புதுக்கோட்டை

அறந்தாங்கி:

அறந்தாங்கியை அடுத்த சூரக்குடி, மொட்டையாண்டி, சங்கனாத்தி உள்ளிட்ட பகுதிகளில் வெறிநாய் கடித்ததில் சில ஆடுகள் உயிரிழந்ததாக அறந்தாங்கி கால்நடை பராமரிப்பு துறைக்கு தகவல் வந்தது.

தகவலின்பேரில் அறந்தாங்கி கால்நடை பராமரிப்புத்துறை உதவி இயக்குனர் டாக்டர் செல்வராஜ் தலைமையில், கால்நடை மருத்துவர்கள் சதீஸ்குமார், நிமலேசன், முருகராஜ் மற்றும் கால்நடை உதவியாளர்கள் அடங்கிய குழுவினர் சூரக்குடி உள்ளிட்ட பகுதிகளுக்கு சென்று ஆய்வு செய்தனர்.

பின்னர் வெறிநாய் கடித்த ஆடுகளுக்கு தடுப்பூசி போட்டனர். மேலும் அப்பகுதியில் உள்ள ஆடுகளை பரிசோதனை செய்தனர். ஆய்வின் போது பஞ்சாத்தி ஊராட்சிமன்றத் தலைவர் பாஸ்கரன் உள்ளிட்ட பலர் உடன் இருந்தனர்.

திருமயம்:

புதுக்கோட்டை மாவட்டம் திருமயம் அருகே உள்ள துளையானூர் கிராமத்தை சேர்ந்தவர் பழனியப்பன். இவரது மகள் பிரியங்கா (வயது17). பி.அழகாபுரியில் உள்ள பள்ளியில் 12ம் வகுப்பு படித்து வந்தார்.

நேற்று முன்தினம் பள்ளிக்கு சென்ற போது பழந்தினாம்பட்டியை சேர்ந்த மாதவன் என்பவர் அவரது  நண்பர்களான  காட்டுபாவாபள்ளிவாசலை சேர்ந்த சின்னக்கருப்பன், தேத்தாம்பட்டியை சேர்ந்த அஜீத்குமார் ஆகியோருடன் சேர்ந்து பிரியங்காவை காரில் கடத்தி சென்றார்.

கார் சிவகங்கை மாவட்டம் நேமத்தான்பட்டி அருகே சென்ற போது  போலீஸ் சோதனைச்சாவடியில், போலீசாரை கண்டதும் பிரியங்காவை காரில் இருந்து கீழே தள்ளி விட்டு 3 பேரும் தப்பி சென்று விட்டனர். பின்னர் பிரியங்கா வீட்டுக்கு வந்து நடந்த விவரத்தை கூறினார்.

இது குறித்து திருமயம் போலீஸ் நிலையத்தில் பிரியங்காவின் தாயார் லட்சுமி புகார் செய்தார். அதன் பேரில் திருமயம் போலீசார் , மாதவன்  மற்றும் அவரது நண்பர்கள் உட்பட 3 பேர் மீது வழக்கு பதிவு செய்து தேடி வந்தனர்.

இந்நிலையில்  காட்டு பாவாபள்ளிவாசல் பேருந்து நிறுத்தத்தில் நின்று கொண்டிருந்த 3 பேரையும் திருமயம் போலீசார் கைது செய்தனர். மேலும் கடத்தலுக்கு பயன்படுத்திய காரையும் பறிமுதல் செய்தனர். அவர்கள் எதற்காக பிரியங்காவை கடத்தினர் என்று போலீசார் விசாரணை நடத்தி வருகின்றனர்.

திருமயம்:

புதுக்கோட்டை மாவட்டம் திருமயம் அருகே உள்ள துளையானூர் கிராமத்தை சேர்ந்தவர் பழனியப்பன். இவரது மகள் பிரியங்கா. இவர் அங்குள்ள பள்ளியில் பிளஸ்–2 படித்து வந்தார்.சம்பவத்தன்று பள்ளிக்கு சென்ற போது பழந்தினாம்பட்டியை சேர்ந்த மாதவன் என்பவர் தனது 4 நண்பர்களுடன் சேர்ந்து பிரியங்காவை காரில் கடத்தி சென்று விட்டார்.

