புதுக்கோட்டை

புதுக்கோட்டை:

தமிழக அரசால் நடத்தப்படும் மக்களை தேடி மருத்துவம் திட்டத்தின் கீழ் அறந்தாங்கி அரசு கலை அறிவியல் கல்லூரியில் பயிலக் கூடிய மாணவர்களுக்கு முழு உடல் மருத்துவ பரிசோதனை மற்றும் ரத்ததான முகாம் நடைபெற்று வருகிறது.

நேற்று நடைபெற்ற நிகழ்ச்சியை கல்லூரி முதல்வர் கண்ணன் தொடங்கி வைத்தார். முகாமில் மாணவர்களுக்கு ரத்தப் பரிசோதனை, ரத்த அழுத்தம் போன்ற நோய்களுக்கு பரிசோதனை செய்யப்பட்டது. இதில் 2 ஆயிரத்திற்கும் மேற்பட்ட மாணவ, மாணவியர்கள் கலந்து கொண்டு பயனடைந்தனர்.

முகாமில் மருத்துவ அலுவலர் மருத்துவர் ஜெயஸ்ரீ, வட்டார சுகாதார மேற்பார் வையாளர் விஸ்வநாதன், மருத்துவ அலுவலர்கள் செவிலியர்கள் சுகாதாரத்துறை பணியாளர்கள், கல்லூரி நிதியாளர் மற்றும் துறை தலைவர்கள் பேராசிரியர்கள், நாட்டு நலப்பணித் திட்ட அலுவலர் செந்தில்குமார், இளையோர் செஞ்சிலுவை சங்க ஒருங்கிணைப் பாளர் முனைவர் கணேஷ்குமார் ஆகியோர் கலந்து கொண்டனர்.

புதுக்கோட்டை:

புதுக்கோட்டை மாவட்டம் ஆலங்குடி அருகே உள்ள பாரதி நகரை சேர்ந்த கணேசன் மகன் சிவா வயது 26 . இவர் தனியார் நிறுவன ஊழியர்.

இவர் தனது  உறவினர்  மகளான புதுக்கோட்டை மாவட்டம் கீழாநிலைக்கோட்டையை சேர்ந்த வெற்றி வேல் மகள் பிரசன்னாதேவி வயது 20 என்பவரை கடந்த 2 வருடமாக காதலித்து வந்துள்ளார்.

இவர்களின் காதலுக்கு பிரசன்னா தேவியின் வீட்டில் எதிர்ப்பு  தெரிவித்ததால் இருவரும் ஆலங்குடி அருகே உள்ள கீழாத்தூர்நாடியம்மன் கோவிலில் திருமணம் செய்து கொண்டனர்.

பின்னர் ஆலங்குடி அனைத்து மகளிர் போலீஸ் நிலையத்தில்  பாதுகாப்பு கேட்டு தஞ்சமடைந்துள்ளனர்.

இது தொடர்பாக ஆலங்குடி அனைத்து மகளிர் போலீஸ் நிலைய இன்ஸ்பெக்டர் ஹேமலதா தஞ்சமடைந்த காதலர்களிடம்  விசாரணை நடத்தினர்.  

இதனை தொடர்ந்து இருவரது குடும்பத்திற்கும் போலீசார் தகவல் தெரிவித்தனர். பின்னர்,போலீஸ் நிலையம் வந்த இருவரது குடும்பத்தினரும் சமரச பேச்சில் ஈடுபட்ட போது பிரசன்னா தேவி குடும்பத்தார் ஏற்றுக்கொள்ளவில்லை.  

இதைத் தொடர்ந்து போலீசார் கணவர் சிவாவுடன்  பிரசன்னா தேவியைஅனுப்பி வைத்தனர்

புதுக்கோட்டை :

புதுக்கோட்டை மாவட்டம் பொன்னமராவதி அருகே உள்ள மலையடிப்பட்டி முருகன் கோவிலில் ஆண்டுந்தோறும் பங்குனி உத்திர திருவிழாவை முன்னிட்டு பக்தர்களுக்கு அன்னதானம் வழங்கப்படும். கடந்த இரண்டு ஆண்டுகளாக கொரோனா வைரஸ் தொற்றின் காரணமாக கோவில்களில் திருவிழாக்கள் நடைபெறாத காரணத்தால் அன்னதானம் நடைபெற வில்லை.‌

