இந்தியாவில் பாராளுமன்ற தேர்தல் தேதிகள் அறிவிக்கப்பட்டுள்ளன. 7 கட்டமாக நடைபெறும் தேர்தல் ஏப்ரல் 19-ம் தேதி தொடங்குகிறது. பாராளுமன்ற தேர்தலில் போட்டியிடும் வேட்பாளர்களின் பட்டியலை காங்கிரஸ் கட்சி வெளியிட்டு வருகிறது.
அதன் படி காங்கிரஸ் கட்சியின் ராகுல் காந்தி மீண்டும் வயநாடு தொகுதியில் போட்டியிடுகிறார். திருவனந்தபுரம் தொகுதியில் சசிதரூர் போட்டியிடுகிறார்.
இந்த வரிசையில் புகழ்பெற்ற நடிகர் சிவராஜ் குமாரின் மனைவி கீதா சிவராஜ் குமார் காங்கிரஸ் வேட்பாளராக அறிவிக்கப்பட்டு இருக்கிறார். இவர் பாராளுமன்ற தேர்தலில் கர்நாடகாவின் ஷிமோகா தொகுதியில் காங்கிரஸ் வேட்பாளராக போட்டியிடுவார் என்று அறிவிக்கப்பட்டுள்ளார். இவர் மறைந்த முன்னாள் முதல்வர் பங்காரப்பாவின் மகள் என்பது குறிப்பிடத்தக்கது.
இந்நிலையில், ஷிவமொகா காங்கிரஸ் வேட்பாளர் கீதா சிவராஜ் குமார், பத்ராவதியில் பிரசாரத்தை துவங்கியுள்ளார். திறந்த வேனில் பத்ராவதி டவுன், கரேஹள்ளி கிராமத்தில் ஊர்வலமாக வந்து, ஓட்டு சேகரித்தார். அவருடன் சிவராஜ்குமார், பத்ராவதி காங்கிரஸ் எம்.எல்.ஏ., சங்கமேஸ்வர் இருந்தனர்.
இதற்கிடையில், மக்களவை தேர்தல் முடியும்வரை கன்னட நடிகர் சிவராஜ் குமாரின் படங்களுக்கு தடை விதிக்குமாறு தேர்தல் ஆணையத்திடம் பாஜக கோரிக்கை விடுத்துள்ளது.
அந்த புகாரில், அவர் நடித்த திரைப்படங்கள், விளம்பரங்கள் காட்டுவதைத் தவிர்க்க திரையரங்குகள், தொலைக்காட்சி சேனல்கள், சமூக ஊடக தளங்களுக்கு உத்தரவு பிறப்பித்து உடனடியாக நடவடிக்கை எடுக்க வேண்டும் என்று கோரப்பட்டுள்ளது.
