காஞ்சிபுரம்

செங்கல்பட்டு:

செங்கல்பட்டு நகர விஜய் மக்கள் இயக்க இளைஞரணி தலைவர் பூக்கடை ஜின் விடுத்துள்ள அறிக்கையில், காஞ்சீபுரம் மாவட்டத்தில் விஜய் நடித்த தெறி படம் ஏராளமான தியேட்டர்களில் ரிலீஸ் செய்யப்படவில்லை.

இது ரசிகர்களுக்கு மிகுந்த ஏமாற்றத்தை அளித்துள்ளது. இந்த நிலையில் தற்போது காஞ்சீபுரம் மாவட்டத்தில் தெறி படத்தின் திருட்டு வி.சி.டி.க்கள் வெளியாகி விற்பனை செய்யப்பட்டு வருகிறது.

இது குறித்து கூடுதல் போலீஸ் சூப்பிரண்டு ஜோசப்பிடம் புகார் கொடுத்துள்ளதாக குறிப்பிட்டுள்ளார்.

திருப்போரூர்:

காயாரை அடுத்த பனங்காட்டுபாக்கம் கிராமத்தைச் சேர்ந்தவர் அருண்குமார் பா.ம.க ஒன்றிய தலைவர். இவருடைய நண்பர் கண்ணதாசன். இவருக்கும், மாம்பாக்கம் ஜோதி நகரைச்சேர்ந்த சந்துரு என்ற சங்கருக்கும் கடந்த சில நாட்களுக்கு முன்பு மோதல் ஏற்பட்டது.

இதுகுறித்து இருவரும் தாழம்பூர் போலீஸ் நிலையத்தில் புகார் செய்தனர். இதில் கண்ணதாசனுக்கு ஆதரவாக அருண்குமார் சமாதானம் பேசியுள்ளார்.

இதனால் ஆத்திரம் அடைந்த சங்கர், மற்றும் அவரது மகன் ஜெகதீப் ஆகியோர் நேற்று இரவு கொளத்தூர் பஸ் நிலையம் அருகே அருண்குமாரை வழிமறித்து தாக்கினர்.

இதில் பலத்த காயமடைந்த அருண்குமார் செங்கல்பட்டு அரசு மருத்துவமனையில் அனுமதிக்கப்பட்டு உள்ளார். இது குறித்த காயார் சப்–இன்ஸ்பெக்டர் சித்ரா தேவி வழக்குபதிவு செய்து சங்கர், அவரது மகன் ஜெகதீசை கைது செய்து விசாரணை நடத்தி வருகின்றார்.

காஞ்சீபுரம்:

காஞ்சீபுரம் தாலுக்கா போலீசார் செவிலிமேடு கூட்டுச் சாலைப் பகுதியில் ரோந்து பணியில் ஈடுபட்டனர். அப்போது மாட்டு வண்டியில் மணல் கடத்திய தாயார் குளம் பகுதியைச் சேர்ந்த ராஜா, பிள்ளையார் பாளையம் பகுதியைச் சேர்ந்த முனியாண்டி, குமரேசன், ராமசந்திரன், ஆகியோரை கைது செய்தனர்.

மேலும் மணல் கடத்தலுக்கு பயன்படுத்திய மாட்டு வண்டிகளும் பறிமுதல் செய்யப்பட்டது. இதே போல் கீழகதிர்பூர் பகுதியில் மணல் கடத்திய அதே பகுதியைச் சேர்ந்த பொன்னுரங்கம், வரதராஜ் ஆகியோரை பாலுச்செட்டிசத்திரம் போலீசார் கைது செய்தனர்.

தாம்பரம்:

பாரதீய ஜனதா சார்பில் தமிழகம் முழுவதும் ‘தாமரை வெல்லட்டும், தமிழகம் மலரட்டும்‘ என்ற தலைப்பில் 50 தேர்தல் பரப்புரை வாகனம் இன்று துவக்கி வைக்கப்படுகிறது.

இந்த வாகனங்களில் வீடியோ திரை பொருத்தப்பட்டுள்ளது. தாம்பரத்தில் உள்ள தனியார் பள்ளியில் நடந்த நிகழ்ச்சியில் 8 வாகனங்கள் துவக்கி வைக்கப்பட்டது.

