நாகப்பட்டினம்

சீர்காழி:

நாகை மாவட்டம் சீர்காழி அருகே உள்ள பூம்புகாரை சேர்ந்தவர் பழனி (35) மீனவர். இவர் நேற்று இரவு மோட்டார் சைக்கிளில் சென்று கொண்டிருந்தார்.

பல்லவனம் என்ற இடத்தில் ஆர்ச் சுவற்றில் மோட்டார் சைக்கிள் மோதியது. இதில் பழனியின் தலையில் பலத்த காயம் ஏற்பட்டது. அவர் சிகிச்சைக்காக மயிலாடுதுறை அரசு ஆஸ்பத்திரியில் அனுமதிக்கப்பட்டார். அங்கு சிகிச்சை பலன் இன்றி இறந்தார்.

இது குறித்து பூம்புகார் போலீசார் விசாரணை நடத்தி வருகிறார்கள்.

வேதாரண்யம்:

வேதாரண்யம் வ.உ.சி.நகரை சேர்ந்தவர் ராசி (வயது 86). இவர் சோமநாதர் கோயிலடியில் உள்ள கடையில் காய்கறி வாங்கி கொண்டு தனது வீட்டிற்கு நடந்து சென்றார். அப்போது அங்கு வந்த மோட்டார் சைக்கிள் மோதியது.

இதில் பலத்த காயமடைந்த ராசி வேதாரண்யம் அரசு மருத்துவமனையில் அனுமதிக்கப்பட்டு சிகிச்சை பெற்று வருகிறார்.

இதுபற்றி வேதாரண்யம் சப்-இன்ஸ்பெக்டர் ரெங்கநாதன் வழக்குபதிவு செய்து விசாரணை நடத்தி வருகிறார்.

வேதாரண்யம்:

வேதாரண்யத்தை அடுத்த அண்டர்காடு கிராமத்தைச் சேர்ந்த பக்கிரிசாமி மகன் ஞானமணி (வயது 30). இவர் உடல் நலம் பாதிக்கப்பட்டு இருந்தார். தஞ்சாவூரில் உள்ள மருத்துவரிடம் சிகிச்சை பெற்று மாத்திரைகள் சாப்பிட்டு வந்தார்.

இந்நிலையில் அவர் வாழ்க்கையில் வெறுப்படைந்து வி‌ஷம் குடித்துவிட்டார். அவரை உறவினர்கள் மீட்டு திருவாரூர் அரசு மருத்துக்கல்லூரி மருத்துவ மனையில் சேர்த்து சிகிச்சை அளித்தனர். அங்கு சிகிச்சை பலனின்றி அவர் பரிதாபமாக இறந்தார்.

இது குறித்து அவரது மனைவி மதுபாலா கொடுத்த புகாரின் பேரில் வேதாரண்யம் சப்-இன்ஸ் பெக்டர் ரெங்கநாதன் வழக்குபதிவு செய்து விசாரணை நடத்தி வருகிறார்.

தரங்கம்பாடி:

நாகை மாவட்டம், செம்பனார்கோவில் அருகே சேமங்கலம் கிராமத்தை சேர்ந்தவர் ராஜ்குமார் (வயது 36), விவசாயி. இவர், சேமங்கலம் அருகே 5 ஏக்கர் வயலை குத்தகைக்கு எடுத்து சாகுபடி செய்து இருந்தார். சம்பவத்தன்று வயலுக்கு சென்ற ராஜ்குமார், சாகுபடி செய்த நெற்பயிர்கள் தண்ணீர் இன்றி காய்ந்து கிடப்பதை பார்த்து மனம் உடைந்தார். அப்போது திடீரென அதிர்ச்சியில் மாரடைப்பு ஏற்பட்டு வயலில் மயங்கி விழுந்த ராஜ்குமார் சம்பவ இடத்திலேயே பரிதாபமாக இறந்தார்.

இந்த நிலையில் இறந்துபோன விவசாயி ராஜ்குமார் குடும்பத்திற்கு தமிழக அரசு இழப்பீட்டுத்தொகை வழங்காததாலும், அதிகாரிகள் முறையாக கணக்கெடுப்பு நடத்தாதையும் கண்டித்து சேமங்கலம் கிராமம் தெற்கு தெருவில் 90-க்கும் மேற்பட்ட குடும்பங்களை சேர்ந்தவர்கள் வீடுகளில் கருப்புக்கொடி ஏற்றி போராட்டம் நடத்தினர்.

