கடலூர்

விருத்தாசலம்:

கடலூர் மாவட்டம் விருத்தாசலம் அருகேயுள்ள ரெட்டிக்குப்பத்தை சேர்ந்தவர் தண்டபாணி. ஓய்வு பெற்ற அரசு பஸ் டிரைவர். இவர் தனது குடும்பத்தினருடன் நேற்று விழுப்புரத்தில் உள்ள உறவினர் வீட்டுக்குச் சென்று விட்டார்.

இதை அறிந்த மர்ம மனிதர்கள் நள்ளிரவில் அங்கு வந்தனர். தண்டபாணியின் வீட்டுக்கதவை உடைத்து உள்ளே புகுந்த அவர்கள், அங்கிருந்த பீரோவை உடைத்தனர். அதில் இருந்த 30 பவுன் நகை, ரொக்கம் ரூ.20 ஆயிரம் மற்றும் வெள்ளிப் பொருட்களை வாரிச்சுருட்டிக் கொண்டு வெளியேறினர்.

பின்னர் அந்த பகுதியில் வேறு ஏதாவது வீட்டில் கைவரிசை காட்டலாமா? என்று நோட்டமிட்டனர். அப்போது தண்டபாணி வீட்டின் அருகேயுள்ள பாலமுருகன், என்பவரது வீட்டில் காற்றுக்காக கதவை திறந்து வைத்து தூங்கிக் கொண்டிருந்தனர். உள்ளே நுழைந்த கொள்ளையர்கள் அங்கு தூங்கிக் கொண்டிருந்த பாலமுருகனின் மனைவி ஆசிரியை மதுபாலா கழுத்தில் கிடந்த 5 பவுன் தங்கச்சங்கலியை பறித்தனர். திடுக்கிட்டு விழித்த மதுபாலா திருடன்... திருடன்... என்று சத்தம் போட்டார். அதற்குள் அந்த கும்பல் அங்கிருந்து தப்பிச்சென்று விட்டது.

இந்த துணிகர கொள்ளை குறித்து மங்கலம்பேட்டை போலீசுக்கு தகவல் தெரி விக்கப்பட்டது. போலீசார் விரைந்து வந்து பார்வையிட்டு விசாரித்தனர்.

கடலூரில் இருந்து போலீஸ் மோப்ப நாய் புருனே அழைத்து வரப்பட்டது. அதுகொள்ளை நடந்த வீட்டில் இருந்து சிறிது தூரம் ஓடிச்சென்று படுத்துக் கொண்டது. மேலும் விழுப்புரத்தில் இருந்து வந்த தடயவியல் நிபுணர்களும் கொள்ளை நடந்த வீட்டில் பதிவான ரேகைகளை பதிவு செய்தனர்.

விருத்தாசலம்:

கடலூர் மாவட்டம் விருத்தாசலம் அருகேயுள்ள பூந்தோட்டம் பகுதியைச் சேர்ந்தவர் அரிபுத்திரன். இவர் பெரியார் நகரில் பந்தல் பொருட்கள் விற்பனை செய்யும் கடை நடத்தி வருகிறார். வழக்கம்போல் வியாபாரம் முடிந்ததும் நேற்று இரவு கடையை பூட்டிவிட்டு வீட்டுக்குச் சென்று விட்டார்.

இந்த நிலையில் விருத்தாசலம் போலீசார் இரவு நகரில் ரோந்து பணி மேற்கொண்டனர். அப்போது அரிபுத்திரனின் பந்தல் பொருட்கள் விற்பனை கடையில் தீ கொழுந்துவிட்டு எரிவதைப் பார்த்தனர். உடனடியாக அவர்கள் விருத்தாசலம் தீயணைப்பு நிலையத்துக்கு தகவல் தெரிவித்தனர்.

மறுநிமிடமே 2 தீயணைப்பு வண்டிகளில் தீயணைப்பு வீரர்கள் விரைந்து வந்து தீயை அணைக்கும் பணியில் ஈடுபட்டனர். பந்தல் பொருட்களில் பற்றி எரிந்த தீயை அவர்களால் அணைக்க முடியவில்லை. தீ மளமளவென்று அருகில் உள்ள காய்கறி கடைக்கும் பரவியது.

