மணிப்பூருக்கு செல்ல சொன்னோம், ஆனால் மோடி கரீனா கபூரை பார்க்க செல்கிறார்- காங்கிரஸ்

இந்தியாவில் பழம்பெரும் நடிகர்களுள் ஒருவர் ராஜ் கபூர். இவரின் குடும்பத்தை சேர்ந்த ரன்பிர் கபூர், கரீனா கபூர் ஆகியோர் தற்போது பாலிவுட் சினிமாவின் முன்னணி நடிகர்களாக உள்ளனர்.

ராஜ் கபூர் 1924 ஆம் ஆண்டு டிசம்பர் 24 ஆம் தேதி பிறந்தார். இந்நிலையில் ராஜ் கபூரின் நூறாவது பிறந்தநாளை அவரது குடும்பம் விமர்சையாக கொண்டாடியது.

இந்த கொண்டாட்டத்தில் பிரதமர் மோடி கலந்து கொண்டார். பின்னர் ரன்பீர் கபூர், ஆலியா பட், கரீனா கபூர், சைஃப் அலிகான் உள்ளிட்ட ராஜ் கபூர் குடும்பத்தினரிடம் மோடி புகைப்படம் எடுத்து கொண்டார்.

இந்நிலையில், கரீனா கபூர் குடும்பத்தை நேரில் சென்று பிரதமர் மோடி சந்தித்ததை காங்கிரஸ் தலைவர் பவன் கேரா விமர்சித்துள்ளார்.

இது தொடர்பாக பேசிய அவர், "நாங்கள் மணிப்பூர் என்று சொன்னதை பிரதமர் மோடி கரீனா கபூர் என்று நினைத்து விட்டார் போல" என்று தெரிவித்துள்ளார்.

பாஜக ஆட்சி செய்யும் மணிப்பூர் மாநிலத்தில் மைதேயி சமூகத்தினருக்கும், குகி பழங்குடியினருக்கும் இடையே கடந்தாண்டு மே மாதம் கலவரம் வெடித்தது. இந்த கலவரத்தில் இதுவரை 200-க்கும் மேற்பட்டோர் உயிரிழந்துள்ளனர்.

இதனையடுத்து மணிப்பூர் மாநிலத்திற்கு பிரதமர் மோடி செல்ல வேண்டும் என்று எதிர்க்கட்சிகள் கோரிக்கை வைத்தன. ஆனால் இப்போதுவரை மணிப்பூருக்கு பிரதமர் மோடி செல்லவில்லை என்பது குறிப்பிடத்தக்கது.