வேலூர்

வேலூர்:

வேலூர் மாவட்ட போலீஸ் சூப்பிரண்டு கட்டுப்பாட்டில் செயல்படும் தனிப்படை போலீசார் செயல்பாடுகள் கடந்த சில மாதங்களாக புகாருக்கு உள்ளாகி வருகிறது.

தனிப்படையில் செயல்படும் சிலர் கஞ்சா, மணல் கடத்தல், காட்டன் சூதாட்டம், குட்கா விற்பனை என சட்ட விரோத நடவடிக்கையில் நேரடி தொடர்பில் இருந்து வருவதாக வேலூர் மாநகர போலீஸ் அதிகாரிகள் மத்தியில் அதிருப்தி பேச்சு எழுந்துள்ளது.

சமீபத்தில் ரே‌ஷன் அரிசி கடத்தல் கும்பலுடன் நேரடி தொடர்பில் இருக்கும் தனிப்படை போலீஸ் ஏட்டு குறித்த தகவல் வெளியானது.

தற்போது எஸ்.பி., தனிப்படையில் உள்ள போலீஸ்காரர் ஒருவர் மணல் கடத்தல் தொடர்பாக பேசிய ஆடியோ சமூக வலைதளங்களில் வெளியாகி பரபரப்பை ஏற்படுத்தியுள்ளது.

வேலூர் மாவட்ட ஆயுதப்படையில் உயர் முக்கிய பொறுப்பில் இருக்கும் போலீஸ்காரர் ஒருவர் அடுக்கம்பாறை பகுதியில் வீடு கட்டி வருகிறார். அவரது வீட்டுக்கு மணல் தேவை என்பதால் எஸ்.பி., தனிப்படையில் பணியாற்றி வரும் சப்-இன்ஸ்பெக்டர் ஒருவர், அவருக்கு உதவி செய்ய முன் வந்துள்ளார்.

இதற்காக கொலை வழக்கில் தொடர்புடைய பஞ்சர் மணி என்பவர் மூலம் கடந்த ஆண்டு டிசம்பர் மாதம் இறுதியில் மணல் ஏற்றி செல்ல ஏற்பாடும் நடந்தது.

அப்போது மணல் கடத்தல் வாகனத்தை பாகாயம் போலீஸ் சப்-இன்ஸ்பெக்டர் ரவிச்சந்திரன் பறிமுதல் செய்து பஞ்சர் மணி, வாகன உரிமையாளர் டெல்லிபாபு உள்ளிட்ட 3 பேர் மீது வழக்குப்பதிவு செய்தார்.

அந்த வாகனத்தை விடுவிக்க பேரம் பேசியும் முடியாத நிலையில், பஞ்சர் மணி எஸ்.பி., தனிப்படை போலீஸ்காரர் ஒருவரிடம் தொடர்ந்து பேசி வாகனத்தை விடுவிக்க வற்புறுத்தியுள்ளார்.

அந்த உரையாடலில், பஞ்சர் மணி, ‘எஸ்ஐ சொல்லித்தான் மணலை ஓட்டினேன். அவர் சொன்னபடி வண்டியுடன் வந்திருந்தால் வண்டி சிக்கியிருக்காது.

எப்படியாவது அந்த வண்டியை மீட்டுக் கொடுங்கள். என் மீது வழக்கு போட்டதை பற்றி நான் கவலைப்படவில்லை. வண்டியை மீட்க முடியாத நிலையில் உள்ளது. என்னுடைய நம்பரை பார்த்து எஸ்ஐ எடுத்து பேசுவதில்லை’’ என்று கூறுகிறார்.

இதையடுத்து பஞ்சர் மணியை சமாதானம் செய்யும் அந்த எஸ்.பி., தனிப்படை போலீஸ்காரர் ‘எங்கள் தரப்பில் இப்போதைக்கு எதுவும் செய்ய முடியாது. பார்த்து அட்ஜெஸ்ட் செய்துகொள்’ என்று கூறுகிறார்.

மற்றொரு ஆடியோவில் வீடு கட்டிவரும் காவலர், பஞ்சர் மணியிடம் பேசும்போது:-

‘‘நாளைக்கு 10 ஆயிரம் கொடுக்கிறேன். இப்போதைக்கு இதுதான் செய்ய முடியும்’’ என்கிறார்.

