கிறித்தவம்

நாகர்கோவில் ராமன்புதூர் கார்மல்நகரில் அமைந்துள்ளது பரிசுத்த திருக்குடும்ப ஆலயம். இந்த ஆலய திருவிழா நேற்று கொடியேற்றத்துடன் தொடங்கியது. இதையொட்டி ேநற்று காலை 6.30 மணிக்கு திருப்பலி, மாலை 6 மணிக்கு ஜெபமாலை, புகழ்மாலை நடந்தது. இரவு 7.45 மணிக்கு ஆலய வளாகத்தில் நடந்த கொடியேற்றம் நிகழ்ச்சிக்கு கோட்டார் வட்டார முதன்மை அருட்பணியாளர் மைக்கேல் ஏஞ்சலூஸ் தலைமை தாங்கினார்.

ஊர்தலைவர் ஆல்பர் மதியரசு கொடியை ஏற்றி வைத்தார். அப்போது செயலாளர் ஜூலியன், பொருளாளர் ஜோசப் ஆன்றனி, நண்பர்கள் நல சங்க தலைவர் ஜெரோம் ஜெயகுமார் உள்பட நிர்வாகிகள் பலர் உடன் இருந்தனர். தொடர்ந்து திருப்பலி நடந்தது. கன்னியாகுமரி கிளாரட் சபை அருட்பணியாளர் தனிஸ்லாஸ் மறையரையாற்றினார். விழாவை முன்னிட்டு ஆலயம் முழுவதும் மின்விளக்குகளால் அலங்கரிக்கப்பட்டு இருந்தது. கொடியேற்ற நிகழ்ச்சியில் பொதுமக்கள் திரளானோர் பங்கேற்றனர்.

விழா வருகிற 27-ந் தேதி வரை 10 நாட்கள் நடக்கிறது. இன்று (சனிக்கிழமை) காலை 6.30 மணிக்கு திருப்பலி, மாலை 6 மணிக்கு ஜெபமாலை, புகழ்மாலை நடக்கிறது. தொடர்ந்து பி‌‌ஷப் பீட்டர் ரெமிஜியூஸ், சி.பி.எஸ்.இ. பள்ளி தாளாளர் அருட்பணியாளர் கிரேஸ் குணபால் தலைமையில் திருப்பலி நடக்கிறது. தேவசகாயம் மவுண்ட் பங்குத்தந்தை பிரைட் மறையுரையாற்றுகிறார்.

விழா நாட்களில் காலை, மாலையில் ஜெபமாலை, புகழ்மாலை, திருப்பலி நடக்கிறது. 26-ந் தேதியன்று இரவு 9 மணிக்கு தேர்பவனி நடக்கிறது.

விழாவின் கடைசி நாளான 27-ந் தேதியன்று காலை 6.30 மணிக்கு திருக்குடும்ப திருவிழா ஆடம்பர கூட்டு திருப்பலி நடக்கிறது. கோட்டார் மறைமாவட்ட ஆயர் நசரேன் சூசை தலைமை தாங்கி மறையுரையாற்றுகிறார்.

மதியம் 2 மணி, மாலை 6 மணிக்கு தேர்பவனி நடக்கிறது. தொடர்ந்து பணவிளை இணைபங்குத்தந்தை ராபின் தலைமையில் கொடியிறக்கம் நடக்கிறது. இதற்கான ஏற்பாடுகளை பங்குதந்தை சகாய பிரபு வழிகாட்டுதலின்பேரில் ஊர்நிர்வாகிகள், பங்கு இறைமக்கள் உள்பட பலரும் செய்து வருகின்றனர்.

நாகர்கோவில் ராமன்புதூர், கார்மல்நகரில் பரிசுத்த திருக்குடும்ப ஆலய டிரஸ்ட் திருவிழா இன்று (வெள்ளிக்கிழமை) கொடியேற்றத்துடன் தொடங்கி 27-ந்தேதி வரை 10 நாட்கள் நடக்கிறது.