 இந்நிலையில் இந்த ஆண்டு கொரோனா வைரஸ் தொற்று குறைந்துள்ள நிலையில் ‌ தமிழகம் முழுவதும் கேவில்களில் திருவிழாக்கள் வெகு விமரிசையாக நடைபெற்று வருகிறது. அதன் ஒரு பகுதியாக இன்று பங்குனி உத்திர திரு விழாவை முன்னிட்டு காஞ்சாத்து மலை முருகன் கோவிலில் ஏராளமான பக்தர்கள் கலந்து கொண்டு சாமி தரிசனம் செய்தனர்.

பக்தர்களுக்கு அன்னதானம் வழங்கு வதற்காக கோவில் அருகில் உள்ள வனத்துறைக்கு சொந்தமான இடத்தில் அன்ன தானம் வழங்குபவர்கள் சமையல் செய்துள்ளனர். இதனை பார்த்த வனத்துறையினர், வனத்துறைக்கு சொந்தமான இடத்தில் அனுமதியின்றி சமையல் செய்ததாகக் கூறி அவர்களுக்கு அபராதம் விதித்தனர்.

இதற்கு எதிர்ப்பு தெரிவித்து மலையடிப் பட்டி கிராம பகுதியை சேர்ந்த பொது மக்கள் பொன்னமராவதி திருமயம் சாலையில் சாலை மறியல் போராட்டத்தில் ஈடுபட்டனர்.

இதனையடுத்து சம்பவ இடத்திற்கு வந்த மாவட்ட வன அலுவலர் மேரி லின்சி சாலை மறியல் போராட்டத்தில் ஈடுபட்ட பொது மக்களிடம் பேச்சுவார்த்தை நடத்தி வனத்துறைக்கு சொந்தமான இடத்தில் சமையல் செய்வது தவறு என்றும் அதற்கு இந்த அபராதத்தை செலுத்திவிடுங்கள் என்றும் இனிமேல் இதுபோன்று வனத்துறைக்கு சொந்தமான இடத்தில் அனு மதியில்லாமல் செய்யக் கூடாது எனவும் அறிவுறுத் தினார்.

இதனையடுத்து பொதுமக்கள் சாலை மறியல் போராட்டத்தை கைவிட்டனர். இதனால் அந்த பகுதியில் சிறிது நேரம் பரபரப்பு ஏற்பட்டது

புதுக்கோட்டை:

புதுக்கோட்டை மாவட்டத்தில் பல்வேறு பகுதிகளில் மாசி மற்றும் பங்குனி திருவிழாக்களை முன்னிட்டு மாட்டு வண்டி , குதிரை பந்தயம் போட்டிகள் நடத்தப்பட்டு வருகின்றன. ஆனால் இப்பந்தயங்களை நடத்த போலீசார் அனுமதி அளிக்கப்படுவதில்லை.

இருப்பினும் புதுக்கோட்டை மாவட்டத்தில் தொடர்ந்து பந்தயங்கள் நடத்தப்பட்டு வருகிறது.  இந்த பந்தயங்கள் நடைபெற்றபின்பு பந்தயம் நடத்தியவர்கள் மீது போலீசார் வழக்குபதிவு செய்வது தொடர்கதையாக உள்ளது.

இந்நிலையில் கே.புதுப்பட்டி காவல் சரகத்திற்கு உட்பட்ட நெடுங்குடியில் சிவன் கோவில் விழாவை முன்னிட்டு மாட்டு வண்டி பந்தயம் நடத்தப்பட்டது. இதை தொடர்ந்து போலீசாரிடம் அனுமதி பெறவில்லை என கூறி சுப்பையா மகன் அருணாச்சலம், கணேசன் மகன் ராஜேஸ், கருப்பையா மகன் முருகேசன், அசோக், அமுதன் காந்தி மகன் அருண்குமார் ஆகியோர் பந்தயத்திற்கு ஏற்பாடு செய்ததாக அவர்கள் மீது சப்இன்ஸ்பெக்டர் தமிழ்வாசகன் மூன்று பிரிவுகளின் கீழ் வழக்குபதிவு செய்து விசாரனை நடத்தி வருகின்றனர்.

