காஞ்சிபுரம்

காஞ்சீபுரம்:

உத்திரமேரூர் ஆலப்பாக்கம் ஆற்றுபடுகையில் மணல் கடத்தல் நடைபெறுவதாக போலீசாருக்கு தகவல் கிடைத்தது. போலீசார் ரோந்து சென்றபோது மாட்டு வண்டிகளில் மணல் கடத்திய ஆலப்பாக்கம் கிராமத்தைச் சேர்ந்த செல்வம், குமார், சேகர் ஆகியோரை கைது செய்தனர். மாட்டு வண்டிகளும் பறிமுதல் செய்யப்பட்டது.

இதேபோல் சூணாம்பேடு ஏரி பகுதியில் மாட்டு வண்டியில் மணல் கடத்திய அதே பகுதியைச் சேர்ந்த பாலாஜி சூணாம்பேடு போலீசார் கைது செய்தனர்.

திருபோரூர்:

திருப்போரூர் ஊராட்சி ஒன்றியத்திற்குட்பட்ட கேளம்பாக்கம் ஊராட்சியில் பருவமழை முன்னெச்சரிக்கை நடவடிக்கையாக ரூ. 2 லட்சம் செலவில் நீர் ஆதாரமான முத்தாளம்குட்டை ஜேசிபி மூலம் தூர்வாரி ஆழப்படுத்தும் பணி நடைபெற்று வருகிறது.

இதனை ஊராட்சிமன்ற தலைவர் வெங்கடேசன் மற்றும் வார்டு உறுப்பினர் தாமரைசெல்வி பார்வையிட்டு ஆய்வு செய்தனர்.

மாமல்லபுரம்:

மாமல்லபுரம் அடுத்த நல்லான்பிள்ளை பெற்றாள் கிராமத்தை சேர்ந்தவர் கிருஷ்ணப்பன். இவரது மனைவி சுமதி. மகள் புவனேஸ்வரி ஊராட்சி பள்ளியில் 5-ம் வகுப்பு படித்துவந்தார்.

புவனேஸ்வரி வீட்டு வேலை செய்யாததை சுமதி கண்டித்ததால் உடலில் மண்ணெண்ணெய் ஊற்றி தீ வைத்துக் கொண்டார். சென்னை கீழ்பாக்கம் அரசு மருத்துவமனையில் அனுமதிக்கப்பட்டு சிகிச்சை பெற்று வந்த புவனேஸ்வரி நேற்று சிகிச்சை பலனின்றி உயிரிழந்தார்.

மாமல்லபுரம் போலீசார் வழக்கு பதிவு செய்து விசாரணை நடத்தி வருகிறார்கள்.

காஞ்சீபுரம்:

வாலாஜாபாத் வெள்ளேரியம்மன் கோவில் புதுத்தெருவைச் சேர்ந்தவர் கஜேந்திரன். வாலாஜாபாத் வட்டார வளர்ச்சி அலுவலகத்தில் பணியாற்றி வந்தார்.

கடந்த 1996-ம் ஆண்டு கஜேந்திரனும் அவருடன் பணிபுரிந்த வேறு சிலரும் பணி நீக்கம் செய்யப்பட்டனர்.

இதை எதிர்த்து கஜேந்திரன் வழக்கு தொடர்ந்ததில் சென்னை முதலாவது கூடுதல் தொழிலாளர் நீதிமன்றம் 2007-ம் ஆண்டு வரை ஊதியம் மற்றும் நிலுவை தொகை வழங்க உத்தரவிட்டது.

ஆனால் வாலாஜாபாத் வட்டார வளர்ச்சி அலுவலகம் 2003 ஆண்டு வரையான ஊதியம் மட்டும் அளித்ததாக கூறப்படுகிறது.

இதன் பின்னர் ஊதியம் மற்றும் சில சலுகைகளை வழங்கவில்லை என கஜேந்திரன் நீதிமன்றத்தில் மீண்டும் வழக்கு தொடர்ந்தார். அந்த வழக்கில் உரிய இழப்பீடு வழங்கவில்லையெனில் அலுவலகத்தை ஜப்தி செய்யலாம் என கோர்ட்டு தீர்ப்பு கூறியது.

இதையடுத்து ஊழியருக்கு இழப்பீடு தொகை வழங்காத வட்டார வளர்ச்சி அலுவலகத்தை ஜப்தி செய்ய கோர்ட்டு ஊழியர்கள் வந்தனர். இதனால் அங்கு பரபரப்பு ஏற்பட்டது.

கோர்ட்டு உத்தரவை காட்டி வட்டார வளர்ச்சி அலுவலகத்தை ஜப்தி செய்ய வந்துள்ளதாக தெரிவித்தார்.

அதிர்ச்சி அடைந்த அதிகாரிகள் வழக்கு தொடர்ந்த கஜேந்திரனிடம் பேச்சு வார்த்தை நடத்தினர். ஒருவார கால அவகாசத்தில் நிலுவை தொகையினை வழங்குவதாக உறுதி அளித்தனர். இதைத் தொடர்ந்து ஜப்தி நடவடிக்கை ஒத்தி வைக்கப்பட்டது.

வாலாஜாபாத் வட்டார வளர்ச்சி அலுவலகத்தை கோர்ட்டு ஊழியர்கள் ஜப்தி செய்ய வந்த சம்பவம் அப்பகுதியில் பெரும் பரபரப்பை ஏற்படுத்தியது.

