கடலூர்

ஸ்ரீமுஷ்ணம்:

சோழத்தரம் அருகே கொண்டசமுத்திரம் நொச்சிக்காடு பகுதி சுடுகாடு நிலம் ஆக்கிரமிக்கப்பட்டுள்ளது. மேலும் வனத்துறைக்கு சொந்தமான இடத்தை விளை நிலங்களாகவும் பயன்படுத்தி வருகின்றனர்.

இவர்கள் மீது நட வடிக்கை எடுக்கக் கோரியும், அந்த பகுதியில் உள்ள லிங்கப்பன் ஏரியை தூர்வாரக்கோரியும் சம்பந்தப்பட்ட துறை அதிகாரிகளிடம் அந்த பகுதி பொதுமக்கள் பலமுறை மனு கொடுத்தனர்.

ஆனால், அதிகாரிகள் பொதுமக்களின் கோரிக்கை மனு சம்பந்தமாக இதுவரை எந்தவித நடவடிக்கையும் எடுக்கப்படவில்லை.

இதை கண்டித்து பொதுமக்கள் சாலை மறியல் போராட்டம் நடத்தப்போவதாக அறிவித்திருந்தனர். அதன்படி இன்று காலை கொண்டசமுத்திரம் நான்கு முனை சாலையில் பஸ்சை வழிமறித்து சாலை மறியலில் ஈடுபட்டனர்.

தகவல் அறிந்த ஸ்ரீமுஷ்ணம் இன்ஸ்பெக்டர் செல்வம் தலைமையிலான போலீசார் சம்பவ இடத்துக்கு விரைந்து வந்து மறியலில் ஈடுபட்ட பொதுமக்களிடம் சமரச பேச்சுவார்த்தை நடத்தினர்.

ஆனால், பொதுமக்கள் நாங்கள் பலமுறை கோரிக்கை மனு கொடுத்தும் இந்த பிரச்சினைக்கு தீர்வு கிடைக்கவில்லை. எனவே, சம்பந்தப்பட்ட அதிகாரிகள் இங்கு வந்து பேச்சுவார்த்தை நடத்தினால்தான் கலைந்து செல்வோம் என்று கூறி தொடர்ந்து போராட்டத்தில் ஈடுபட்டனர்.

சமரச பேச்சுவார்த்தையை தொடர்ந்து 9.55 மணி அளவில் போராட்டம் வாபஸ் ஆனது.

இதனால் அந்த பகுதியில் போக்குவரத்து பாதிக்கப்பட்டது.

கடலூர்:

மாசி மகத்தை முன்னிட்டு கடலூரில் இன்று தீர்த்த வாரி நடைபெற்றது. இதையொட்டி கடலூர் மார்க்கெட் காலனியில் இருந்து சிறப்பு அலங்காரத்தில் உற்சவ மூர்த்திகள் அலங்கரிக்கப்பட்டு டிராக்டரில் எடுத்துச் செல்லப்பட்டது.

வண்ணாரப்பாளையம் பகுதியில் சென்று கொண்டிருந்த போது மேலே செல்லும் மின் கம்பியில் சாமிகளுக்கு செய்யப்பட்டிருந்த அலங்காரம் உரசுவது போல் இருந்தது.

இதனால் ஊர்வலத்தில் வந்தவர்கள் தாங்கள் வைத்திருந்த மரக்குச்சியால் மின் கம்பியை தூக்கினர். அப்போது மின் கம்பிகள் ஒன்றோடு ஒன்று உரசியதால் தீப்பொறி கிளம்பியது.

கண்ணிமைக்கும் நேரத்தில் மின் கம்பிகள் அறுந்து விழுந்தன. அதனைத் தொடர்ந்து அந்த பகுதியில் உள்ள டிரான்ஸ் பார்மர் வெடித்து சிதறியது.

இதனால் ஊர்வலத்தில் வந்த பொதுமக்கள் அலறியடித்து ஓடினர். அதிர்ஷ்டவசமாக மின் கம்பிகள் பக்தர்கள் இல்லாத இடத்தில் அறுந்து விழுந்தது. இதனால் பெரும் உயிர்ச்சேதம் தவிர்க்கப்பட்டது.

