புதுச்சேரி

புதுச்சேரி:

காங்கிரஸ் கட்சி அலுவலகத்தில் முன்னாள் முதல்-அமைச்சர் நாராயணசாமி நேற்று நிருபர்களுக்கு பேட்டியளித்தார். அப்போது அவர் கூறியதாவது:-

புதுவை பொதுப்பணித்துறை அமைச்சர் லட்சுமிநாராயணன் அரசின் 300 நாள் சாதனைகளை வெளியிட்டுள்ளார். கடந்த ஆட்சியில் நாங்கள் எதையும் செய்யவில்லை என்றும் குற்றஞ்சாட்டியுள்ளார். இப்போது புதுச்சேரியில் பாலாறும், தேனாறும் ஓடுவதாகவும் கூறியுள்ளார்.

கடந்த காலத்தில் கவர்னருக்கு எதிராக ஐகோர்ட்டில் வழக்கு தொடர்ந்தவர் அவர்தான். முதியோர் உதவித்தொகையை உயர்த்தி வழங்குவதை தடுக்கிறார். புதுவை வளர்ச்சிக்கு முட்டுக்கட்டையாக உள்ளார். காவலர் பணிக்கான வயது வரம்பினை உயர்த்தும் கோப்பினை தேவையின்றி டெல்லிக்கு அனுப்பியுள்ளார் என்று கவர்னர் மீது அடுக்கடுக்கான புகார்களை கூறி வழக்கு தொடர்ந்திருந்தார். ஆனால் இப்போது நாங்கள் எதுவும் செய்யவில்லை என்று கூறுகிறார்.

எங்கள் ஆட்சிக்காலத்திலும் சென்டாக் மூலம் மாணவர்களுக்கு முறையாக நிதியுதவி வழங்கப்பட்டது. காமராஜர் மணிமண்டபம் கட்டி முடிக்கப்பட்டது. இவர்கள் திறப்பு விழாதான் செய்துள்ளார்கள். அரும்பார்த்தபுரம் மேம்பாலம் திறப்புவிழாவின்போது மத்திய மந்திரி நிதின் கட்காரி எனது கோரிக்கையை ஏற்று இந்திராகாந்தி, ராஜீவ்காந்தி சிலை பகுதியில் மேம்பாலம் அமைக்க அறிவிப்பு வெளியிட்டார்.

விழுப்புரம்- புதுச்சேரி இடையே 4 வழிச்சாலை அமைக்க காங்கிரஸ் ஆட்சி காலத்தில்தான் ஒப்புதல் பெறப்பட்டது. அந்த திட்டத்தில்தான் ஆரியபாளையத்தில் ரூ.60 கோடியில் மேம்பாலம், சாலை அமைக்கும் பணியும் வருகிறது.

இந்த ஆட்சியாளர்களின் சாதனை முதியோர், மீனவர் உதவித் தொகைகளை உயர்த்தி கொடுத்தது ஒன்றுதான். மற்றவை எல்லாம் எங்கள் ஆட்சியில் வந்தவை. மத்திய அரசிடம் கூடுதலாக ரூ.2 ஆயிரம் கோடி கேட்டார்கள். அந்த நிதி வந்ததா? மழை நிவாரணம் ரூ.300 கோடி கேட்ட நிலையில் மிகக்குறைந்த அளவே நிதி ஒதுக்கப்பட்டுள்ளது.

மத்திய மந்திரிகள் புதுவை வந்து பேட்டி கொடுக்கின்றனர். ஆனால் என்ன நடந்தது? பிரதமர் அறிவித்த பெஸ்ட் புதுச்சேரி என்னவானது? நான் மாநில அந்தஸ்து, நிதிக்குழுவில் புதுச்சேரியை சேர்ப்பது தொடர்பாக பிரதமர், உள்துறை மந்திரி, நிதி மந்திரி உள்ளிட்டவர்களை பலமுறை சந்தித்தேன். புதுவை முதல்-அமைச்சர் யாரை சந்தித்தார்? கடன் தள்ளுபடி என்னவானது?

புதுவையில் கஞ்சா புழக்கம் அதிகரித்துள்ளது. சட்டம்-ஒழுங்கு கெட்டுள்ளது. குற்ற சம்பவங்களும் பெருகி வருகிறது. முதல்-அமைச்சர், அமைச்சர்கள் அலுவலகம் புரோக்கர் மயமாக காட்சியளிக்கிறது. ஊழல் பெருகி வருகிறது. அதற்கான ஆதாரம் எங்களிடம் உள்ளது. அமைச்சர் லட்சுமிநாராயணனின் குற்றச்சாட்டுகள் தொடர்பாக மேடைபோட்டு விவாதிக்க தயார்.

இவ்வாறு நாராயணசாமி கூறினார்.

பேட்டியின்போது காங்கிரஸ் தலைவர் ஏ.வி.சுப்ரமணியன், பொதுச்செயலாளர்கள் சாமிநாதன், தனுசு ஆகியோர் உடனிருந்தனர்.

புதுச்சேரி:

புதுவையில் 2011-க்கு பிறகு 10 ஆண்டாக உள்ளாட்சி தேர்தல் நடைபெறவில்லை.

இந்த நிலையில் உள்ளாட்சி தேர்தலை புதுவையில் நடத்த கோரி சுப்ரீம்கோர்ட்டு உத்தரவிட்டது. கடந்த அக்டோபர் 4-ந்தேதிக்குள் தேர்தலை நடத்தி முடிக்கவும் அறிவுறுத்தியது.

