நீலகிரி

ஊட்டி:

நீலகிரி மாவட்டத்தில் கடந்த சில தினங்களாக மழை பெய்து வருகிறது. நேற்றும் மழையும் பெய்தது. இந்த கனமழை காரணமாக கடும் மேகமூட்டமும் காணப்படுகிறது.

இதன் காரணமாக வாகன ஓட்டிகள் மிகவும் அவதியடைந்து வருகின்றனர். மழையால் பல இடங்களில் காய்கறி பயிர்கள் அழுகக்கூடிய சூழ்நிலை ஏற்பட்டுள்ளது.

நீலகிரி மாவட்டம் ஊட்டி தாவரவியல் பூங்காவில் நாளை மறுநாள் மலர் கண்காட்சி நடைபெற உள்ளது. இந்த கண்காட்சியை முதல்-அமைச்சர் மு.க.ஸ்டாலின் தொடங்கி வைக்கிறார்.

மலர் கண்காட்சிக்காக கடந்த ஒரு மாத காலமாகவே பல வண்ண மலர்களை தாவரவியல் பூங்காவில் உள்ள மலர் மாடங்களில் அடுக்கி வைக்கப்பட்டிருந்தது. இது அங்கு வந்திருந்த சுற்றுலா பயணிகளை கவர்ந்திழுத்தது.

இந்த நிலையில் கடந்த சில தினங்களாக பெய்து வரும் மழையால் பல வண்ண மலர்களும் மழையில் நனைகின்றன. மலர்கள் மழையில் நனையாமல் இருக்க தோட்டக்கலைத்துறை பல்வேறு நடவடிக்கைகள் எடுத்து வருகிறது.

அதன் ஒரு பகுதியாக பூங்காவில் கண்காட்சிக்காக அடுக்கி வைக்கப்பட்டுள்ள பல வண்ண மலர்களையும் பாலித்தீன் கவர்களை கொண்டு போர்த்தி பாதுகாத்து வருகிறார்கள். இந்த பணியில் பூங்கா ஊழியர்கள் ஈடுபட்டுள்ளனர்.

ஊட்டியில் நடக்கும் மலர் கண்காட்சிக்காக பல்வேறு வண்ண மலர்கள் தயார் நிலையில் உள்ளன. இந்த கண்காட்சியை காண தமிழகம் மட்டுமின்றி, இந்தியா முழுவதும் இருந்தும், வெளிநாடுகளில் இருந்தும் சுற்றுலா பயணிகள் வருவார்கள். சுற்றுலா பயணிகளை கவரும் வகையில் பல வண்ண மலர்களை தயார் நிலையில் வைத்துள்ளோம்.

தற்போது ஊட்டியில் மழை பெய்து வருவதால் மலர் கண்காட்சிக்கு தயாரான மலர்களை பாலித்தீன் கவர்களை கொண்டு மூடி பாதுகாத்து வருகிறோம்.

இவ்வாறு அவர்கள் கூறினர்.

ஊட்டி:

தமிழகப் பகுதிகளில் நிலவும் வளிமண்டல கீழ் அடுக்கு சுழற்சியாலும், வெப்பச்சலனம் காரணமாகவும் கடந்த சில நாட்களாக நீலகிரி மாவட்டத்தில் பல்வேறு இடங்களில் பரவலாக மழை பெய்து வருகிறது.

நேற்றும் நீலகிரி மாவட்டத்தில் காலை முதல் நள்ளிரவு வரை, ஊட்டி நகரம், தலைக்குந்தா, லவ்டேல், பிங்கா் போஸ்ட் உள்ளிட்ட இடங்களிலும், புறநகா் பகுதிகளிலும் 2 மணி நேரத்திற்கும் மேலாக பலத்த மழை கொட்டி தீர்த்தது.

இந்த மழை காரணமாக தாழ்வான பகுதிகளில் தண்ணீர் தேங்கியது. இதனால் சாலையோரம் நடந்து செல்லும் மக்கள் பாதிப்படைந்தனர். மேலும் ஊட்டி பஸ் நிலைய சாலை, குன்னூர் சாலை உள்பட அனைத்து முக்கிய சாலைகளிலும் வெள்ளம் பெருக்கெடுத்து ஓடியது. சாலைகளில் சென்ற வாகனங்கள் தண்ணீரை பீய்ச்சி அடித்தபடி சென்றன.