மின் கம்பி அறுந்து விழுந்த தகவல் அறிந்ததும் மின் ஊழியர்கள் சம்பவ இடத்துக்கு விரைந்து வந்தனர். அவர்கள், “ஏன் இப்படி பொறுப்பில்லாமல் நடந்து கொள்கிறீர்கள்? மின் வயர்கள் அறுந்து பக்தர்கள் மீது விழுந்திருந்தால் உயிர்ச்சேதம் ஏற்பட்டிருக்கும் அல்லவா?” என்று எச்சரித்தனர்.

அதற்கு பொதுமக்கள், “நீங்கள் மின் கம்பியை நல்ல முறையில் பராமரித் திருந்தால் இதுபோன்ற நடந்திருக்காது” என்று கூறினர். இதைத்தொடர்ந்து மின்வாரிய ஊழியர்களுக்கும், பொதுமக்களுக்கும் இடையே கடும் வாக்குவாதம் ஏற்பட்டது.

பாதுகாப்பு பணியில் இருந்த போலீசார் இருதரப் பினரையும் சமரசம் செய்து அனுப்பி வைத்தனர். மின் கம்பி அறுந்து விழுந்ததைத் தொடர்ந்து அந்த பகுதியில் நீண்ட தூரத்துக்கு சாமிகளை எடுத்து வந்த வாகனங்கள் நின்றதால் போக்குவரத்து பாதிக்கப்பட்டது.

கடலூர்:

கடலூர் துறைமுகத்தில் இருந்து 100-க்கும் மேற்பட்ட மீனவர்கள் பைபர் படகுகள் மற்றும் விசைப்படகுகள் மூலம் கடலுக்கு மீன் பிடிக்க சென்று வருகின்றனர்.

மீனவர்கள் மீன் பிடித்து விட்டு கடற்கரையில் அந்த படகுகளை நிறுத்தி விட்டு வீடு திரும்புவார்கள். படகுகளில் மீன்பிடிக்க பயன்படுத்தும் வலைகள் மற்றும் இரும்பு பொருட்களை வைத்து செல்வார்கள்.

இந்த நிலையில் கடந்த சில நாட்களாக படகுகளில் வைக்கப்பட்டிருந்த இரும்பு பொருட்கள் மற்றும் வலைபின்னுவதற்கு பயன்படுத்தும் ஈயம் போன்ற பொருட்கள் திருடு போனது.

இதுகுறித்து மீனவர்கள் கடலூர் துறைமுக போலீசாரிடம் புகார் தெரிவித்திருந்தனர். இன்று அதிகாலை மீனவர்கள் மீன்பிடித்துவிட்டு கரைதிரும்பியபோது 4 சிறுவர்கள் கரையில் நிறுத்திவைக்கப்பட்டிருந்த படகுகளில் உள்ள பொருட்களை திருடிக்கொண்டிருப்பதை பார்த்தனர்.

மீனவர்கள் வருவதை அறிந்த சிறுவர்கள் அங்கிருந்து தப்பிச்செல்ல முயன்றனர். மீனவர்கள் 4 சிறுவர்களையும் விரட்டி பிடித்து சரமாரியாக தாக்கினர்.

அப்போது 2 சிறுவர்கள் வைத்திருந்த சாக்குகளில் 50 கிலோ ஈயம் மற்றும் இரும்பு பொருட்கள் இருந்தன.

உடனே மீனவர்கள் கடலூர் துறைமுக போலீசாருக்கு தகவல் தெரிவித்தனர். போலீசார் சம்பவ இடத்துக்கு விரைந்து வந்து மீனவர்களிடம் சிறுவர்களை நீங்கள் ஏன் தாக்கினீர்கள் என்று கேட்டனர்.

இதனால் போலீசாருக்கும், மீனவர்களுக்கும் இடையே கடும் வாக்கு வாதம் ஏற்பட்டது. இதைத் தொடர்ந்து அங்கிருந்த பொதுமக்கள் அவர்களை சமாதனப்படுத்தினர்.

பின்னர் 4 சிறுவர்களையும் போலீசார் துறைமுக போலீஸ் நிலையத்துக்கு அழைத்து சென்று விசாரணை நடத்தினர்.