இந்த ஆடியோ உரையாடல் குறித்து போலீஸ் சூப்பிரண்டு அலுவலகம் தரப்பில் விசாரித்தபோது, ‘‘டிசம்பர் மாதம் நடைபெற்ற இந்த சம்பவம் குறித்து விசாரிக்கப்பட்டு வருகிறது. விரைவில் நடவடிக்கை எடுக்கப்படும்’’ என தெரிவித்தனர்.

வேலூர்:

வேலூர் மாவட்டம் கே.வி. குப்பம் அடுத்த வடுகன்தாங்கல் பிள்ளையார் கோவில் தெருவை சேர்ந்தவர் கணேசன் என்கிற விநாயகம் (வயது 24). கூலித்தொழிலாளி.

குடியாத்தம் தரணம்பேட்டை பகுதியை சேர்ந்த பாலாஜி என்பவரது மகள் சுப்ரஜா (24). இவர்கள் இருவரும் வேலூரில் உள்ள தனியார் ஐடிஐயில் படிக்கும்போது காதலித்து வந்தனர். இருவரும் வெவ்வேறு சமூகத்தை சேர்ந்தவர்கள் என்பதால் அவர்களது பெற்றோர்கள் காதலுக்கு கடும் எதிர்ப்பு தெரிவித்தனர்.

இதையடுத்து பெற்றோரின் எதிர்ப்பை மீறி கடந்த 4 ஆண்டுகளுக்கு முன்பு காதல் திருமணம் செய்து கொண்டனர். முடினாம் பகுதியில் தனியாக வசித்து வந்தனர். அவர்களுக்கு 2 வயதில் ஆண் குழந்தை உள்ளது.

காதல் திருமணம் செய்து கொண்டதால் சுப்ரஜாவை அவரது வீட்டில் சேர்க்கவில்லை என கூறப்படுகிறது.

இந்த நிலையில் கடந்த 2 மாதங்களுக்கு முன்பு சுப்ரஜா மாயமாகி விட்டதாக விநாயகம் தெரிவித்தார்.

சுப்ரஜாவின் உறவினர் ஒருவர் சந்தேகமடைந்து இதுகுறித்து கே.வி.குப்பம் போலீசில் புகார் அளித்தார்.

போலீசார் இது தொடர்பாக விநாயகத்திடம் விசாரணை நடத்தினர். அப்போது விநாயகம் அவரது தம்பி விஜய், உறவினர் 17 வயது சிறுவன் ஆகியோர் சேர்ந்து சுப்ரஜாவை தாக்கி உயிருடன் புதைத்து கொன்றது தெரியவந்தது.

சர்க்கார் தோப்பு வனப்பகுதியில் சுப்ரஜாவை புதைத்திருப்பதாக தெரிவித்தனர். நேற்று சர்க்கார் தோப்பில் சுப்ரஜாவின் உடலை தோண்டி எடுத்து பிரேத பரிசோதனை செய்தனர்.

மேலும் விநாயகம் அவரது தம்பி விஜய் ஆகியோரை கைது செய்து வேலூர் ஜெயிலில் அடைத்தனர். கொலைக்கு உடந்தையாக இருந்த 17 வயது சிறுவன் சென்னை சீர்திருத்த பள்ளியில் அடைக்கப்பட்டார்.

இந்த கொலை சம்பவம் குறித்து விநாயகம் அளித்துள்ள வாக்குமூலத்தில் கூறியிருப்பதாவது:-

நான் சுப்ரஜாவை காதலித்து திருமணம் செய்து கொண்டேன். 2 வயதில் ஆண் குழந்தை ஒன்று உள்ளது. கடந்த ஒரு ஆண்டுக்கு முன்பு வேலூரைச் சேர்ந்த திருமணமான பெண் ஒருவருடன் எனக்கு பழக்கம் ஏற்பட்டது.

நாளடைவில் இது கள்ளக்காதலாக மாறியது. இதையறிந்த சுப்ரஜா கள்ளக்காதலியுடன் உள்ள தொடர்பை கைவிடுமாறு கண்டித்தார்.

