துணைவி போற்றி
ஓம் உலகின் எல்லா எழுத்திற்கும் மூலமே போற்றி
ஓம் ஐம் ஹ்ரீம் ஸ்ரீம் மந்திர எழுத்துகளின் ரூபமே போற்றி
ஓம் மந்திர ராஜ்யத்தின் தேவி பீஜாட்ஸரி போற்றி
ஓம் சர்வாம்பிகையே சத்தியவாசினி புத்தகவாசினியே போற்றி
ஓம் சர்வ அபாயங்களையும் துவம்சிப்பவளே போற்றி
ஓம் சாற்றுக் கவி நாநுனி யுரையும் அன்னையே போற்றி
ஓம் காற்றில் கலந்த மந்திர ஒலியே போற்றி
ஓம் வித்யா திருஷ்டா யுத்மா போற்றி
ஓம் வாக்கின் தலைவியான வாக்தேவி போற்றி
ஓம் விஞ்சு பகவதி உயர்புகழ் பிராம்ஹி போற்றி
ஓம் சொல்லும் சொல்லின் மெய்ஞானப் பொருளே போற்றி
ஓம் நீதித்துறை நடுநின்ற நாயகி போற்றி
ஓம் பண் பரதம் கல்வி தருபவளே போற்றி
ஓம் கற்றவர் நாவில் உறைபவளே போற்றி
ஓம் யந்திர வாகன ஆயுதங்களின் அதிதேவதையே போற்றி
ஓம் தேகத்தின் புத்திப் பகுதியில் உறைபவளே போற்றி
ஓம் வேத தர்ம நீதி சாஸ்திரங்கள் வகுத்தவளே போற்றி
ஓம் பூஜிப்போர் மனம் மகிழ்விப்பவளே போற்றி
ஓம் அனைத்து புண்ய தீர்த்தங்களின் ரூபத்தவளே போற்றி
ஓம் யமுனை நதி தீரத்தின் மையங் கொண்டவளே போற்றி
ஓம் சர்வ ஜீவ காருண்ய மனம் கொண்ட மாதரசி போற்றி
ஓம் பிரம்மா லோகத்தை மையம் கொண்ட பிரம்ம நாயகி போற்றி
ஓம் உச்ச நிலை வறுமையையும் கற்ற வித்தை கொண்டு அழிப்பவளே போற்றி
ஓம் சரணடைந்தவர்க்கு சாஸ்வத மானவளே போற்றி
ஓம் வேதாந்த ஞானிகளின் ரூபத்தவளே போற்றி
ஓம் எழு தாமரை யுறை புகழ் முன்றக் கரவுருள் போற்றி
ஓம் பின்னமேதுமில்லாமல் தேவையானதை தருபவளே போற்றி
ஓம் இடது ஒரு கையில் சுவடி கொண்டவளே போற்றி
ஓம் இடது மறு கையில் ஞானாமிர்த கலசம் கொண்டவளே போற்றி
ஓம் வலது ஒரு கையில் சின் முத்ரா கொண்டவளே போற்றி
ஓம் வலது மறு கையில் சிருஷ்டியின் அட்சரமாலை கொண்டவளே போற்றி
ஓம் பத்மாசனம் உறைபவளே போற்றி
ஓம் புத்திப் பிரகாசம் தருபவளே போற்றி
ஓம் வாக்கு வன்மை தருபவளே போற்றி
ஓம் மனதில் தூய்மை சாந்தி அமைதி தருபவளே போற்றி
ஓம் தத்துவ எழுத்து ரூபம் தாங்கிய தேவி போற்றி
ஓம் மஹா நைவேத்யம் உவந்தவள் போற்றி
ஓம் கற்பூர நீராஜனம் உவந்தவள் போற்றி
ஓம் ஸ்வர்ண புஷ்பம் உவந்தவளே போற்றி
ஓம் யுக தர்மம் கணித்தவளே சகலகலாவல்லியே போற்றி
ஓம் ஸ்ரீசக்கர பூஜையின் மந்திர ரூபிணியே போற்றி
ஓம் பதாம் புயத்தவளே சகலகலாவல்லியே போற்றி
ஓம் கற்றறிஞர் கவிமழை தரும் கலாப மயிலே போற்றி
ஓம் கண்ணும் கருத்தும் நிறை சகலாகலாவல்லியே போற்றி
ஓம் வெள்ளோதிமைப் பேடே சகலகலாவல்லியே போற்றி
ஓம் கண்கண்ட தெய்வமே சகலகாவல்லியே போற்றி
ஓம் கல்விச் செல்வம் தந்தருள்வாய் கலைவாணியே
போற்றி ... போற்றி ... போற்றி ... போற்றியே ....

