புதுக்கோட்டை

புதுக்கோட்டை:

புதுக்கோட்டை நகர் காமராஜபுரம் பகுதியை சேர்ந்தவர் நாகரத்தினம் (வயது 65). இவருக்கு உறவினர்கள் என்று யாரும் கிடையாது. மேலும் திருமணமும் செய்துகொள்ளவில்லை.  

இவர் புதுக்கோட்டை அரசு பழைய தலைமை மருத்துவமனையில் தற்காலிக பெண் உதவியாளராக வேலை பார்த்து வந்தார். மேலும் அவர் இரவு நேரங்களில் தனக்கா ஒதுக்கப்பட்டிருந்த ஓய்வு அறையிலேயே தங்கிக்கொள்வார்.

நாகரத்தினம் மருத்துவமனையில் பணியாற்றும் ஊழியர்கள், 108 ஆம்புலன்ஸ் டிரைவர்களுக்கு சாப்பாடு வாங்கி கொடுப்பது, மருத்துவமனை வளாகத்தினை சுத்தம் செய்வது உள்ளிட்ட பணிகளை மேற்கொண்டு வந்தார்.

இந்த நிலையில் நேற்று இரவு அவர் வழக்கமான பணிகளை முடித்துவிட்டு தனது ஓய்வறைக்கு தூங்க சென்றார். இன்று காலை அவரது அறையில் நாகரத்தினம் ரத்த வெள்ளத்தில் பிணமாக கிடந்தார்.

இதுதொடர்பாக மருத்துவமனை ஊழியர்கள் கொடுத்த புகாரின் பேரில் புதுக்கோட்டை நகர காவல் நிலைய போலீசார் விரைந்து சென்று கொலையுண்ட நாகரத்தினத்தின் உடலை கைப்பற்றி பிரேத பரிசோதனைக்காக அனுப்பி வைத்தனர்.

நள்ளிரவில் அங்கு வந்த யாரோ மர்ம நபர்கள் நாகரத்தினத்தை அடித்துக்கொலை செய்துள்ளனர். முன்விரோதத்தில் அவர் கொலை செய்யப்பட்டாரா? அல்லது கொள்ளை முயற்சியில் இந்த கொடூர சம்பவம் நடந்ததா? என்று போலீசார் புலன் விசாரணை நடத்தி வருகிறார்கள்.

கொலை சம்பவம் நடந்த இடத்திற்கு மோப்பநாய் தீரன் வரவழைக்கப்பட்டது. மேலும் கைரேகை நிபுணர்களும் வந்து கொலையாளிகள் விட்டுச்சென்ற தடயங்களை பதிவு செய்து கொண்டனர். இந்த சம்பவம் அரசு ஆஸ்பத்திரி வளாகத்தில் பரபரப்பை ஏற்படுத்தியுள்ளது.

புதுக்கோட்டை:

புதுக்கோட்டை மாவட்டம் திருமயம்  அருகே குலமங்கலத்தில் உள்ள மலையக்கோவில் சுப்பிரமணிய சுவாமி கோவில் தைபூச திருவிழாவை முன்னிட்டு ஜல்லிக்கட்டு நிகழ்ச்சி நடைபெற்றது.

சட்டத்துறை அமைச்சர் ரகுபதி இலுப்பூர் கோட்டாட்சியர் தண்டாயுதபானி, திருமயம் தாசில்தார் பிரவினாமேரி ஆகியோர் முன்னிலையில் மாடுபிடி வீரர்கள் உறுதிமொழி எடுத்துக் கொண்டனர்.

முதலில் கோவில் மாடு வாடிவாசல் வழியாக அவிழ்த்து விடப்பட்டது. அந்த காளையை யாரும் பிடிக்கவில்லை.

இதைத்தொடர்ந்து புதுக்கோட்டை, சிவகங்கை, திருச்சி மாவட்டங்களில் இருந்து வந்த காளைகள் ஒன்றன்பின் ஒன்றாக அவிழ்த்து விடப்பட்டது.