இன்று மாலை 6 மணிக்கு ஜெபமாலை, புகழ்மாலை, 6.45 மணிக்கு கொடியேற்றம், திருவிழா திருப்பலி நடக்கிறது. இதற்கு கோட்டார் வட்டார முதன்மை அருட்பணியாளர் மைக்கேல் ஏஞ்சலூஸ் தலைமை தாங்குகிறார். கன்னியாகுமரி கிளாரட்சபை அருட்பணியாளர் தனிஸ்லாஸ் மறையுரையாற்றுகிறார்.

19-ந்தேதி முதல் தினமும் காலை மற்றும் மாலை திருப்பலி நடக்கிறது.

24-ந்தேதி காலை 6.30 மணிக்கு திருமுழுக்கு சிறப்பு திருப்பலி, மாலை 6.30 மணிக்கு நடைபெறும் திருப்பலிக்கு குருசடி பங்குத்தந்தை பிரான்சிஸ் போர்ஜியா தலைமை தாங்க, தளவாய்புரம் பங்குத்தந்தை செயில்சிங் மறையுரையாற்றுகிறார். இரவு 11 மணிக்கு கிறிஸ்து பிறப்பின் பெருவிழா திருப்பலி நடைபெறுகிறது.

25-ந்தேதி மாலை 6.30 மணிக்கு நடைபெறும் திருப்பலிக்கு புதுகிராமம் பங்குத்தந்தை கிறிஸ்டோ டாபின் தலைமை தாங்க, பள்ளவிளை பங்குத்தந்தை பெஞ்சமின் மறையுரையாற்றுகிறார்.

26-ந்தேதி காலை 6.30 மணிக்கு முதல் திருவிருந்து ஆடம்பர திருப்பலி நடக்கிறது. இதற்கு புன்னைநகர் பங்குத்தந்தை ஜாய் தலைமை தாங்க, இளங்கடை பங்குத்தந்தை துரைசாமி மறையுரையாற்றுகிறார். மாலை 6.30 மணி சிறப்பு ஆராதனைக்கு தேவசகாயம் மவுண்ட் திருத்தல அதிபர் பிரான்சிஸ் சேவியர் தலைமை தாங்க, கோட்டார் பங்குத்தந்தை ஸ்டான்லி சகாய சீலன் மறையுரையாற்றுகிறார். இரவு 9 மணிக்கு தேர் பவனி நடைபெறுகிறது.

27-ந்தேதி காலை 6.30 மணிக்கு திருக்குடும்ப திருவிழா ஆடம்பர கூட்டு திருப்பலி நடக்கிறது. நிகழ்ச்சிக்கு கோட்டார் மறை மாவட்ட ஆயர் நசரேன் சூசை தலைமை தாங்கி, மறையுரையாற்றுகிறார். தேர்பவனி பிற்பகல் 2 மணி மற்றும் மாலை 6 மணிக்கு நடக்கிறது. அதைத்தொடர்ந்து கொடியிறக்கம் நடைபெறுகிறது. இதற்கு பணவிளை இணைபங்குத்தந்தை ராபின் தலைமை தாங்குகிறார்.

31-ந்தேதி இரவு 11 மணிக்கு நன்றி வழிபாடும், நள்ளிரவு 11.45 மணிக்கு புதுவருட திருப்பலியும் நடைபெறுகிறது.

திருவிழா நிகழ்ச்சி ஏற்பாடுகளை பரிசுத்த திருக்குடும்ப ஆலயம் டிரஸ்ட் பங்குத்தந்தை, ஊர் நிர்வாகத்தினர், பங்கு இறைமக்கள் இணைந்து செய்து வருகின்றனர்.