2 மணி நேரத்திற்கும் மேலாக கொட்டி தீர்த்த மழையால், சுற்றுலா தலங்களில் குவிந்திருந்த சுற்றுலா பயணிகள் தாங்கள் தங்கியிருந்த விடுதிகளை நோக்கி படையெடுத்தனர்.

கூடலூர் மற்றும் சுற்றுவட்டார பகுதிகளில் நேற்று காலை வானம் மேகமூட்டத்துடன் காணப்பட்டது. இருப்பினும் அடிக்கடி மிதமான வெயில் நிலவியது.

மதியத்திற்கு பிறகு பலத்த மழை கொட்டியது. சுமார் 2 மணி நேரம் நீடித்த மழையால் சாலைகளில் மழைநீர் பெருக்கெடுத்து ஓடியது. மழையுடன் கருமேகங்களும் சூழ்ந்திருந்ததால், அந்த பகுதியே இருளாக காட்சியளித்தது. இதனால் வாகன ஓட்டிகள் வாகனங்களின் முகப்பு விளக்குகளை எரியவிட்டபடியே சென்றனர்.

தொடர் மழையால் கூடலூர் மற்றும் சுற்றுப்புற பகுதிகளில் உள்ள கால்வாய்களிலும் தண்ணீர் வரத்து அதிகரித்து காணப்பட்டது. இதேபோல், பொன்னானி, சோலாடி ஆறுகளிலும், நீரோடைகளில் தண்ணீர் வரத்து அதிகரித்து காணப்பட்டது.

இந்த மழைக்கு கூடலூர் தோட்டமூலா பகுதியில் உள்ள சுமாா் 15 வீடுகளுக்குள் தண்ணீர் புகுந்தது. மேலும் அந்த பகுதியில் உள்ள குடியிருப்புகளை சுற்றி வெள்ளம் சூழந்திருந்தது. இதனால் அப்பகுதி மக்கள் மிகவும் அவதியடைந்தனர்.

முறையான வடிகால் வசதி இல்லாத காரணத்தாலேயே மழை வெள்ளம் சூழ்ந்ததாகவும், உடனடியாக நடவடிக்கை எடுக்கவும் வேண்டும் எனவும் அப்பகுதி மக்கள் கோரிக்கை விடுத்துள்ளனர்.

கூடலூரில் இருந்து கோத்தர் வயல் செல்லும் சாலையிலும் கால்வாயில் ஏற்பட்ட அடைப்பால் தண்ணீர் விவசாய நிலத்திற்குள் புகுந்தது.

பந்தலூர் மற்றும் மேங்கோ ரேஞ்ச், உப்பட்டி, பொன்னானி, கொளப்பள்ளி, அய்யன்கொல்லி, சேரம்பாடி, எருமாடு பகுதிகளிலும் பலத்த மழை பெய்தது. அந்த பகுதிகளில் சாலைகளில் உள்ள குழிகள் அனைத்தும் நிரம்பி குளம் போல காட்சியளித்தது. பலத்த காற்றுடன் மழை பெய்ததால் மின் கம்பிகள் மீது மரக்கிளைகள் விழுந்து, அடிக்கடி மின்தடையும் ஏற்பட்டது.

சேரம்பாடி அருகே உள்ள நெல்லி குன்னுவில் பெய்த மழைக்கு சாமிநாதன் என்பவரின் வீட்டின் பின்புறம் திடீரென மண்சரிவு ஏற்பட்டு வீட்டின் மீது விழுந்தது.

அந்த சமயம் வீட்டில் யாரும் இல்லாததால் பெரும் அசம்பாவிதம் தவிர்க்கப்பட்டது.

இன்று காலையும் மாவட்டம் முழுவதும் அவ்வப்போது சாரல் மழையும், கடுமையான குளிரும் நிலவி வருகிறது. தொடர்ந்து சாரல் மழையும், குளிரும் வாட்டி வதைத்து வருவதால் மக்களின் இயல்பு வாழ்க்கையில் பாதிப்பு ஏற்பட்டது.

