விம்பிள்டன் இறுதிப்போட்டிக்கு ரோஜர் பெடரர், மரின் சிலிச் தகுதி

லண்டன்:

விம்பிள்டன் டென்னிஸ் ஆண்கள் அரையிறுதிப்போட்டியில் ரோஜர் பெடரர் மற்றும் மரின் சிலிச் வெற்றி பெற்று, இறுதிப்போட்டிக்கு தகுதி பெற்றுள்ளனர்.

இங்கிலாந்தில் நடைபெற்று வரும் விம்பிள்டன் கிராண்ட்ஸ்லாம் டென்னிஸ் தொடரின் ஆண்கள் ஒற்றையர் பிரிவின் அரையிறுதி ஆட்டங்கள் நேற்று நடைபெற்றன. முதல் அரையிறுதி ஆட்டத்தில் குரோஷியாவின் மரின் சிலிச் மற்றும் அமெரிக்காவின் சாம் குரேரி பலப்பரீட்ச்சை நடத்தினர்.

முதல் செட்டை சிலிச் இழந்தாலும் அடுத்தடுத்த செட் ஆட்டங்களில் சிறப்பான ஆட்டத்தை வெளிக்காட்டினார். சிலிச்-க்கு சவால் அளித்தாலும் குரேரியால் அடுத்த செட்களை வெல்ல முடியவில்லை. 4 செட் வரை சென்ற இந்த ஆட்டத்தின் இறுதியில் 6-7 6-4 7-6 7-5 என்ற செட் கணக்கில் சிலிச் வெற்றி பெற்று முதன் முறையாக விம்பிள்டன் இறுதிப்போட்டிக்கு தகுதி பெற்றுள்ளார்.



இரண்டாவது அரையிறுதி ஆட்டத்தில், சுவிச்சர்லாந்தின் ரோஜர் பெடரர் மற்றும் செக் குடியரசின் தாமஸ் பெர்டைச் மோதினர். முன்னணி வீரரான பெடரருக்கு சரியான சவால் அளிக்கும் விதமாக பெர்டைச் விளையாடினார். இருப்பினும், அவரால் ஒரு செட்டை கூட வெல்ல முடியவில்லை. முடிவில் 7-6, 7-6, 6-4 என்ற கணக்கில் பெடரர் வென்று 11-வது முறையாக விம்பிள்டன் இறுதிப்போட்டிக்கு முன்னேறினார்.

நாளை மறுநாள் (16-7-17) நடக்க உள்ள ஒற்றையர் இறுதிப்போட்டியில் பெடரர், சிலிச் பலப்பரீட்சை நடத்த உள்ளனர்.