வாணி சரஸ்வதி என் வாக்கில் நீ குடியிருந்து  
தாயே சரஸ்வதியே சங்கரி நீ என் முன் நடந்து
என் நாவில் குடியிருந்து நல்லோசை தந்துவிட்டு
கமலாசனத்தாலே எமைக் காத்து
என் குரலில் நீயிருந்து கொஞ்சிடனும் பெற்றவளே ...

என் நாவில் நீ தங்கி குடியிருந்து
சொற்பிழை பொருட்பிழை நீக்கி
நல்லறிவும் நல்வாழ்வும் நீ தந்து
மங்கல வாழ்விற்கு வழி வகுத்து
தஞ்சமென்ற பிள்ளைகளுக்கு
சாஸ்வதமான சரஸ்வதி தாயே
உன் திருவடி சரணம் போற்றி...
உன் மலரடி சரணம் போற்றி ...போற்றியே .....

இன்று வசந்த பஞ்சமி தினம். இது பசந்த் பஞ்சமி, ஸ்ரீபஞ்சமி என்ற பெயர்களிலும் வழங்கப்படுகின்றது. மானிடர்கள் பெற வேண்டிய மிக உயரிய செல்வம் ஞானமே அதை அருளும் சரஸ்வதி தேவி அவதரித்த தினமாதலால் ஸ்ரீ பஞ்சமி என்ற பெயரில் வழங்கப்படுகிறது. வங்காளத்தில் இது சரஸ்வதி பூஜை தினமாகவே கொண்டாடாப்படுகிறது.

ஸ்ரீசரஸ்வதி தேவிக்கு வசந்த பஞ்சமி தினத்தில் விரதம் இருந்து பூஜைகள் செய்து வழிபாடு செய்வதால் லௌகிக உலசில் அறிவு சார் கலைகளில் முன்னேற்றம் கிடைப்பது மட்டுமல்லாது ஆன்மீகத்தில் உயர்நிலைகளை அடைதலும் கிட்டும் என்பது நம்பிக்கை.

ஜோதிடத்தில் ஒரு ஜாதகத்தில் ஐந்தாவது இடம் நுண்ணறிவுக்கான இடமாக குறிக்கப்படுகின்றது. பஞ்சமி திதியன்று செய்யப்படும் இறைவழிபாடுகள், நுண்ணறிவை சரியான பாதையில் செலுத்த வல்லவை.

இந்தியாவில் தென் கிழக்கு மாகாணங்கள் சிலவற்றில் வசந்த பஞ்சமி தினம் புதுவருடத்துவக்கமாகவே கொண்டாடப்படுகிறது.

இன்றைய தினம் வசந்த பஞ்சமி தினத்தில் விரதம் இருந்து பூஜைகள் செய்வது மிகக்சிறப்பு. அக்ஷராப்பியாசத்திற்கும் கல்வி சம்வந்தமான புதிய முயற்சிகள் துவங்கவும் ஏற்ற தினம் இது. எந்த வகையான செயலாக இருந்தாலும் வெற்றிகரமாக முடிய இன்று தொடங்கலாம். ஸ்ரீகிருஷ்ணர், சாந்தீபனி முனிவரிடம் குருகுல வாசம் துவங்கிய நாளும் இன்று தான்.

இந்த விரத பூஜை கொஞ்சம் வித்தியாசமானது. பூஜை செய்ய உகந்த நேரம் காலை 9 முதல் 11 வரை. இது பூர்வாஹன காலம் என்று அழைக்கப்படுகிறது.

முதலில் தூய்மையான இடத்தை தேர்ந்தெடுத்து அங்கு கிழக்கு பார்த்து பூஜைமேடையை அமைக்க வேண்டும். கோலங்கள் முதலியவற்றால் அலங்கரிக்கவும். பூஜை துவங்கும் முன்பாக தூபங்கள் கமழச்செய்யும். தீபங்கள் ஒற்றைப்படை எண்ணிக்கையில் ஏற்றி வைத்தல் சிறப்பு.

