நீலகிரி

குன்னூர்:

நீலகிரி மாவட்டம் குன்னூர் உமரி காட்டேஜ் பகுதியை சேர்ந்தவர் 16 வயது மாணவி. இவர் குன்னூரில் உள்ள தனியார் மகளிர் மேல்நிலைப்பள்ளியில் பிளஸ்2 படித்து வருகிறார்.

இவர் தினமும் தனது வீட்டில் இருந்து தோழிகளுடன் பள்ளிக்கு நடந்து செல்வது வழக்கம். இன்று காலையும் மாணவி வழக்கம்போல் வீட்டில் இருந்து புறப்பட்டு தனது தோழிகளுடன் பேசிக்கொண்டே பள்ளிக்கு வந்து கொண்டிருந்தார்.

பள்ளி அருகே வந்த போது வாலிபர் ஒருவர் அங்கு வந்தார். அவர் மாணவியை வழிமறித்து, நான் உன்னை காதலிக்கிறேன். நீயும் என்னை காதலிக்க வேண்டும் என கூறினார். ஆனால் மாணவி அதற்கு மறுப்பு தெரிவித்தார்.

இதனால் அவர்களுக்கு இடையே வாக்குவாதம் ஏற்பட்டது. வாக்குவாதம் முற்றவே ஆத்திரம் அடைந்த வாலிபர் தான் மறைத்து வைத்திருந்த கத்தியை எடுத்து மாணவியின் கழுத்தை அறுத்தார். மேலும் ஆத்திரம் தீராத அவர் மாணவியின் தோல், வயிறு, தலை, நெஞ்சு உள்ளிட்ட பகுதிகளிலும் கத்தியால் சரமாரியாக குத்தினார்.

இதில் பலத்த காயம் அடைந்த மாணவி ரத்த வெள்ளத்தில் சரிந்து கீழே விழுந்தார். இதனை மாணவியுடன் வந்த சக மாணவிகள் பார்த்து அலறினர். மாணவிகள் அலறிய சத்தம் கேட்டு அப்பகுதியை சேர்ந்த பொதுமக்கள் ஓடி வந்தனர்.

பின்னர் படுகாயங்களுடன் உயிருக்கு போராடிய மாணவியை மீட்டு குன்னூர் லாலி அரசு ஆஸ்பத்திரிக்கு அனுப்பி வைத்தனர். அங்கு மாணவிக்கு தீவிர சிகிச்சை அளிக்கப்பட்டு வருகிறது.

இதற்கி்டையே மாணவியை கத்தியால் குத்திய வாலிபரை சுற்றி வளைத்து பிடிக்க முயன்றனர்.

அப்போது வாலிபர் தான் கையில் வைத்திருந்த கத்தியை காட்டி மக்களை மிரட்டினார். மக்கள் சுதாரித்து கொண்டு வாலிபரின் கையில் இருந்த கத்தியை தட்டி விட்டு, அவரை சுற்றி வளைத்து பிடித்தனர்.

வாலிபரை சரமாரியாக தாக்கிய பொதுமக்கள் அவரை குன்னூர் போலீஸ் நிலையத்தில் ஒப்படைத்தனர். அந்த வாலிபரிடம் கஞ்சா, மதுபாட்டில்கள் உள்ளிட்டவையும் இருந்தது. இதையடுத்து போலீசார் வாலிபரிடம் இருந்து கஞ்சா, மதுபாட்டில்கள், கத்தி உள்ளிட்டவற்றை பறிமுதல் செய்தனர்.

தொடர்ந்து இந்த சம்பவம் குறித்து வழக்குப்பதிவு செய்து விசாரணை நடத்தினர்.

விசாரணையில், மாணவியை கத்தியால் குத்தியது குன்னூரை சேர்ந்த ஆசிக்(26) என்பது தெரியவந்தது. இவர் மாணவியை ஒரு தலையாக காதலித்து வந்துள்ளார். ஆனால் மாணவி, வாலிபரின் காதலை ஏற்கவில்லை.

