கடலூர்

கடலூர்:

கடலூர் மாவட்டம் பொது சுகாதாரம் மற்றும் நோய் தடுப்பு மருந்துத்துறை மூலம் கடலூர் மாவட்டத்தில் தீவிர போலியோ சொட்டு மருந்து முகாம் நடைபெறுவதையொட்டி மாவட்ட அளவிலான ஒருங்கிணைப்புக்குழு கூட்டம் கலெக்டர் ராஜேஷ், தலைமையில் நடைபெற்றது.

போலியோ என்னும் இளம்பிள்ளைவாத நோயை தடுப்பதற்காக நாடு தழுவிய அளவில் போலியோ சொட்டு மருந்து போடும் பணிகள் 1995ம் ஆண்டு முதல் தொடங்கப்பட்டு, தற்போது 22-வது முறையாக தமிழ் நாட்டிலுள்ள பிறந்த குழந்தை முதல் 5 வயதிற்குட்பட்ட அனைத்து குழந்தைகளுக்கும் கொடுக்கப்படவுள்ளது.

தமிழகத்தில் போலியோ வைரஸ் தாக்குதல் வரக்கூடாது என்ற நோக்கத்திற்காக இந்த ஆண்டு முதற் கட்டமாக வருகிற 2-ந் தேதி அன்றும் இரண்டாவது கட்டமாக 30-ந் தேதி அன்றும் இரண்டு தவணைகளில் போலியோ சொட்டு மருந்து வழங்கும் முகாம்கள் நடைபெறவுள்ளது.

கடலூர் மாவட்டத்தில் 5 வயதிற்குட்பட்ட 2,48,286 குழந்தைகளுக்கு இந்த போலியோ சொட்டு மருந்து கொடுக்கப்படவுள்ளது.

இவ்வாறு கலெக்டர் கூறினார்.

கூட்டத்தில் துணை இயக்குநர் (சுகாதாரப் பணிகள்) டாக்டர் ஜவஹர்லால், மாவட்ட சமூக நல அலுவலர் மீனா, மாவட்ட தொடக்க கல்வி அலுவலர் மதிவாணன், மாவட்ட கல்வி அலுவலர் விருத்தாச்சலம் கோமதி, மாவட்ட மெட்ரிக்குலேசன் பள்ளி அலுவலர் பிச்சையப்பன், கடலூர் நகராட்சி ஆணையர் விஜயகுமார், வட்டார மருத்துவ அலுவலர்கள், இந்திய மருத்துவர் சங்க செயலாளர் டாக்டர் கண்ணன், தொலைபேசி துறை அலுவலர் சங்கர், என்.எல்.சி. மருத்துவமனை மருத்துவ அலுவலர் டாக்டர் கனி, மகளிர் திட்ட உதவி திட்ட அலுவலர் சத்தியமூர்த்தி, மின்சார வாரிய இளநிலை பொறியாளர் செரி, பேரூராட்சி அலுவலர்கள் மற்றும் தன்னார்வ தொண்டு நிறுவனத்தினர் கலந்து கொண்டனர்.

சிதம்பரம்:

காட்டுமன்னார்கோவில் அருகே உள்ள விளத்தூர் கிராமத்தை சேர்ந்தவர் சாரதாம்பாள் (வயது 60). இவர் மற்றும் மேலநெடும்பூர் கிராமத்தை சேர்ந்த ராதாகிருஷ்ணன் (46), மேலவன்னியூரை சேர்ந்த சிங்காரு(60) ஆகிய 3 பேரும் விளத்தூர் மெயின்ரோட்டில் நடந்து சென்று கொண்டிருந்தனர்.

அப்போது சாலையோரத்தில் உள்ள ஒரு மரத்தில் இருந்து பறந்து வந்த வி‌ஷவண்டுகள் அவர்கள் 3 பேரையும் கடித்தது. இதில் அவர்கள் காயம் அடைந்தனர்.

உடனடியாக அவர்கள் காட்டுமன்னார்கோவில் அரசு மருத்துவ மனையில் அனுமதிக்கப்பட்டனர். அங்கு அவர்களுக்கு சிகிச்சை அளிக்கப்பட்டது.

கடலூர்:

ஜனவரி முதல் ஏப்ரல் வரை 4 மாதங்கள் ஆமைகளின் இனப்பெருக்க காலம். இந்த கால கட்டத்தில் ஆமைகள் கடலோர பகுதிகளில் முட்டையிட்டு குஞ்சு பொரிப்பது வழக்கம்.

இந்த முட்டைகள் மனிதர்கள், விலங்குகள் மற்றும் பறவைகளால் சேதம் அடையாமல் இருக்கவும், ஆமை இனங்கள் அழிவதை தடுக்கவும் கடலூர் வனத்துறை அதிகாரிகள் கடலூர் துறைமுகம் அருகே உள்ள சொத்திக்குப்பம் கடலோர பகுதியில் ஆமை முட்டைகளை பாதுகாப்பதற்காக பொரிப்பகம் ஒன்றை ஏற்படுத்தி உள்ளனர்.

