தமிழகம், ஆந்திரா, கர்நாடகா, ஒடிசாவில் நடிகை குஷ்பு பிரசாரம்

சென்னை:

காங்கிரஸ் கட்சியின் நட்சத்திர பேச்சாளரான நடிகை குஷ்பு தமிழகம், கர்நாடகா, ஆந்திரா, ஒடிசா மாநிலங்களில் பிரசாரத்தில் ஈடுபடுகிறார்.

கட்சி மேலிடம் அவரது பிரசார திட்டத்தை வகுத்துள்ளது. அதன்படி 6-ந் தேதி (சனிக்கிழமை) அவர் தேனியில் பிரசாரத்தை தொடங்குகிறார்.

அங்கு காங்கிரஸ் சார்பில் போட்டியிடும் ஈ.வி.கே.எஸ்.இளங்கோவனை ஆதரித்து பிரசாரம் செய்கிறார்.

மறுநாள் (7-ந்தேதி) கன்னியாகுமரி செல்கிறார். அங்கு காங்கிரஸ் வேட்பாளர் எச்.வசந்தகுமாருக்கு ஆதரவாக பிரசாரம் செய்கிறார். அதன் பிறகு ஆந்திரா, கர்நாடகா மாநிலங்களுக்கு பிரசாரம் செய்ய செல்கிறார்.

மீண்டும் தமிழ்நாட்டுக்கு வரும் அவர் ஆரணி, திருவள்ளூர் உள்பட மற்ற தொகுதிகளில் பிரசாரம் செய்கிறார். பின்னர் ஒடிசா மாநிலத்திலும் காங்கிரசுக்கு ஆதரவாக பிரசாரம் செய்கிறார்.

முதற்கட்ட தேர்தல் பிரசாரம் ஓயும் நாளான 16-ந்தேதி வரை தொடர்ந்து அவர் பிரசாரத்தில் ஈடுபடுகிறார். #Loksabhaelections2019 #Congress #Kushboo