சென்னை:
கால்நடை சந்தை கட்டுப்பாட்டுக்கு எதிராக பேரவையில் எதிர்க்கட்சி தலைவர் ஸ்டாலின் தனித் தீர்மானம் கொண்டு வந்தார். அதில், கால்நடை சந்தை கட்டுப்பாட்டால் விவசாயிகளின் பொருளாதாரம் பாதிக்கப்படும், அதனால், கால்நடை சந்தை கட்டுப்பாட்டுக்கு எதிராக சட்டப்பேரவையில் தீர்மானம் நிறைவேற்ற வேண்டும் என வலியுறுத்தி இருந்தார்.
மத்திய அரசின் கால்நடை சந்தைக் கட்டுப்பாட்டு சட்டத்தை தமிழக அரசு ஆதரிக்கக் கூடாது என எதிர்க்கட்சிகள் மற்றும் அதிமுக தோழமை கட்சிகள் வலியுறுத்தின.
ஸ்டாலின் கொண்டு வந்த தீர்மானத்திற்கு பதிலளித்து பேசிய முதலமைச்சர் எடப்பாடி பழனிச்சாமி, ”பெரும்பான்மையான மக்களின் விருப்பப்படி தமிழக அரசின் நிலைப்பாடு இருக்கும். தமிழகத்தில் பசுவதை தடுப்பு சட்டம் 40 ஆண்டுகளாக அமலில் உள்ளது. உச்சநீதிமன்ற தீர்ப்பு வந்த பிறகு தமிழக அரசின் நிலைப்பாடு தெரிவிக்கப்படும்” என்றார்.
ஆனால், முதலமைச்சரின் பதிலை ஏற்க மறுத்து திமுக உறுப்பினர்கள் வெளிநடப்பு செய்தனர். அதேபோல், சட்டசபையில் இருந்து அதிமுக தோழமை கட்சிகளான தமிழ்நாடு கொங்கு இளைஞர் பேரவை, முக்குலத்தோர் புலிப்படையும் வெளிநடப்பு செய்தன.
