சினிமா செய்திகள்

தற்போது காவல்துறையினருக்கு கொரோனா தொற்று உறுதியாகியுள்ளதைத் தொடர்ந்து வரலட்சுமி சரத்குமார் தனது சமூக வலைதள பக்கத்தில் வீடியோ ஒன்றை வெளியிட்டுள்ளார். அதில் அவர் பேசியிருப்பதாவது:

"காவல்துறையினருக்கு மிகப்பெரிய நன்றி. இரவும் பகலுமாக எங்களுக்காக உழைத்துக் கொண்டிருக்கிறீர்கள். யாரும் பார்க்கவில்லை என நினைக்காதீர்கள். நாங்கள் பார்த்துக் கொண்டுதான் இருக்கிறோம். நீங்கள் பண்ணும் ஒவ்வொரு விஷயமும் எங்களுடைய நல்லதுக்குத் தான் செய்து கொண்டிருக்கிறீர்கள்.

உங்களுடைய குடும்பத்தினரையும், உங்களுடைய உயிரையும் பாதுகாக்காமல் எங்களுடைய உயிரைப் பாதுகாத்துக் கொண்டிருக்கிறீர்கள். அதற்குப் பெரிய நன்றி. உங்களுடைய சேவை கடவுளுக்குச் சமமானது.  நீங்கள் எல்லாம் எங்களுக்கு ஒரு உத்வேகம்" இவ்வாறு அவர் தெரிவித்துள்ளார்.

தமிழ் சினிமாவில் அம்மா வேடங்களில் நடிப்பவர்களுக்கு கவனம் ஈர்க்க வாய்ப்பு கிடைப்பது குறைவு. ஆனால் தான் நடித்த பிச்சைக்காரன், பசங்க 2, ரஜினி முருகன், ஸ்பைடர், சிவப்பு மஞ்சள் பச்சை உள்பட அனைத்து படங்களிலும் தனியாக தெரிந்து கவனம் ஈர்த்தவர் தீபா ராமானுஜம். சிவப்பு மஞ்சள் பச்சை படத்தில் தீபா பேசிய பெண்களின் உடை தொடர்பான வசனம் தனியாகவே சமூகவலைதளங்களில் பிரபலம்.

கணவருடன் அமெரிக்காவில் வசிக்கும் இவர் அடிப்படையில் நாடக இயக்குனர், நாடக நடிகை, தொழில் முனைவோர். அமெரிக்காவில் கொரோனா தாக்கம் அதிகரிக்கும் இந்த சமயத்தில் அது குறித்து மாலை மலருக்கு அவர் அளித்த சிறப்பு பேட்டி:

அமெரிக்கா எப்படி இருக்கிறது?
கலிபோர்னியாவில் சான்பிரான்சிஸ்கோ பகுதியில் வசிக்கிறேன். மார்ச் 21 ஆம் தேதி இந்தியா திரும்ப திட்டமிட்டு இருந்தேன். கொரோனா காரணமாக ஊரடங்கை முதலில் அறிவித்தது கலிபோர்னியாதான். அந்த அறிவிப்பு வெளியானதும் எனது திட்டத்தை ரத்து செய்து இங்கேயே இருந்துவிட்டேன். அந்த முடிவு நல்லதாக போய்விட்டது. இந்தியா வந்து இருந்தால் தனியாக சிரமப்பட்டு இருப்பேன். இங்கே அனைவருக்கும் கொரோனா பயம்தான். எங்களுக்கு வீட்டிலேயே இருப்பது இப்போது பழகி விட்டது. ஆனால் இந்த அளவுக்கு உலக அளவில் மக்கள் பாதிக்கப்பட்டிருப்பது இதுதான் முதல் முறை என்று நினைக்கிறேன்.

அங்கு எண்ணிக்கை அதிகரித்துக்கொண்டே செல்கிறதே?
ஆமாம். நாளுக்கு நாள் அதிகரிக்கிறது. உலகம் முழுக்கவே அதிகரித்தாலும் அமெரிக்காவில் மிக வேகமாக பரவுகிறது.