தீயணைப்பு வீரர்களின் நீண்டநேர போராட்டத்துக்குப் பின்னரே தீயை முற்றிலுமாக அணைக்க முடிந்தது. இருப்பினும் தீ விபத்தில் ரூ.5 லட்சம் மதிப்புள்ள பந்தல் பொருட்கள் மற்றும் காய்கறிகள் நாசமானது.

தீ விபத்துக்கான காரணம் என்ன என்று தெரியவில்லை. இதுகுறித்து விருத்தாசலம் போலீசார் வழக்குபதிவு செய்து விசாரித்து வருகிறார்கள். ஏற்கனவே அரிபுத்திரனின் பந்தல் கடையில் 2 முறை தீப்பிடித்துள்ளது.

தொடர்ந்து கடையில் தீ விபத்து ஏற்படுவதால் நாசவேலை காரணமாக இருக்கலாம் என்று போலீசார் சந்தேகிக்கிறார்கள். எனவே தொடர்ந்து பல்வேறு கோணங்களில் போலீசார் விசாரித்து வருகிறார்கள்.

பெண்ணாடம்:

கடலூர் மாவட்டம் பெண்ணாடம் சோழன் நகரை சேர்ந்தவர் மணிவாசகம். கூலித் தொழிலாளி. இவரது மகள் சோனியா(வயது 20). பெரம்பலூரில் உள்ள தனியார் கல்லூரியில் பி.எஸ்.சி. மூன்றாமாண்டு படித்து வந்தார்.

செமஸ்டர் தேர்வில் சோனியா 2 பாடங்களில் தோல்வி அடைந்தார். இதனால் மனவருத்தத்தில் இருந்தார். கடந்த 28-ந் தேதி வீட்டில் யாரும் இல்லாத நேரத்தில் அவர் வி‌ஷம் குடித்தார்.

மயங்கி விழுந்த அவரை அக்கம் பக்கத்தினர் மீட்டு 108 ஆம்புலன்ஸ் மூலம் விருத்தாசலம் அரசு ஆஸ்பத்திரிக்கு அனுப்பி வைத்தனர். அங்கு முதலுதவி சிகிச்சை அளிக்கப்பட்டது.

பின்னர் மேல்சிகிச்சைக்காக சென்னை அரசு ஆஸ்பத்திரியில் சேர்த்தனர். அங்கு சோனியாவுக்கு தீவிர சிகிச்சை அளிக்கப்பட்டது. இருப்பினும் சிகிச்சை பலனின்றி நேற்று இரவு 7 மணியளவில் சோனியா பரிதாபமாக இறந்தார்.

இதுகுறித்து பெண்ணாடம் போலீசில் புகார் செய்யப்பட்டது. சப்-இன்ஸ்பெக்டர் புருசோத்தமன் விசாரணை நடத்தினார்.

சிதம்பரம்:

அகில இந்திய காங்கிரஸ் கட்சி தலைவர் சோனியா காந்தியை விமர்சித்து பேசிய பாரதீய ஜனதா தேசிய செயலாளர் எச்.ராஜாவை கண்டித்து காங்கிரஸ் சார்பில் பல்வேறு பகுதிகளில் போராட்டம் நடந்து வருகிறது.

கடலூர் மாவட்டம் சிதம்பரத்தில் எச்.ராஜாவை எதிர்த்து இன்று போராட்டம் நடைபெற்றது. சிதம்பரம் காந்தி சிலை அருகே காங்கிரஸ் நிர்வாகிகள் மற்றும் தொண்டர்கள் திரண்டனர்.

நகர தலைவர் ராஜேந்திரன் தலைமையில் அவர்கள் எச்.ராஜாவுக்கு எதிராக கோ‌ஷமிட்டனர். பின்னர் திடீரென்று எச்.ராஜாவின் உருவபொம்மையை எரித்து ஆர்ப்பாட்டம் செய்தனர்.

இதுதொடர்பாக சிதம்பரம் நகர போலீசார் விசாரணை நடத்தி வருகின்றனர். இந்த போராட்டத்தால் அந்த பகுதியில் பரபரப்பு ஏற்பட்டது.

