சேலம்:
சேலம் மாவட்டத்தில் கடந்த சில நாட்களாக மழை பெய்து வருகிறது. அதன் தொடர்ச்சியாக நேற்றிரவு சேலம் மாநகர் மற்றும் புறநகர் பகுதி பகுதிகளில் பல்வேறு பகுதிகளில் கன மழை பெய்தது.
கன மழை
சேலம் மாநகரில் அஸ்தம்பட்டி, அம்மாப்பேட்டை, ஜங்சன், கொண்டலாம்பட்டி உள்பட பல பகுதிகளில் நேற்றிரவு கன மழை கொட்டியது. சுமார் 2 மணி நேரத்திற்கும் மேல் பெய்த இந்த கன மழையால் சாலைகளில் தண்ணீர் பெருக்கெடுத்து ஓடியது.
அம்மாப்பேட்டை, பெரமனூர், கிச்சிப்பாளையம் நாராயணநகர், பச்சப்பட்டி, தாதகாப்பட்டி உள்பட பல பகுதிகளில் சாலைகளில் பெருக்கெடுத்து ஒடிய தண்ணீர் தாழ்வான பகுதிகளில் உள்ள வீடுகளுக்குள் புகுந்தது . இதனால் அந்த வீடுகளில் வசிப்போர் தூங்க முடியாமல் தவித்தனர். பின்னர் பாத்திரங்களில் எடுத்து தண்ணீரை வெளிறேற்றினர்.
சேலம் புறநகர்
இதே போல சேலம் மாவட்டத்தின் புறநகர் பகுதிகளான மேட்டூர், எடப்பாடி, சங்ககிரி ஆகிய பகுதிகளிலும் கன மழை பெய்தது . இந்த மழையால் தாழ்வான பகுதிகள் மற்றும் வயல்வெளிகளில் தண்ணீர் தேங்கியது. சேலம் மாவட்டத்தில் பெய்து வரும் தொடர் மழையால் ஏரி, குளங்களுக்கு நீர்வரத்து அதிகரித்து நிலத்தடி நீர்மட்டமும் உயர்ந்துள்ளது. இதனால் விவசாயிகள் மகிழ்ச்சி அடைந்துள்ளனர்.
250.6 மி.மீ. மழை
மாவட்டத்தில் அதிக பட்சமாக மேட்டூரில் 80.6 மி.மீ. மழை பெய்துள்ளது. சேலம் 61.8, எடப்பாடி 26, சங்ககிரி 24, கரிய கோவில் 19, ஓமலூர் 15, தம்மம்பட்டி 10, பெத்தநாயக்கன்பாளையம் 6, ஏற்காடு 4.2, வீரகனூர் 4 மி.மீ. என மாவட்டம் முழுவதும் 250.60 மி.மீ. மழை பெய்துள்ளது. இன்று காலையும வானம் மேக மூட்டத்துடன் காட்சி அளித்தது.