இதுகுறித்து தகவல் அறிந்த சீர்காழி சமூக நலத்துறை தனி தாசில்தார் சண்முகம் மற்றும் அதிகாரிகள் சேமங்கலம் கிராமத்திற்கு சென்று போராட்டத்தில் ஈடுபட்ட பொதுமக்களிடம் பேச்சுவார்த்தை நடத்தினர். அப்போது பொதுமக்களின் கோரிக்கைகள் தொடர்பாக விரைவில் நடவடிக்கை எடுப்பதாக உறுதி அளிக்கப்பட்டது.

இதைத்தொடர்ந்து பொதுமக்கள் தங்கள் வீடுகளில் கட்டி இருந்த கருப்புக் கொடியை அகற்றினர். இதனால் அந்த பகுதியில் பரபரப்பு ஏற்பட்டது.

வேதாரண்யம்:

வேதாரண்யம் அருகே தென்னடார் கிழக்கு கிராமத்தை சேர்ந்தவர் சுப்பிரமணியன் இவருடைய மகள் லாவண்யா (வயது 20). வேதாரண்யத்தில் உள்ள அரசு கல்லூரியில் பி.பி.ஏ. 3-ம் ஆண்டு படித்து வருகிறார்.

அவரது கிராமத்தில் இருந்து கல்லூரிக்கு சென்றுவர முடியாததால் வேதாரண்யம் அருகே வடகட்டளை பகுதியில் உள்ள அவரது பாட்டி சரோஜா வீட்டில் தங்கியிருந்து கல்லூரிக்கு சென்று வந்தார்.

வழக்கம் போல் நேற்று மாலை லாவண்யா கல்லூரி முடிந்து வீட்டிற்கு வந்துள்ளார். அப்போது அதே பகுதியை சேர்ந்த சுப்பையன் மகன் விஜயன் என்பவர் வீட்டிற்குள் புகுந்து சரோஜாவை தாக்கி விட்டு பேத்தி லாவண்யாவை கடத்தி சென்று விட்டார்.

இதில் பலத்த காயமடைந்த சரோஜாவை அக்கம் பக்கத்தினர் மீட்டு வேதாரண்யம் அரசு ஆஸ்பத்திரியில் சிகிச்சைக்காக சேர்த்தனர்.

இது குறித்து சரோஜா வேதாரண்யம் போலீசில் புகார் செய்தார். சிறப்பு சப்-இன்ஸ்பெக்டர் பாண்டியன் வழக்கு பதிவு செய்து லாவண்யாவை கடத்தி சென்ற விஜயனை தேடி வருகின்றனர்.

இச்சம்பவம் அந்த பகுதியில் பரபரப்பை ஏற்படுத்தியுள்ளது.

வேதாரண்யம்:

நாகை மாவட்டம் வேதாரண்யம் அடுத்த கோடியக்கரையில் தற்போது மீன்பிடி சீசன் என்பதால் வெளிமாவட்டங்களில் இருந்து ஏராளமான மீனவர்கள் வந்து தங்கி மீன்பிடித்து வருகின்றனர்.

இந்நிலையில் கடல் பகுதியில் கடந்த 2 நாட்களாக கடல் சீற்றமாக காணப்படுகிறது. இதனால் கடலுக்கு மீன்பிடிக்க சென்ற மீனவர்கள் போதிய மீன்கள் கிடைக்காததாலும், கடல் சீற்றம் காரணமாகவும் கரைக்கு திரும்பி வருகின்றனர்.

இன்று காலை முதல் கோடியக்கரையில் கடற்பகுதியில் கடல் சீற்றத்துடன் இருந்தது. இதனால் வழக்கம்போல் காலை 11 மணிக்கு கடலுக்கு செல்ல தயாரான மீனவர்கள் அச்சத்துடன் படகுகளை கரையில் பாதுகாப்பாக நிறுத்திவிட்டு வீட்டுக்கு திரும்பினர்.

இதனால் சுமார் 350 விசைப்படகுகள் உள்பட பெரிய படகுகள் கரையில் நிறுத்தப்பட்டுள்ளன. மேலும் 2000 மீனவர்கள் மீன்பிடிக்க செல்லவில்லை.