காஞ்சீபுரம்:

அகில இந்திய தொழிற்சங்கங்கள் 12 அம்ச கோரிக்கையை வலியுறுத்தி இன்று நாடு தழுவிய வேலை நிறுத்த போராட்டத்திற்கு அழைப்பு விடுத்து உள்ளது.

தமிழகத்தில் பல்வேறு தொழிற்சங்கங்களும் போராட்டத்திற்கு ஆதரவு தெரிவித்து உள்ளன.

திருவள்ளூர், திருத்தணி, ஊத்துக்கோட்டை, பொன்னேரி உள்ளிட்ட மாவட்டம் முழுவதும் அரசு பஸ்கள், தனியார் பஸ்கள், ஆட்டோக்கள் வழக்கம் போல் ஓடின. கூடுதலாக 13 அரசு பஸ்கள் இயக்கப்பட்டது.

திருவள்ளூர் தலைமை தபால் நிலையம், ரெயில் நிலையம், பஸ் பணிமனையில் போலீஸ் பாதுகாப்பு போடப்பட்டு இருந்தது.

திருவள்ளூர் கலெக்டர் அலுவலகத்தில் அதிகாரிகள் மட்டும் பணியில் இருந்தனர் .பெரும்பாலான ஊழியர்கள் பணிக்கு வரவில்லை.

இதைப்போல் திருவள்ளூர் தாசில்தார் அலுவலகத்தில் ஊழியர்கள் யாரும் பணிக்கு வரவில்லை. இதனால் அலுவலகம் வெறிச்சோடி காணப்பட்டது. வட்டார போக்குவரத்து அலுவலகத்திலும் பெரும்பாலான ஊழியர்கள் பணிக்கு வரவில்லை. இதனால் பணிகள் பாதிக்கப்பட்டது.

திருவள்ளூர் தலைமை தபால் நிலையம் முன்பு சி.ஐ.டி.யு.சி., ஏ.ஐ.டி.யு.சி. உள்ளிட்ட பல்வேறு தொழிற்சங்கத்தினர் சுமார் 500-க்கும் மேற்பட்டோர் கோரிக்கைகளை வலியுறுத்தி ஆர்ப்பாட்டத்தில் ஈடுபட்ட னர். திடீரென அவர்கள் மறியல் செய்தனர்.

இதையடுத்து போராட்டத்தில் ஈடுபட்ட 500 பேரை போலீசார் கைது செய்தனர். அவர்கள் அனைவரும் தனியார் திருமண மண்டபத்தில் தங்க வைக்கப்பட்டனர்,.

காஞ்சீபுரத்தில் பொது வேலை நிறுத்தத்தால் எந்தவித பாதிப்பும் ஏற்படவில்லை. அரசு மற்றும் தனியார் பஸ்கள் வழக்கம் போல் ஓடியது. பொது மக்கள் அதிகமாக பயணிக்கும் ஷேர் ஆட்டோக்கள் மற்றும் ஆட்டோக்கள் வழக்கம் போல் இயங்கின

நகரின் முக்கிய சாலைகளான காந்தி சாலை, காமராஜர் சாலை, ரெயில்வே சாலை உள்ளிட்ட இடங்களில் கடைகள் வழக்கம் போல் திறந்திருந்தன. முக்கிய இடங்களில் போலீசார் பாதுகாப்பு பணியில் ஈடுபட்டனர்.

காஞ்சீபுரம் தேரடியில் இருந்து தொழிற்சங்கத்தினர் 300-க்கும் மேற்பட்டோர் ஊர்வலமாக வந்தனர். பின்னர் அவர்கள் கலெக்டர் அலுவலகம் அருகே உள்ள காவலான்கேட்டில் ஆர்ப்பாட்டத்தில் ஈடுபட்டனர். இதையடுத்து அங்கு பலத்த போலீஸ் பாதுகாப்பும் போடப்பட்டு இருந்தது.

மதுராந்தகத்தில் வழக்கம் போல் பஸ்கள் ஓடின. ஆட்டோக்கள் மட்டும் ஓட வில்லை.

இதேபோல் செங்கல்பட்டு, ஸ்ரீபெரும்புதூர் உள்ளிட்ட மாவட்டம் முழுவதும் எந்த வித பாதிப்பும் இன்றி பஸ்கள் இயங்கியது. பொது மக்கள் அதிகம் கூடும் இடங்கள், பஸ்நிலையம், ரெயில் நிலையங்களில் போலீசார் பாதுகாப்பு பணியில் ஈடுபட்டனர். பாதிக்கப்பட்டது.

தாம்பரம்:

பம்மல் சிக்னல் மெயின் ரோடு பகுதியை சேர்ந்தவர் சீதாலட்சுமி (75). இவர் இன்று காலை அப்பகுதியில் உள்ள கோவிலுக்கு சென்று விட்டு நடந்து வந்து கொண்டிருந்தார். அப்போது மோட்டார் சைக்கிளில் வந்த 2 மர்ம நபர்கள் சீதா லட்சுமி கழுத்தில் இருந்த 5 பவுன் நகையை பறித்து சென்றுவிட்டனர்.

இது குறித்து சங்கர் நகர் போலீசார் வழக்கு பதிவு செய்து விசாரித்து வருகின்றனர்.