ஊரடங்கு அங்கு எப்படி இருந்தது?
நான் இருக்கும் கலிபோர்னியாவில் ஊரடங்கு கடுமையாக கடைபிடிக்கப்படுகிறது. நாங்கள் மார்ச் 19 லிருந்து வீட்டுக்குள்ளேயேதான் முடங்கி இருக்கிறோம். அத்தியாவசிய பொருட்கள் வாங்க கடைகளுக்கு சென்றாலும் தெளிவாக திட்டமிட்டு வாங்க வேண்டியதை எழுதி எடுத்து சென்று வாங்கி முடித்த உடனே திரும்பி விடுகிறோம். வாங்கும் பொருட்களையும் சுகாதாரமான முறையில் சுத்தப்படுத்தியே பயன்படுத்துகிறோம். ஒரு கடிதம் வந்தால் கூட அதை தொடுவதற்கு தயங்குகிறோம். அந்த அளவுக்கு கவனமாக இருக்கிறோம். இனி இந்த வாழ்க்கையை பழகிக்கொள்ள தான் வேண்டும். இத்தனை கவனமாக இருந்தாலும் கலிபோர்னியா கொரோனா பாதிப்பில் 5 வது இடத்தில் இருக்கிறது.

அமெரிக்க மக்களின் மனநிலை எப்படி இருக்கிறது?
கடுமையான மன அழுத்தத்தில் இருக்கிறார்கள். கொரோனா தந்த உயிர் பயத்தை விட வேலை பறி போவதால் எழும் மன அழுத்தமும் முக்கிய காரணம். நிறைய துறைகள் இழுத்து மூடிவிட்டார்கள். இதனால் பெரும்பாலானோர் தங்களது வாழ்வாதாரத்தை இழந்துவிட்டனர். கொரோனாவுக்கு பின்னும் இந்த பாதிப்புகள் தொடருமே என்ற அச்சமும் ஏற்பட்டுள்ளது. அரசும், மருத்துவர்களும் அதை போக்க முயற்சிகள் எடுத்து வருகிறார்கள்.

கொரோனாவை வைத்து அமெரிக்காவில் நடக்கும் அரசியல் மாற்றங்கள், குறிப்பாக டிரம்பின் பேச்சு, நடவடிக்கைகளுக்கு மக்கள் என்ன சொல்கிறார்கள்?
அவர் கட்சியை சார்ந்த பலர் அவர் சொல்வதைதான் நம்புகிறார்கள். ஆனால் எங்கள் நண்பர்கள் அனைவருக்குமே அவர் இதை கையாளும் முறையில் அதிருப்தி இருக்கிறது. ஆனால் அமெரிக்க அரசியல் அமைப்பில் மாகாணங்களை பொறுத்த வரை கவர்னர்களுக்கு தனி அதிகாரம் உண்டு. அந்த வகையில் எங்கள் கவர்னர் ஆக்கபூர்வமான நடவடிக்கைகளை தான் முன்னெடுக்கிறார்.

அமெரிக்காவில் இருக்கும் இந்தியர்களின் நிலையில் எதுவும் மாற்றம்?
இங்கே இருக்கும் இந்தியர்களுக்கு எந்த பிரச்சினையும் இல்லை. ஆனால் வேலையை இழந்து விட்டால்தான் கடும் சிரமத்துக்கு ஆளாவார்கள். 60 நாட்களுக்குள் அவர்கள் புது வேலை தேடிக் கொள்ள வேண்டும், அல்லது அவர்களது விசா ஸ்டேடஸை மாற்றிக் கொள்ள வேண்டும். கடந்த 2 மாதங்களில் அமெரிக்காவில் 3 கோடிக்கும்  (33.5 மில்லியன்) அதிகமான மக்கள் வேலை இழந்துள்ளார்கள். இதில் இந்தியர்களும் அடக்கம். இப்போது எதிலுமே ஒரு நிலை இல்லாத தன்மை இருப்பதால் இந்தியர்கள் மட்டுமல்லாமல் அனைவருக்குமே ஒரு பயம் இருக்கிறது.

