ஹெலிகாப்டர் டாக்சி சர்வீஸ்- தலிபான் அட்டூழியம் என வைரலாகும் தகவல்

ஆப்கானிஸ்தானை விட்டு வெளியேறும் போது அமெரிக்க ராணுவம் பல கோடி டாலர்கள் மதிப்புள்ள ஆயுதங்கள் மற்றும் ராணுவ வாகனங்களை அங்கேயே விட்டுசென்றது. இவற்றில் ஹெலிகாப்டர்கள் மற்றும் ஆயுதம் தாங்கிய வாகனங்களும் அடங்கும். 

ஆப்கானில் உள்ள அமெரிக்க ஆயுதங்களின் விவரங்கள் வெளியான நிலையில், தற்போது தலிபான்கள் காபூல் விமான நிலையத்தை கைப்பற்றுவது, அமெரிக்க ஹெலிகாப்டர்களை இயக்குவது போன்ற காட்சிகள் அடங்கிய வீடியோ சமூக வலைதளங்களில் வைரலாகி வருகிறது.

வீடியோவில் ஹெலிகாப்டர் தடுமாற்றத்துடன் சாலையில் ஊர்ந்து செல்லும் பரபரப்பான காட்சிகள் இடம்பெற்று இருக்கின்றன. "ஸ்பெஷல் பிளாக் ஹாக் டாக்சி சர்வீஸ் ஆப்கானிஸ்தான் டாக்சி ஆப்ரேட்டர்" எனும் தலைப்புடன் வைரலாகி வருகிறது. 

வைரல் வீடியோவை ஆய்வு செய்ததில், இந்த வீடியோ லிபியாவில் எடுக்கப்பட்டது என தெரியவந்தது. உண்மையில் இந்த வீடியோ கடந்த ஆண்டு எடுக்கப்பட்டது ஆகும். இணைய தேடல்களில் வியட்நாம் செய்தி வலைதளத்திலும் இடம்பெற்று இருக்கிறது. அந்த வகையில் வைரல் வீடியோ ஆப்கானில் எடுக்கப்படவில்லை என உறுதியாகிவிட்டது.