பரிபூர்ணத்தை குறிக்கும் கலச ஸ்தாபனம் விநாயகர் பூஜை முதலியவற்றை முதலில் செய்ய வேண்டும். அதன் பின் ஸ்ரீவிஷ்ணுவையும் சிவனாரையும் விக்ரகங்கள் அல்லது படங்களில் ஆவாஹனம் செய்து பூஜைகள் செய்ய வேண்டும்.

அம்பினை சத்வ குண ஸ்வரூபிணி...அம்பிகையின் வெண்பட்டு வஸ்திரம், ஸ்படிக மாலை முதலிய சத்வ குணத்தையும் தூய்மையையும் குறிக்கின்றன. ஆகவே தத்வகுண ஸ்வரூபனான திருமாலி பூஜை செய்யப்படுகின்றார். சில புராணங்களின் படி, சரஸ்பதி தேவி, சிவனாரின் சகோதரியாக கருதப்படுகின்றாள். ஆகவே சிவனாரும் பூஜையில் இடம் பெறுகின்றார்.

சிவ, விஷ்ணு பூஜைகளுக்கு பின் சரஸ்பதி தேவியின் படத்திற்கு பூஜைசெய்ய வேண்டும். வெண்ணிற பட்டு வஸ்திரம் அல்லது மஞ்சள் நிற வஸ்திரம் சாற்றி மஞ்சள் நிற மலர்கள் அல்லது மல்லிகை மலர்களால் மாலைகள் சூட்டி, அலங்கரித்து, மல்லிகை, தாமரை, செண்பக மலர்களால் அஷ்டோத்திரம் கூறி அர்ச்சனை செய்யவும். அம்பிகையின் பன்னிரு திருநாமங்களை  கூறி வழிபாடு செய்வது மிகவும் சிறப்பானதாக கருதப்படுகின்றது.

பூஜை தினத்தன்று மாலையிலோ அல்லது மறுநாள் காலையிலோ இயன்றதை நிவேதனமாக செய்து புனர் பூஜை செய்து அம்பிகையையும் மற்ற தேவதைகளையும் யதாஸ்தானம் செய்யவும்.

விருப்பமிருப்பவர்கள் மேற்கூறிய பூஜை முறைகளின் படி பூஜை செய்யலாம். சரஸ்வதி பூஜைக்கென சாரதா நவராத்திரியில் செய்யும் பூஜைமுறைகளையும் பின்பற்றலாம்.

விஸ்தாரமான  பூஜைகள் செய்ய  இயலாதோரும், ஸ்ரீசரஸ்வதி தேவியின் படம் அல்லது பிரதிமையை அலங்கரித்து வைத்து தெரிந்த சரஸ்வதி துதிகளை பாராயணம் செய்து இயன்ற நிவேதனங்கள் படைத்து வழிபாடு செய்யலாம்.

ஸ்ரீசரஸ்வதி தேவியை போற்றும் ஸ்ரீசரஸ்வதி அந்தாதி துதியை இன்றைய தினம் சொல்லி வழிபாடு செய்யலாம்.

"ஸ்ரீ வித்யாரூபிணி சரஸ்வதி சகலகலாவல்லி
சாரபிம் பாதிரி சாரதாதேவி சாஸ்த்ரவல்லி
வாணி கமலவாணி வாக்தேவி வரநாயகி
வீணாபுஸ்தக தாரிணி புஸ்தக ஹஸ்தே
ஸ்ரீ வித்யாலட்சுமி நமோஸ்துதே"

இந்த ஸ்லோகத்தை தினமும் 3 முறை மாணவ மாணவியர்கள் பாராயணம்(சொல்லுதல்) செய்து வந்தால் ஞாபக சக்தி அதிகரித்து கல்வி அறிவு பெருகும்.

சத்தியலோகத்தில் இருக்கும் பிரம்மனுக்கும், சரஸ்வதிக்கு ஒரு முறை வாக்குவாதம் ஏற்பட்டது. அப்போது, ‘வாக்கு’ என்னும் கல்விக்கு அதிபதி என்ற கர்வம் சரஸ்வதியிடம் காணப்பட்டது. இதனால் பேசும் சக்தியை இழக்கும்படி சரஸ்வதிக்கு பிரம்மன் சாபம் கொடுத்தார்.

