மாநிலங்களவையில் முத்தலாக் மசோதாவை நிறைவேற்ற விடமாட்டோம் - காங்கிரஸ் உறுதி

கொச்சி:

இஸ்லாமிய மதத்தினர் பின்பற்றும் முத்தலாக் விவகாரத்து முறையை தடை செய்யும் வகையில் மத்திய அரசு சிறப்பு மசோதா உருவாக்கி உள்ளது. மக்களவையில் தாக்கல் செய்யப்பட்ட இந்த மசோதா கடந்த வாரம் நிறைவேறியது. இதைத்தொடர்ந்து மாநிலங்களவையில் இந்த வாரம் தாக்கல் செய்யப்படும் என எதிர்பார்க்கப்படுகிறது.

இந்த மசோதாவுக்கு மக்களவையில் எதிர்ப்பு தெரிவித்த காங்கிரஸ் கட்சி, மாநிலங்களவையில் இந்த மசோதாவை நிறைவேற்ற விடமாட்டோம் என அறிவித்து உள்ளது.

இது குறித்து கட்சியின் எம்.பி.யான வேணுகோபால், நேற்று செய்தியாளர்களிடம் கூறுகையில், ‘முத்தலாக் மசோதாவை மக்களவையில் 10 எதிர்க்கட்சிகள் எதிர்த்தன. பல்வேறு பிரச்சினைகளில் அரசை ஆதரிக்கும் அ.தி.மு.க. மற்றும் திரிணாமுல் காங்கிரஸ் கூட எதிர்ப்பு தெரிவித்தன. இந்த கட்சிகளுடன் இணைந்து மாநிலங்களவையில் முத்தலாக் மசோதாவுக்கு கடும் எதிர்ப்பு தெரிவிப்போம். இந்த மசோதாவை தற்போதைய வடிவத்தில் நிறைவேற்ற விடமாட்டோம்’ என்று தெரிவித்தார். முத்தலாக் மசோதாவில் கடுமையான பிரிவுகள் இருப்பதாக கூறிய வேணுகோபால் எம்.பி., சிவில் தவறை குற்றமாக கருதுவதை ஒருபோதும் ஏற்க முடியாது என்றும் தெரிவித்தார். பெண்களுக்கு அதிகாரம் அளிப்பதற்கு இந்த மசோதா உதவாது என்றும் அவர் கூறினார். #TripleTalaq #RajyaSabha #Venugopal