விம்பிள்டன் டென்னிஸ்: ஹாலேப், வீனஸ் வில்லியம்ஸ் 2-வது சுற்றுக்கு முன்னேற்றம்

கிராண்ட்ஸ்லாம் டென்னிஸ் தொடர்களில் ஒன்றான விம்பிள்டன் இன்று தொடங்கியது. பெண்களுக்கான ஒற்றையர் பிரிவில் 2-ம் நிலை வீராங்கனையான ரொமானியாவின் சிமோனா ஹாலேப் நியூசிலாந்தின் மரினா எராகோவிக்கை எதிர்கொண்டார். இதில் ஹாலேப் 6-4, 6-1 என நேர்செட் கணக்கில் எராகோவிக்கை வீழ்த்தி 2-வது சுற்றுக்கு முன்னேறியுள்ளார்.

10-ம் நிலை வீராங்கனை வீனஸ் வில்லியம்ஸ் பெல்ஜியத்தை சேர்ந்த எலிஸ் மெர்டென்ஸை எதிர்கொண்டார். முன்னணி வீராங்கனையான வீனஸிற்கு எலிஸ் மெர்டென்ஸ் கடும் நெருக்கடி கொடுத்தார். இதனால் முதல் சுற்று ‘டை பிரேக்கர்’ வரை சென்றது. இறுதியில் 7(9)- 6(7) என வீனஸ் முதல் செட்டை கைப்பற்றினார். 2-வது செட்டை 6-4 என எளிதில் கைப்பற்றி 2-வது சுற்றுக்கு முன்னேறினார்.



அமெரிக்க வீராங்கனை மேடிசன் கெய்ஸ், பெலாரஸ் வீராங்கனை அரினா சபாலென்கா, சீனாவின் வாங் கியாங், இத்தாலி வீராங்கனை கமிலா கியோர்கி ஆகியோரும் 2-வது சுற்றுக்கு முன்னேறியுள்ளனர்.

ஆண்களுக்கான ஒற்றையர் பிரிவில் 1-ம் நிலை வீரரான ஆண்டி முர்ரே, 9-ம் நிலை வீரரான நிஷிகோரி, 12-ம் நிலை வீரர் டிசோங்கா ஆகியோர் 2-வது சுற்றுக்கு முன்னேறியுள்ளனர்.