அரியலூர்

அரியலூர்:

அரியலூர் மாவட்டம் ஜெயங்கொண்டம் அருகே உள்ள கல்லாத்தூர் மெயின் ரோடு தெருவைச் சேர்ந்தவர் ஞானபிரகாசம்  (வயது37).  இவர் மோட்டார்சைக்கிளில் ஆண்டிமடத்தில்  இருந்து கல்லாத்தூர் நோக்கி  நேற்று இரவு சென்று கொண்டிருந்தார்.  

அப்போது அதே பகுதியைச் சேர்ந்த ராஜபிரகாஷ் 20 ஆண்டிமடத்தை சேர்ந்த விஷால் 18 ஆகிய இருவரும் சாலையோரம்  நடந்து சென்று கொண்டிருந்தனர்.  

அப்போது ஞானப் பிரகாசம் ஓட்டிவந்த மோட்டார் சைக்கிள் நடந்து சென்ற விஷால்,  ராஜபிரகாஷ் ஆகியோர் மீது எதிப்பாராத விதமாக மோதியது.

இந்த விபத்தில் மோட்டார் சைக்கிள் ஓட்டி வந்த ஞானப்பிரகாசம்  சம்பவ இடத்திலேயே  பரிதாபமாக உயிரிழந்தார். படுகாயமடைந்த விஷாலும், ராஜ பிரகாஷ் ஆகிய இருவரும் ஜெயங்கொண்டம் அரசு மருத்துவமனையில் சிகிச்சை பெற்று வருகின்றனர்.

இதுகுறித்து ஜெயங்கொண்டம்  போலீசார் வழக்கு  பதிந்து விசாரித்து வருகின்றனர்.

அரியலூர்:

அரியலூர்  ஜெயங்கொண்டம் ஆண்டிமடம்  அருகே உள்ள அகினேஸ்புரம்  நடுத்தெருவை சேர்ந்தவர் பெரிய நாயகம்.  இவரது மனைவி நட்சத்திரமேரி வயது70. இவர் நேற்று மாலை 4 மணி அளவில் வயலில் ஆடு மேய்த்துக் கொண்டிருந்தார்.

அப்போது அங்கு வந்த மர்ம நபர்கள் திடீரென  நட்சத்திரமேரி காதில் அணிந் திருந்த கம்மல்  தோட்டை அறுத்து கொண்டு தப்பி ஓடிவிட்டனர்.

அப்போது அவர்சத்தம் போடவே அருகில் இருந்தவர் கள் ஓடிவந்து  மூதாட்டியை மீட்டு ஆண்டிமடம்  அரசு மருத்துவமனையில்சிகிச்சைக்காக சேர்த்தனர்.

இது குறித்து நட்சத்திரமேரி ஆண்டிமடம் போலீசில் புகார் அளித்தார். அதன் பேரில் இன்ஸ்பெக்டர்குண சேகரன் வழக்கு பதிந்து மூதாட்டியிடம் நகை கொள்ளையில் ஈடுப்பட்ட மர்ம நபர்கள் குறித்து விசாரித்து வருகிறார்.

அரியலூர்:

உலக காச நோய்தினம் ஒவ்வொரு ஆண்டும் மார்ச் 24ம் தேதி கடை பிடிக்கப் படுகிறது. காசநோயை உண்டாக்கக் கூடிய மைக்கோ பாக்டீரியம் டியூபர் குளோசிஸ்  கிருமியை கண்டுபிடித்த தினமே உலக காச நோய்தினமாகும்.  

அந்த வகையில் அரியலூர் பேருந்து நிலையத்தில் உலக காசநோய் தின விழிப்புணர்வு பேரணியினை மாவட்ட கலெக்டர் ரமண சரஸ்வதி கொடியசைத்து துவக்கி வைத்தார்.

இப்பேரணி அரியலூர்  பேருந்து நிலையத்தில்  புறப்பட்டு நிர்மலா பெண்கள்  மேல் நிலைப்பள்ளியில் நிறை வடைந்தது.

இரண்டு வாரத்திற்குமேல் இருமல், மாலை நேர காய்ச் சல், பசியின்மை, எடை குறைதல், நெஞ்சுவலி  போன்றவை காசநோயின் அறிகுறிகள் ஆகும். இந்நோய் உள்ளவர்கள் அருகில் உள்ள அரசு மருத்துவமனைகள்  மற்றும் அரசு ஆரம்ப சுகாதார நிலையங்களில் சளி பரிசோதனை செய்து கொள்ள வேண்டும்.

காசநோய் இருப்பது உறுதியானால் தினசரி கூட்டு மருந்து சிகிச்சை முறையில் மாத்திரைகள் எடுத்து கொள்ளவேண்டும். மாத்திரைகள்  தொடர்ந்து சாப்பிடுவதன் மூலம் காசநோயை முழுமையாக குணப்படுத்த முடியும்.

அரியலூர் மாவட்டத்தில் காசநோயின் தாக்கத்தை போக்கும் வகையில் மாவட்ட நிர்வாகத்தின்  சார்பில் பொதுமக்கள் மற்றும்பள்ளி, கல்லூரி மாணவர்களுக்கு காசநோய் குறித்த விழிப் புணர்வு ஏற்படுத்தப்படுவதுடன் பரிசோதனை முகாம் நடத்துல் போன்ற  பல்வேறு நடவடிக்கைகள் மூலம் காசநோய் பரவும் விகிதம் தடுக்கப்பட்டு வருகிறது.