மார்த்தாண்டம் மறை வட்ட திருத்தலமாக விமலபுரம் தூய அமலோற்பவ அன்னை ஆலயம் அறிவிக்கப்பட்டுள்ளது. இதுகுறித்து திருத்தல அதிபரும் பங்கு தந்தையுமான ஏசுதாஸ் கூறியதாவது:-

மலங்கரை கத்தோலிக்க திருச்சபையின் மார்த்தாண்டம் மறை மாவட்டத்திற்கு உட்பட்டது தூய அமலோற்பவ அன்னை ஆலயம். மறைமாவட்ட வெள்ளி விழா தொடக்க நிகழ்ச்சி நேற்று மார்த்தாண்டம் மறைமாவட்ட பேராலயத்தில் நடைபெற்றது.

இந்த விழாவில் கலந்துகொண்ட மலங்கரை கத்தோலிக்க திருச்சபையின் தலைவராகிய உயர் பேராயர் கர்தினால் கிளீமிஸ் காதோலிக்கோஸ், மார்த்தாண்டம் மறைமாவட்ட ஆயர் வின்சென்ட் மார் பவுலோஸ் முன்னிலையில் விமலபுரம் தூய அமலோற்பவ அன்னை ஆலயத்தை திருத்தலமாக உயர்த்தப்பட்டு உள்ளதாக அறிவித்தார்.

மறை வட்டத்தின் அனைத்து பங்குகளில் இருந்தும், பிற ஊர்களில் இருந்தும் மக்கள் திருப் பயணமாக விமலபுரத்திற்கு வந்து ஜெபிக்க சிற்றாலயம் ஒன்று அமைக்கப்பட்டுள்ளது. இத்திருத்தலத்தில் நற்கருணை ஆண்டவர் பிரசன்னத்தில் வைக்கப்படும். வேண்டுதல்கள் நிறைவேறி தூய அமலோற்பவ அன்னையின் அருள் விளங்கி நிற்கிறது.

இவ்வாறு அவர் கூறினார்.

இயேசு எல்லா நகரங்களுக்கும் கிராமங்களுக்கும் போய், அங்கிருந்த ஜெபக்கூடங்களில் கற்பித்தார், கடவுளுடைய அரசாங்கத்தைப் பற்றிய நல்ல செய்தியைப் பிரசங்கித்தார், எல்லா விதமான நோய்களையும் எல்லா விதமான உடல் பலவீனங்களையும் குணமாக்கினார். பெரும் திரளான மக்கள் கூட்டத்தைப் பார்த்தபோது அவருடைய மனம் உருகியது. மேய்ப்பன் இல்லாத ஆடுகளைப் போல் அதிகார வர்க்கத்தால் அவர்கள் கொடுமைப்படுத்தப்பட்டும், புறக்கணிக்கப்பட்டும் இருந்தார்கள். அவர்கள் போலி இறைவாக்கினரிடமும், பணம் பிடுங்கும் சமயவாதிகளிடமும் மாட்டிக்கொண்டு தங்கள் துன்பங்கள் தீர்ந்துவிடாதா என்று ஏங்கினார்கள். அவர்களிடம் ‘போலிகள்’ குறித்த விழிப்புணர்வை இயேசு உருவாக்கினார்.

“போலி இறைவாக்கினரைக் குறித்து எச்சரிக்கையுடன் இருங்கள். ஆட்டுத் தோலைப் போர்த்திக்கொண்டு உங்களிடம் வருகின்றனர். ஆனால், உள்ளேயோ அவர்கள் கொள்ளையிட்டுத் தின்னும் ஓநாய்கள். ஒவ்வொரு மரமும் அதனதன் கனியால் அறியப்படும். போலி இறைவாக்கினரை அவர்களின் செயல்களைக்கொண்டே அறிந்துகொள்வீர்கள். நல்ல மரமெல்லாம் நல்ல கனிகளைக் கொடுக்கும். கெட்ட மரம் நச்சுக் கனிகளைக் கொடுக்கும். மரம் அதன் கனியால் அறியப்படும். முட்செடிகளில் திராட்சைப் பழங்களையோ, முட்பூண்டுகளில் அத்திப் பழங்களையோ பறிக்க முடியாது. அதைப் போல, செயல்களைக்கொண்டே அவர்கள் யாரென்று அறிந்துகொள்வீர்கள். நல்ல கனி கொடாத மரங்களெல்லாம் வெட்டப்பட்டு நெருப்பில் எறியப்படும் என்று உங்களுக்குச் சொல்கிறேன்” என்று அதிகாரத் தொனியுடன் கற்பித்தார் இறைமகன்.

