காஞ்சிபுரம்

திருப்போரூர்:

கேளம்பாக்கத்தை அடுத்த தையூர், செங்கன்மால் பகுதியில் தனியார் நிறுவனம் ஒன்றின் அடுக்கு மாடி குடியிருப்பு கட்டுமானப் பணிகள் நடை பெற்று வருகின்றன.

இதில் மேற்கு வங்காள மாநிலத்தைச் சேர்ந்த முத்தாகர்ஷேக் (22) பெயின்டிங் வேலை செய்து வந்தார். அவர் 12-வது மாடியில் கிரில் கேட்டிற்கு பெயின்டிங் அடித்துக்கொண்டிருந்தார். அப்போது எதிர்பாராத விதமாக கீழே விழுந்து சம்பவ இடத்திலேயே இறந்து போனார்.

இது குறித்து கேளம்பாக்கம் இன்ஸ்பெக்டர் கோவிந்த ராஜ், சப்-இன்ஸ்பெக்டர் ஜோதி ஆகியோர் வழக்கு பதிவு செய்து விசாரணை நடத்தினர்.

விசாரணையில் சரியான பாதுகாப்பு வசதியின்றி தனியார் நிறுவனம் வேலை வழங்கியதால் 12-வது மாடியிலிருந்து தொழிலாளி கீழே விழுந்து இறந்தது தெரியவந்தது.

இதையடுத்து மேடவாக்கத்தைசேர்ந்த ஒப்பந்தக்காரர் சதாசிவம், மேனேஜர் ஜெயராமன், சூபர்வைசர் நரேஷ்குமார் ஆகிய 3 பேரையும் போலீசார் கைது செய்தனர்.

திருப்போரூர்:

திருப்போரூரை அடுத்த சிறுங்குன்றம் கிராமம் செல்லியம்மன்கோயில் தெருவில் வசித்து வருபவர் ராமு. இவருடைய மகள் பவித்ரா (17). திருப்போரூர் அரசு மகளிர் பள்ளியில் 11-ம் வகுப்பு படித்து வந்தார்.

கடந்த 9-ந்தேதி வீட்டில் இருந்த பவித்ராவை சரியாக படிக்கவில்லை என அவருடைய அக்காள் திட்டியதாக கூறப்படுகிறது.

இதில் மனமுடைந்த பவித்ரா வீட்டில் யாரும் இல்லாத போது தனது உடலில் மண்எண்ணெயை ஊற்றி தீ வைத்துக்கொண்டார்.

உடல் கருகிய அவரை அக்கம்பக்கத்தினர் மீட்டு மேல்சிகிச்சைக்காக கீழ்பாக்கம் அரசு மருத்துவமனையில் சேர்த்தனர். அங்கு சிகிச்சை பலனின்றி பவித்ரா பரிதாபமாக உயிரிழந்தார்.

இதுகுறித்து திருப்போரூர் இன்ஸ்பெக்டர் முத்துக் குமார், சப்-இன்ஸ்பெக்டர் ராஜேந்திரன் ஆகியோர் வழக்குபதிவு செய்து விசாரணை நடத்தி வருகின்றனர்.

ஆலந்தூர்:

தமிழக பா.ஜனதா தலைவர் தமிழிசை சவுந்தரராஜன் டெல்லி செல்லும் வழியில் சென்னை விமான நிலையத்தில் பேட்டி அளித்தார். அவர் கூறியதாவது:-

காவிரி பிரச்சினையில் பா.ஜனதா தேசிய தலைவர் அமித்ஷாவை சந்தித்து பேசுவதற்காக மத்திய மந்திரி பொன்.ராதாகிருஷ்ணன், இல.கணேசன், சி.பி.ராதா கிருஷ்ணன், எச்.ராஜா, நான் ஆகியோர் டெல்லி செல்கிறோம். தமிழகத்தில் நிலவும் காவிரி பிரச்சினை தொடர்பாக அவரிடம் விவாதிக்க உள்ளோம்.

காவிரி பிரச்சினையில் தமிழக பா.ஜனதா தொடர்ந்து விவசாயிகள் பக்கம் இருந்து வருகிறது. சுப்ரீம் கோர்ட்டு உத்தரவிட்ட பிறகும் கர்நாடக காங்கிரஸ் அரசு தமிழகத்துக்கு காவிரியில் தண்ணீர் திறந்து விட மறுக்கிறது. ஆனால் காவிரி பிரச்சினையில் மத்திய அரசையும், பிரதமரையும் குறை சொல்லி திசை திருப்புகின்றனர்.

விவசாயிகளுக்கு ஆதரவாக திருநாவுக்கரசர் போராட்டம் நடத்தப் போவதாக அறிவித்துள்ளார். மத்திய அரசையும் அவர் குறை கூறி இருக்கிறார்.

கடந்த 10 ஆண்டுகளாக மத்தியில் காங்கிரஸ் கட்சி தான் ஆட்சி நடத்தியது. அப்போது ஏன் அவர்கள் காவிரி பிரச்சினையை தீர்க்கவில்லை. காவிரி நீர் மேலாண்மை வாரியம் ஏன் அமைக்கவில்லை என்று திருநாவுக்கரசர் விளக்கம் சொல்ல வேண்டும்.

காவிரி நீர் மேலாண்மை வாரியம் அமைக்க வேண்டும் என்பதில் தமிழக பா.ஜனதா உறுதியாக உள்ளது.

முதல்-அமைச்சர் ஜெயலலிதா சிகிச்சை பெறும் அப்பல்லோ மருத்துவ மனைக்கு சென்று அவருக்கு அளிக்கப்படும் சிகிச்சைகள் பற்றி மருத்துவர்களிடம் கேட்டறிந்தேன். அவரது உடல்நிலையில் முன்னேற்றம் ஏற்பட்டுள்ளதாக தெரிவித்தனர். எனவே மாற்று முதல்-அமைச்சரோ அல்லது பொறுப்பு முதல்- அமைச்சரோ நியமிக்கப்பட தேவையில்லை.

இவ்வாறு அவர் கூறினார்.

தாம்பரம்:

குரோம்பேட்டை, ராதா நகர் நம்மாழ்வார் தெருவை சேர்ந்தவர் ராமநாதன். சாப்ட்வேர் என்ஜினீயர். சிறுசேரியில் உள்ள தனியார் நிறுவனத்தில் வேலை பார்த்து வருகிறார்.

நேற்று இரவு ராமநாதன் வீட்டை பூட்டிவிட்டு தனி அறையில் குடும்பத்துடன் தூங்கினார். நள்ளிரவில் வந்த மர்ம கும்பல் வீட்டின் கதவை உடைத்து புகுந்தனர்.

பின்னர் பீரோவை உடைத்த அதில் இருந்த ரூ.17 ஆயிரத்தை கொள்ளையடித்து சென்று விட்டனர்.

வீட்டிற்குள் கொள்ளையர்கள் புகுந்தது ராமநாதனுக்கு தெரியவில்லை. இன்று அதிகாலை எழுந்த போது தான் பணம் கொள்ளை போனது தெரிந்தது.

மறைத்து வைத்திருந்த 10 பவுன் நகையை கொள்ளை கும்பல் கவனிக்காததால் அவை தப்பியது.

வீட்டில் உரிமையாளர் இருக்கும் போதே கொள்ளையர்கள் புகுந்த சம்பவம் பரபரப்பை ஏற்படுத்தி உள்ளது. இதுகுறித்த சிட்லபாக்கம் போலீசார் வழக்கு பதிவு செய்து விசாரணை நடத்தி வருகிறார்கள்.