நீங்கள் தேடியது "Pakistan parliament"

இஸ்லாமாபாத்:

பாகிஸ்தான் நாடாளுமன்றத்துக்கு நடந்த தேர்தலில் எந்தக்கட்சியும் பெரும்பான்மை பலம் பெறாமல், தொங்கு நாடாளுமன்றம் உருவாகி உள்ளது. முன்னாள் கிரிக்கெட் வீரர் இம்ரான்கானின் பாகிஸ்தான் தெஹ்ரீக் இ இன்சாப் கட்சி கூடுதல் இடங்களை கைப்பற்றி தனிப்பெரும் கட்சியாக வந்து உள்ளது. அந்தக் கட்சி, சிறிய கட்சிகளின் ஆதரவுடன் இம்ரான்கான் தலைமையில் புதிய அரசு அமைக்கிறது.



இந்த நிலையில் பாகிஸ்தான் நாடாளுமன்றம் கடந்த திங்கட்கிழமை கூடியது. இதில் இம்ரான்கான், பாகிஸ்தான் முஸ்லிம் லீக் கட்சி (நவாஸ்) தலைவர் ஷாபாஸ் ஷெரீப், பாகிஸ்தான் மக்கள் கட்சித்தலைவர் பிலாவல் சர்தாரி பூட்டோ, முன்னாள் அதிபர் ஆசிப் அலி சர்தாரி உள்ளிட்ட புதிய எம்.பி.க்கள் பதவி ஏற்றனர்.

புதிய எம்.பி.க்கள் பதவி ஏற்றதைத் தொடர்ந்து புதன்கிழமை (நேற்று) சபாநாயகர் தேர்தல் நடத்தப்படும் என அறிவிக்கப்பட்டது.

இந்த தேர்தலில் இம்ரான்கானின் தெஹ்ரீக் இ-இன்சாப் கட்சி, மூத்த தலைவர்களில் ஒருவரான ஆசாத் கைசரை களம் இறக்கியது.

11 எதிர்க்கட்சிகளின் சார்பில் பொது வேட்பாளராக பாகிஸ்தான் மக்கள் கட்சியின் மூத்த தலைவர் சையத் குர்ஷித் ஷா நிறுத்தப்பட்டார்.

நேற்று காலை 10 மணிக்கு சபாநாயகர் தேர்தல் தொடங்கிவிடும் என எதிர்பார்க்கப்பட்டது. ஆனால் எம்.பி.க்கள் சபைக்கு வர தாமதம் ஏற்பட்டதால், தேர்தல் ஒரு மணி நேரம் தாமதமாக தொடங்கியது. அனைத்து எம்.பி.க்களும் ஓட்டு போட்டனர். அதைத் தொடர்ந்து ஓட்டுப்பெட்டி நாடாளுமன்ற செயலாளர் வசம் ஒப்படைக்கப்பட்டது. ஓட்டு எண்ணிக்கை நடைபெற்றது.

இதில் இம்ரான்கானின் தெஹ்ரீக் இ இன்சாப் கட்சி வேட்பாளர் ஆசாத் கைசர் வெற்றி பெற்றார். அவருக்கு 176 ஓட்டுகள் கிடைத்தன. அவரை எதிர்த்து போட்டியிட்ட சையத் குர்ஷீத் ஷா 146 ஓட்டுகள் பெற்றார். 8 ஓட்டுகள் செல்லாத ஓட்டுகள் ஆகும்.

முன்னாள் சபாநாயகர் ஆயாஸ் சாதிக், சபாநாயகர் தேர்தலில் தெஹ்ரீக் இ இன்சாப் கட்சி வேட்பாளர் ஆசாத் கைசர் வெற்றி பெற்றதாக முறைப்படி அறிவித்தார்.

வெற்றி பெற்ற ஆசாத் கைசர், நாடாளுமன்றத்தில் எதிர்க்கட்சி வரிசையில் அமர்ந்து இருந்த தலைவர்கள், எம்.பி.க்களை சந்தித்து அவர்களுடன் கை குலுக்கினார். அவர்கள், புதிய சபாநாயகருக்கு வாழ்த்து தெரிவித்தனர்.

அதையடுத்து ஆசாத் கைசர் புதிய சபாநாயகராக பதவி ஏற்றார். அவருக்கு முன்னாள் சபாநாயகர் ஆயாஸ் சாதிக் பதவிப்பிரமாணம் செய்து வைத்தார்.

அதையடுத்து அவர் சபையை நடத்தினார். சபையில் அமளி நிலவியது. அவர் அமைதியை நிலை நாட்ட முயற்சித்தும் அது பலன் தரவில்லை. இதையடுத்து அவர் சபையை 15 நிமிடங்கள் ஒத்திவைத்தார்.

