ராகுல் காந்தியின் அமேதி தொகுதியில் நாளை மோடி பிரசாரம்

லக்னோ:

பாராளுமன்ற தேர்தலையொட்டி பிரதமர் நரேந்திரமோடி நாடு முழுவதும் சுற்றுப்பயணம் செய்து பா.ஜனதா வேட்பாளர்களுக்கு ஆதரவாக பிரசாரம் செய்து வருகிறார்.

நாளை (3-ந்தேதி) அவர் உத்தரபிரதேச மாநிலம் செல்கிறார். அங்கு காங்கிரஸ் தலைவர் ராகுல்காந்தியின் அமேதி தொகுதியில் தேர்தல் பிரசாரம் செய்கிறார்.

முன்னதாக அமேதியில் நடைபெறும் அரசு விழாவில் கலந்து கொண்டு பல்வேறு நலத்திட்டங்களை தொடங்கி வைக்கிறார். கவுர்வா என்ற இடத்தில் ஏ.கே.47 ரக துப்பாக்கிக்கான குண்டுகள் தயாரிக்கும் தொழிற்சாலை அமைக்கப்பட்டுள்ளது. அதை நாளை அவர் தொடங்கி வைக்கிறார்.

அமேதி தொகுதியை மிக முக்கியமானதாக பா.ஜனதா கருதுகிறது. ஏனெனில் இது ராகுல்காந்தி போட்டியிட்டு வெற்றி பெற்ற தொகுதி. கடந்த 2014-ம் ஆண்டு தேர்தலில் பா.ஜனதா சார்பில் தற்போதைய மத்திய மந்திரி ஸ்மிரிதி இரானி போட்டியிட்டு தோல்வியை தழுவினார்.

ஆனால் ராகுல்காந்தி வெற்றி பெற்ற ஓட்டு விகிதத்தை பெருமளவு குறைத்தார். 2009-ம் ஆண்டு நடைபெற்ற பாராளுமன்ற தேர்தலில் ராகுல்காந்தி 3 லட்சம் வாக்குகள் வித்தியாசத்தில் வெற்றி பெற்றார். ஆனால் 2014 தேர்தலில் அது 1 லட்சமாக குறைந்தது.

கடந்த தேர்தலில் தோல்வியை தழுவிய போதிலும் ஸ்மிரிதி இரானி அமேதி தொகுதியில் 5 ஆண்டுகளாக தொடர்ந்து பணியாற்றி வருகிறார்.

இந்த தொகுதியில் மீண்டும் போட்டியிட திட்டமிட்டு ராகுல்காந்திக்கு எதிராக தேர்தல் வியூகம் அமைத்து செயலாற்றுகிறார். அமேதியை ராகுல்காந்தி ஒதுக்கி விட்டதாக குற்றம் சாட்டுகிறார். இந்த முறை ராகுலிடம் இருந்து இந்த தொகுதியை பா.ஜனதா கைப்பற்றும் என நம்பிக்கை தெரிவித்துள்ளார்.  #RahulGandhi #Amethi #PMModi