17-வது ஐ.பி.எல். போட்டிக்கான வீரர்கள் மினி ஏலம் துபாயில் இன்று நடந்து வருகிறது. ஏலப்பட்டியலில் மொத்தம் 333 வீரர்கள் இடம்பெற்றுள்ளனர். இதில் 214 பேர் இந்தியர்கள், 119 வீரர்கள் வெளிநாட்டை சேர்ந்தவர்கள்.
இந்தஏலத்தில் பேட் கம்மின்ஸை 20.50 கோடிக்கு சன்ரைசர்ஸ் அணி ஏலம் எடுத்தது. ஸ்டார்கை ரூ.24.75 கோடிக்கு கொல்கத்தா அணி விலைக்கு வாங்கியது. இதற்கு அடுத்தப்படியாக டேரில் மிட்செலை ரூ.14 கோடிக்கு சென்னை அணி வாங்கியது. மேலும் சென்னை அணியில் நியூசிலாந்து அணியின் ஆல் ரவுண்டரி ரச்சின் ரவீந்திராவை சென்னை சூப்பர் கிங்ஸ் அணி ரூ.1.8 கோடிக்கு ஏலம் எடுத்துள்ளது.
இந்த நிலையில் சென்னை ரசிகர்களை நான் மகிழ்விப்பேன் என சிஎஸ்கே அணியால் ஏலம் எடுக்கப்பட்ட ரச்சின் ரவீந்திரா தெரிவித்துள்ளார்.
இது குறித்து அவர் கூறியதாவது:-
முதல் முறையாக ஐபிஎல் தொடரில் விளையாட போகிறேன். சிறந்த வீரர்களான டோனி மற்றும் ஜடேஜா போன்ற சிறந்த வீரர்களை கொண்ட சென்னை அணியில் விளையாடபோவதை நினைத்தால் மிகவும் பெருமையாக உள்ளது.
சென்னை சூப்பர் கிங்ஸ் ரசிகர்களின் வரவேற்பு, மைதானத்தில் நிலவும் சூழல் குறித்தெல்லாம் நியூசிலாந்து வீரர்கள் நிறைய கூறியுள்ளார்கள். சென்னை ரசிகர்களை நிச்சயம் மகிழ்விப்பேன்.
இவ்வாறு ரச்சின் ரவீந்திரா கூறினார்.