ஊரடங்கை தளர்த்திய பிறகு நிலைமை எப்படி இருக்கும்?
ஒருவரை ஒருவர் நேரில் சந்திப்பது குறையும் என்று நினைக்கிறேன். ஜூம் போன்ற செயலிகள் நமது வாழ்க்கையில் முக்கிய பங்கு வகிக்கும் இங்கே பள்ளி, கல்லூரிகள் வகுப்புகளை ஆன்லைனில் மாற்றி விட்டனர். அமெரிக்காவில் இருக்கும் பாடல், நடன வகுப்பு ஆசிரியர்கள் ஆன்லைனில் தங்கள் வகுப்புகளை தொடங்கி விட்டார்கள். மருத்துவர்களும் வீடியோ கால் மூலமாக ஆலோசனை வழங்குகின்றனர். நண்பர்களை சந்திப்பதும் ஆன்லைன் மூலமாக தான் என்று மாறிவிட்டது. இனி இதுபோலத் தான் வாழ பழகிக்கொள்ள வேண்டும்.

சினிமாத்துறை என்ன ஆகும்?
நமது துறை மக்கள் அதிக அளவில் கூடி பணிபுரிய வேண்டிய துறை. இதில் சமூக விலகலை கடைபிடிப்பது சிரமமான ஒன்று. மாஸ்க் அணிந்து படங்களில் நடிக்கவும் முடியாது. தடுப்பு மருந்து கண்டுபிடிக்கப்பட்டால் பிரச்சினை இல்லை. அதுவரை எல்லோருக்குமே மனதுக்குள் பயம் இருந்துகொண்டே இருக்கும். மக்கள் பயமில்லாமல் தியேட்டருக்கு போய் படம் பார்க்க எத்தனை நாள் ஆகும் என்று தெரியவில்லை. ஆனால் திரைத்துறையில் அன்றாட வருமானத்தை நம்பி இருக்கும் பல்லாயிரக்கணக்கான தொழிலாளர்கள் தான்இதனால் அதிகம் பாதிக்கபட்டுள்ளனர். சினிமா தொழிலாளர்கள் மட்டுமல்ல... ஆட்டோ ஓட்டுனர்கள் உள்பட எல்லா தொழிலாளர்களுமே சிரமத்தில் தான் இருக்கிறார்கள்.

அம்மா வேடமாக இருந்தாலும் தனியாக தெரிவது எப்படி?
சினிமா என்பது சம்பளத்தை தாண்டி என்னுடைய பேஷன். எனவே கவனமாக தேர்ந்தெடுத்து நடிக்கிறேன். சசி போன்ற ஒருசில இயக்குனர்களே பெண் கதாபாத்திரங்களுக்கு அதிக முக்கியத்துவம் தருகிறார்கள். சசி சார் என்றால் கதை கேட்கமால் நடிக்கும் அளவுக்கு நம்பிக்கை உண்டு.

டைரக்‌ஷன் எப்போது?
இங்கே "கிரியா" என்ற நாடக குழவை கடந்த 20 வருடங்களாக நடத்தி வருகிறேன். இந்தியாவுக்கும் வந்து நாடகம் போட்டுள்ளோம். எங்களது நாடகங்களை K.பாலசந்தர், கமல்ஹாசன், சிவ கார்த்திகேயன், இயக்குனர் சசி உள்பட பலர் நேரில் பார்த்து பாராட்டியுள்ளனர். சினிமா டைரக்‌ஷன் என்னுடைய கனவு. கதாநாயகிக்கு முக்கியத்துவம் தரும் கதை உட்பட, பல கதைகள் தயாராக இருக்கிறது. விரைவில் நடக்கும் என்று நம்புகிறேன்.

ஊரடங்கு குறித்து நடிகை இனியா அளித்த பேட்டியில் கூறியதாவது: பள்ளிகளில் ஏப்ரல், மே மாதம் விடுமுறை விட்டால் ஒரு சந்தோஷம் இருக்கும்ல, அந்த மாதிரி இருக்கு. என்னோட பள்ளி நண்பர்கள் கூட அதிகம் பேசுறேன். இதெல்லாம் இந்த ஊரடங்கில் ரொம்ப ஜாலிதான். தவிர, எனக்கு கிளாசிக்கல் டான்ஸ் தெரியும். இந்தக் கடுமையான நேரத்துல கேரளா அரசாங்கம் எடுக்கிற முடிவுகள், அவங்களோட விதிமுறைகள் எல்லாம் நல்லா இருக்கு. சீக்கிரமே இந்தச் சூழல் மாறிடும்னு நம்பிக்கை தருது.