புதிய சபாநாயகர் ஆசாத் கைசர், கைபர் பக்துங்வா மாகாண சட்டசபை சபாநாயகராக பதவி வகித்த அனுபவம் கொண்டவர் என்பது குறிப்பிடத்தக்கது.   #ImranKhan #PakistanParliament #tamilnews

இஸ்லாமாபாத்:

பாகிஸ்தான் நாடாளுமன்றத்துக்கு கடந்த மாதம் 25-ந் தேதி தேர்தல் நடந்தது. இந்த தேர்தலில் எந்தவொரு கட்சிக்கும் தனிப்பெரும்பான்மை கிடைக்காமல், தொங்கு நாடாளுமன்றம் உருவாகி உள்ளது.

116 இடங்களுடன் தனிப்பெரும் கட்சியாக வந்து உள்ள முன்னாள் கிரிக்கெட் வீரர் இம்ரான்கானின் பாகிஸ்தான் தெஹ்ரீக் இ இன்சாப் கட்சி, சிறிய கட்சிகளுடன் சேர்ந்து அரசு அமைக்க உள்ளது.

இந்த நிலையில், பாகிஸ்தான் நாடாளுமன்றம் இன்று (திங்கட்கிழமை) கூடுகிறது. இதற்கான அழைப்பை அந்த நாட்டின் ஜனாதிபதி மம்னூன் உசேன் விடுத்து உள்ளார். இன்று புதிய உறுப்பினர்கள் பதவி ஏற்பார்கள்.



அதைத் தொடர்ந்து சபாநாயகர், துணை சபாநாயகர், பிரதமர் பதவிகளுக்கான தேர்தல் நடைபெறும்.

நாடாளுமன்ற தேர்தலில் பாகிஸ்தான் முன்னாள் பிரதமர் நவாஸ் ஷெரீப்பின் பாகிஸ்தான் முஸ்லிம் லீக் கட்சி (நவாஸ்) 64 இடங்களை கைப்பற்றி உள்ளது. மற்றொரு முன்னாள் பிரதமரான மறைந்த பெனாசிர் பூட்டோவின் பாகிஸ்தான் மக்கள் கட்சி 43 இடங்களில் வெற்றி பெற்று உள்ளது. இவ்விரு கட்சிகளும் தேர்தலுக்கு பின்னர் கைகோர்த்து உள்ளன. இது ஒரு பக்கம் இம்ரான்கான் கட்சிக்கு தலைவலியை ஏற்படுத்தி உள்ளது.

நடக்க உள்ள சபாநாயகர், துணை சபாநாயகர், பிரதமர் பதவிகளுக்கான தேர்தலில் இம்ரான்கானின் பாகிஸ்தான் தெஹ்ரீக் இ இன்சாப் கட்சிக்கு இந்தக் கட்சிகள் பலத்த போட்டியை உருவாக்கும்.

இந்த நிலையில் நேற்று முன்தினம் லாகூர் மாதிரி நகரில் உள்ள பாகிஸ்தான் முஸ்லிம் லீக் கட்சி (நவாஸ்) தலைவர் ஷாபாஸ் ஷெரீப்பின் இல்லத்தில் எதிர்க்கட்சி தலைவர்கள் கூட்டம் நடந்தது.

இந்த கூட்டத்தில் ஷாபாஸ் ஷெரீப், பாகிஸ்தான் மக்கள் கட்சியின் மூத்த தலைவரும், முன்னாள் பிரதமருமான யூசுப் ராஸா கிலானி, முன்னாள் நாடாளுமன்ற எதிர்க்கட்சி தலைவர் சையத் குர்ஷீத் ஷா, பாகிஸ்தான் முஸ்லிம் லீக் கட்சி (நவாஸ்) மூத்த தலைவர் கவாஜா ஆசிப், முன்னாள் நாடாளுமன்ற சபாநாயகர் அயாஸ் சாதிக் உள்ளிட்டவர்கள் கலந்து கொண்டனர். இந்த கூட்டத்தில் பாகிஸ்தான் நாடாளுமன்ற சபாநாயகர், துணை சபாநாயகர், பிரதமர் தேர்தல் குறித்து முக்கிய ஆலோசனை நடத்தி, கூட்டு வியூகம் ஒன்றை பாகிஸ்தான் முஸ்லிம் லீக் கட்சியும் (நவாஸ்), பாகிஸ்தான் மக்கள் கட்சியும் வகுத்து உள்ளன.

பிரதமர் தேர்தலில் எதிர்க்கட்சிகளின் பொது வேட்பாளராக பாகிஸ்தான் முஸ்லிம் லீக் கட்சி (நவாஸ்) தலைவர் ஷாபாஸ் ஷெரீப் நிறுத்தப்படுகிறார்.இம்ரான் கானுக்கு ஷாபாஸ் ஷெரீப் கடும் போட்டியை உருவாக்குவார் என்ற எதிர்பார்ப்பு பாகிஸ்தானில் நிலவுகிறது.  #Pakistan #Parliament #PMElection