கோத்தகிரி:

நீலகிரி மாவட்டத்தில் செயல்பட்டு வரும் டாஸ்மாக் மதுபான சில்லறை விற்பனைக் கடைகளில், மது பானங்களை வாங்கி பயன்படுத்திவிட்டு காலி மது பாட்டில்களை சாலையோரங்களிலும், வன பகுதியிலும், விளை நிலங்களிலும் சிலா் வீசி வருகின்றனா்.

வன பகுதிகளில் வீசப்படும் காலி மதுபாட்டில்களால் வன உயிரினங்களுக்கும், பொது இடங்களில் வீசப்படும் காலி மதுபாட்டில்களால் சுற்றுபுறமும் மாசுபட்டு நோய் தொற்று ஏற்பட காரணமாகிறது. இதனைத் தடுக்கும் பொருட்டு மாவட்டம் முழுவதும் 15 இடங்களில் காலி மதுபாட்டில்களை சேகரிக்கும் மையம் மாவட்ட நிர்வாகத்தால் அமைக்கப்பட்டுள்ளது.

முதல்கட்டமாக மதுபான உற்பத்தி நிறுவனங்கள் மூலம் நீலகிரி மாவட்டத்தில் உள்ள அனைத்து சாலையோரங்களில் காணப்படும் காலி மதுபாட்டில்களைச் சேகரித்து அகற்றும் பணி கடந்த 11-ந் தேதி முதல் தொடங்கப்பட்டு, செயல்படுத்தப்பட்டு வருகிறது.

மேலும் மதுபானங்களின் காலி பாட்டில்களை டாஸ்மாக் கடைகளில் மீண்டும் கொடுத்து, ரூ.10-தை வாடிக்கையாளா்கள் பெற்றுக்கொள்ளலாம் எனவும் தெரிவிக்கப்பட்டிருந்தது.

இதன் தொடா்ச்சியாக நீலகிரி மாவட்டத்தில் அமைந்துள்ள அனைத்து டாஸ்மாக் கடைகளிலும் நேற்று முதல் விற்பனை செய்யப்படும் அனைத்து மதுபான பாட்டில்களின் மேலும் டாஸ்மாக் நிறுவனத்தால் கூடுதலாக ரூ.10 பெறப்படும் என்ற ஸ்டிக்கா் ஒட்டப்பட்டு மதுபானங்கள் விற்பனை செய்யப்பட்டது.

மேலும் காலி மதுபாட்டில்களை சேகரிக்கும் திட்டமும் தொடங்கியது. இதற்கிடையே அனைத்து மதுபான சில்லறை விற்பனை கடைகளிலும் விற்பனை செய்யப்பட்டு வரும் அனைத்து மதுபான பாட்டில்கள் மீது டாஸ்மாக் நிறுவனத்தால் கூடுதலாக ரூ.10 வசூலிக்கப்படும் என்ற ஸ்டிக்கர் ஒட்டப்பட்டுள்ளதா என்பது குறித்து டாஸ்மாக் மாவட்ட மேலாளர் சேகர் மற்றும் அதிகாரிகள் ஆய்வு மேற்கொண்டனர்.

இது தொடர்பாக டாஸ்மாக் மாவட்ட மேலாளர் சேகர் கூறியதாவது:-

ஸ்டிக்கருடன் விற்பனை செய்யப்பட்ட மதுபானங்களின் காலி மதுபாட்டில்களை டாஸ்மாக் கடைகளில் மீண்டும் அளித்து ரூ.10 வாடிக்கையாளர்கள் பெற்றுக்கொள்ளலாம்.

எனவே பொதுமக்களும், சுற்றுலா பயணிகளும் காலி மதுபாட்டில்களை சேகரிக்கும் மையங்களில் ஒப்படைத்தோ அல்லது டாஸ்மாக் மதுபான சில்லரை விற்பனை கடைகளில் அளித்து ஒத்துழைப்பு வழங்க வேண்டும்.

இவ்வாறு அவர்கள் கூறினர்.