ஒரு முறை இயேசு வரி வசூலிக்கும் அலுவலகத்தில் மத்தேயு என்ற ஒருவர் அமர்ந்திருப்பதைக் கண்டார். அவரைப் பார்த்து, “என்னைப் பின்பற்றி வா” என்று இயேசு கூறியதும் உடனே மத்தேயு எழுந்து அவரைப் பின்பற்றிப் போனார். பின்பு, மத்தேயுவின் வீட்டில் இயேசு சாப்பிட்டுக்கொண்டிருந்தபோது வரி வசூலிப்பவர்கள், பாவிகள் எனப் பலரும் அங்கே வந்து இயேசுவோடும் அவருடைய சீடர்களோடும் சேர்ந்து சாப்பிட ஆரம்பித்தார்கள். இதைப் பார்த்த சமய அதிகாரம் கொண்ட பரிசேயர்கள், இயேசுவின் சீடர்களைப் பார்த்து “உங்கள் போதகர் ஏன் வரி வசூலிப்பவர்களோடும் பாவிகளோடும் சேர்ந்து சாப்பிடுகிறார்?” என்று சத்தமாகக் கேட்டார்கள். அது அவருடைய காதில் விழுந்தபோது, “ஆரோக்கியமாக இருக்கிறவர்களுக்கு மருத்துவர் தேவையில்லை, நோயாளிகளுக்குத்தான் தேவை. அதனால், ‘பலியை அல்ல; இரக்கத்தைத்தான் நான் விரும்புகிறேன்’ என்று சொல்லப்பட்டதன் அர்த்தத்தை நீங்கள் போய்க் கற்றுக்கொள்ளுங்கள். நீதிமான்களை அல்ல: பாவிகளைத்தான் நான் மீட்க வந்தேன்” என்று சொன்னார்.

துயரத்தின் முகமறியாமல் பூமியில் ஒருவர் வாழ்ந்துவந்தார். அவர்தான் யோபு. அவருடைய அந்தஸ்து மலைக் குன்றைப்போல உயர்ந்து நின்றது. குறைவில்லா சந்தோஷத்தின் காரணமாக ஆரோக்கியம் அவரிடம் விளைக்கைப்போல் ஒளிவீசியது. ஆனந்தமே உருவாக அவரது குடும்பம் பாசத்தில் திளைத்தது. மொத்தத்தில் ஊரும் உறவும் போற்ற அவர் சீரும் சிறப்புமாக வாழ்ந்து வந்தார். ஆனால், எதிர்பாராத விதமாக அவரது வாழ்வில் சோதனைகள் சூறாவளியாகச் சூழ்ந்து தாக்கின.

ஒரே நாளில் தன் ஆஸ்திகள் அனைத்தையும் இழந்து வீதிக்கு வந்துவிட்டார். திடீரென்று வீசிய சூறாவளிக் காற்று, அவருடைய பிள்ளைகளின் உயிரைப் பறித்துவிட்டுப் போனது. ஆஸ்திகளை இழந்து, அவற்றைவிடவும் உயர்ந்த செல்வம் என்று அவர் எண்ணிக்கொண்டிருந்த தன் பிள்ளைச் செல்வங்களை இழந்து மனம் வெந்து நடைபிணமாக இருந்த வேளையில் அவரை ஒரு கொடிய நோய் தாக்கியது. அந்த நோயின் விளைவாக உச்சந்தலை முதல் உள்ளங்கால் வரை கொப்புளங்கள் பெருகின. அவை தந்த வலி அவரை சித்திரவதை செய்தது. நோயின் வேதனையைப் பொறுக்க முடியாமல் துடியாய்த் துடித்தார்.

