திருவனந்தபுரம்:
கேரளாவில் பெய்து வரும் தொடர் மழை காரணமாக பல்வேறு பகுதிகளில் நிலச்சரிவு ஏற்பட்டு போக்குவரத்து துண்டிக்கப்பட்டுள்ளது. இந்நிலையில், திருவனந்தபுரம் மற்றும் பாலக்காடு ரெயில்வே கோட்டங்களில் ஏற்பட்டுள்ள நிலச்சரிவு காரணமாக ரெயில் சேவைகள் நிறுத்தப்பட்டுள்ளது.
இதுதொடர்பாக தெற்கு ரெயில்வே இன்று வெளியிட்டுள்ள செய்திக்குறிப்பில் கூறப்பட்டிருப்பதாவது:-
திருவனந்தபுரம்-எர்ணாகுளம் (கோட்டயம் வழி) வழித்தடத்தில் அனைத்து ரெயில்களும் நாளை மாலை 4 மணி வரை ரத்து செய்யப்பட்டுள்ளன.
எர்ணாகுளம்-ஷோரனூர் மற்றும் பாலக்காடு வழித்தடத்தில் அனைத்து ரெயில்களும் நாளை மாலை 4 மணி வரை ரத்து செய்யப்படுகின்றன. இதேபோல் ஷோரனூர்-கோழிக்கோடு வழித்தடத்தில் இன்று மாலை வரை ரெயில்கள் ரத்து செய்யப்படுகின்றன.
அடுத்த அறிவிப்பு வரும் வரை திருவனந்தபுரம் மற்றும் பாலக்காடு கோட்டங்களில் இயக்கப்படும் அனைத்து சுவிதா ரெயில்கள், சிறப்பு ரெயில்கள் ரத்து செய்யப்பட்டுள்ளன.
பல்வேறு பகுதிகளில் ரெயில்பாதைகள் மற்றும் ரெயில்வே பாலங்கள் வெள்ளத்தில் மூழ்கி உள்ளதால், ரெயில்வே அவ்வப்போது வெளியிடும் அறிவிப்புகளை தெரிந்துகொண்டு அதன்படி பயணம் செய்யும்படி பொதுமக்கள் கேட்டுக்கொள்ளப்படுகிறார்கள்.
பாலக்காடு-ஷோரன்பூர் வழித்தடத்தில் இன்று மாலை ரெயில் சேவையை தொடங்க முடியுமா? என்பது குறித்து அதிகாரிகள் ஆய்வு செய்து வருகின்றனர்.
எனினும் திருவனந்தபுரம்-எர்ணாகுளம் (அலெப்பி வழி) மற்றும் திருவனந்தபுரம்- திருநெல்வேலி (நாகர்கோவில் வழி) ஆகிய வழித்தடங்களில் அந்த பகுதியில் உள்ள நிலவரத்திற்கு ஏற்ப குறிப்பிட்ட வேகத்தில் ரெயில்கள் இயக்கப்படும். பயணிகளின் வசதிக்காக எர்ணாகுளத்தில் இருந்து அலெப்பி வழியாக திருவனந்தபுரத்திற்கு சிறப்பு பாசஞ்சர் ரெயில்கள் இயக்கப்படுகின்றன.
இவ்வாறு தெற்கு ரெயில்வே செய்திக்குறிப்பில் கூறப்பட்டுள்ளது. #KeralaFlood #KeralaTrainsCancelled