விசாரணையில் அந்த சிறுவர்கள் இது போன்ற கொள்ளை சம்பவங்களில் தொடர்ந்து ஈடுபட்டிருப்பதும் இதற்கு உறுதுணையாக மேலும் 4 பேர் செயல்படுவதும் தெரியவந்தது.

தொடர்ந்து போலீசார் வழக்கு பதிவு செய்து 4 சிறுவர்களையும் கைது செய்தனர். சிறுவர்களுக்கு உறுதுணையாக இருக்கும் 4 பேரை வலைவீசி தேடி வருகின்றனர்.

விருத்தாசலம்:

விருத்தாசலத்தில் பழமைவாய்ந்த விருத்தகிரீஸ்வரர் கோவில் உள்ளது. இந்த கோவிலில் ஆண்டு தோறும் மாசிமக பெருவிழா நடைபெறும். இந்த ஆண்டிற்கான விழா கடந்த 2-ந் தேதி கொடியேற்றத்துடன் தொடங்கியது.

12 நாட்கள் நடைபெறும் இந்த விழாவில் கடந்த 7-ந் தேதி விருத்தாசலம் விருத்தகிரீஸ்வரர் கோவிலை கட்டிய விபசித்து முனிவருக்கு விருத்தகிரீஸ்வரர் காட்சி அளிக்கும் ஐதீக திருவிழா நடந்தது.

விழாவின் சிகர நிகழ்ச்சியான தேரோட்டம் இன்று காலை நடந்தது. அதிகாலை 4.30 மணிக்கு விருத்தகிரீஸ்வரர், விருத்தாம் பிகை, ஆலத்து விநாயகர், வள்ளி தெய்வானை உடனுறை முருகன், சண்டிகேஸ்வரர் ஆகியோருக்கு சிறப்பு அபிஷேக ஆராதனை செய்யப்பட்டது. சிறப்பு அலங்காரத்தில் அலங்கரிக்கப்பட்ட தேரில் எழுந்தருளினர்.

முதலில் ஆலத்து விநாயகர் எழுந்தருளிய தேர் புறப்பட்டது. அப்போது சிவச்சாரியார்கள் வேதமந்திரங்கள் ஓத தேரோட்டம் தொடங்கியது. விருத்தாசலம் தொகுதி கலைச்செல்வன் எம்.எல்.ஏ. தேரை வடம் பிடித்து தொடங்கி வைத்தார். ஏராளமான பக்தர்கள் வடம் பிடித்து தேர் இழுத்தனர். தேர் 4 கோட்டை வீதிகள் மற்றும் முக்கிய வீதிகள் வழியாக மீண்டும் கோவிலை வந்தடைந்தது.

இதேபோல முருகன், விருத்தகிரீஸ்வரர், விருத் தாம்பிகை, சண்டிகேஸ்வரர் தேர்களும் அடுத்தடுத்து முக்கிய வீதிகள் வழியாக மீண்டும் கோவிலை வந்தடைந்தன. இன்று நடைபெற்ற தேரோட்டத்தில் தமிழகத்தின் பல்வேறு பகுதிகளில் இருந்து பல்லாயிரக்கணக்கான பக்தர்கள் கலந்து கொண்டு தரிசனம் செய்தனர்.

தேரோட்ட நிகழ்ச்சியையொட்டி விருத்தாசலம் துணை போலீஸ் சூப்பிரண்டு கார்த்திகேயன் தலைமையில் போலீசார் பாதுகாப்பு பணியில் ஈடுபட்டனர். 3 உயர் கோபுரங்கள் அமைக்கப்பட்டு கண்காணிப்பு பணி நடந்தது. விழாவிற்கான ஏற்பாடுகளை இந்து சமய அறநிலையத்துறையினர் செய்து இருந்தனர்.

நாளை (சனிக்கிழமை) மாசிமக திருவிழாவும், நாளை மறுநாள் (ஞாயிற்றுக்கிழமை) தெப்ப உற்சவமும், 13-ந் தேதி (திங்கட்கிழமை) சண்டிகேஸ்வரர் உபயத்துடன் விழா நிறைவடைகிறது.