ராணிப்பேட்டை

காவேரிப்பாக்கம்:

காவேரிப்பாக்கம் செல்வவிநாயகர் கோவில் தெருவைச் சேர்ந்தவர் கருணாநிதி (வயது 33), கேபிள் டி.வி. ஆபரேட்டர். இவரது மனைவி சுதா (30). இவர்களுக்கு திருமணமாகி ஒரு வயதில் ஆண் குழந்தை உள்ளது. குடும்ப பிரச்சினை காரணமாக கணவன், மனைவி இடையே கருத்து வேறுபாடு இருந்து வந்துள்ளது. இந்தநிலையில் கடந்த 20 நாட்களுக்கு முன்பு தகராறு ஏற்பட்டு சுதா, குழந்தையுடன் தனது தாய் வீட்டிற்கு சென்றுள்ளார்.

வீட்டில் மனைவி, குழந்தை இல்லாத காரணத்தால் விரக்தியடைந்த கருணாநிதி கடந்த 5-ந் தேதி உடலில் மண்எண்ணெய் ஊற்றி தீ வைத்துக் கொண்டுள்ளார். இதை பார்த்த பொதுமக்கள் அவரை மீட்டு வாலாஜா அரசு மருத்துவமனைக்கு சிகிச்சைக்காக அனுப்பி வைத்தனர். பின்னர் மேல்சிகிச்சைக்காக சென்னை கீழ்ப்பாக்கம் அரசு மருத்துவமனையில் அனுமதித்தனர்.

இந்த நிலையில் சிகிச்சை பலனின்றி கருணாநிதி நேற்று உயிரிழந்தார். இச்சம்பவம் குறித்து காவேரிப்பாக்கம் இன்ஸ்பெக்டர் மகாலட்சுமி வழக்குப் பதிவு செய்து விசாரணை நடத்தி வருகின்றார்.

ஆற்காடு:

ராணிப்பேட்டை மாவட்டத்தில் கொரோனா இரண்டாவது அலை குறைந்து வருகிறது. இந்தநிலையில் நேற்று ஆற்காடு தாசில்தார் காமாட்சி தலைமையில் வருவாய்த்துறையினர் ஆற்காடு அடுத்த குக்குண்டி கிராமத்தில் செயல்பட்டு வரும் தனியார் கம்பெனியில் ஆய்வு செய்தனர். அப்போது முக கவசம் அணியாமல், சமூக இடைவெளி பின்பற்றாமல் தொழிலாளர்கள் வேலை செய்து கொண்டிருந்தனர். மேலும் தொழிலாளர்களின் எண்ணிக்கை அரசு விதிமுறைகளை மீறி காணப்பட்டது.

எனவே அந்த கம்பெனிக்கு அதிகாரிகள் அபராதம் விதித்தனர். மேலும் புதுப்பாடி கூட்ரோட்டில் அரசு மற்றும் தனியார் பஸ்களில் ஆய்வு செய்தனர். அப்போது முக கவசம் இல்லாமல், சமூக இடைவெளியை பின்பற்றாமல் அதிக நபர்களை ஏற்றிவந்த பஸ்சுக்கு அபராதம் விதித்தனர்.

ராணிப்பேட்டை:

ராணிப்பேட்டை மாவட்டத்தில் கொரோனா தொற்று பரவல் குறைந்து வருகிறது. நேற்று ஒரே நாளில் 64 பேருக்கு கொரோனா தொற்று இருப்பது உறுதி செய்யப்பட்டது.

தொற்றால் மாவட்டம் முழுவதும்‌ அரசு, தனியார் ஆஸ்பத்திரிகளில் 655 பேர் சேர்ந்து சிகிச்சை பெற்று வருகின்றனர். கொரோனா தொற்றுக்கு 3 பேர் பலியாகி உள்ளனர்.