தன் தவறை எண்ணி வருந்திய சரஸ்வதி, பூலோகத்தில் வேதங்கள் வழிபட்ட வேதாரண்யம் (திருமறைக்காடு) சென்று அங்குள்ள ஈசனை நோக்கி தவமிருந்தாள். பின்னர் அத்தல அம்பாளிடம் யாழ் இசைத்து காண்பிக்க வந்தாள். அப்போது அம்பாளின் குரல், தன் யாழில் இருந்து வெளிப்பட்ட இசையை விட இனிமையாக இருப்பதைக் கண்டு, யாழை மூடிவைத்து விட்டாள். இதனால் தான் வேதாரண்யத்தில் உள்ள இறைவியின் பெயர் ‘யாழைப் பழித்த மென்மொழியாள்’ என்றானது.

தன்னைப் பிரிந்து சென்ற சரஸ்வதியைத் தேடி பூலோகம் வந்தார் பிரம்மன். தவத்தில் இருந்த சரஸ்வதியை சமாதானம் செய்து, வாணியம்பாடி தலத்திற்கு அழைத்துச் சென்றார். அங்கு அதிதீஸ்வரரையும், பெரியநாயகியையும் வழிபட்டதன் பயனாக சரஸ்வதிக்கு பேசும் சக்தி வந்தது. மேலும் அங்குள்ள ஹயக்ரீவன் முன்னிலையில் யாழை மீண்டும் சரஸ்வதி இசைக்க இறைவனும், இறைவியும் அருள்புரிந்தனர். இதையடுத்து சரஸ்வதி இனிய கீதம் இசைத்தாள்.


சரஸ்வதி பூஜையன்று இந்த தலத்தில் ஈசனையும், அம்பாளையும், கலைவாணியையும் முறையே ஐந்து தீபங்கள் ஏற்றி வழிபட்டால் கல்வியறிவு ஊற்றெடுக்கும் என்பது நம்பிக்கை. ஞானம், தெளிவு பிறக்கவும், கல்வியிலும் நேர்முகத் தேர்வுகளில் வெற்றிபெறவும், உயர்பதவிகள் கிடைக்கவும் இந்த ஆலயத்திற்கு வந்து வழிபடுபவர்களின் எண்ணிக்கை அதிகரித்து வருகிறது.

வேலூரில் இருந்து 65 கிலோமீட்டர் தூரத்திலும், ஜோலார்பேட்டையில் இருந்து 16 கிலோமீட்டர் தொலைவிலும் அமைந்துள்ளது வாணியம்பாடி.

* சிருங்கேரியில் சரஸ்வதி கோவிலில் ஒரு மாணவியைப் போல் படிக்கின்ற கோலத்தில் சரஸ்வதிதேவியை தரிசனம் செய்யலாம்.

* கர்நாடக மாநிலம் பேலூர் என்ற இடத்தில் உள்ள ஆலயத்தில் நடனமாடும் கோலத்தில் காட்சி தரும் சரஸ்வதியை கண்ணார கண்டு மகிழலாம்.

* நாகப்பட்டினம் மாவட்டம் கடலங்குடியில் உள்ள சிவன் கோவிலில் வளையல், கொலுசு அணிந்தபடி சரஸ்வதிதேவி காட்சியளிக்கிறாள்.

* ஜப்பானியர்கள் ‘பென்டென்’ என்னும் பெயரில் சரஸ்வதியை வழிபடுகின்றனர். டிராகன் என்ற அசுர பாம்பு வாகனத்தில் வரும் இத்தேவி சிதார் இசைக்கிறார்.

* இந்தோனேஷியாவிலும், பாலித்தீவிலும் புத்தகங்களை அலங்கரித்துப் பூஜிக்கும் வழக்கம் இருக்கிறது. இந்த பூஜைக்கு ‘கலஞ்சன்’ என்று பெயர்.

* விஜயதசமி நாளில் பாலித்தீவில் ‘தம்பாத் ஸரிம்’ என்னும் குளத்தில் நீராடி புத்தகங்களை வழிபட்டால் கல்வியில் சிறந்து விளங்கலாம் என்பது அங்குள்ள மக்களின் நம்பிக்கையாக இருக்கிறது.