கடலோர பகுதிகளில் ஆமைகள் இட்டு செல்லும் முட்டைகளை சேகரித்து இந்த பொரிப்பகத்துக்கு எடுத்து வந்து அங்குள்ள 35 குழிகளில் முட்டைகளை பாதுகாத்து வைக்கின்றனர். 45 நாட்கள் முதல் 60 நாட்களுக்குள் முட்டையில் இருந்து ஆமைகுஞ்சுகள் வெளிவந்ததும் அவற்றை எடுத்து வனத்துறையினர் கடலில் விட்டு வருகின்றனர்.

அந்த வகையில் கடலூர் மாவட்ட வனத்துறை அதிகாரி சவுந்தரராஜன், வனச்சரகர்கள் அப்துல் அமீது, ராஜேந்திரன், வன காப்பாளர் ஆதவன் ஆகியோர் சுமார் 4 ஆயிரம் ஆமை முட்டைகளை சேகரித்து, சொத்திக்குப்பத்தில் உள்ள பொரிப்பகத்தில் பாதுகாப்பாக வைத்தனர். இதில் 253 முட்டைகளில் இருந்து வெளிவந்த ஆமை குஞ்சுகளை வனத்துறையினர் பிடித்து நேற்று கடலில் விட்டனர்.

இந்த ஆண்டு இதுவரை 1,613 முட்டைகளில் இருந்து வெளிவந்த ஆமை குஞ்சுகள் கடலில் விடப்பட்டுள்ளதாகவும் வனத்துறை அதிகாரி ஒருவர் தெரிவித்தார்.

கடலூர்:

கடலூர் தேவனாம்பட்டினத்தில் சில்வர்பீச் உள்ளது. இங்கு விடுமுறை தினங்களில் ஏராளமான பொதுமக்கள் மற்றும் சுற்றுலா பயணிகள் வந்து செல்வார்கள்.

கடந்த சில மாதங்களுக்கு முன்பு சில்வர் பீச்சில் கடல் உள்வாங்கியது. ஒரு வாரம் கழித்து மீண்டும் பழைய நிலைக்கு வந்தது. இந்த நிலையில் நேற்று மாலை திடீரென கடல் 20 அடி தூரம் உள்வாங்கியது. இதைப்பார்த்த பொதுமக்கள் மற்றும் மீனவர்கள் அதிர்ச்சி அடைந்தனர். கடலில் குளித்து கொண்டிருந்த சுற்றுலா பயணிகள் அலறியடித்து ஓடினர்.

இரவிலும் கடல் உள்வாங்கியே இருந்தது. இன்று காலை வரை அதேநிலை நீடித்தது. கடல் அமைதியாக இருந்தது. எனவே பொதுமக்கள், சுற்றுலா பயணிகள் சில்வர்பீச்சுக்கு வரவில்லை.

அடிக்கடி கடல் உள்வாங்குவது பொதுமக்கள் மத்தியில் பெரும் பீதியை ஏற்படுத்தி உள்ளது. சுனாமி தாக்குதலுக்கு பின்னர்தான் கடலூர் சில்வர் பீச்சில் கடல் உள்வாங்குவதும், கடலில் ராட்சத அலைகள் எழுந்து சீற்றமாக காணப்படுவதும் நடந்து வருகிறது.

இதற்கு சரியான காரணம் இதுவரை தெரியவில்லை. காலமுறை மாற்றத்தால் கடல் உள்வாங்கும் சம்பவம் நடந்திருக்கலாம் என்று அதிகாரிகள் தரப்பில் கூறப்படுகிறது.

இது குறித்து பொதுமக்கள் கூறுகையில், நாங்கள் குடும்பத்துடன் கடற்கரைக்கு வந்தோம். குழந்தைகள் கடற்கரையில் விளையாடி கொண்டிருந்தனர். திடீரென கடல் உள்வாங்கியதை பார்த்ததும் திகைத்துப்போனோம். உடனே அங்கிருந்து அலறியடித்துக் கொண்டு வெளியேறினோம்.

அந்த நேரத்தில் போதிய அளவு போலீசாரும் அங்கு இல்லை. மேலும் இதுபோன்ற கடல் சீற்றம் அடிக்கடி நிகழ்வதால் கடல் துறை சம்பந்தப்பட்ட அதிகாரிகள் இது குறித்து சரியான காரணத்தை பொதுமக்களுக்கு தெரிவிக்க வேண்டும். முன் எச்சரிக்கை நடவடிக்கை எடுத்து சுற்றுலா பயணிகள், மீனவர்களை காக்க வேண்டும் என்றனர்.