பந்தயங்கள் நடத்தும் முன்னரே தடுத்து நிறுத்தாமல் அவர்களை நடத்த விட்டுவிட்டு பின்னர் வழக்கு பதிவு செய்வது என்பது வாடிக்கையாகி விட்டது. நேற்று முன்தினம் திருமயம் அருகே மெய்யூரணி பகுதியில் மாட்டு வண்டி பந்தயம் நடத்தியதாக 5 பேர் மீது வழக்குபதிவு செய்யப்பட்டது குறிப்பிடத்தக்கது.

புதுக்கோட்டை:

புதுக்கோட்டை மாவட்டம் விராலிமலை கவரப்பட்டி பகுதியை சேர்ந்தவர் சங்கர் (வயது 29). பார்வையற்ற மாற்றுத்திறனாளி. இவர் அப்பகுதியில் உள்ள அரசு மேல்நிலைப்பள்ளி அருகாமையில் பெட்டிக்கடை வைத்துள்ளார்.
இந்த பகுதியில் கள்ளச்சந்தையில் பகல் மற்றும் இரவு நேரங்களில் மதுபானம் விற்பனை செய்யப்படுவதாகவும், அதனை தடுப்பதற்காக காவல் கட்டுப்பாட்டு  அறைக்கு சங்கர் தகவல் தெரிவித்தார்.


உடனே விராலிமலை போலீசார் சங்கரை ஜீப்பில் காவல்நிலையத்துக்கு அழைத்து சென்று  பல மணிநேரம் அடித்து-உதைத்தாக கூறப்படுகிறது.

இதுபற்றி அறிந்த மாவட்ட காவல் கண்காணிப்பாளர் நிஷாபார்த்திபன் சங்கரை தாக்கிய போலீஸ் காரர்கள் செந்தில்குமார், அசோக், பிரபு ஆகிய 3 பேரை பணியிடை நீக்கம் செய்து உத்தவிட்டார்.

இந்நிலையில் இன்று மத்திய மண்டல ஐ.ஜி. பாலகிருஷ்ணன், இச்சம்பவம் தொடர்பாக விசாரணை நடத்தினார். இதனை தொடர்ந்து விராலிமலை போலீஸ் இன்ஸ்பெக்டர் பத்மாவை காத்திருப்போர் பட்டியலுக்கு மாற்றம் செய்து உத்தரவிட்டார்.

புதுக்கோட்டை:

புதுக்கோட்டை மாவட்டம் சிப்காட் வாளகத்தில் டாஸ்மாக் மாவட்ட குடோன் செயல்பட்டு வருகிறது. இங்கு புதுக்கோட்டை மாவட்டம் கந்தர்வகோட்டை அருகே கல்லாக்கோட்டையில் இயங்கி வரும் கல் டிஸ்டில்லரிஸ் சாராய தொழிற்சாலையிலிருந்து பிராந்தி பாட்டிகள் குடோனில் இறக்குவதற்காக ஒரு டார்ஸ் லாரியில் கொண்டு வரப்பட்டு நிறுத்தப்பட்டிருந்தது.

சம்பவத்தன்று அதிகாலையில் லாரியிலிருந்து ரூ.1.74 லட்சம் மதிப்புள்ள மது பாட்டிகள் திருடப்பட்டுள்ளது தெரியவந்தது.

இதுகுறித்து தொழிற்சாலை மேலாளர் சீனிவாசன் கொடுத்த புகாரின்பேரில், வெள்ளனூர் சிறப்பு சப்இன்ஸ்¢பெக்டர் குடுமிநாதன் வழக்குப்பதிவு செய்து விசாரனை நடத்தி வருகிறார்.

டாஸ்மாக் குடோனில் மதுபாட்டிகள் கொள்ளை போன சம்பவம் பரபரப்பை ஏற்படுத்தியுள்ளது. டாஸ்மாக் குடோன் மற்றும் அலுவலக வளாகத்தில் சிசிடிவி காமிரா செயல்படவில்லை என்பது குறிப்பிடத்தக்கது.