இதையடுத்து உள்ளாட்சி தேர்தல் நடத்துவதற்கான பணிகளை மாநில தேர்தல் ஆணையம் மேற்கொண்டு கடந்த செப்டம்பரில் தேர்தல் தேதியை அறிவித்தது.

பிற்படுத்தப்பட்டோர், பழங்குடியினருக்கான இடஒதுக்கீடில் குளறுபடி இருப்பதாக அரசியல் கட்சிகள் குற்றம் சாட்டி சென்னை ஐகோர்ட்டில் வழக்கு தொடர்ந்தன.

குளறுபடிகளை சரிசெய்து தேர்தல் அறிவிப்பை வெளியிடும்படி ஐகோர்ட்டு உத்தரவிட்டது. தொடர்ந்து பழங்குடியினர், பிற்படுத்தப்பட்டோருக்கான இடஒதுக்கீடை அரசு ரத்து செய்தது. இதன்பின் மீண்டும் தேர்தல் தேதி அறிவிக்கப்பட்டது.

பிற்படுத்தப்பட்டோர், பழங்குடியினருக்கு ஒதுக்கீடு வழங்கி தேர்தலை நடத்தக்கோரி தி.மு.க. சார்பில் சென்னை ஐகோர்ட்டில் வழக்கு தொடரப்பட்டது. வழக்கை விசாரித்த ஐகோர்ட்டு தேர்தல் அறிவிப்பை ரத்து செய்தது.

புதுவை அரசு சார்பில் இடஒதுக்கீடு வழங்குவது தொடர்பாக ஓய்வுபெற்ற நீதிபதி சசிதரன் தலைமையில் ஆணையம் அமைக்கப்பட்டது.

இந்த நிலையில் தி.மு.க. மாநில அமைப்பாளர் சிவா, பிற்படுத்தப்பட்டோர், பழங்குடியினருக்கு இடஒதுக்கீடு வழங்கி உள்ளாட்சி தேர்தலை நடத்த வேண்டும் என சுப்ரீம்கோர்ட்டில் மனு தாக்கல் செய்தார். இந்த மனு உடனடியாக விசாரணைக்கு ஏற்கப்படவில்லை.

ஐகோர்ட்டில் இருந்த வழக்குகளை மனுதாரர்கள் வாபஸ்பெற்றனர்.

இதனால் ஐகோர்ட்டு விதித்த இடைக்கால தடை ரத்தானது. புதுவை மாநில தேர்தல் கமி‌ஷன் தேர்தல் நடத்துவதற்கான ஆயத்த பணிகளை மேற்கொண்டது. நகராட்சி, கொம்யூன் வாரியாக தேர்தல் நடத்தும் அதிகாரிகளை நியமித்தது.

இதனிடையே இந்திய தேர்தல் கமி‌ஷன் புதுவை வாக்காளர் பட்டியலில் புதிய வாக்காளர்களை சேர்த்து அறிவிப்பு வெளியிட்டது. இதனடிப்படையில் புதிய வாக்காளர் பட்டியலை தயாரிக்கும் பணியில் மாநில தேர்தல் கமி‌ஷன் தயாராகி வருகிறது.

இந்த நிலையில் தி.மு.க. தாக்கல் செய்த மனு சுப்ரீம் கோர்ட்டில் விசாரணைக்கு ஏற்கப்பட்டது. அரசு தரப்பு, தேர்தல் கமி‌ஷன், மனுதாரர் தரப்பில் வாதிடப்பட்டது. வாதங்களை பதிவு செய்த நீதிபதிகள், உள்ளாட்சி தேர்தல் தொடர்பாக 2 வாரத்துக்குள் பதிலளிக்கும் படி புதுவை அரசு, மாநில தேர்தல் ஆணையத்துக்கு உத்தரவிட்டனர்.

இந்த வழக்கு இம்மாத இறுதிக்கு தள்ளி வைக்கப்பட்டுள்ளது. அதேநேரத்தில் உள்ளாட்சி தேர்தலை தாமதப்படுத்த வேண்டாம் எனவும் நீதிபதிகள் கருத்து தெரிவித்துள்ளனர்.

சுப்ரீம் கோர்ட்டு தலையீடு காரணமாக உள்ளாட்சி தேர்தலுக்கான தேதியை மாநில தேர்தல் ஆணையம் தற்போது அறிவிக்க முடியாத நிலை ஏற்பட்டுள்ளது.

அதுமட்டுமின்றி பிளஸ்-2, 10-ம் வகுப்பு பொதுத்தேர்வுகள் வருகிற மே மாதம் நடக்க உள்ளது. வழக்கமாக தேர்தல்கள் மே மாதம் தான் நடைபெறும். இப்போது பொதுத்தேர்வு அறிவிக்கப்பட்டுள்ளதால் தேர்தல் மே மாதம் நடக்க வாய்ப்பில்லை.

பள்ளிகளில் வாக்குச்சாவடிகள் அமைப்பது, தேர்தல் பணியில் ஆசிரியர்களை ஈடுபடுத்துவது ஆகியவற்றிலும் சிக்கல் ஏற்படும். எனவே உள்ளாட்சி தேர்தல் மேலும் சில மாதத்துக்கு தள்ளிப்போகிறது.