வெற்றி காளைகளின் உரிமையாளர்களுக்கும், காளைகளை அடக்கிய வீரர்களுக்கும் பல்வேறு பரிசுகள் வழங்கப்பட்டது.


புதுக்கோட்டை மாவட்டம் மட்டுமல்லாது வெளிமாவட்டங்களிலிருந்தும் ஏராளமானோர் வந்து நிகழ்ச்சியை கண்டு களித்தனர். இதில் 500 காளைகள் 150 மாடுபிடி வீரர்கள் கலந்து கொண்டனர்.

ஜல்லிக்கட்டு விழாவை முன்னிட்டு ஏராளமான போலீசார் பாதுகாப்பு பணியில் ஈடுபட்டிருந்தனர். காயமடைந்த வீரர்களுக்கு வாடிசால் அருகே இருந்த மருத்துவ முகாமில் சிகிச்சை அளிக்கப்பட்டது.

புதுக்கோட்டை:

புதுக்கோட்டை மாவட்டம் அறந்தாங்கி தாலுகா திருநாளூர் கிராமத்தைச் சேர்ந்தவர் கற்பூரசுந்தரேஸ்வரபாண்டி (வயது 29). இவர் தனது மனைவி சுந்தரி (26) மற்றும் மகன்கள் நித்தீஸ் (6), வித்தீஸ் (4) ஆகியோருடன் கும்பகோணத்தில் தங்கி டீ கடை நடத்தி வந்தார்.

இந்தநிலையில் கடந்த ஒன்றரை ஆண்டுகளுக்கு முன்பு மனைவி சுந்தரியோடு   ஏற்பட்ட   கருத்து வேறுபாட்டால், அவரை விட்டுப் பிரிந்தார். பின்னர் அவர் தனது இரண்டு மகன்களையும் அழைத்துக்கொண்டு சொந்த ஊரான திருநாளூருக்கு வந்து வாழ்ந்து வந்துள்ளார்.

நேற்று சிறுவர்கள் நித்தீஸ் மற்றும் வித்தீஸ் ஆகிய இருவரும் வீட்டருகே விளையாடிக் கொண்டிருந்தனர். அப்போது அவ்வழியாகச் சென்ற சுந்தரேஸ்வரபாண்டியின் சகோதரர் செல்லபாண்டி, சிறுவர்களை வீட்டிற்கு செல்லும்படி கூறிவிட்டு சென்றுள்ளார்.

ஆனால் சிறுவர்கள் வீட்டிற்கு செல்லாமல் அங்கேயே விளையாடிக்கொண்டு  இருந்துள்ளனர்.

நண்பகல் 2 மணியைத்தாண்டியும் சிறுவர்கள் வீட்டிற்கு வராததையடுத்து, தெருவில் சென்று பார்த்தபோது அவர்களை காணவில்லை. இதையடுத்து கற்பூர சுந்தரேஸ்வரபாண்டி மற்றும் உறவினர்கள் சிறுவர்களை தேடிச்சென்றனர். சிறுவர்கள் விளையாடக்கூடிய இடங்கள், வீட்டருகே உள்ள குளக்கரை உள்ளிட்ட பல்வேறு இடங்களில் தேடிப்பார்த்தனர்.

ஆனால் எங்கு தேடியும் சிறுவர்கள் கிடைக்கவில்லை. இதனால் பதட்டம் அடைந்த அவர்கள், அறந்தாங்கி போலீஸ் நிலையத்தில் சம்பவம் குறித்து புகார் அளித்தனர்.  புகாரின்  அடிப்படையில் வழக்குப்பதிவு செய்த போலீசார் காணாமல் போன சிறுவர்களை தீவிர மாகத்தேடி வருகின்றனர்.

சிறுவர்களை யாராவது மர்ம நபர்கள் கடத்தி சென்றார்களா? என்ற கோணத்திலும் போலீசார் விசாரணை நடத்தி வருகிறார்கள்.

வீட்டருகே தெருவில் விளையாடி கொண்டிருந்த 2 சிறுவர்கள் மாயமான சம்பவம் அப்பகுதியில் அதிர்ச்சியை ஏற்படுத்தியுள்ளது.