``என் வீடு திருவனந்தபுரத்துல இருக்கு. ஒரு நிகழ்ச்சிக்காக கொச்சின் வந்திருந்தேன். அப்பதான் ஒருநாள் ஊரடங்கு அறிவித்தார்கள். அதுக்குப் பிறகு, என்னால திருவனந்தபுரத்துக்கும் போக முடியாமல் சென்னைக்கும் வர முடியாமல் கொச்சின்ல மாட்டிக்கிட்டேன். அக்கா வீட்ல இருக்கேன். இந்த ஊரடங்கு எல்லோருக்கும் ஒரே மாதிரி இல்லை. நிறைய பேருக்கு இது ரொம்ப ரொம்ப சவாலான சூழல்.  

நம்ம இயற்கைக்கு என்ன செய்றோமோ அதைத்தான் இயற்கை நமக்கு திருப்பிக்கொடுக்கும். அப்படி நம்ம அனுபவிக்கிற காலம் இது. அதனால இந்தப் பாடத்தை நம்ம ஏத்துக்கிட்டு இந்தச் சூழலை கடந்துதான் வந்தாகணும்“ இவ்வாறு அவர் கூறினார்.

‘கேடி’ படம் மூலம் தமிழில் ஹீரோயினாக அறிமுகமானவர் நடிகை தமன்னா.
இதைத் தொடர்ந்து அவருக்கு அதிக வாய்ப்புகள் வந்தன. தனுஷின் படிக்காதவன், சூர்யாவின் அயன், கார்த்தியின் பையா, விஜயின் சுறா, அஜித்தின் வீரம் உட்பட பல படங்களில் நடித்து முன்னணி நடிகையானார்.

தமிழ் வெப்சீரிசில்லும் நடித்து அவரே டப்பிங்கும்  பேசி வருகிறார். தமிழைப் போலவே தெலுங்கிலும் தொடர்ந்து நடித்து வந்தார். இந்தியில் அஜய் தேவ்கன் ஜோடியாக ஹிம்மத்வாலா என்ற படத்தில் நடித்தார்.

தமன்னாவின் தாய் மொழி சிந்தி. தமிழ், இந்தி, தெலுங்கு, ஆங்கில மொழிகளில் பேசும் நடிகை தமன்னாவுக்கு தனது தாய்மொழியில் பேசத் தெரியாது. சில வார்த்தைகள் புரியும் என்றாலும் சரளமாகப் பேச வராது என்பதால், இந்த ஊரடங்கில் தனது அம்மாவிடம் சிந்தி மொழியை கற்கிறார்.

மற்ற மொழிகள் தெரிந்திருந்தாலும் தாய் மொழி தெரிந்திருப்பது முக்கியம் என்று தெரிவித்துள்ளார்.

இயக்குனர் பா.இரஞ்சித் அறிக்கை ஒன்றை வெளியிட்டுள்ளார். அதில்,

உலகெங்கிலும் கொரோனா பெரும் கொடூரத்தை நிகழ்த்திக்கொண்டிருக்கும் வேளையில், இந்தியாவில் குறிப்பாக தமிழகத்தில் கொரோனா நோய்த்தொற்று பற்றிய கேலிப்பேச்சுக்களை பரப்பி கிண்டலடித்துக் கொண்டிருந்தோம்.

நிலைமையின் தீவிரத்தை தாமதமாகவே உணர்ந்து கொண்டாலும், தடுப்பு நடவடிக்கையாக அரசு அறிவித்த பொது ஊரடங்கிற்குப் பிறகு தான் கொஞ்சம் கொஞ்சமாக இந்நோய் பற்றிய பீதிக்குள் நாம் நுழைந்தோம். அந்த பீதி இன்று வரை தொடர்ந்துகொண்டேதான் இருக்கிறது.

பல்வேறு இடர்பாடுகளை தாங்கி நாம் அனைவருமே கொரோனாவிற்கு எதிராக ஒருங்கிணைந்து போராடிக் கொண்டிருக்கிறோம். இந்த
நோய்தொற்றினால் நாம் இறந்துவிடுவோமோ என்கிற அச்சத்தை போக்குவதற்காக நமக்கு, "நோயுடனே வாழ பழகிக்கொள்வோம்" என்று அரசு தரப்பு இப்போது நழுவுவதையும் காண முடிகிறது.

