நீங்கள் தேடியது "Plus 1 Student Dead"

திருப்பத்தூர்:

திருப்பத்தூர் மாவட்டம் நாட்டறம்பள்ளி அடுத்த கொத்தூரை சேர்ந்தவர் சின்னத்தம்பி. இவரது மகன் முகிலன் (வயது 16). இவர் திருப்பத்தூரில் உள்ள தோமினிக் சாவியோ மேல்நிலைப் பள்ளியில் மாணவர் விடுதியில் தங்கி பிளஸ்-1 படித்து வந்தார்.

இந்த நிலையில் மாணவன் நேற்று முன்தினம் காலை வகுப்புக்கு வரவில்லை. விடுதியிலும் அவரை காணவில்லை. இதுகுறித்து ஆசிரியர்கள் மாணவனின் பெற்றோருக்கு செல்போனில் தொடர்பு கொண்டு உங்களது மகன் வீட்டிற்கு வந்தாரா என கேட்டனர். மகன் வீட்டிற்கு வரவில்லை என அவர்கள் தெரிவித்தனர்.

மேலும் எங்கள் மகன் உங்கள் பள்ளியில் மாணவர் விடுதியில் தங்கி தான் படித்து வருகிறான். அப்படி இருக்கும் போது எப்படி வீட்டிற்கு வருவான் என கேள்வி எழுப்பினர்.

அதன் பின்னர் கொத்தூரில் இருந்து பெற்றோர்கள் அவசர அவசரமாக பள்ளிக்கு வந்தனர்.

இந்த நிலையில் திருப்பத்தூர் டவுன் போலீசில் மாணவனின் பெற்றோர் புகார் செய்தனர். புகாரின் பேரில் போலீசார் வழக்கு பதிவு செய்து தனிப்படை அமைத்து மாணவனை தேடி வந்தனர். நேற்று இரவு பள்ளி வளாகத்தில் பொருத்தப்பட்டு இருந்த கண்காணிப்பு கேமரா காட்சிகளை ஆய்வு செய்தனர்.

அதில் மாணவர் பள்ளியின் பின்புறம் உள்ள கிணற்றுப் பக்கம் செல்லும் காட்சிகள் பதிவாகி இருந்தது. இதனால் மாணவன் பள்ளி வளாகத்தை விட்டு வெளியே செல்லவில்லை என்பது தெரியவந்தது.

இன்று காலை போலீசார் பள்ளி வளாகம் முழுவதும் மாணவனை தேடி வந்தனர். அப்போது பள்ளி வளாகத்தில் உள்ள இரும்பு கம்பியால் மூடப்பட்ட கிணற்றில் மாணவன் பிணமாக மிதந்தார். தீயணைப்புத் துறையினர் உதவியுடன் மாணவனின் பிணத்தை போலீசார் மீட்டனர்.

மகனின் பிணத்தை பார்த்த பெற்றோர் கதறி துடித்தனர். மேலும் மாணவனின் தந்தை மகன் சென்ற இடத்துக்கு செல்கிறேன் என கூறி கிணற்றில் குதித்து தற்கொலை செய்து கொள்ள முயன்றார். போலீசார் அவரை தடுத்து நிறுத்தினர்.

மூடப்பட்ட கிணற்றில் மாணவன் எப்படி இறந்தான் என்பது கேள்விக்குறியாக உள்ளது. காணாமல் போனதாக பதிவு செய்த வழக்கை மர்ம மரணம் என வழக்கு பதிவு செய்து பள்ளி நிர்வாகத்தினரிடம் போலீசார் விசாரணை நடத்தி வருகின்றனர். மாணவன் கிணற்றில் பிணமாக மிதந்த சம்பவம் அதிர்ச்சியை ஏற்படுத்தியது.

கரூர்:

கரூர் மாவட்டம் அரவக்குறிச்சியை அடுத்த காக்காவடி பகுதியில் ஒரு தனியார் மெட்ரிக் மேல்நிலைப்பள்ளி இயங்கி வருகிறது. இங்கு கரூர் மட்டுமல்லாமல் அண்டை மாவட்டங்களைச் சேர்ந்த மாணவ-மாணவிகள் ஏராளமானோர் அங்குள்ள விடுதியில் தங்கி கல்வி பயின்று வருகின்றனர்.

இதில் திண்டுக்கல் மாவட்டம் வேடசந்தூர் பகுதியைச் சேர்ந்த சரவணன் என்பவர் மகன் சந்தோஷ் பாபு (வயது 16) என்ற மாணவன் விடுதியில் தங்கி பிளஸ்-1 படித்து வந்தார்.

இந்த நிலையில் நேற்று இரவு வழக்கம் போல் அவர் விடுதியில் கொடுத்த உணவினை வாங்கி சாப்பிட்டார். பின்னர் சற்று நேரத்தில் திடீரென்று மயங்கி விழுந்தார். இதுபற்றி சக மாணவர்கள் விடுதி காப்பாளரிடம் தகவல் தெரிவித்தனர்.

அதன்பேரில் உடனடியாக பள்ளி நிர்வாகத்தினர் அந்த மாணவனை மீட்டு அருகில் உள்ள மருத்துவமனைக்கு கொண்டு சென்றனர். அங்கு டாக்டர்கள் பரிசோதித்து விட்டு மாணவன் சந்தோஷ் இறந்து விட்டதாக தெரிவித்தனர். இதனைக்கேட்டு அனைவரும் அதிர்ச்சி அடைந்தனர்.

இது பற்றி தகவல் அறிந்த மாணவனின் தந்தை சரவணன் மற்றும் உறவினர்கள் கரூர் விரைந்தனர். பின்னர் அவர்கள் அரவக்குறிச்சி போலீஸ் நிலையத்தில் சந்தோஷ் இறப்பில் தங்களுக்கு சந்தேகம் இருப்பதாக கூறியுள்ளனர்.

பள்ளி நிர்வாகத்தினரை விசாரணைக்கு உட்படுத்தி உரிய தண்டனை வழங்க வேண்டும் எனவும் கூறியுள்ளனர்.

உயிரிழந்த மாணவன் இரவு உணவு சாப்பிட செல்லும்போது வலிப்பு ஏற்பட்டு மயங்கி விழுந்ததாக கூறப்பட்டது. இது தொடர்பாக போலீஸ் தரப்பில் கூறும்போது, மாணவனின் உடல் கரூர் அரசு மருத்துவக் கல்லூரி மருத்துவமனைக்கு பிரேத பரிசோதனைக்காக அனுப்பி வைக்கப்பட்டுள்ளது. பரிசோதனை முடிவில் உண்மை தெரியும் என கூறினர்.

பள்ளி விடுதியில் இரவு உணவு சாப்பிட்ட மாணவன் மர்மமான முறையில் இறந்த சம்பவம் கரூரில் பெரும் பரபரப்பை ஏற்படுத்தி உள்ளது.