இணையத்தில் வெளியான புதிய விவரங்கள் - அசத்தல் அம்சங்களுடன் உருவாகும் ஐபோன் 12 ப்ரோ மேக்ஸ்

ஆப்பிள் நிறுவனத்தின் ஐபோன் 12 ப்ரோ மேக்ஸ் விவரங்கள் ஆன்லைனில் வெளியாகியுள்ளது. அதன்படி புதிய மாடல் ஐபோன் 11 ப்ரோ மேக்ஸ் மாடலை விட அதிக மாற்றங்களை கொண்டிருக்கும் என தெரியவந்துள்ளது. அதில் முக்கியமான ஒன்றாக ஸ்மார்ட் கனெக்டர் இருக்கிறது.

மேலும் ஐபோன் 12 ப்ரோ மேக்ஸ் இதுவரை வெளியான ஐபோன்களில் மிகவும் மெல்லியதாக இருக்கும் என எதிர்பார்க்கப்படுகிறது. தோற்றத்தில் இதன் வடிவமைப்பு பார்க்க ஐபேட் ப்ரோ போன்று காட்சியளிக்கும் என கூறப்படுகிறது. தற்சமயம் வெளியாகி இருக்கும் தகவல்களில் ஐபோன் 12 ப்ரோ மேக்ஸ் முழு வடிவமைப்பை தெரியப்படுத்துகிறது.

அதன்படி புதிய ஐபோன் 7.39 எம்எம் அளவு தடிமனாக இருக்கும் என கூறப்படுகிறது. கடந்த ஆண்டு அறிமுகமான ஐபோன் 11 ப்ரோ 8.10 எம்எம் தடிமனாக இருந்தது குறிப்பிடத்தக்கது. புதிய ஐபோன் மெல்லியதாக இருந்தாலும், இதன் கேமரா பம்ப் முந்தைய மாடலை விட தடிமனாக இருக்கும் என கூறப்படுகிறது.

இத்துடன் புதிய ஐபோன் நாட்ச் முந்தைய மாடல்களில் உள்ளதை விட சிறியதாக இருக்கும் என கூறப்படுகிறது. ஐபோன் 12 ப்ரோ மேக்ஸ் மாடலில் ஃபிளாட் எட்ஜ்கள் வழங்கப்படும் என்றும் தகவல் வெளியாகியுள்ளது. இத்துடன் ஸ்மார்ட் கனெக்டர் வழங்குவது பற்றிய தகவலும் இடம்பெற்று இருக்கிறது.

ஆப்பிள் நிறுவனம் புதிய ஐபோன் 12 சீரிஸ் மாடல்களை மூன்று வெவ்வேறு அளவுகளில் வெளியிட இருக்கிறது. இவற்றில் 5ஜி வசதி வழங்கப்படும் என்றும் அதிகம் எதிர்பார்க்கப்படுகிறது.