இதுபோன்ற விழிப் புணர்வு பேரணி மூலம்பொது மக்கள் காசநோய் பற்றி தெரிந்து கொண்டு தங்களை காசநோயிலிருந்து தற்காத்து கொள்வதுடன் காசநோய் இல்லா உலகம் படைக்க வழி வகை ஏற்படும் என தெரிவித்தார்.

பேரணியில், அரியலூர் அரசு  மருத்துவக்கல்லூரி முதல்வர்  முத்துகிருஷ்ணன், துணை இயக்குநர்  (காச நோய்) நெடுஞ்செழியன், மருத்துவர்கள், அரசு கலைக்கல்லூர் மாணவ, மாணவிகள், ஆசிரியர்கள், தேசிய காச நோய் ஒழிப்புத்திட்ட பணி யாளர்கள் உள்ளிட்ட பலர் கலந்து கொண்டனர்.

ஜெயங்கொண்டம்:

அரியலூர் மாவட்டம் ஜெயங்கொண்டம் அருகே சுத்துக்குளம் கிராமத்தில் பிரசித்திபெற்ற முனீஸ்வரன் கோவில் உள்ளது. இந்த கோவிலில் ஒவ்வொரு ஆண்டும் பங்குனி மாதத்தில் திருவிழா நடத்தப்பட்டு வருகிறது.

இந்த விழாவின்போது வழக்கமாக ஜல்லிக்கட்டு போட்டியும் நடத்தப்படும். அதன்படி இந்த ஆண்டு கோவில் திருவிழா மற்றும் ஜல்லக்கட்டுக்கான ஏற்பாடுகளை கிராம மக்கள் செய்திருந்தனர்.

இதில் கோவில் திருவிழாவுக்கு அனுமதி அளிக்கப்பட்டு, ஜல்லிக்கட்டு நடத்துவதற்கு மாவட்ட நிர்வாகத்தின் சார்பில் அனுமதி மறுக்கப்பட்டிருந்தது.

இந்த நிலையில் தடையை மீறி அக்கிராமத்தில் ஜல்லிக்கட்டு விழா நடத்துவதற்கு வாடிவாசல் அமைக்கப்பட்டு விழாவிற்கான ஏற்பாடுகளை கிராம மக்கள் செய்திருந்தனர்.

பின்னர் இதுபற்றி தகவல் அறிந்த ஜெயங்கொண்டம் தாசில்தார் ஆனந்தன் தலைமையிலான வருவாய்த்துறையினர் மற்றும் போலீசார் நேற்று இரவு பேச்சுவார்த்தை நடத்தி, அங்கு அமைக்கப்பட்டிருந்த கம்பி வேலிகளை அகற்றுமாறு கேட்டுக்கொண்டனர். இதில் உடன்பாடு ஏற்படவில்லை.

இதையடுத்து அதிகாரிகள் தரப்பில் ஜே.சி.பி எந்திரம் வரவழைக்கப்பட்டு கம்பி வேலிகளை அகற்றினர். இதில் ஆத்திரமடைந்த அக்கிராமத்தைச் சேர்ந்த சுமார் 50க்கும் மேற்பட்டோர் தாசில்தார் வாகனத்தை சூழ்ந்து கொண்டு வாக்குவாதத்தில் ஈடுபட்டனர். பின்னர் வாகனத்தில் உள்ளே இருந்த தாசில்தாரை வலுக்கட்டாயமாக கீழே இறக்கி சூழ்ந்துகொண்டு தாக்கியதாக கூறப்படுகிறது. மேலும் ஜீப் கண்ணாடியும் அடித்து நொறுக்கப்பட்டது.

பின்னர் இதுபற்றி தகவல் அறிந்த ஜெயங்கொண்டம் டி.எஸ்.பி. கலை கதிரவன் தலைமையிலான போலீசார் சம்பவ இடத்திற்கு விரைந்து வந்தனர்.

பின்னர் அங்கிருந்தவர்களை விரட்டி விட்டு தாசில்தாரை மீட்டு ஜெயங்கொண்டம் அரசு மருத்துவமனைக்கு முதலுதவி சிகிச்சைக்காக அனுப்பி வைத்தனர். இதுகுறித்து குண்டவெளி கிராம நிர்வாக அலுவலர் வேல்முருகன் மீன்சுருட்டி காவல் நிலையத்தில் அளித்த புகாரின் பேரில் சிவராமன், பரசுராமன், ராமஜெயம் உள்பட 27 பேர் மீது பல்வேறு பிரிவுகளில் வழக்குப்பதிவு செய்யப்பட்டது.

மேலும் அசம்பாவிதங்களை தடுக்க சுத்துக்குளம் கிராமத்தில் 100 க்கும் மேற்பட்ட போலீசார் பாதுகாப்பு பணியில் ஈடுபடுத்தப்பட்டுள்ளனர். தாசில்தாரை தாக்கி அவரின் ஜீப் கண்ணாடியை நொறுக்கிய சம்பவம் ஜெயங்கொண்டம் பகுதியில் பெரும் பரபரப்பை ஏற்படுத்தியுள்ளது.