இதனால் எங்களுக்குள் தகராறு ஏற்பட்டது. இதில் ஆத்திரமடைந்த நான் சுப்ரஜாவை சில முறை அடிக்கவும் செய்தேன்.

இந்நிலையில் அவரின் உடல் நிலை பாதிக்கப்பட்டது. அவர் கள்ளக்காதலை கைவிட கூறி என்னிடம் தொடர்ந்து தகராறு செய்தார்.

கள்ளக்காதலியுடன் சேர்ந்து வாழ முடிவு செய்தேன். இதற்கு இடையூறாக உள்ள சுப்ரஜாவை தீர்த்துக் கட்டினால் கள்ளக்காதலியுடன் சந்தோ‌ஷமாக வாழலாம் என நினைத்தேன்.

கடந்த 2 மாதங்களுக்கு முன்பு எனது தம்பி விஜய் மற்றும் உறவினர் 17 வயது சிறுவன் ஆகியோருடன் சேர்ந்து சர்க்கார் தோப்பு வனப்பகுதியில் சவக்குழி தோண்டினோம்.

அதற்கு மறுநாள் எனக்கும் சுப்ரஜாவுக்கும் தகராறு ஏற்பட்டது. அப்போது கைகளால் தாக்கியதில் அவர் காயம் அடைந்தார். அவரை ஆஸ்பத்திரிக்கு அழைத்து செல்வதாக கூறினேன். அதை நம்பி அவரும் என்னுடன் வந்தார்.

அவரை சர்க்கார் தோப்பு வனப்பகுதிக்கு அழைத்துச் சென்றேன். அங்கு ஏற்கனவே திட்டமிட்டபடி விஜய் மற்றும் 17 வயது சிறுவன் இருவரும் தயாராக இருந்தனர். 3 பேரும் சேர்ந்து சுப்ரஜாவை தாக்கினோம் அவர் மயங்கி விழுந்தார்.

ஏற்கனவே தோண்டி வைத்திருந்த குழியில் அவரை உயிருடன் புதைத்துக் கொன்றோம். பின்னர் எதுவும் நடக்காததுபோல் அங்கிருந்து புறப்பட்டு வந்து விட்டோம்.

இவ்வாறு அவர் கூறியுள்ளார்.

வேலூர்:

வேலூர் கொணவட்டத்தை சேர்ந்தவர் சல்மான் (வயது20). தனியாக செல்பவர்களை வழிமறித்து கத்தியை காட்டி மிரட்டி செல்போன் மற்றும் நகை பறிப்பில் ஈடுபட்டு வந்தார். இது சம்பந்தமாக வேலூர் வடக்கு குற்றப்பிரிவு போலீசார் நேற்று இரவு சல்மானை பிடித்து கைது செய்தனர்.

அவரை நீதிபதி முன்பு ஆஜர்படுத்துவதற்காக டோல்கேட் அருகே உள்ள நீதிபதிகள் குடியிருப்பிற்கு அழைத்துச் சென்றனர்.

அப்போது போலீசாரின் பிடியில் இருந்து சல்மான் தப்பி ஓடி விட்டார். போலீசார் அவரை விரட்டிச் சென்றனர். ஆனால் அவர் அங்கிருந்து வேகமாக தப்பி சென்று விட்டார்.

இதனைத் தொடர்ந்து வேலூர் மாநகரில் உள்ள பகுதிகளில் போலீசார் உஷார்படுத்தப்பட்டனர். நள்ளிரவில் கொணவட்டம் பகுதியில் பதுங்கியிருந்த சல்மானை போலீசார் மடக்கிப் பிடித்தனர். பின்னர் மீண்டும் அவரை நீதிபதி முன்பு ஆஜர்படுத்தி வேலூர் ஜெயிலில் அடைத்தனர்.

போலீசாரின் பிடியில் இருந்து தப்பி ஓடியது சம்பந்தமாக பாகாயம் போலீசில் புகார் அளிக்கப்பட்டது. இது தொடர்பாக போலீசார் சல்மான் மீது வழக்கு பதிவு செய்துள்ளனர். இது குறித்து உயர் அதிகாரிகள் விசாரணை நடத்தி வருகின்றனர்.