இத்தனை சோதனைகளுக்கு நடுவிலும் கடவுள் மீதான நம்பிக்கையும், ஞானத்தையும் அவர் இழக்கவில்லை, கடவுளைத் திட்டவில்லை. ஆனால் மனதளவில் அவர் உடைந்துபோயிருந்தார். “தீய மனிதர்கள் என்னைவிட சந்தோஷமாக இருக்கிறார்களே (யோபு 21:7-9)” என்று ஏக்கமாகக் கூறினார். கடவுளை நோக்கி “நீர் என்னைப் பாதாளத்தில் ஒளித்து, உமது கோபம் தீருமட்டும் என்னை மறைத்து வையும் (யோபு 14:13).” என்று அழுது புலம்பினார். யோபு ரொம்பவே நொந்துபோயிருந்தார்.

தான் கஷ்டப்படுவதற்கான காரணத்தையும் அவர் அறிந்திருக்கவில்லை. அப்படியிருந்தும், கடவுளிடம் உறுதியாக இருக்க வேண்டும் என்பதில் அவர் தீர்மானமாக இருந்தார். சோதனை வந்தபோதும் அதை விட்டுக்கொடுக்க அவர் தயாராக இருக்கவில்லை. “என் ஆவி பிரியுமட்டும் என் உத்தமத்தை என்னைவிட்டு விலக்கேன்(யோபு 27:5).” என்று யோபு உறுதியாகக் கூறினார்.

இழப்பையும், வேதனைகளையும் துச்சமாக மதித்த யோபுவுக்கு இருந்த அதே மனவுறுதி நமக்கும் இருந்தால் எந்தச் சூழ்நிலையிலும் நாம் பரலோகத் தந்தைக்கு உத்தமமாயிருக்க அது உதவி செய்யும். சோதனைகளோ, எதிர்ப்புகளோ, கஷ்டங்களோ எது வந்தாலும் சரி, நம் உத்தமத்தை விட்டு விலகாமல் இருக்க அது நிச்சயம் உதவி செய்யும்.

கடவுளின் கட்டுப்பாட்டில் இந்த உலகம் இருந்தாலும், சாத்தானின் சோதனைகளுக்குக் களமாகவும் இது இருக்கிறது. அதில் சிக்கி அவனது அடிமைப் பொறியில் மாட்டிக்கொண்டால் மீண்டு வருதல் அபூர்வம். நம்முடைய சகிப்புத்தன்மையும், உறுதித்தன்மையும் மட்டுமே சாத்தானை எதிர்த்துப்போரிடத் தகுந்த ஆயுதங்கள். சாத்தானால் நாம் சோதிக்கப்படும் காலங்களில் எல்லாம் கடவுளுக்கு உண்மையுள்ளவர்களாக இருக்கிறோம் என்பதை நாம் நிரூபிக்க வேண்டும், அது மட்டுமே முக்கியம். சில சமயங்களில் கஷ்டங்களும், சோதனைகளும் நம்மை ஓட ஓட விரட்டுவதுபோல் தோன்றலாம். இனிமேலும் நம்மால் பொறுக்க முடியாததுபோல் தோன்றலாம். அப்படிப்பட்ட சூழ்நிலையில் சகித்திருப்பதற்கு யோபுவின் வாழ்க்கை நமக்கு உயரிய உதாரணம். யோபுவின் உறுதியும், சகிப்புத்தன்மையும், உத்தமத்தன்மையும் இறுதியில் அவரை மீட்டன.