பாரதீய ஜனதா கட்சியின் தமிழக மேலிட பொறுப்பாளர் முரளிதரராவ் கலந்து கொண்டு தேர்தல் பிரசார வாகனங்களை தொடங்கி வைத்தார். அவர் வேட்டி–சட்டை அணிந்து வந்திருந்தார். மத்திய மந்திரி பொன். ராதாகிருஷ்ணன், மாநில பா.ஜனதா தலைவர் தமிழிசை சவுந்தரராஜன் ஆகியோர் பங்கேற்றனர். அப்போது, தமிழிசை சவுந்தரராஜன் நிருபர்களிடம் கூறியதாவது:–

தமிழகம் முழுவதும் இன்று வீடியோ திரையுடன் கூடிய 50 தேர்தல் பரப்புரை வாகனம் துவக்கி வைக்கப்படுகிறது. இதில் ஆண்ட கட்சிகள், ஆளும் கட்சிகள் ஆகியவற்றின் ஊழல், மது பிரச்சினை போன்றவை வீடியோ மூலம் மக்களுக்கு விளக்கப்படும். மேலும் மத்திய அரசின் நல்ல திட்டங்கள் பற்றியும் வீடியோ மூலம் எடுத்துரைக்கப்படும்.

பா.ஜனதா ஆட்சி மலர்ந்தால் என்னென்ன திட்டங்கள் செய்யப்படும் என்பது பற்றியும், மக்களிடம் பிரசாரம் செய்யப்படும்.

தேசிய செயலாளர் அமித்ஷா நாளை திருச்சி வருகிறார். அங்கு நடக்கும் பொதுக்கூட்டத்தில் பா.ஜனதா கூட்டணி வேட்பாளர்களை அறிமுகப்படுத்துகிறார்.

தேர்தல் கமிஷன் மற்ற கட்சிகளிடம் கெடுபிடி காட்டுகிறது. ஆனால் ஆளும் கட்சிக்கு தனிவழிமுறையை கையாளுகிறது. தேர்தல் கமிஷன் பாரபட்சமாக நடக்கிறது.

விருத்தாசலத்தில் நடந்த முதல்–அமைச்சரின் தேர்தல் பிரசார கூட்டத்தில் 2 பேர் பலியானது வருத்தம் அளிக்கிறது. அவர்களது குடும்பங்களுக்கு எனது ஆழ்ந்த இரங்கலை தெரிவித்துக் கொள்கிறேன்.

இதுபோன்ற சம்பவம் இனிமேல் நடக்காமல் பார்த்துக் கொள்ள முதல் வரை கேட்டுக் கொள்கிறேன்.

இவ்வாறு அவர் கூறினார்.

நிகழ்ச்சியில் மாவட்ட செயலாளர் மோகன்ராஜா, தாம்பரம் தொகுதி பொறுப்பாளர் செம்பாக்கம் தேவசுப்பரமணியம் உள்பட பலர் கலந்து கொண்டனர்.

ஆலந்தூர்:

மடிப்பாக்கம் சீனிவாச நகரை சேர்ந்தவர் அரிதாஸ். இவர் கடந்த 2009 ஆண்டு வேளச்சேரி மெயின் ரோட்டில் மோட்டார் சைக்கிளில் சென்ற போது டிப்பர் லாரி மோதி பலியானார்.

விபத்து ஏற்படுத்திய லாரி டிரைவர் திரிசூலம் இந்திரா நகரை சேர்ந்த சாந்தகுமார் மீது போலீசார் வழக்குப்பதிவு செய்தனர். இந்த வழக்கு சைதாப்பேட்டை 4–வது நடுவர் நீதிமன்றத்தில் நடந்தது. விசாரணை முடிந்து நீதிபதி ஆபிரகாம்லிங்கன் தீர்ப்பளித்தார். அதில் விபத்து ஏற்படுத்திய டிரைவர் சாந்தகுமாருக்கு 2 ஆண்டு ஜெயில் தண்டனை விதித்து தீர்ப்பு கூறினார்.