போலீசாரின் பிடியில் இருந்து கைதி தப்பி ஓடிய சம்பவம் நேற்றிரவு வேலூரில் பரபரப்பை ஏற்படுத்தியது.

வேலூர்:

வேலூர் சத்துவாச்சாரி கானாறு தெருவை சேர்ந்தவர் மாணிக்கவேல் (வயது 57). இவரது வீட்டின் பின்பக்கமாக பிஸ்கெட் தயாரிக்கும் கம்பெனி நடத்தி வருகிறார். இவருக்கு மனைவி மற்றும் மகன், 2 மகள்கள் உள்ளனர்.

மாணிக்கவேல் தனது மனைவி மற்றும் மகளுடன் நேற்று முன்தினம் இரவு 10 மணியளவில் காரில் கும்பகோணத்தில் உள்ள திருமஞ்சேரி கோவிலுக்கு சென்றார். நேற்று காலை கோவிலில் சாமி தரிசனம் செய்துவிட்டு இரவு 9 மணியளவில் மாணிக்கவேல் குடும்பத்துடன் வீடு திரும்பினார். அப்போது வீட்டின் முன்பக்க கதவின் பூட்டு உடைக்கப்பட்டிருந்தை கண்டு அதிர்ச்சி அடைந்தார்.

மாணிக்கவேல் மற்றும் குடும்பத்தினர் உள்ளே சென்று பார்த்தபோது அறைகளில் ஆங்காங்கே துணிகள், பொருட்கள் சிதறிக்கிடந்தன.

பீரோ உடைக்கப்பட்டு, அதில் வைக்கப்பட்டிருந்த 50 பவுன் நகைகள், ரூ.80 ஆயிரம் ரொக்கம், வெள்ளிப் பொருட்கள் ஆகியவை திருட்டு போயிருந்தது.

இது குறித்து அவர் சத்துவாச்சாரி போலீசாருக்கு தகவல் தெரிவித்தார். மாவட்ட குற்றப்பிரிவு துணை போலீஸ் சூப்பிரண்டு ராஜன்பாபு, போலீஸ் இன்ஸ்பெக்டர் கருணாகரன் தலைமையிலான போலீசார் அங்கு விரைந்து சென்று பார்வையிட்டனர்.

பின்னர் மாணிக்கவேல் குடும்பத்தினர் மற்றும் அக்கம் பக்கத்து வீட்டில் வசிப்பவர்களிடம் விசாரணை நடத்தினர். போலீசாரின் முதற்கட்ட விசாரணையில், மாணிக்கவேலின் குடும்ப நிகழ்வுகளை நன்கு அறிந்த மர்ம கும்பல் இந்த சம்பவத்தில் ஈடுபட்டிருக்கலாம் என கூறப்படுகிறது.

கைரேகை நிபுணர்கள் அங்கு வரவழைக்கப்பட்டனர். அவர்கள் வீட்டில் பதிவாகியிருந்த கொள்ளையர்களின் கைரேகை மாதிரிகளை சேகரித்தனர். போலீஸ் மோப்பநாய் வீட்டினுள் மோப்பம் பிடித்தது. அந்தத் தெருவில் சிறிது தூரம் ஓடி நின்றது. யாரையும் கவ்வி பிடிக்கவில்லை.

பின்னர் போலீசார் அந்த தெருவில் பொருத்தப்பட்டிருந்த கண்காணிப்பு கேமராக்களை ஆய்வு செய்தனர். அதில் ஒரு கேமராவில் அந்தத்தெருவில் நள்ளிரவில் பைக்கில் கொள்ளையர்கள் வந்தது தெரியவந்ததுள்ளது. கேமராவில் கொள்ளையர்களின் உருவம் பதிவாகியுள்ளது. அவர்கள் யார் என்று போலீசார் விசாரித்து வருகின்றனர்.

இதேபோல் கடந்த சில மாதங்களுக்கு முன்பு அருகில் உள்ள வீட்டின் பூட்டை உடைத்து 3 பேர் கும்பல் பணத்தை திருடி சென்றனர்.

அதில் ஈடுபட்ட 3 பேரும் சிறுவர்கள் தான். அந்த கும்பலுக்கு இதில் தொடர்பு உண்டா என்ற கோணத்தில் போலீசார் விசாரித்து வருகின்றனர்.