மீண்டும் முதலிடம் பிடித்த ரிலையன்ஸ் ஜியோ - டிராய் அதிரடி அறிவிப்பு

இந்திய டெலிகாம் சந்தையில் ஜூலை மாதம் ரிலையன்ஸ் ஜியோ நிறுவனம் நாட்டின் அதிவேக 4ஜி டவுன்லோடு வேகம் வழங்கிய நிறுவனங்கள் பட்டியலில் முதலிடம் பிடித்துள்ளது. ஜூலை மாதத்தில் ஜியோவின் 4ஜி டவுன்லோடு வேகம் நொடிக்கு 21 மெகாபைட் (21Mbps) ஆக இருந்தது. ஜூன் மாதம் இது 17.6Mbps ஆக இருந்தது குறிப்பிடத்தக்கது.

மத்திய டெலிகாம் ஒழுங்குமுறை ஆணையமான டிராய் வெளியிட்ட தகவல்களின்படி ஏர்டெல் டவுன்லோடு வேகம் 8.8Mbps ஆகவும், வோடபோன் 7.7Mbps ஆகவும், ஐடியா செல்லுலார் 6.6Mbps ஆக இருந்தது. பி.எஸ்.என்.எல். நிறுவனம் அதிவேக 3ஜி நெட்வொர்க் ஆக இருந்தது.

ஜுலையில் பி.எஸ்.என்.எல். சராசரி டவுன்லோடு வேகம் 2.5 Mbps ஆக இருந்தது. இதைத் தொடர்ந்து ஐடியா 2 Mbps, வோடபோன் 1.9 Mbps மற்றும் ஏர்டெல் 3ஜி 1.4 Mbps வேகம் வழங்கியிருக்கின்றன. டவுன்லோடு வேகம் தவிர அப்லோடு வேகங்களில் வோடபோன் நிறுவனம் முதலிடம் பிடித்துள்ளது.

வோடபோன் நிறுவனம் ஜுலை மாதம் 5.8 Mbps அப்லோடு வேகம் வழங்கியிருக்கிறது. ஐடியா செல்லுலார் 5.3 Mbps அப்லோடு வேகமும், ஜியோ 4.3 Mbps, ஏர்டெல் நிறுவனம் 3.2 Mbps அப்லோடு வேகம் வழங்கியிருக்கின்றன.

பயனர் வீடியோ பார்க்கும் போது டவுன்லோடு வேகம் முக்கிய பங்காற்றுகிறது. டவுன்லோடு வேகம் கொண்டே இணைய பிரவுசிங், மின்னஞ்சல் பயன்பாடு உள்ளிட்டவற்றை மேற்கொள்ளப்படுகின்றன. பயனர் புகைப்படங்கள், வீடியோக்களை மின்னஞ்சல் அல்லது சமூக வலைத்தளங்கள் மூலம் பகிர்ந்து கொள்ளும் போது அப்லோடு வேகம் தேவைப்படுகிறது.