கார் சிவகங்கை மாவட்டம் நேமத்தான்பட்டி போலீஸ் சோதனைச்சாவடி அருகே செல்லும் போது, போலீசாரை கண்டதும் பிரியங்காவை காரில் இருந்து கீழே தள்ளி விட்டு தப்பி சென்று விட்டனர் .

இது குறித்து திருமயம் போலீஸ் நிலையத்தில் புகார் செய்யப்பட்டது. அதன்பேரில் போலீசார் விசாரணை நடத்தி கடத்தலில் ஈடுபட்ட 5 பேரையும் தேடி வருகின்றனர்.

திருமயம்:

புதுக்கோட்டை மாவட்டம் திருமயத்தில் டெங்கு தடுப்பு விழிப்புணர்வு பேரணி நடைபெற்றது.பேரணியில் திருமயம் அரசு பெண்கள் மேல்நிலைப்பள்ளி மாணவிகள் சுகாதாரத்துறை அதிகாரிகள் மற்றும் பொதுமக்கள் என சுமார் 100 க்கும் மேற்பட்டோர் கலந்து கொண்டனர்.பேரணியை வட்டார சுகாதாரத்துறை அதிகாரி தொடங்கி வைத்தார்.

பேரணி அரசு மேல் நிலைப்பள்ளியில் துவங்கி பேருந்து நிலையம்,கடைவீதி என முக்கிய சாலைகளின் வழியாக வரை சென்றது.பேரணியில் உங்கள் வீட்டை சுற்றி தண்ணீர் தரை தொட்டி, பூந்தொட்டி, டயர் மற்றும் உபயோகமற்ற பிளாஸ்டிக்பொருட்கள், கொட்டாங்குச்சி, உரல் , ஆட்டுக்கல் போன்றவற்றில் தண்ணீர் தேங்காமல் அப்புறப்படுத்தவேண்டும் , பிடித்து வைத்த தண்ணீரை மூன்று தினங்களுக்கு மேல் பயன்படுத்தக் கூடாது. வீட்டை சுற்றி தண்ணீர் தேங்காமல் வடிகால் அமைக்க வேண்டும்,

காய்ச்சல் மற்றும் அறிகுறிகள் தென்பட்டால் அருகில் உள்ள ஆரம்ப சுகாதார நிலையத்திற்கு செல்ல வேண்டும் என்று வீதிகளில்  கோ‌ஷங்களையிட்டு முக்கிய சாலைகளின் வழியாக மக்களுக்கு விழிப்புணர்வு ஏற்படும் வகையில் பேரணியாக சென்றனர்.

கீரனூர்:

கீரனூர் அடுத்துள்ள கிள்ளுக்குளவாய்பட்டி ஒன்றிய தொடக்கப் பள்ளியில் மாணவர்களுக்கு விலையில்லா காலணிகள் வழங்கப்பட்டது. நிகழ்ச்சிக்கு பள்ளி தலைமை ஆசிரியர் ஆரோக்கியதாஸ் தலைமை வகித்தார். உதவி ஆசிரியர் நாராயணன் முன்னிலை வகித்தார். பள்ளி மேலாண்மைகுழு தலைவரும், பஞ்சாயத்து தலைவருமான ஆனந்தி பழனிச்சாமி சிறப்புரை ஆற்றி மாணவர்களுக்கு விலையில்லா காலணிகளை வழங்கினார்.

நிகழ்ச்சியில் கவுன்சிலர் ரவிச்சந்திரன், சுரேஷ்குமார், செல்வராஜ், சக்தி மற்றும் சத்துணவு பணியாளர்கள் ஆசைத்தம்பி, முனியம்மாள், கிராம கல்வி குழு உறுப்பினர்கள், பள்ளி மேலாண்மை குழு உறுப்பினர்கள் மற்றும் பெற்றோர் கலந்து கொண்டனர்.முடிவில் உதவி ஆசிரியர் நாராயணன் நன்றி கூறினார்.