பேரையூர்:
திருமங்கலம் அருகே உள்ள நாகையாபுரம் போலீஸ் சரகத்திற்குட்பட்ட எஸ்.வளையபட்டியைச் சேர்ந்தவர் இளங்கோ (வயது 29). இவரது மனைவி பஞ்சவர்ணம் (27).
இவர்களுக்கு திருமணமாகி 8 ஆண்டுகள் ஆகின்றன. செல்வகுமார் (7) என்ற மகன் உள்ளான். கடந்த சில மாதங்களாக இளங்கோவுக்கும், அவரது மனைவிக்கும் கருத்து வேறுபாடு ஏற்பட்டது. இதனால் குடும்பத்தகராறு உருவானது.
நேற்றும் அவர்களுக்கு இடையே வாக்குவாதம் ஏற்பட்டது. இந்த நிலையில் பஞ்சவர்ணம் மற்றும் இளங்கோ தீக்காயங்களுடன் மதுரை அரசு ஆஸ்பத்திரிக்கு கொண்டு வரப்பட்டனர்.
இது குறித்து நாகையாபுரம் போலீசாருக்கு தகவல் கொடுக்கப்பட்டது. அவர்கள் விரைந்து வந்து விசாரணை நடத்தினர்.
அப்போது பஞ்சவர்ணம் கூறுகையில், குடும்ப தகராறில் கணவர் இளங்கோ, என்மீது மண் எண்ணை ஊற்றி தீ வைத்தார். அந்த அறையில் இருந்த மகனை காப்பாற்ற வந்தபோது நான் கணவரை கட்டிப்பிடித்தேன் என்றார்.
மேலும் கணவரின் செயலுக்கு அவரது பாட்டி பேச்சியம்மாள் உடந்தையாக இருந்ததாகவும் தெரிவித்தார்.
அதன்பேரில் இளங்கோ, பேச்சியம்மாள் மீது நாகையாபுரம் போலீசார் வழக்குப்பதிவு செய்து விசாரணை நடத்தி வருகின்றனர்.