இருப்பினும் தினமும் மாணவி பள்ளிக்கு வரும் போதும், பள்ளி முடிந்து வீட்டிற்கு வரும் போதும் ஆசிக் பின் தொடர்ந்து செல்வதையும், காதலிக்குமாறு வற்புறுத்துவதையும் வழக்கமாக வைத்துள்ளார். அதேபோல் தான் இன்று பள்ளிக்கு வந்த மாணவியை மறித்து தன்னை காதலிக்குமாறு கூறியுள்ளார்.

ஆனால் மாணவி அதற்கு மறுப்பு தெரிவிக்கவே ஆத்திரம் அடைந்து கத்தியால் குத்தியதும் தெரியவந்தது.

இதையடுத்து போலீசார் அந்த வாலிபரிடம் தொடர்ந்து விசாணை நடத்தி வருகிறார்கள்.

ஊட்டி:

நீலகிரி மாவட்டத்தில் செயல்பட்டு வரும் டாஸ்மாக் மதுபான சில்லறை விற்பனைக் கடைகளில், மதுபானங்களை வாங்கி பயன்படுத்திவிட்டு, காலி மதுபான பாட்டில்களை சாலையோரங்களிலும், வனப்பகுதியிலும், விளைநிலங்களிலும் வீசி செல்கின்றனா்.

வனப்பகுதிகளில் வீசப்படும் காலி மதுபாட்டில்களால் வன உயிரினங்களுக்கும், பொது இடங்களில் வீசப்படும் காலி மதுபாட்டில்களால் சுற்றுபுறமும் மாசுப்பட்டு நோய் தொற்று ஏற்பட காரணமாகிறது.

இதனைத் தடுக்கும் பொருட்டு நீலகிரி மாவட்டத்தில் காலி மதுபாட்டில்களை சேகரிக்கும் மையம் மாவட்ட நிா்வாகத்தால் முதற்கட்டமாக தொடங்கப்பட்டுள்ளது.

ஊட்டியில் தலைக்குந்தா பஸ் நிலையம் மற்றும் பாதுகாக்கப்பட்ட வனப்பகுதி அருகிலும், ஊட்டி நகர சுகாதார மையம் அருகிலும், கோத்தகிரி மேட்டுப்பாளையம் சாலையில் டானிங்டன் பகுதியிலும், கோத்தகிரியில் கட்டபெட்டு சந்திப்பு பகுதியிலும், பைக்காரா பஸ் நிலையம் மற்றும் பாதுகாக்கப்பட்ட வனப்பகுதி அருகிலும் அமைக்கப்பட்டுள்ளது.

இதேபோல் குந்தா பிக்கட்டி கடைவீதியில் பாதுகாக்கப்பட்ட வனப்பகுதி அருகிலும், குன்னூரில் வண்டிசோலையில் பாரஸ்ட்டேல் சாலை பகுதியிலும், கூடலூா் நகரில் சில்வா் கிளவுட் அருகிலும், பந்தலூரில் தாளூா் சோதனைச்சாவடி அருகிலும் அமைக்கப்பட்டுள்ளது.

எனவே, பொதுமக்களும், சுற்றுலா பயணிகளும் மாவட்ட நிா்வாகத்தால் தொடங்கப்பட்டுள்ள காலி மதுபாட்டிலுக்கான சேகரிக்கும் மையத்தில் காலி மது பாட்டில்களை ஒப்படைத்து, நீலகிரி மாவட்டத்தின் வனப்பகுதியையும், விளைநிலங்களையும், சுற்றுப்புறத்தையும் பாதுகாக்க ஒத்துழைப்பு வழங்க வேண்டும் என நீலகிரி மாவட்ட நிா்வாகத்தின் சாா்பில் கோரிக்கை விடுக்கப்பட்டுள்ளது.