இந்த கொரோனா பேரிடரால் உலகமும், இந்தியாவும் என்னவெல்லாம் மாற்றங்களை சந்திக்கப் போகிறது என்று பொருளாதார வல்லுனர்கள் முதல் சாமானிய மக்கள் வரை எதிர்பார்த்துக் கொண்டிருக்கிறார்கள்.  இந்த ஊரடங்கு காலத்தில் பெரும்பாலான குற்ற நடவடிக்கைகள் குறைந்திருப்பதும், மனிதநேய தன்மையின் பொருட்டு சக மனிதனுக்கான உதவிகள் பெருகியதும் பாராட்டுக்குரியவைகள். ஆனால் வழக்கம் போல நம் தமிழகத்தில் கொரோனாவை விட கொடிய நோயான சாதிவெறி அதே உயிர்ப்புடன் தன் கோரத்தாண்டவத்தை நிகழ்த்திக் கொண்டிருக்கின்றது.

இந்த கொரோனா காலத்தில் நமக்குத் தெரிந்து தமிழகத்தில் மட்டும் கிட்டதட்ட முப்பதுக்கும் மேற்பட்ட பல்வேறு விதமான சாதி வன்கொடுமை தாக்குதல்கள் தலித் மக்களின் மேல் நிகழ்த்தப்பட்டிருக்கிறது. இச்சம்பவங்கள் யாவும், எத்தனை பேரிடர் வந்தாலும் இந்த மனிதர்கள் மனதில் தேக்கி வைத்திருக்கிற சாதிவெறி வன்மத்தை மட்டும் விட்டொழிக்க மாட்டார்கள் என்ற வலிதரும் உண்மையை மிக தீர்க்கமாக உணர்ந்துகொள்ள முடிகிறது.

சேலம் மாவட்டம் ஓமலூர் வட்டம்  டி. கோணாகாபாடி ஊராட்சி மன்ற தலைவராக தேர்ந்தெடுக்கப்பட்ட திருமதி.அம்சவள்ளியை சாதியின் பெயரால் பணி செய்யவிடாமல் தடுத்து அவர் மீது சாதிய வன்மத்தை காட்டிய சாதிவெறிக்கும்பல் தொடங்கி நேற்றிரவு தூத்துக்குடி அருகே நிகழ்த்தப்பட்ட இரட்டைக்கொலை வரை நம் தமிழ் மக்கள் சாதிவன்மம் முற்றிப்போய் சக மனிதனாகிய, சகோதரனாகியவர்கள் மீது  எவ்வித அச்சமுமின்றி சாதி வன்கொடுமைகளை இந்த நெருக்கடியான காலத்திலும் நிகழ்த்திக் கொண்டிருக்கிறார்கள்.

உலகமே துவண்டு கிடக்கக் கூடிய இப்படியான நெருக்கடி காலத்திலும் கூட, அன்றாடம் தாக்குதலை எதிர்கொண்டிருக்கிற ஒவ்வொரு தலித்துக்கும் பின்னால் இருக்கிற வலியையும், வேதனையையும் இப்போதாவது நீங்கள் புரிந்துகொள்ளவேண்டும். கடக்க முடியாத பொழுதுகளுடன்...

இவ்வாறு அறிக்கையில் கூறப்பட்டுள்ளது.

தமிழில் பின்னணி பாடகராக வலம் வருபவர் வேல்முருகன். பாடகராக ரசிகர்களை கவர்ந்த இவர் அன்னையர் தினத்தை முன்னிட்டு அயனாவரத்தில் இருக்கும் மக்கள் 1,500 பேருக்கு உணவு வழங்கி இருக்கிறார்.

இவருடன் டெப்டி செகரெட்டரி பிரகாஷ் IAS, ஐகோர்ட் செகரட்டரி மோகன், அடிஷனல் செகரிடி நாகப்பன் ஆகியோர் இணைந்து 1500 பேருக்கு உணவு கொடுத்திருக்கிறார்கள்.
அம்மா என்று சொல்லி பாருங்க... அந்த வார்த்தை கூட தெய்வமாகுங்க... கடவுளிடம் கேட்டு பாருங்க... தாயின் கருவறையே கோயில்தானங்க... என்ற பாடலையும் உருவாகி வெளியிட்டிருக்கிறார்.