புவனகிரி:

கடலூர் மாவட்டம் புவனகிரி தாமரைக்குளம் பகுதியை சேர்ந்தவர் பழனிவேல்(வயது 55). தொழிலாளி. இவரது மனைவி சகுந்தலா(50). இவர்களுக்கு ஒரு மகனும், ஒரு மகளும் உள்ளனர்.

இவர்களது மகன் அரேபியாவில் வேலை பார்த்து வருகிறார். மகள் திருவள்ளூரில் உள்ள கல்லூரியில் தங்கி படித்து வருகிறார்.

பழனிவேலுக்கும், சகுந்தலாவுக்குமிடையே அடிக்கடி தகராறு ஏற்பட்டு வந்தது. நேற்று இரவு 10.40 மணியளவில் அவர்களுக்குள் மீண்டும் குடும்ப பிரச்சினை காரணமாக தகராறு ஏற்பட்டது.

இதில் பழனிவேல் ஆத்திரமடைந்து சகுந்தலாவை கையால் ஓங்கி அடித்தார். இதில் சகுந்தலா மயங்கி விழுந்தார். உடனடியாக அவரை சிதம்பரம் ராஜாமுத்தையா மருத்துக்கல்லூரி மருத்துவ மனைக்கு கொண்டு சென்றனர். ஆனால் வழியிலேயே சகுந்தலா பரிதாபமாக இறந்தார்.

இதுகுறித்து புவனகிரி போலீசில் புகார் செய்யப்பட்டது. இன்ஸ்பெக்டர் இளவரசன் மற்றும் போலீசார் சம்பவ இடத்துக்கு விரைந்து வந்து விசாரணை நடத்தினர்.

இந்தகொலை தொடர்பாக பழனிவேலை போலீசார் வலைவீசி தேடி வருகின்றனர். குடும்ப தகராறில் மனைவியை கணவன் அடித்து கொன்ற சம்பவம் அந்த பகுதியில் பெரும் பரபரப்பை ஏற்படுத்தியுள்ளது.

கடலூர்:

விழுப்புரம் மாவட்டம் திருநாவலூரைச் சேர்ந்தவர் கோவிந்தராஜ். இவரது மகள் மகாலட்சுமி (வயது 21). இவர் கடலூர் தேவனாம்பட்டினத்தில் உள்ள பெரியார் அரசு கலைக்கல் லூரியில் பி.காம். 3-ம் ஆண்டு படித்து வருகிறார்.

தினமும் கல்லூரிக்கு பஸ்சில் வந்து செல்வார். வழக்கம்போல் இன்று காலை மகாலட்சுமி கல்லூரிக்கு வந்தார். 11.30 மணி அளவில் கல்லூரி வகுப்பறையில் இருந்து வெளியே சென்ற அவர் கல்லூரி வளாகத்தில் மயங்கி விழுந்தார்.

இதைப்பார்த்த மற்ற மாணவிகள் அதிர்ச்சி அடைந்தனர். கல்லூரி பேராசிரியர்களிடம் தகவல் தெரிவித்தனர். பின்னர் மாணவி மகாலட்சுமியை கடலூர் அரசு ஆஸ்பத்திரிக்கு கொண்டு சென்றனர்.

அங்கு அவரை டாக்டர்கள் பரிசோதித்து பார்த்தனர். அப்போது மாணவி மகாலட்சுமி வி‌ஷம் குடித்து இருப்பது தெரியவந்தது. இதைத்தொடர்ந்து அவருக்கு தீவிர சிகிச்சை அளிக்கப்பட்டு வருகிறது.

இது குறித்து தேவனாம்பட்டினம் போலீசில் புகார் செய்யயப்பட்டது. போலீசார் கல்லூரிக்கு விரைந்து வந்து விசாரணை நடத்தினர்.

மாணவி மகாலட்சுமி கல்லூரி வளாகத்தில் வி‌ஷம் குடித்து இருக்கலாம் என்று போலீசார் கருதுகின்றனர். மாணவி எதற்காக வி‌ஷம் குடித்தார்? என்று தெரியவில்லை. இது தொடர்பாக போலீசார் தொடர்ந்து விசாரணை நடத்தி வருகின்றனர்.

கல்லூரியில் மாணவி வி‌ஷம் குடித்து மயங்கி விழுந்த சம்பவம் கடலூரில் பெரும் பரபரப்பை ஏற் படுத்தி உள்ளது.